durch den Predicanten von Vlm/ zu Bern geprediget vff Sontag nach Sant Pauls bekerung.

DO er vom berg herab gieng/ volget jm. rc

Da sehennd wir/ das es ist wie Gott durch Esayam gewyßsagt hat/ so er spricht/ Min wort wirt nit lär widerkeren/ sonder wirt alles das vßrichten/ dazu ichs geschickt hab. rc. Christus hat dz götlich wort vff dem berg geprediget/ vnd nit vergeblich/ er hat vil frucht bracht/ nemlich das jm vil volck nachuolget. Wie der Euangelist sagt: Wo es noch mit ernst reyn vnd luter geprediget wird/ da louffend jm gewüßlich die vßerwelten zu/ vnd volgend jm nach: wo es aber on ernst/ valschlich vnnd mit menschen leren vermischt/ geprediget wirt/ da richt man nüt vß: dann die schaff Christi hörend deren stimm nit/ volgend jnen ouch nit nach: derhalben von nöten ist/ das ein Christenliche Oberkeyt ein flyssig vffsehen hab/ wie das göttlich wort jren vnderthonen fürgetragen werde/ nitt allein in der statt Bern/ sondern ouch vff dem land/ das dem armen volck der reyn kern des götlichen worts/ vnd nit die sprüwer der menschen leren/ fürgehalten werde/ sust geschäch den armen lüten/ wie den ackerpfärden/ die buwend den habern/ vnd essend sy aber nit. rc.

Vnd sihe/ ein vßsetziger kam/ vnnd bättet jn an. rc.

Lucas v. cap. spricht: Er viel vff sin angesicht/ vnd bättet jn an/ das ist/ er eeret jn/ als ein der jn möcht vom vßsatz reynigen/ darzu hat jn der gloub getriben/ wie dann sine eignen wort anzeygend/ so er spricht: Herr so du wilt/ kanstu mich wol reynigen. Da sicht man dz er gloubt vnd Christo vertruwet hat/ er künde jm wol helffen/ der gloub lert jnn ouch recht bitten. Paulus spricht/ Rom. 8. Wir wüssend nit was wir bätten söllend/ wie sich gebürt. rc. Ein gläubiger lernt durch den geist Gottes recht bitten/ vnd setzt alle ding dem willen gottes heym/ wie der vßsetzig gethon hat/ so er spricht: Herr/ so du wilt. rc. Wär den glouben nit hat/ der kan nicht recht bitten/ Wie es Gott mit jm macht/ so gefalt es jm nit/ darumb ist der gloub in allen dingen not/ on jnn blybt der mensch ein ewiger murmler wider Gott/ wie die kinder Israels in der wüstin. rc.

Ein kurtz/ aber ein rechtschaffen gebätt hat der außsetzig gefürt/ so er spricht/ Wilt du/ so magstu mich reynigen/ dem söllen wir nachuolgen/ vnd dem willen gottes alle ding heym stellen/ vnd sagen/ Nit min/ sunder din will geschech.

Vnd Jesus streckt sin hand zß/ rüret jn an. rc.

Da sol nieman gedencken/ daß dz wort/ Ich wils thun/ biß gereyniget/ in jm selber hab die krafft/ vßsetzel zu reynigen: dann wo dem also wäre/ woltend wir mit dem wort/ wol allen vssetzigen zu hilff kommen. Es ist keiner so redloß/ er könde sagen/ Ich wils thun/ biß gereyniget. Darumb nit das wort/ sunder die krafft Gottes hat den vssetzigenn gereyniget. Christus hat durch das wort/ Ich wils thun/ allein syn allmechtigen willen vnd krafft zu erkennen geben. Es ist nitt geredt/ wenn man sagt/ Das wort thuts. rc. wie dann ouch vom Nahctmal des Herrenn geredt wirt/ das wort Christi: Das ist min lyb/ bringe den lyb Christi ins brot. Das kan aber nit sin/ wie in vergangnen tagengnug gehört ist worden.

Vnd Jesus sprach zu jm: Sich zu/ sags nieman. rc.

Dem beuelch des Herren hat der vssetzig nit geläbt/ sunder wie Marcus .i. cap. spricht/ hat ers vßbreyt/ diß geschicht kundbar gemacht/ vnd des Herren befelch verachtet/ damit er nüt vßgericht hatt/ dann/ das volck den Herrenn also überfiel/ dz er nit kondt offenlich in die statt gon/ begärtend vß fürwitz jn zu hören/ vnd wunderwerck vonn jm zesehen: suchtend ouch mer deß lybs/ dann der seelen heyl/ darumb hatdiser vßsetzig on zwyffel vnrecht gethon/ das er die geschicht wider den befelch Christi/ also vßgerufft hat.

Sonder gang hin/ zeyg dich dem priester.

Da hand die bäpstler die orenbycht gründen wellen/ glych als ob der vssatz die sünd bedüte/ vnnd Zeygen heysse Bychten. Die offenbar felschung der gschrifft/ solt allein gnug darzu sin/ das all Christen von der Bäpstler leer abträttind/ vnd all jr leer verdächtlich vnnd argwönig hieltind. Wer wil jnen doch gloubenn geben/ so sy mit valscher vßlegung der gschrifft/ dem armen volck/ ein sölchen schwären last vff den halß gelegt hand?

Christus hat da in das gsatz Mosi gesehen/ das was noch durch sin tod nit vffehept/ darinn den priesteren gwallt geben was/ durch jr vrteil zu erkennen/ ob einer vom vssatz recht gereynget wär oder nit/ Leuit. 14. Wär nun recht geryniget was/ der solt dem gsatz nach/ ein opffer geben. Dahin sicht Christus/ so er sagt: Gang hin, zeyd dich dem priester/ vnnd opffer die gaab/ die Moses beuolhen hat/ jnen zu einer zügnuß/ dz ist/ ich wil das du das gsatz haltest/ zeygest dich dem priester/ das er dich für reyn vrteyl/ vnd gebest jm das opffer zu einer zügnuß''/ das ist/ zu einem gesatz oder recht/ das sy daruon jren teyl/ vnd jr recht habind. Christus wolt jnen noch zu der zyt/ an jrer gerechtkeyt nit nachteylig sin/ darumb hieß er den vssetzigen hingon/ sich dem priester erzeygen/ vnd opfferen. rc. Was gadt dz die orenbycht an? dienet doch kein buchstab dahär/ wär kan jnen mer glouben/ so er den falsch by jnen findt?

Do ober Jesus yngieng zu Capernaum/ tratt ein houptman zu jm/ der batt jn vnd sprach: Herr min knecht ligt. rc.

Im vßsetigen der ein Jud ist gewesen/ hand wir ein Exempel des gloubens gehept. Aber in disem houptman habend wir vil ein treffenlicher exempel des gloubens/ vnd der liebe. Der außsetzig gloube/ Christus der by jm stund/ möchte jn reynigen. Der houptman aber gloubt/ er möchte mit einem wort gesund machen/ wenn er schon nit gegenwürtig were: Der houptman hat ouch den vssetzigen in der liebe übertroffen/ dann der vssetzig sucht allein sin eygne gesundtheyt: der houptman aber sucht die gsuntheyt sins knechtes/ deß nam er sich so hertzlich vnd ernstlich an/ ans wär er selbs in der kranckheit gelegen. Man findet lüt vnder vns/ die sich jrer knecht vnd mägt nüt annemmend/ trybend sy vß so sy kranck werdend/ fragend nüt darnach das jnen geholffen werde; welches doch diser Heyd nit gethon hat. Es klaget yederman ob den Eehalten/ vnnd dargegen klagend sich ouch die Eehalten ab jren herren vnd frowen. Diß klagen kumpt zu beyden syten daher/ das wir nit Christen sind/ vnd die liebe nit in vns ist. Ein Christenlicher herr/ meyster oder frouw gedenckend/ das sy ouch ein herren im himmel habend/ darumb haltend sy sich früntlich/ vnd nach aller billigkeyt gegen jren dieneren: wie sy wöltend das sich Gott gegen jnen hielt/ deßglychen die Eehalten kerend allen flyß an/ dz sy den nutz vnd frommen jrer herren vnd frowen fürderen: sy sind nit ougen diener/ sunder dienend dermassen/ als ob sy Gott selber dienetend. Wie das alles Paulus gelert hat/ die Epheser am 6. cap. vnd die Collosser am .4. cap.

Jesus sprach zu jm: Ich wil kommen vnd jn gsund machen.

Hie sehend wir/ wie früntlich Christus sye gegen den armen sünderen/ wiewol diser houptman ein Heyd was/ vnd ein kriegsman/ wleche doch gemeynlich gottloß sind/ dennocht hat jnn Christus von stundan erhört/ vnd hilff zugesagt. Ein sölich wolgefallenn hat Christus ab einem glöubigen hertzen/ das sol vns billich zu Christo ziehen/ das wir jm gloubind vnnd truwind/ so werdend wir sin güte vnnd früntlicheyt ouch erfaren.

Der houptman antwort vnd sprach: Herr ich bin nit wärt dz du gangest vnder min dach. rc.

Diser Houptman hatt ein sölchen glouben/ das er am wort vnd an der zusagung Christi benügig was/ vnd nit wyter fragt: vermeynt Christus möchts mit einem wort vßrichten/ derhalben es nit von nöten wär/ dz er lyplich in sin huß gieng/ darumb sagt er: Herr ich bin nit wärdt.rc. Kein sölcher gloub ist vnder vns erfunden worden. Wir sind am wort vnnd an der zusagung Gottes nit gesettiget gewesen/ sonder habend gewelt/ das man vns Christum lyßlich im Sacrament zu huß trage: ist einer kranck worden/ oder gestorben/ so ists die erst frag gewesen/ ob er ouch hab das Sacrament empfangen/ als ob all vnser trost vnnd seligkeyt darinn gestanden sye/ da hats nüt golten/ das Christus Joan.6. sagt: Wär an mich gloubt/ der hat das ewig leben: Item/ Wär zu mir kumpt/ den wirt nit hungeren: vnd wer an mich gloubt/ den wirt nimmermer dürsten/ den hunger vnd durst habend wir vns mit dem Sacrament wollen löschenn: wir sind am wort nit gesettiget gewesenn/ sonder habend Christum ouch lyplich vnnd wesenlich wellen essenn/ vnnd deßhalb wie wir vermeyntend jnn zehuß tragen lassen. Der houptman schatzt sich nit wärdt/ das jm Christus/ der noch in knechtischer form vff erden wandlet/ zu huß gienge/ vnnd wir dörffend so vermessenn sin/ das wir den regierendenn Christum (wie wir dann fürgebend) zu huß tragenn lassend/ als ob er vnns durch sin wort vnnd zusagung nit möge/ oder nit well helffenn/ sonder müsse lyplich vnd wesenlich by vns sin.

Dann ich bin ein mensch/ darzu der oberkeyt vnderthon/ vnd hab vnder mir kriegsknecht .rc.

Argumentatur a minori /Er wil so vil sagenn: Ich bin dir im gewallt nitt zu verglychen/ dann ich bin vnder dem gewalt eins anderen: du aber hast alle ding in diner hannd/ dennocht richten ich alle ding mit dem wort vß/ was ich heyssen vnd befilch/ das thund mine knecht/ wie vil mer magstu alle ding mit einem wort vßrichten/ die kranckheyten vertrybenn/ gesundtheyt geben/ den tod hinweg nemmen/ vnnd by dem lebenn behalten/ darumb es nit von nöten ist/ das du in min huß gangest.

Do das Jesus hort/ verwundert er sich vnd sprach zu denen die jm nachuolgtend: Warlich sag ich üch/ solichen glouben hab ich nye .rc.

Christus lobt den glouben des Heydnischen houptmans so hoch/ das er jn fürsetzt dem glouben der Juden/ vnd spricht/ Er hab kein sölchen glouben in Israel funden. O wie übel wurdend die widertöuffer gesehen haben/ wenn sy die wort von Christo gehört hettind. Sy sagend doch/ ein Christ möge kein Oberer sin/ sy hettind disenn houptman für kein Christen gehalten: dann er hat das schwärt gefürt/ vnd kriegsknecht vnder jm gehept/ wie er selbs sagt. Nun weyßt man wol dz die kriegsknecht nit mit einem fuchsschwantz dryn schlahend/ psieß vnd schwärdter sind jr weeren/ dannocht nennt jn Christus ein glöubigen/ vnd ein sölichen glöubigen/ das sins glychen vnder dem volck Israels nit erfunden werde: darzu wyset er jnn nit daruon/ spricht nit/ Tritt ab von diner Houptmanschafft/ wie dann Petrus sin Cornelium/ vnnd Paulus/ Paulum/ Sergium/ ouch nitt daruon gewisen habennd/ wie der Apostel geschicht vßwysend. Darumb liebe Christen/ hütend üch vor der verfürischenn leer der Widertöuffer. Wo wir jnen wölting glouben vnnd volgenn/ wurdind wir billich für die vngehorsamesten diser welt gehalten/ vonn Gott vnd von den menschen verhaßt vnd verfolget/ vnd durch die verfolgung/ wurdind wir nit marterer Christi/ sonder des tüfels.

Aber ich sag üch/ Vil werdend kommen von Morgen vnd von Abent/ vnd sitzen mit Abraham vnd Isaac vnd Jacob. rc.

Da zeygt der Herr selber an/ das die Heyden söllind zum glouben berufft werden/ vnd die Juden verworffen/ wie dann all Propheten gewyßsagt habend/ sonderlich Esaias/ Oseas/ vnd Paulus. Rom. 9. 10. 11. cap.

Aber die kinder des rychs werdend vßgestossen in die vsserste finsternuß. rc.

Die Juden nennt er kinder des rychs/ dann sy kamend von denen här/ welchen das rych Gottes verheyssen was/ die werdend jrs gloubens halb vßgestossenn in die vsserste finsternuß. rc.

Christus zeygt ouch da zwey ort an der absterbenden. Das erst ist/ das die vßerwelten werdend sehen mit Abraham. rc. Das ander ist das ort der vssersten finsternuß/ da ist weynen vnd zanklaffen. Zwüschend disen zwey orten/ ist kein mittel/ wie die seelenbrenner vom Fägfhür dichtet hand.

Vnd Jesus sprach zum houptman: Gang hin/ dir geschech wie du gloubt hast.

Da sicht man wie krefftig der gloub vor Gott ist/ vnnd das jm Gott nüts versagt. Christus spricht hie: Dir geschech wie du gloubt hast. Vnd ,1. Joh. 5. stadt: Das ist vnser zuuersicht by Gott/ wenn wir etwas bittend nach sinem willen/ so hört er vns.

In summa/ wir habend in disem Euangelio/ die summ eins rechten Christenlichen lebens/ welche stadt in glouben vnd liebe. Wenn wir in disen zwey stucken vns übtind/ vnd mannlich fürfürind/ so wurdind wir ouch Gott so genäm werden/ das er vns in allen nöten wurd hilff vnd bystand thun/ ja er wurd vns durch die trübsal diser welt/ vnd verfolgung der Thyrannen/ zu ewigem rid vnd fröuden füren/ darzu helff vns Gott.

Amen.