Ich glaub an Jesum Christum/ Aufferstanden von den todten.

Am Ostertage.

VNd da der Sabbath vergangen war/ kaufften Maria Magdalena/ vnd Maria Jacobi vnd Salome specery/ auff das sie kemen/ vnd salbeten ihn. Vnd sie kamen zum grabe an einem Sabbather sehr frü/ da die Sonne aufging/ Vnnd sie sprachen vntereinander/ Wer waltzet vns den stein von des grabes thür? Vnd sie sahen dahin/ vnnd wurden gewar/ das der stein abgeweltzet war/ denn er war sehr groß. Vnnd sie gingen hinein in das grab/ vnnd sahen einen Jüngling zur rechten hand sitzen/ der hatte ein lang weyß kleyd an/ vnd sie entsatzten sich.
Er aber sprach zu jnen: Entsetzet euch nicht/ Jr suchet Jesum von Nazareth den gecreutzigten/ er ist aufferstanden/ vnd ist nicht hie/ Sihe da die stedte/ da sie jn hinlegten. Gehet aber hin/ vnd sagets seinen Jüngern/ vnnd Petro/ das er für euch hingehen wirdt in Galileam/ da werdet jr jhn sehen/ wie er euch gesagt hat.

DA der Herr biß an dritten tage im grabe lag/ ist er vom tode erstanden/ vnnd ein Herr worden in Himel vnd erden/ vnd zum zeugnuß ist er seinen Jüngern fünff mal an disem tage erschienen/ vnnd hat durch Mariam vnnd die lieben Engeln/ seinen sieg vnd vberwindung/ seinen brüdern verkündigen lassen/ Psalm 22.

Der schlangen dem leydigen Teufel hat er den kopff zutretten/ Gene. 3. vnnd hat dem Sathan seine wehre vnnd waffen genommen/ wie Dauid dem Goliath/ vnnd hat die pforten der hellen zubrochen/ wie Samson die thor zu Gaza/ vnd den raub außgetheylet/ vnd die gefangenen erlöset/ Esaie 49. wie Abraham Genesis am 14. vnd hat die gefengnuß gefangen/ Psal. 68. wie Cirus Babylon/ vnnd hat die welt vberwunden/ Johan. 16. vnd alle Tyrannen in seine ketten geschlagen/ wie die wilden thier/ vnnd hat die sünde in seinem blute erseufft/ vnd den fluch vom gesetze genommen/ Galat. 3 vnnd die handtschrifft/ so wider vns stunde/ an das Creutz gehefftet/ Coloss. 2. vnd Gottes zorn gestillet/ vnd den todt verschlungen/ Esaie 25. Osee am 13. vnd die hellischen pforten zubrochen/ vnnd hat von seinen feinden triumphieret/ auff seinem triumphwagen/ Ezech. am 1. vnd sie schaw getragen/ Colossen. 2. als der rechte Ritter auß Palestin/ welcher die schöne jungfrawe/ seine liebe Christenheyt vom Drachen errettet/ vnd jr an jren gürtel gebunden/ Wie man solches den kindern in S. georgen spiel/ hatwollen fürmalen.

Seinen sieg hat er vns geschencket/ 1. Corinth. 15. vnnd wil vnser ewiger schutz vnd schirm sein/ das vns alle Teufel vnnd Tyrannen/ one seinen willen/ nicht ein härlein krümmen sollen. Vnd hat vns eine ewige vnd feste gerechtigkeyt zu einem beudpfenning/ auß disem wunderlichen Krieg mitbracht/ Psal. 22. Roma. 4. welche wir der sünden/ gesetze/ vnserm nagenden wurm/ vnnd Gottes grimmigen zorn können fürhalten/ Vnd hat vns verdienet aufferstehung des fleisches/ vnd das ewige leben/ damit wir vns für dem tode/ grabe vnnd hellen nimmer mehr förchten dörffen.

Du solst auffs aller gewisseste glauben/ das Christus dir zu gut/ den Sathan gerichtet/ die welt vberwunden/ die sünde bezalet/ den fluch vom gesetz wegkgenommen/ dich mit Gott versönet/ vnnd den todt gefressen/ dir dein grab geheyliget/ vnd die helle zerstöret hat/ vnd das er dein ewiger schutzherr/ gerechtigkeyt/ aufferstehung vnd leben sein wil/ der dich in seiner hand füre vnd schütze/ vnd deine feinde in seiner macht hat.

Darumb solst du getrost sein/ Johan. 16. vnd dich nicht entsetzen/ wie die Engelein predigen/ sondern von hertzen fro sein/ vnd jn preisen/ denn er wil dein ewiger trost sein/ vnd deine feinde vnter deine füsse legen/ wie im Josua am 10. fürgebildet ist/ vnd wil dich von der hand deiner schinder erretten/ damit jederman erfare/ das er der mechtige Herr in Israel/ vnser Heylandt vnnd Erlöser sey/ Esaie am 49.