Mit xiij. vnchristlichen Artickeln die da zu Augspurg/ vnder yhn/ für vnchristlich verworffen sint/ Dauor sich ein yder fromer Christ wol hütten mag/ damit er geferlickeit des leibes vnnd der Seele entfliehen müge/ klerlich hirnach angetzeiget.

Dem ersamen vnd wolweisen N. Rosenmayr Burger zu Stetin meinem besondern Herrn vnd freunde.

Meinen freundtlichen grus zuuorn/ Ersamer günstiger lieber Herr vnd freund/ Nachdem ich in kurtzuerschiner zeit bey euch gewest bin/ vnd wir von mancherley irthumb so yetz inn Landen hyn vnd wyder erwachsen/ redeten/ vnder andern wurdet yhr zu rede von einer Sect/ welche newlich sich erhaben/ wüstet aber nicht wie vnd welcherley gestalt/ Nhu bin ich in kurtz uergangen tagen zu Saltzburg gewest/ da ich dann gründlich erfaren/ auch zum teyl gesehen hab/ die elende Sect/ das ich anders nicht ermessen kan/ denn das es sey ein sondere plag von Gott zu vnsern letzten getzeitten/ vmb vnser sunde willen/ denn es leßt sich fast dermassen ansehen als wolte Gott seinen zorn vber die welt gehen lassen/ dieweil sei ntheures vnd heilsames wort in aller welt gepredigt/ vnd so vbel gehalten wirt. Denn ien yder seinem whan vnd gutduncken nach leben vnd richten/ deßgleichen die schrifft seines gefallens dewten vnd zihen wil/ dauon dann solche vnd andere grausame erschreckliche yrthumb erwachsen/ ddas Paulus wol recht hat gesagt/ Dieweil sie nicht geglaubt haben/ hat sie Gott lassen fallen in krefftige yrthumb Was sich aber diß orths weyther begeben/ werd yhr hirnach in .xiij. artickeln/ welche sie für warhafftig halten/ vertzeichen finden. Wil euch hiemit in die gnad des almechtigen befehlen der wöll euch vnd vns alle führen vnd regiren zur rechter warhafftiger erkentnis seines Götlichen worts/ Amen Datum Saltzburg. M. D. XXVij.

I. N.

E. williger

A.

Newe zeittung jm Stifft zu Saltzburg/ von den newen Taufforden vnd Gartenbrüdern.

Alhier zu Saltzburg/ vnd an viel andern orthen in dißem Stifft/ haben sich die Gartenbrüder zu samen gethan/ gepredigt/ auffs new getafft/ vnd also ein gantze newe Bruderschafft auffgericht/ Sun zum mehrerm teyl auff den Einöden/ ader sonst in winckeln zusamen kommen/ Vnd alß bald einer widder getaufft worden ist/ hat er gelt adder geltswerdt in die Bruderschafft geben vnd zugesagt/ das er hinfort in die stainern Tempel nicht mehr woll geen/ auch kein Meß mehr woll hören/ vnd vom Sacrament des Altars nichts anders halten/ denn das es brot vnd wein sey/ Vnd darzu von vnsern opffern/ feyertagen/ tauffen/ vnd viel andern artickeln (wie yhr zubedencken habt) gentzlich vnd gar nichts halten/ Haben auch dise bruderschafft heimlich wollen halten/ bissolang yhr viel wurden/ das sie hernachmals yhr vornehmen mit gewalt möchten hinaus füren. Vnd als man von yhn sagt (wie wol sie solchs auch bekennen) so haben sie in der Christnacht alle Münch vnd pfaffen zutodt wollen schlagen. Als man nu ein pfaffen (der yhr fürnembster prediger gewest ist) hat wollen greiffen/ do hat man vnuorsehner ding xxxij. person bey einander gefunden/ die selbigen seint von funff raysigen/ vnd etzlichen fueßknechten/ nicht weyt von der stadt Saltzburg/ angenomen/ vnd zu gefencknis gebracht/ vnd herttiglich gefragt/ haben aber von yhrem yrthumb nicht wollen abtretten/ vnd ymmer einer mehr bekant dann der ander/ vnd yhrer brüder vnd schwester noch viel angeben/ die hat man zum teyl auch nachmals gefangen/ vnd seint also yhr zehen zu der straff furgenommen/ Nemlich der Pfaff mit andern zweyen/ welche nicht haben wollen widderruffen/ die hat man in der Stadt auff dem Fronhoff alßo lebendig verprant/ Die funff haben yhre yrthumb bekant/ die hat man mit dem schwerdt gericht/ vnnd nachmals verbrant. Aber ein fraw ein fast hübsches frewlin von xvi. iaren/ hat keinerley weys wollen widerruffen/ wiewol man sie des lebens gefrist wolt haben/ die hat der scharffrichter auff sein arm genomen vnd in die roßtrenck getragen/ vnd sie vnter das wasser gedruckt biß sie ertruncken ist/ vnd nachmals den cörper verbrant. Auff den montag nach aller heiligen tag hat man abermals vier gericht/ nemlich ein Edelman genant Richter Diethmorungen/ vnd ein Taschner zu Saltzburg die als sie yhren yrthumb bekanten/ hat man sie enthewpt/ vnd dornach verbrant. Aber sunst einen Senckler vnd einen Gürtler/ dieweil sie auff yhrer widdertauff/ Sacrament/ vnd allen andern/ gantz bestendig bliben/ hat man sie lebendig auff dem platz verbrant/ die haben lang gelebt vnd Gott herttiglich angeruffen/ ist gar erbermlich zuhören gewest.

Auff den dinstag dornach hat man zehen frawen/ vnd etzliche menner/ die do bekanten yhren irrsal/ das leben gefrist/ mochten zur buß kommen/ aber der land vertriben werden/ nach erkentnis der Gmayn vnd Obirckeit sich zuhalten.

Auff mittwoch dornach hat man einen Statschreiber/ auch ein Pfaffen/ vnd sunst drey person mit yhn/ darunder ein Gürtler/ ein fast hübscher vnd junger gesell gewest/ für die Stadt gefurt in ein haws/ darinnen sie vormals gepredigt hatten/ vnd als sie nicht haben wollen widderruffen/ Sonder trotzlich yre opinion verfochten/ vnd kein schewen der marter gehabt/ hat man das haws angetzündt vnd sie darinnen verbrant/ haben lang gelebt/ vnd jemmerlich vndereinander geschryen/ zu letzt yhr leben auffgeben/ Gott helff yhn vnd vns nach seinem gefallen.

Man hat auch zway hewser in der stadt Saltzburg/ do die gemelten brüder zusamen kommen sint/ zu einem gedechnis abgebrant. So liigen noch .xli. person gefangen/ weis noch niemant was man mit yhn fürnehmen wirt/ Gott schicks zum besten/ Actum Saltzburg im .xxvij. jar der mindern zal.

1. Die Prediger dießer zeit sindt widder einander/ darumb sind sie nichtgeruffen/ noch zu hören.
2. Sie zeyhen vns wir leren/ man müsse sundigen/ das ist ein lügen.
3. Schreiber diß büchleins/ spricht es sey yrthumb vnd gots lesterung/ wenn man leert/ Wer von Gott zur selickeit vosehen sey/ der werd selig.
4. Er meynt/ es sein etzlich in dießer zeit on sund/ vnd spricht der sey hie ein kind Gottes/ der weder außwendig noch ynnwendig boßheit an yhm befinde.
5. Er vrteilt freuelich/ Es sey den leuthen aus vnserm predigen gar kein liecht zugestanden/ vnd besser sich gar niemants/ vnd darumb so seyen wir nicht von Got beruffen.
6. Das etzlich verrucht menschen/ yhre sund Got zuschreiben (als so Got schuldig daran sey) vnd sagen/ Zuge mich Gott/ so sundiget ich nicht/ Das zeyhen sie vnns/ als ob wir alßo lereten/ ist ein lügen.
7. Er meynt der geist guts zuthun/ sey allen menschen gmein vnd angeborn/ darumb so mögen sie guts thun von yhn selbs wie sie erschaffen sindt.
8. Er leßt sich mercken/ Als ßo das natürlich Gesetz genugsam were guts zuthun/ ader Christlich zu leben.
9. Er hellt niemants für ein rechten Prediger/ er sey denn ein landtfarer vnd bleib nicht an eym orht.
10. Er lehret/ der himlisch vatter zihe vns zu yhm durch vnser kreffte/ alßo/ das vor der widdergeburt/ etwas guts in vns sey/ als wenn wir nicht gantz kinder des zorns ader fleischs weren. ist auch des Balthasars yrsal in seiner tafel.
11. Er gibt Christum allein für als ein lehrer Christlichs lebens/ vnd nicht als ein erfüller des gesetzts in vns.
12. Er spricht/ Es sey nhur ein einiges zihen des vatters/ damit er vns zu yhm zihe/ das sey wenn man lere recht thun von aussen.
13. Er helts für ein besondere newe offenbarung von Got/ das man sich widderumb tewffen soll lassen.