Eberlin von Günzburg, Johann - Vom bychten

Eberlin von Günzburg, Johann - Vom bychten

Christus yß de volkomen vorgeuer der sunden wue he dorch den propheten EZEC secht 18 Dat he der sunden nicht meer wil gedencken. In deme 24 Psalmen secht he O HERE du werdest myner sunde vmme dynes namen wyllen genedich syn.

Der PROPHE. Esaias 43. vnde 48. sprikt Vmme mynen wyllen effte auer van wegen myner werde edder vmme mynes namens wyllen / sonder vmme dynes namens wyllen.

Am 31. PSALMEN. Ick werde deme heren myne vngerechticheit bychten edder bekenen/ vnde du hefst my vorgeuen de vngerechticheyt myner sunde.

In dem anderen boeke der KONNIGE 12. Capit Alßo bolde de könig Dauid bekennet Ick hebbe ghesundiget thor stundt sprack de prophete Natan De here hefft ock dyne sunde van dy genomen.

JHERE. an deme 18. Cap. Wen gy dhuen dath ouel boeten/ so wyl yk ok dat ouel wenden/ dath ick my voergenomen hebbe tho duen.

In der ersten Epistel sunte JOHAN. am ersten Cappitel. werden wy unse sunde bychten/ so ys de here getrwe vnde gerecht. vnde wert vnß vnße sunde vorgeuen/ vnde vns van aller vnser vngerechticheyt reynigen.

In dem 18. PSALME. O here make my reine van mynen heymliken sunden.

CRISOSTO.In der vthlygynge des seßtigesten Psalmen Dath de sunde affghewaschen werde/ mit weynen/ mit almyßen/ vnde mit betrachtynge der sunde/ gedenckt he dusser bychte nichtes mit allen du schalt auer dyne sunde seggen/ darmede he se vth delge Schemestu dy auer dyne sunde yemandes tho seggen/ so segghe se dagelikes in dyner zelle Ik segge nicht dat du se schalt bychten/ dynem gemededen knechte vp dath he dy de nicht vorworpe Segge ße gode dath he ße heyl.

Der gelikke secht he ok in d eyn vnde veertigsten HOMELIE. edder predekye van der bothe Do he dath de bichte der sunden nomet Wanner man de sunde in deme ghemöde erkennet vnde in deme herten bychtet/ vnde lernet/ dath sunte PETER de sunde sy van wegen der tranen vorgeuen worden Darumme du sundige mynsche/ bychte gode dyne sunde Bychte vor dem richter dyne sunde/ vnd bychte se nicht mit d' thunge Jo doch opet weinichst mit der gedechtiße/ Duth secht he in de xiij Ca. sunte PETERS Epistolon to den Hebreern JACOB am latsten, eyne bekenne deme andern sine sunde Dath wil sunte Jacob dar mede Wenner ein mynsche gode vorthornet hefft/ schuldich yß sik suluest thegen ome vorclagen vnde syne sunde bekennen.

DAVIT am drudden Psalmen secht Ik wyl thegen my myne sunde bekennen gode/ vnde he hefft my vorgeuen den vndoget myner sunde. Ein yewelck soll sik thegen sindem negesten othmödigen/ vnd tho vorn/ den he beledyget hefft sine sunde bekennen/ vnde sik nicht mit freuel entschuldigen. Vorgeue einer dem anderen/ wue dath Vader vnse leret Vorgiff vnß alßo wy vorgheuen Christus secht MATHEI am vifften Sik toh ersten mit deme negesten tho vorßönen.

ITEM JOHAN. am latsten Do christus denn Jungern in bleeß vnde sprack Nemeth henn den hylligen geyst, welckern gy de sunde vorgheuen/ den schullen ße vorgheven sin rc. Dusse spröke secht nicht varm der heymlike bichte Ja ock nichtes van der openbarn bychte.

Volgt daruth

Dath de bychte nicht tho fordern vnde vpghesettet sy Leß des werdigen hernn Doctoris Martini Luthers böcklyn So he van der bychte hefft lathen vth ghaen Werestu wue du recht bychten schalt lernen Id sinth tweyerleygge wiße de sunde bekanth tho maken Eine dorch thugen openbaer vor der samelinghe ouerwüden De christus lereth MATHEI am achteinden Dusse yß noeth vnde noch geystliken ghewolde. De ander iß williklikenn fry vnde vnebtwunghen vnde yß de beßte Vnde heylsamste von mynschen ghesetthen vnghefangen De Bawst hefft gaer neyne macht de heymliken bychte tho setten vnde ghebeden.

Woe sunte PETER. 2 PEtri 2 ome vnde den synen gesecht hefft.

Beslutynghe / Id kan de bychte nicht ein gebot christi syn / de wyle in der Bychte chrißtus Ammacht vnde egenthumb vorkeret vnde versmelert werdt Dan christus well dath christlike herte/ in ome suluest befryen/ vnde de gewethen ruwich maken.

Quelle: Zeitschrift für Kirchengeschichte, Band XXVIII

Cookies helfen bei der Bereitstellung von Inhalten. Diese Website verwendet Cookies. Mit der Nutzung der Website erklären Sie sich damit einverstanden, dass Cookies auf Ihrem Computer gespeichert werden. Außerdem bestätigen Sie, dass Sie unsere Datenschutzerklärung gelesen und verstanden haben. Wenn Sie nicht einverstanden sind, verlassen Sie die Website.Weitere Information
autoren/e/eberlin/vom_bychten.txt · Zuletzt geändert: von 127.0.0.1
Public Domain Falls nicht anders bezeichnet, ist der Inhalt dieses Wikis unter der folgenden Lizenz veröffentlicht: Public Domain