GOttseliger Christlicher Leser/ allhie hastu inn ainer kurtzen Summa/ die Leer/ Glauben vnd bekantnus C. S. von Christo dem aingebornen Sone Gottes/ vnserm Gott vnd herren/ vnd vom H. Sacrament seins leibs vnd bluts/ mit ainer Protestation vnd widersprechung aller Irrthumb/ Auß wellichem ein vnparteischer oder jha auch ein jeder/ gleich sehen khan/ wie vnrecht ihm/ auß des Sathans lauter anstifftung/ damit der herr Christus nit durch ihn glorificirt vnd mehr bekhant werde/ von vilen beschicht/ die vnerfintlich schreien vnd fürgeben: Er verleückne die menscheit Christi/ oder vermenge seine Naturen/ vnd halte nichts vom Sacrament des leibs vnd bluts Christi/ vnd anders mehr. Ob er sich denn wol offt vnd bestendig in seinen büchern des alles veranthwort/ vnd solche falsche Calumnien mit guttem grunde der warhait abeleinet/ so wil es doch wenig helffen/ weil die lüge odder vnwarhait in der welt/ sonderlich zu vnsern zeiten bei vilen mer/ weder die helle warhait gillt/ Aber villeicht ists auch nicht jedermann/ seine bücher zubekommen noch zu lesen müglich/ Drumb seint allhie folgend die zwen fürnemsten Artickel/ vmb welcher willen er allermeist argwenig gmacht/ verdacht vnd verfolget wirt/ jedermann zu gutte in seinem selbs bekanthnus abgeleinet/ welch bekhandtnus drumb an tag gegeben/ auff das man sich vor gotte (der alles entlich wirt richten) mit vorvrtheilln nicht mehr verschulde/ denn es wirt klärlich damit seine vnschuldt beweiset vnnd dargethon/ das ihm mercklich vnrecht für Gotte vnnd den menschen beschicht/ Wer denn des alles gründtlichern vnnd aigentlichern bericht will haben/ der wirt es inn seinen büchern überflissig findenn/ damit sei dem Herren Christo die sache/ des sie ist/ vnd seine reine lautere warheit ans liecht zubringenn gantz befolhen.