der muter gotes/ wie sy vnd die hailigen sollen geert werden/ von ainem yegklichen Christenmenschen.

D. Martin Luther.

M. D. XXIII.

Man begeet heüt das fest der hailigen Junckfrauwen Marie/ als sy geborn ist/ dartzu ist gelesen worden das euangelion Matthei.i. welches erzelt die gelid/ der grossen altuätter Jesu Christi/ vnd laut also. Diß ist das buch von der geburt Jesu Christi der da ist ain son Dauids des sons Abraham rc.

Ir wißt meine freünd/ das gar tieff in die hertzen der menschen gebildet ist/ die eer/ so man erbeüt der muter gottes/ ja auch also tieff/ das niemand gern hört darwider reden/ sondern meer vnd grösser macht/ Nu lassen wirs auch geschehen/ das sy geeret wirt/ dieweil wir in der geschrifft schuldig seind ainander fürzukommen mit der eer/ wie Paulus sagt/ darumb ist man jr auch ain eere schuldig.

Aber da ist wol fürzusehen/ das sy recht werd geert/ wann das volck ist also tieff in die eer geratten/ das sy vil höher wirt geert/ dann recht ist/ darauß zwen schaden kommen. Ain abbruch Christo/ das die hertzen der menschen meer auf sy/ dann auff Christum selbs gestelt seind. Christus ist doch geleich hinderhin in das finster gesetzt/ vnd sein gantz vergessen. Der annder schad/ das auch dem gemainen volck daruon ain mercklicher abbruch geschicht/ wann dieweil die muter gotes/ vnd der hailgen dienst vnd eere also erhaben ist/ wirt der armen dürfftigen Christen vergessen. Ich laß geschehen das du vil von jr haltest/ sy groß lobest vnd preysest/ aber also ferr/ das dein guter won nit herauß breche/ vnnd machen ain gesetz darauß/ Darumb hat auch die geschrift gar nichts von jr geburt beschriben/ damit vnd kainer sein hertz auff sy/ stell/ Nu haben pfaffen vnd münch/ der weyber eer herfür ziehen wöllen/ vnd Mariam so hoch erhebt/ das sy vns ain göttin (nach art der Haiden) auß diser diemütigen dienerin gemacht haben. Solches nu zubestetigen/ mußten sy lugen brauchen/ vnnd die geschrifft bey dem hat sich hierein der Engel Satane auffgemutzt/ vnd vnder dem schein der ere gotes/ vnd seiner lieben hailigen/ geschafft zubauwen grosse stifft vnd thum/ die yetzund worden seind grosse schantheüser/ ich het schier anders geredt/ wiewol laider auß gotes vngnaden/ jr kromerey so offentlich ist/ das man an secken sicht ob es mülners heüser seind. Nu ist die hilff der lebendigen hailgen gar ernider gelegt/ durch sollich vnötlich ere der gestorbnen. Ich haiß sollich dienst vnnötig/ wann sy seind nit gebotten/ darbey will ich dir (wie offt gemelt ist) nit verbieten jr ere. Aber ich wolt geren/ du mercktest disen vnderschaid/ wenn du ainem armen zu der narung hilffst/ so dienst warlich meer/ dann ob du ain guldine kirch bauwtest. Also wirt es auch got vrtailen/ so wir kommen werden/ vnd haben den armen nichts guts thon. Ey ich hab ain kloster/ ain stifft/ ain kirch lassen bauwen. O got/ wie ain groß loch hab ich in den himel gemacht/ da wirt der herr sprechen/ wer hat dich gehaissen/ wirt der sprechen/ mein gut geduncken. Got aber wirt antworten/ nain es dunckt mich nit gut/ so wirt der verlorn haben allen seinen kosten/ all sein mü/ arbait vnd zuuersicht Secht darumb schait man wol die ere deren hailigen die noch leben/ von der/ die gestorben seind/ als edel gestain vnd holtz/ vnd lernet/ das wir meer verdienen/ so wir ainem armen ain guldin geben/ dann ainem gestorbnen hundert. O das dunckt vns nu frembd sein/ macht nichts anders/ dann das man in die vnerkantliche ere der hailgen geratten ist/ darumb muß es gelernet vnd triben werden mit der hailigen geschrifft/ so wirt es wol selbs abfallen.

Ja sprechen sy/ ey seind doch vil hailgen erschinen/ wie sant Lorentz mit dem rost/ der hat den teüfel zertreten/ als dann gepredigt wirdt zu Bamberg von Kaiser Hainrich/ welches sünd von dem tüefel auff die wag wurden gelegt/ vnd überwegten gar weit die gutten werck/ der doch souil kirchen vnnd klöster gebauwen hatt/ da kam Lorentz vnd warff ainen kelch (den Hainrich in Lorentzen ere het lassen machen) zu den guten wercken/ also macht diser kelch Hainrichen selig. O du seliger kelch/ der deiner vil het/ Secht zu solch falsch tröm vnd liegen mussen die hörn/ die die warhait nit wöllen hörn/ Ich halt es sey vil meer der schwartzteüfel geweßt/ dann sant Lorentz/ darumb secht eüch für/ das eüch solich fablen nit betriegen vnd verfürn/ da müßt ir nu selbs richten. Ir habt ye kain gebot kirchen zubauwen/ kelch/ meßgewand zumachen rc. Sonder den armen zuhelfen ist eüch geboten/ vnd das seind die freünd/ als Christus spricht/ die vns werden nemen in die ewigen hütten/ Das wir nun haben verlassen den willen vnd das gebot gotes/ so seind wir auch von got verlassen/ vnd haben vns gehangen an vnnötige ding/ vnd seind ye lenger ye meer vom schöpffer in die creatur kommen/ vnd haben gar nach die creatur zu ainem got vnd schöpffer gemacht. Secht nu was das für wort seind/ die wir der hailgen junckfrawen Marie zulegen im Salue regina/ wer wil das verantwurten/ das sy vnser leben/ vnser trost/ vnnser süssigkait sein sol/ so sy sich doch laßt benügen/ das sy ain armes gefeß sey/ solches gebet singt man durch die gantzen welt/ vnd leüt groß glocken dartzu. Der geleichen ist es mit dem Regina coeli/ welches nit besser ist/ da man sy ain küngin des himels nent. Ist das nit ain vneere Christo gethon/ das ainer creatur wirt zugelegt/ das allain got gebürt/ Darumb laßt von solchen vngeschickten worten/ Gern wil ich sy haben/ das sy für mich bitt/ aber das sy mein trost vnd leben sey/ wil ich nit/ vnd dein gebet ist mir gleich als lieb/ als das jr. Wieso? wenn du glaubst/ das Christus gleich als wol in dir als in ir wonet/ kanst du mir als wol helffen als sy/ darumb halt du die ere der lieben hailigen/ geleich der/ mit welcher wir ein ander schuldig seind zueren/ ainer soll den andern eeren/ als gottes kind. Hütten eüch vor den zwen schaden/ verdunckelt mir Christum nicht. Lasset den vnnsern trost vnd leben sein/ Eere Mariam vnnd die andern hailigen/ das du hieher ainem lebendigen hailigen/ hundert pfenning gebest/ wo du dort hin den gestorbnen ainen gibst/ Du wirst nitt verdammet/ ob du geleich Marie vnnd allen hailigen kain solche eere anthust/ ja vnnd ob du schon nimmer an sy gedechtest/ Aber hie/ wenn du die lebendigen versaumst/ warlich so wirdst du verdampt/ wann hie hast du das gebot/ dort hast du kains/ hie must du dich vnderwerffen vnd sprechen/ mein lieber bruder/ du bist mein bruder/ aber dennocht sol ich mich vnder dich beraiten/ wann du bist meer dann ich/ Also solt man auch die hailigen im himel gehalten haben/ als nemlich für kinder gottes/ für vnser brüder vnd schwester/ so wär die geschrifft bliben/ Nun aber seind die leüchtfertigen gaist zu gefallen/ vnd haben auff gesehen/ vnd bey dem volck sollich göter oder götzen auffgericht/ vnd bey dem volck sollich göter oder götzen auffgericht/ wo da ain Christlich hertz were gewest/ das den glauben hett geschmecket vnnd empfunden/ das hett also gesagt/ siche ich hab mitsampt dir ain herrn got christum/ ain glauben/ vnnd ainen tauff/ darumb ist not das du mein bruder oder schwester seyest/ yetzund wil ich dich für ain kind gottes halten/ vnnd mich vnder dein fuß legen. Herwiderumb müsten sy auch mir thun/ dann wenn sy heüt auff erden giengen/ so wurden sy so hoffertig nit sein/ sy wurden sich mir/ dir vnd allen glaubigen vnder die füß legen/ vnd für ain herrn halten deßhalb dz Cristus in vns wonet/ also hat vns auch Cristus befolhen/ wer voran geen will/ der sol ain knecht der andern sein/ sollichs hatt er auch selbs gethon/ ist vnder seinen iungern vmbher gangen/ in zu tisch gedient eingeschenckt/ brot auff gelegt/ das liecht putzt/ die füß gewaschen/ vnd sy für herrn gehalten/ wann sy waren gottes kinder/ Ja er hat sich auch für den geringsten geacht/ als er spricht im Euangelion/ von Johanne dem tauffer/ der der gaist ist im reych der hymel/ ist grösser dann diser/ also hat er vns alltzumal gedient ist vnnser knecht gewesen/ hat sein blut vnd flaisch dartzu für vnns gegeben/ vnnd vnnser sünd auff sy gelegt/ vnd sich gantz vnd gar dar geben/ zu vnserm dienst. Also solt es auch sein vnder vns Christen/ das ain yetlicher den andern Christen für sein herrn hielt/ vnd in auch also eerete.

Secht da habt ir nun die eer der muter gottes/ das sy sey ain sonderlich gotes kind/ sey begabt oder begnadt vor allen weibern/ wir wollen sy auch haißen ain gnedige frauwen/ in dise eer wöllen wir sy setzen/ in die sy got hingesetzt hat/ aber das wir sy zu ainer göttin (ja abgöttin) machen sollen (wie münch unnd pfaffen fürgeben) das wöllen wir gar nicht thun/ für ain fürsprecherin wöllen wir sy nit haben/ für ain fürbiterin wöllen wir sy haben als auch die andern hailigen/ nun haben sy Mariam gesetzt/ über alle kör der engel/ neben iren son vnsern herrn/ dardurch irem lieben kind ain vneer vnd abspruch ist geschehen/ das ist groß vnrecht/ vnd ich halt wenn sy noch auff erden gieng/ das sy wurd blut wainen/ solcher vnerlicher ere halben/ so auß fabel predigen/ exempeln/ von dem volck jr wirt angethon/ Darumb laß man sy in ir billichen ere bleyben/ vnnd haltsy für gotes kind/ ja für gotes muter/ lobe got in jr/ als sy auch selbs gethon hat im Magnificat/ vnd sehe yederman meer auff die hailigen/ die hie bey vns leben/ lauff nit hin vnd her/ als ins Grimtal/ gen Etingen/ gen Ainsideln/ gen Ach rc. Lauff in deines nechsten nachbauren hauß/ der dein notturfftig ist/ vnd was du dort hin verzeren vnd geben wilt/ das gib hieher. Das ist gesagt von der ere der lieben hailigen.

Nun wöllen wir von dem Euangelion auch ain wenig sagen/ das ist von der geburt Jesu Christi. Also hept Mat. sein Euangelion an/ vnnd diß ist die vorred/ darinn er beschleüßt sein fürnemen/ was er im sinn hat/ nemlich/ zuschreyben von Jesu Christo/ vnd laut also/ Das buch der geburt Jesu Christi/ D' da ist ain son Dauid des sons Abraham rc. In dem zelt er her xlii. glid/ von Abraham an biß auf Cristum/ vnd tailt solches in drey stuck/ als in Ertzuätter/ in Künig/ vnd in Fürsten/ vnd sagt also. Abraham hat geboren Isaac/ Isaac zeügt Jacob/ vnd das fürter hin biß auf Joseph/ da went er die zungen oder federn vnd sagt nit Joseph Christum/ sonder Jacob Joseph/ der ain man was Marie/ dauon geborn ist Jesus Christus. Zum ersten ist hie zumercken/ das Matheus an der schnur Christi/ angezeücht vier weyber/ welche fast berüchtig sind/ nemlich Thamar/ Rachab/ Ruth vnd Bersabee vnd spricht. Judas zeügt Phares vnd Zaram von Thamar. Dauon liß Gene. am .xxxvii. Von der Rachab liß Josue am .ii. vnd .vi. Von der Ruth liß Ruth am letzsten/ von Besabee am .ii. Regum im xii. capitel. Der vier rechtfertigen weybern als da waren Sara/ Rebeca/ Lia/ vnd Rachel/ der ist geschwigen. Damit hat sy nu hieronimus katzpalger/ warumb das geschehen sey/ Das ist darumb geschehen/ das sy sünder gewesen seind/ das Christus auch in disem grossen geschlecht hat wollen geborn werden/ da huren vnd buben inn seind/ damit er anzaigt/ ye hailiger sy ist/ ye neher sy sich zu den sündern macht/ das ist nu das er sich schlecht vnd flicht/ mitten in das geschlecht der sünder/ vnd schembt sich ir gar nicht. Ja er laßt sy in sein register/ vnd laßt sy gesungen werden auff dem altar/ wann Christus ain Phariseyer wär gewesen/ er wär von dißen geschlechte geflohen das im die schuch empfallen weren/ sy hetten vor jm stincken müssen/ vnd er het sein nasen ab jn gerümpft/ sollichs aber ist geschehen/ das in dem Christus anzaigt/ wie er ja den armen sündern/ so hold sey/ das sich ain yetlichs gewissen an in auf lain/ vnd sprech/ Achr Christus ist ain sollich man/ der sich der sünder nit schämet ja er fürt sy in sein register/ thut nun das der herr hie/ so sollen wir ja niemands verachten/ dann sunst het er wol die frommen erberen weyber anzaigt/ als Saram. rc. Nur/ wenn ainer het wöllen dise weyber vorzeyten verachten/ so het got gesagt/ Drutz/ laß mir sy zu friden/ ich wil sy bringen zu den eren/ da die frommen nit hin kommen sollen/ secht die haben groß Patriarchen geborn/ die kommen in die linien Christi/ vnd werden sein groß mütern/ dz wir nu sagen müssen/ gnadfraw Rachab gnad fraw Ruth. Dise Ruth war ain haydin/ von dem geschlecht Moab/ noch thet jr got die ere/ dz er sy in sein geschlecht nam/ vnd der prophet Esaias must ain grossen spruch von jr machen am xvi. capitel/ O herr send vns dein lemle/ dein herscher/ von d' stat der wüstung/ biß zu dem berg Sion/ dann sy wöllen das petra sey ain stat der haidenschafft/ Da hat er in anainander gemischt das haidnisch blut den judischen vnd in ainander bracht/ darumb das wir sehen gotes huld gegen den sündern/ vnd das wir jm nachuolgen vnd vns nit schemen/ sunder flechten vnd mitten vnder die sünder/ jnen zuhelffen/ darumb seind hie dise berüchten weyber angezaigt.

Item jr ist noch vil mer gewesen vnder den künigen/ der waren gar wenig fromm/ als Dauid Josias Ezechias vnd ander böß buben/ vnd zwar der maist tail. Manasses was ain böser künig/ der tödt die propheten vnd ließ Isaiam mit der segen entzway schneiden/ das er auch die stat Hierusalem erfüllet mit blut/ noch ist er in die linien Christi zu letzst einkommen/ Nu secht jr wie er die hat auff sich genomen/ vnd jr sünd gedeckt/ also will er vnser sünd auch decken/ Vnd diß ist nu ain exempel vnd sacrament/ das sich Christus der sünder also freüntlich annimpt. Nu die .xxxxii. zal ist gar vil gemain in der geschrifft/ wann die kinder von Israel haben xxxxii. rayß oder leger gethon. Christus hat also lang gefast/ mit dißer zal zeücht er an das zunemen aines Christlichen wesens. Darumb setzt auch der ewangelist hie Christum auff das end vnd anfang/ das der mensch .xxxxii. mal geborn wirt/ ee er kumbt in Christum/ der anfang ist in Abraham/ die zunemung in Isaac/ vnnd so fürtan/ biß das man kumbt in Christum. Diß ist nu summa summarum/ der da wil zu Christo komen vnd selig werden/ der muß noch wol .xxxxii. sprüng thun/ so offt muß er geprochen werden/ vnd neüw geborn/ biß das er kompt in Christum/ vnnd als offt er ain mal geprochen ist/ so offt ist ain glid gegangen/ Zu zeiten wenn das creütz so groß ist/ als wenn der tod herkumpt/ kan er wol durch alle glid reissen/ vnd mir in ainem sprung zu Christo helffen darumb steet Christus zu letstem/ das alles muß getödt vnnd gebrochen seyn was am alten Adam ist. Nu von der geburt/ solt ich auch sagen/ das Cristus hie allain rain geborn ist/ wir all in sünden von man vnd weib Eer allain/ on ainem man/ von ainer Junckfrauwen/ dz allain sein geburt rain bleib/ das wir allain durch jn widerumb geborn/ vnd rain werden/ vnd sein raine geburt allain annemen/ Dann als wenig als raine junckfrawen kinder tragen so wenig seind auch raine geburt Nun ist nit mer dann ains das ist auch allain ain raine geburt/ vnd ain rainer mennsch/ der ist Jesus Cristus/ den wöllen wir auch annemen/ vnd kainen andern. Amen.