Dieterich, Veit - Summaria christlicher Leer - Am neunden Sontag/ vom vnrechten Haußhalten/ Luc. 16..
CHristus spricht: Ich sage euch/ machet euch freund mit dem vnrechten Mammon/ auff das/ wenn jr nun darbet/ sie euch auffnemen in die ewigen hütten.
VNser Herr Jesus Christus warnet mit disem spruch/ alle reyche leut/ das sie ihr gelt vnd gut nach Gottes willen recht/ vnd wol brauchen sollen/ das ist/ den armen leuten sollen sie helffen so not leyden/ vnd jr narung entweder kranckheyt/ oder anders vnfals halben/ nicht mehr gewinnen können/ vnnd verheysset er wölle solche hilff/ so armen leuten hie auff erden geschicht/ inn yenem leben reychlich bezalen.
Solche verheissung bringet diß vrtheyl klar mit sich/ das alle/ so armen leuten wol köndten helffen/ wöllens aber vmb des guts willen nit thun/ oder thun es kerglich/ oder noch auch den leuten vmb des geytzes willen vnrecht thun/ sie vbersetzen/ oder sonst vberfortheylen/ das sie Gott in yener welt auch wölle lassen mangel leyden/ vnd vmb solcher vntrew willen ewig verdammen. Darumb sollen alle reyche diser lehre gut acht nemen/ vnnd darnach sich halten/ das sie jnen freunde mit dem vnrechten Mammon machen/ das ist/ mit gelt vnd gut/ welchs der Herr darumb vnrecht heyst/ das schie niemandt sein recht vnnd wol brauchet/ sintemal yederman sich lest beduncken/ er sey eygen Herr vber das seine/ so wir doch alle nur Schaffner vnd verwalter drüber sind/ vnd müssen Gott am Jüngsten tag rechenschafft drüber geben/ wie wirs gebrauchet haben.
Gebet
HErr Got himlischer Vatter/ der du vnns reychen segen/ vnnd das tegliche brod vberflüssig hast geben/ Wir bitten dich/ behüte für geytz/ vnd erwecke vnsere hertzen/ das wir armen leuten gern vnd miltigklich von solchem segen mitteylen/ auff das wir trewe haußhalter vber deine gütter erfunden werden/ vnnd nicht müssen inn ewigkeyt darben/ wenn wir von solcher haußhaltung abgefordert/ vnd für dein gericht kommen werden/ AMEN.