Du solst den Feyertag heiligen/ vnd das Euangelion annemen vnd bewaren.

ALs nun viel volcks bey einander war/ vnnd auß den Stetten zu jm eyleten/ sprach er durch ein geleychnusse: Es gieng ein Seeman auß zu seen seinen Samen/ Vnd in dem er seet/ fiel etlichs an den weg/ vnd ward vertretten/ vnd die vögel vnter dem himel frassens auff. Vnnd etlichs fiel auff den Felp/ vnnd da es auffgieng/ verdorret es/ darumb/ das es nit safft hette. Vnd etlichs fiel mitten vnter die Dörnen/ vnd die Dörnen giengen mit auff/ vnd ersticktens. Vnnd etlichs fiel auff ein gut Land/ vnd es gieng auff/ vnd trug hundertfeltige frucht. Da er das saget/ rüffet er: Wer ohren hat zu hören/ der höre.

Es fragten ihn aber seine Jünger/ vnd sprachen: Was dise gleychmuß were? Er aber sprach: Euch ists gegeben zu wissen das geheymnuß des Reychs Gottes/ Den andern aber in gleychnussen/ Das sie es nit sehen/ ob sie es schon sehen/ vnd nicht verstehen/ ob sie es schon hören.

Das ist aber die gleychnuß: Der same ist dz wort Gottes. Die aber an dem wege sind, das sind die es hören/ Darnach komppt der Teuffel/ vnnd nimmbt das wort von ihrem hertzen/ auff das sie nicht glauben vnnd selig werden. Die aber auff dem Felß/ sind die/ wenn sie es hören/ nemen sie das wort mit freuden an/ vnnd die haben nicht nicht wurtzel/ Ein zeytlang glauben sie/ vnd zu der zeit der anfechtung fallen sie ab. Das aber vnter die Dörnen fiel/ sind die/ so es hören/ vnd gehen hin vnter den sorgen/ reychthumb/ vnnd wollust dises lebens/ vnd ersticken/ vnd bringen keine frücht. Das aber auff dem guten land/ sind/ die das wort hören vnd behalten/ in einem feynen guten hertzen/ vnnd bringen frucht inn gedult.

Sag mir die summa dises gleychniß?

DEr Herr Jesus lehret/ das das lebendig wort Gottes der vnuergengkliche Same ist/ vnd das rechte liecht welches Gott von anbegin der welt ausseen/ predigen/ vnd offentlich auff den leuchter hat auffstecken lassen/ darmit die welt/ so in finsterniß vnd schatten des todes wandelt/ durch die Krafft des mündtlichen wortes an den Son Gottes glaubete/ newgeborn vnd selig würde. Seht wenig aber haben diß himlische liecht angenommen/ Johan. 1. Denn die menschen haben die lügen vnd finsterniß mehr geliebet/ vnd mit grösserm ernst die abgötterey vertheidiget/ denn dise Götliche warheit/ Johan.3.

Vnnd wenn Gott die welt mit gnaden heimgesucht, vnd sie zu diesem Abentmal hat laden lassen/ haben die leut jr hertz selbs verhertet vnd verstocket/ wie die Juden zu Meriba/ Psal. 95. vnd haben sich nit wöllen vnter die flügel des Sons Gottes samlen lassen/ Mat. 23. vnd haben dem heiligen geist widerstrebet/ Act. 7. vnd die gesandten Gottes verhönet/ verjaget/ vnnd vmbgebracht/ Luce 14. Vnd die diesen schatz vnd edles perlein haben ergriffen/ vnd mit glaubigem hertzen gefasset/ die sind vnachtsam gewesen/ vnnd dieses himelbrots vberdrüssig worden/ oder haben vmb forcht oder gunst willen diser welt/ die erkante warheit wider faren/ vnd den Samen entweder vom teuffel auffressen/ verdorren/ oder in dörnen ersticken lassen.

Was sollen wir hierauß lernen?

Das man vnserm Herrn Gott nit die schuld geben solle/ sondern der argen vnd bösen welt/ wenn so wenig leute selig werden. Denn Gott hat dise selige verheissung von des weibes samen Ade/ vnnd allen seinen erben gegeben/ Gene. 3. Vnd wenn der teuffel diß ware liecht hat zudecken oder verdunckeln wöllen/ hat es Gott wider anzünden/ vnnd allezeit an offentlichen örten/ neben grossen wunderzeichen offenbaren vnd vernewen lassen. Denn durch Seth/ Enoch vnd Noah hat Gott seinen namen lassen predigen/ vnnd Japhet hat von dem waren Messia vnnd ewigen Jehoua vnter den Heiden geprediget/ daruon dern name Joue beyn den Heyden blieben ist. Abraham hat dises liecht in MEsopotanien vnd im lande Canaan auffgestecket/ vnd Joseph in Egypten. Sonderlich aber hat Gott seine hoheschule vnd hauptkirche/ sampt trefflichen leuten vnd herrlichen wunderthaten vnter seinem volck Israel erhalten/ welche dises güldenen leuchters vnd liechtes haben warten/ schüren vnd putzen müssen/ vnd diß schaubrot teglich verrichten/ Leuit. 25.

Darnach hat Gott auß sonderem rath die zehen geschlecht inn die Heydenschafft gestrewet/ vnnd seine liebe seele/ die Israeliten/ in das Babilonische/ Medische/ vnd Persische reich gefengklich füren/ vnnd drinnen wonen lassen/ damit der name des ewigen Messie durch die gefangenen/ vnnd durch die mandat der größten Keiser in aller welt bekandt würde/ wie auch Jonah das gantze keyserthumb Niniue zu der waren erkentniß Gottes beruffen hat.

Vnd da das land Juda von Antiocho/ vnd volgend von den ehrgeytzigen pfaffen vnd Herode geengstiget/ vnd hart bedrenget ward/ sind vil Juden in frembde lande kommen/ die vil Judegenossen vnd Gotsförchtige leut bekeret haben/ Act. 2. Entlich hat Got Johannem den Tauffer/ vnnd seinen eingebornen Sone ins fleisch gesandt/ von welchem die weisen auß Morgenlande geprediget/ vnd er solber vom himel geboten/ das man ihn hören solle/ als den lieben Sone Gottes/ vnd ewigen Bischoff der gantzen welt.

Dieser hat die wort des lebens offentlich geprediget/ vnd seinen 82. jüngern befolhen/ das Euangelion in alle welt zuüren/ wie denn S. Paulus biß in die Windische marckt mit dem Euangelio von Jesu Christo kommen ist. Diese haben die himlische lehr mit vnaussprechlichen wunderwercken bestettiget/ vnd biß an der welt ende gebracht/ das auch zu Keiser Valentis zeiten die Bibel in deutsche sprach kommen ist.

Als aber der Antichrist dises liecht schier gar verdustert/ hat Gott zuletzt den Druck/ sampt allen Künsten vnd sprachen widergeben/ vnnd durch den rechten Enoch und eliam/ Apoca. 12. das heilige Euangelion offentlich inn den grösten versamlungen/ vnd in allen sprachen vnd reden/ Psal. 19. predigen lassen/ zum zeugnuß der gantzen welt/ damit sich niemandt zu entschuldigen hette/ als were das Euangeliion verborgen gewest/ vnd das die heilige dreifaltigkeit entschuldiget vnd gerechtfertiget müste werden/ wenn man sie richten/ vnd ir die schuld der verdamniß geben wolte/ Psal. 51.

Denn weil Gott seinen Son für die gantze welt in den tod gibet/ Joan. 3. vnd sendet das euangelion von dem tode vnd aufferstehung Christi zu allen Creaturen/ Mar. 16. vnd hat diß liecht in der Propheten vnd Apostel schrifften/ in der finstern welt so krefftig biß auff dise letzte zeit erhalten/ So beweiset er/ das er alle menschen wil selig haben/ vnd das die leute mutwillig in jrer blindheyt verharren/ vnnd durch sich selbst verderben/ Ose. 13.

Wie das denn so wenig bey dem Euangelio vnd erkanter warheit bestendig bleiben/ vnd verharren?

Die heilige schrifft gibet dise vrsachen: Etlichen ist es nit ernst mit dem Euangelio/ vnd nemen es nit warhafftig an/ Denn da sie gleych getauffet/ vnd mit den erstlingen des geistes versiegelt werden/ vnd erkennen das wort der gnaden/ so sind sie doch sicher vnnd forchtloß/ vnd wöllen nicht folgen dem antreiben des geystes/ welcher sich inn den getaufften reget/ sonder betrüben vnd vertreiben ihn/dieweil sie seinem anhalten widerstreben/ vnnd in sünde vnd schand fallen/ vnd wissentlich drinnen verharren.

Etliche dencken vnd trachten nit darauff/ wie sie dieses zartes perlein/ Mat. 13. welches sie in jrrdischen gefessen tragen/ mit höchstem fleiß in gutem gewissen und vorsatze/ heiliglich in ihr hertz einschliessen vnd verwaren/ wachen/ beten/ seufftzen nicht/ werden der Predig sat vnd vberdrüssig/ wie die Israeliten des himelbrots/ halten nit an mit lesen vnd studieren/ vnd beteuben vnd zemen jren leib nit/ wie S. Paulus 1. Cor. 9. vnd wachsen vnnd nemen nit zu im glauben vnnd liebe/ so kompt denn der teuffel mit siben ergern geystern/ vnd reisset inen das wort auß dem hertzen mit wurtzel mit al/ vnd wonet wider im gereinigten hause/ Luce 11.

Die andern aber/ ob sie wol diese himlische stimme mit freuden annemen/ vnd fangen an zu glauben/ so wöllen sie nichts bey dem wort des creutzes wagen oder zusetzen/ Darumb so bald ein trübes wetter auffgehet/ oder der teuffel in der kirchen ergerniß vnd anstösse anrichtet/ Mar. 4. so prallen sie in der verfolgung zurucke/ vnnd fallen vom creutze/ Vnd weil sie mit dem Herren Christo nit gelten vnd leiden wöllen/ so können sie mit jm auch nit erben noch regieren/ Rom. 8.

Die letzten wöllen sich an Christo vnd seinem seligmachenden wort nit genügen lassen/ Sonder wöllen auch an der welt reichthumb/ ehre vnd wollust dises lebens/ mit jrem hertzen hangen/ Darumb ersticket der gute samen sampt dem glauben/ vnter jren dörnern/ vnd behencken in des teuffels stricken/ 1. Tim. 6. vnd in dem tieffen schlamm jrer schetze/ Abac. 3. das sie nit können selig werden.

Wie sol man denn diß wort hören vnd bewaren?

Wenn vns Gott freuntlich grüsset/ vnd beutet vns seiner gnaden hande an/ vnnd geust in vnsere hertzen die erstling des geystes/ durch die tauff vnd predig des heiligen Euangelii/ Gal. 3. Vnd er zeucht vns zu sich mit seinen genaden/ vnd fehet an vnsere hertzen zu öffnen vnd reinigen/ wie der purpurkremerin Actor. 16. So sollen wir angreiffen/ Phil. 3. vnd von gantzem hertzen/ vnd allen vnsern krefften dem Euangelio vnd antreiben des geistes williglich gehorchen vnd volgen/ vnd von stund an in der krafft Gottes anheben zu seufftzen vnd beten/ Gott wölle durch Christum disen seinen Samen in vnseren hertzen bekleiben vnd gedeyen lassen/ vnd denselben mit seinem geist erwermen/ vnd in vns versiegeln/ Esa. 8. damit er fasele vnd wachse/ vnd viel frucht bringe.

Darnach sollen wir mit zittern vnd forcht in vnserm beruff wandeln/ vnd teglich fort faren/ vnnd mit höchstem ernst vnd fleiß Gottes wort hören vnd lesen/ vnd vns zum creutz vnd gedult teglich schicken/ vnd Gott für seine wolthat dancken vnd dasselbige bey andern leuten rhümen/ Psal. 106.

Solchen vnsern warhafftigen ernst vnd teglichs seufftzen/ wil Gott helffen fördern/ vnd vns wie die jugent leyten vnd gengeln/ Psalm,. 48. vnd einen guten vnd gewissen geist geben/ Luce 6. vnd sein werck das er in vns auß lauter gnaden angefangen/ selber stercken vnd bestettigen/ Psalm. 68. vnd vns in seiner warheit heiligen vnd erhalten/ vmb des gebete seines lieben Sons/ Johan. 17. Denn Christus saget deutlich in disem Euangelio (Euch) das ist/ solchen die zum wort eilen/ vnd sich darzu dringen/ vnd die dürstet nach der gerechtigkeit/ vnnd die Christum suchen/ ist gegeben zuwissen/ das geheimniß des reychs Gottes/ Luce 7. Denn wer da hat/ dem wirt gegeben/ wer aber nicht hat/ von dem wirt genommen auch das er vermeinet zu haben.