Durch Caspar Kantz von Nördlingen.

Wir müssen Christum unsern herren unnd säligmacher zu aller zyt / allein in unß lassen wircken / die vergebung unser sünden. Denn also sagt Gott durch den propheten Ezecchiel ca. xxxiii. Wenn der sünder ein mißfallen tregt über seine sünd / und verbringt das gericht unnd die gerechtigkeit ec. so will ich seiner sünden nit mer gedencken. Das gericht ist nichts anders / denn das der mensch sich selber / in allem seinen thun unnd lassen / worten und wercken erkenne / und urteyle ein armen verdampten sünder / unnd aller plag und straff sich wirdig achte / die selbigen wo sye gott über yn verhengt oder schickt / umb seiner sünd willen und gott zu eeren / willigklich leyd und trag / zu einer buß ec. Die gerechtigkeit ist nichts anders / denn das der mensch in sollichem iamer und verdamniß sein selbs zu gott flyche in rechtem glauben und trauwen / und hoffe das im gott allein auß gnaden umb seins selbs willen / und durch Christum seinen liebsten sun werd seine sünd vergeben. Wie er denn uns sollichs verheyssen hat durch den propheten Esaiam cap. xliiii. Von der volkommenheit des glaubens / stat im cv. psalmen also. Selig seind / die alzeit uben das gericht unnd die gerechtigkeit. Das ist so vil gesagt. Selig seind die menschen / die sich allzeit erkennen / verklagen und richten vor gott / als die armen sünder. Und doch nit verzagen vor dem gericht gottes / sonder zu gottes gnaden zuflucht haben / und im vestigklich vertrawen / er werde inen zu hilff kommen / unnd sye erlösen / von allen sünden / des sie denn von hertzen begeren ec. Von disen menschen sagt David psal. cxlvi. Gott der herr hat ein gefallen in denen die in fürchten / und doch hoffen in sein barmhertzigkeit. Das gericht macht forchtsam. Aber die gerechtigkeit des glaubens / uns in Christo erzeigt tröst und macht frölich. In dem gericht unnd gerechtigkeit / wirdt der mensch und alle seine werck gerecht und gott angenem.

O barmhertziger ewiger gott ich beken und klag dir alle meine sünd. denn ich hab dir allein gesündiget / unnd meine sünd richten und verdammen mich an allen orten. Wo ich bin oder hinflieh / so volgen sye mir nach und stond vor meinen augen. O mein gütiger gott / wie vil sünd hab ich vor dir verbracht / die ich uß scham und forcht / vor keinen menschen verbracht het. Auch bin ich in sünde entpfangen und geboren / und ist all mein leben / thun und lassen nichts denn sünd. Darzu hab ich dein volck mit meinen sünden offt beleidiget und betrübt / darumb ich dich billich fürchten und flyehen solt / als ein gestrenger richter aller boßheit. Aber ich weiß das du ein guttiger gott bist / umb der sünder willen mensch worden / bist kommen in disse welt zu beruffen nit die gerechten / sonder die armen sünder zu der buß. Du hast auch gesagt. Komendt här zu mir alle die ir arbeiten und beschwärdt seind / ich wil euch erquicken unnd helfen. Darumb fleußt mein seel in wanckelmutigkeit zwischen der forcht und hoffnung / yetzt verzwyfel ich uß forcht der sünd / die ich in mir erkenn und entpfind / dan werd ich wider getrost unnd erhebt uß hoffnung deiner barmhertzigkeit. Yedoch die weil dein barmhertzigkeit grösser ist dann mein dürfftigkeit / so will ich allzeit hoffen in dich. Denn du allein bist mein gott und herr / mein säligmacher unnd tröster / mein heyland und einige zuversicht. Darumb bit ich dich demütigklich und hertzlich / durch deines leydens willen und kostbarlichen Bluts / umb vergebung aller meiner sünden / unnd das du seyest mein hoffnung und mein sterck / yetzund auch in der stund meines abscheids. Amen.

Almechtiger Gott mein her Jesu Christe / ich glaub das in dem Brot gegenwertig sey / dein heiliger fronleichnam / unnd in dem wein dein kostbarlichs Blut. Ich glaub auch / das du den leib unnd das blut an dich genommen habest / Adam unnd alle seine nachkomen zu erlösen von dem ewigen tod. Unnd hasts uns verlassen in dem hochwirdigen Sacrament / zu bestätigen deine warhafftige zusagung die sünden zu vergeben / das Bezeugen deine wort / die yetzt in der meß gesprochen werden. Nempt hyn und essent / das ist mein leib der für euch geben wirdt. Nement hyn unnd trincket / das ist mein Blut das für euch vergossen wirdt / zu vergebung der sünden. Uff sollichs trostlichs zusagen beger ich von gantzem meinem hertzenn / in rechter zuversycht unnd gutem vertrawen / das du mich nit lassest heym geen lär unnd hungerig / sonder mich geistlich speisest und trenckest / mit deinem heiligem fronleichnam und rosenfarben Blut / zu vergebung aller meiner sünden uff das ich in warer lieb gegen dir / und Brüderlicher treuw gegen meinen nechsten bestätiget werde. Amen.

O ewiger barmhertziger gott / ich armer ellender sünder / bin berufft und geladen von dir / zu deinem hohen kostreichen abentmal / da du dein eigen leib unnd blut mir zu einer heilsamen speys und volkomnen tranck gnädigklich hast zubereit. Nun erkenn ich mich warlich ein armen unwirdigen sünder / auch der wenigisten gnad bey dir gantz ungemäß. Ich glaub aber on allen zweifel / das du mir dein heiliges sacrament unnd rheylich testament / treulich werdest geben zu einem starcken zeychen / unnd sichern pfand deiner warhafftigen zusagung / die du uns gethon hast mit sollichen worten. Wer mein fleisch ysset / unnd mein Blut trinckt / der bleibt in mir / und ich in jm / und hat das ewig leben / und ich werd in erwecken an dem jüngsten tag. Uff solich dein tröstlich zusagen / beger und wil ich yetzt entpfahen dein heiligen fronleichnam / der für mich dargeben ist in tod. Und dein unschuldigs blut / das für mich vergossen ist zu vergebung aller meiner sünden. Wie wol ich darzu gantz unbereit und des nit wirdig bin. vermag auch durch mein eigne reuw / beicht / Buß / noch andere werck nit rein ( würdig und bereit werden. Darum beger ich von dir meinem einigen gott und heyland / das du mich barmhertzigklich wollest bereiten und würdig machen. Denn darumb das ich ein armer unwürdiger sünder bin / wil ich zu dir / aller sünder trost / fliehen und dich entpfahen in warem glauben. Uff das ich allein bey dir unnd von dir meinem engstlichen gewissen mög ruw und trost finden / und das du in mir bleibend mich dir bereitest nach deinem göttlichen wolgefallen. Ich zweifel auch gar nichtszs / deine krefftige wort werden an mir gentzlich unnd warlich erfüllet / durch welche ich gantz wol getröst / frölich will hin geen zu dir meinem gütigen gott. Unnd glaub vestigklich / das du den leib und das blut an dich genommen habest mich zu erlösen von dem ewigen tod. Darum geschech mir nach deinem wort. Amen. Der rid sey mit mir. Amen.

Zum ersten soll der priester oder ein anderer ein ermanung thun von dem Sacrament / oder sunst etwas tröstlichs uß dem heiligen Evangelio sagen / wie im der geist gottes eyngibt ec. Daranch mag er die beysitzer mit solchen oder andern worten anreden.

Allerliebste in Christe / uff das ir mit frölichem begyrigen hertzen entpfahent den zarten fronleichnam / und rosenfarbes blut unsers seligmachers Jesu Christi / so demütiegent ewere hertzen gegen got / bekennent jm ewre sünd und gebrechen mit hertzlicher begyr unnd sänen nach seiner gotlichen gnad unnd hilff, so will ich yetzt ewr erwölter priester / euch mitteylen die heylige absolution / unnd got für euch Bitten.

Der allmechtig barmhertzig gott / vergeb euch eurer sünd. Unnd ich uß bevelch unsers herren Jhesu Christi / an statt der heyligen kirchen. Sag euch frey ledig und loß / aller euwer sünden in dem namen des vatters / und suns / und des heyligen geysts. Amen.

Die weil ich aber auch beschwert bin mit mancherley gebrechen / so bitten gott treulich für mich / das ich disen seinen dienst jm zu lobe / euch und mir zu trost und heyl möge fleissig ußrichten und volenden. Psal. cxxiii. Unser hilff soll sein in dem namen des herren / der hymmel und erden erschaffen hat.

Darnach sol der priester niderknyen und sagen. Nu laßt uns betten. Sprechend alle heimlich mir mir. Kumm heiliger geist / erfülle die hertzen deiner gläubigen / und entzind in inen das feuer deiner göttlichen liebe / der du durch manigfaltigkeit der zungen die völcker der gantzen welt versamlet hast in einigkeit des glaubens. Alleluia.

O herr allmechtiger gott / hilff das bey uns sey und wone dein heiliger geyst / das er uns erleuchte und lern alle warheit / beschütze und stercke in aller widerwertigkeit durch Christum unsern herren. Amen.

Erhebt ewer hertzen zu gott / und laßt uns dancksagen gott unserm herrn. denn das ist billich und recht. Ja warlich ist es billich und recht auch heylsam / das wir an allen orten und zu aller zeyt dir herr heyliger vatter / almechtiger ewiger gott / dncksagen / durch Christum unsern herren. Durch welchen alle engel unnd die himmelschen kreffte / anbetten / eeren und loben dein herliche maiestat. Mit den selbigen bitten wir / wollest zulassen und annemen unsere stimm / das wir dich auch loben und sprechen on ende. Sanctus. Heyliger / heyliger / heyliger herre Gott Sabaoth. Voll seind hymmel und erd / deiner herrligkeit. Osanna in den höchsten. Gebenedeyt sey der da kompt in dem namen des herrenn. Glück und heyl in den höchsten.

O allergütigister vatter / barmhertziger ewiger gott hilff das dises brot und der wein uns werde und sey / der warhafftig leib / und das unschuldig blut / deines allerliebsten suns unsers herren Ihesu Christi. welcher an dem tag vor seynem leyden nam das brot in seine heiigen hende / sah auff gen hymmel zu dir seinem almechtigen vatter / saget danck segnet und brach das brot / und gab es seinen iungern sprechende. Nement hyn unnd essent. Das ist mein leyb / der für euch geben wirdt.

Des gleichen nach dem obentmal / nam er den kelck in sein heylige hend / dancket / segnet und gab in seinen iungeren und sprach.

Nement hyn und trincket alle darauß / das ist der kelch des newen und ewigen testaments in meinem Blut / das für euch unnd für vil vergossen wirdt zu vergebung der sünden.

Als offt ir dz thut / so thuts in meiner gedechtnis.

Vatter unser der du bis im hymmel. Geheyliget werd dein name. Zukumm dein reich. Dein will der werd / als im hymmel und auff der erd. Unser täglich brot gib uns heut. Unnd vergib uns unser schuld als wir vergeben unsern schuldigern / und für uns nit in versuchung / sonder erlöse uns von übel. Durch unsern herren Ihesum deinen sun. welcher mit dir und dem heyligen geyst ein warer gott lebt und herrscht in ewigkeit. Amen.

Agnus dei.

O du lamb gotes / der du tregst die sünd der welt erbarm dich unser / und gib uns deinen frid. Amen.

O herr Ihesu Christe du ewigs wort des vatters / du heyland der welt / du warer lebendiger gott und mensch erlöß uns durch disen deinen heyligen fronleichnam und rosenfarbes blut / von allen sünden. Hilff das wir erfüllen deine gebott zu aller zeit / und von dir nit gescheyden werden in ewigkeit. Amen.

Nach disem gebett entpfahe der priester das Sacrament / ist er anders geschickt darzu. Und nem darnach ein hostien in die hand / zeyge oder weyse die den Communicantem / und sprech also.

Secht allerliebsten / das ist warlich der heylig leychnam unsers herren Jhesu Christi / der für euch gelitten hat den bitteren tod. Nement hyn und essend in das er euch speyß / nere unnd beware in das ewig leben. Amen.

Der frid sey mit euch allen.

So er sye nu alle communiciert hat mit dem heyligen fronleichnam Christi / sprech er also.

Laßt unns auch trincken den kelch des heyls / und anruffen den namen unsers herren.

Und wann er getruncken hat / sol er sich mit dem kelch oder becher zu inen keren / und also sprechen.

Secht das ist warlich der teur schatz des kostbarlichen bluts unsers herren Jhesu Christi / damit ir erkaufft seyt. Nement hyn unnd teylents mit einander / zu abwaschung ewer sünden.

So das geschehen ist / soll der priester nider knyen unnd dancksagen.

O herr nu laß im frid deine diener nach deinem wort. Denn unsere augen haben gesehen dein heylan. welchen du bereitet hast vor dem angesicht aller völcker. Ein liecht zu erleuchten die heyden / unnd zu einer glory deins volcks Israhel.

Dir sey lob / eer / unnd danck / o du heylige / gebenedeyte / herrliche dreivaltigkeit / Gott vatter / sun / unnd heyliger geyst. Amen.

Item zu dancksagung mag man sprechen.

Te deum laudamus.

Gott dich loben wir / dich herr bekennen wir. O ewiger vatter / dich eeret das gantz erdtrich. Alle engel / mit allen krefften der hymmelen schreyen dir mit on uffhörlicher stimme. Heyliger / heyliger / heyliger herre got sabaoth. Voll seind hymel und erden der glorien deiner maiestat. Dich lobet die heylige versamlung der Aposteln. Die löblich zal der propheten / Unnd das scheinbar hör der märterer. Dich bekent die heyligen christenheit durch den umbkreiß der gantzen welt. Einen vatter der ungemessen herligkeit. Unnd deinen einigen waren erwirdigen sun. Auch den tröster den heyligen geyst. O Christe ein künig der eeren. Du bist des vatters ewiger sun. Du hast nit gescheucht der jungkfrawen leib anzunemen die menscheit. Du hast überwundenn des tods angel / unnd den gläubigen uffgethon das hymmelreich. Du sitzest zu der rechten / in der herrlicheit gott des vatters / und würst geglaubt ein zukünfftiger richter. Darumb bitten wir dich / das du helffest deinen dienern, die du mit deinem kostbarlichen blut erlöset hast. Uff das wir in ewiger glory belonet werden mit deinen heyligen. O herr mach sälig dein volck / und segne dein erbschafft. Regier und erheb sye in ewigkeit. Denn wir loben dich alle tag / unnd preysen deinen namen von welt zu welt. Herr bewar uns disen tag vor sünden. Erbarm dich unser o herr / erbarm dich unser. unnd beweyß uns dein barmhertzigkeit / als wir dann in dich gehofft haben. Herr in dich hab ich gehofft / laß mich nit geschendt werden in ewigkeit. Amen.

O gütiger barmhertziger gott / ein sterck aller die in dich hoffenn / hilff das wir also wandlen durch das zeytlich / uff das wir nit verlieren das ewig. Durch Christum unsern herren. Amen.

O du heylige dreyvaltigkeit / laß dir wolgefallen unser lob unnd dancksagung. Mach vest unnd stet das werck das du in uns verbracht hast. Hilff das uns fruchtbar und fürderlich sey in das ewig leben.

Amen.

Aus dem Original abgeschrieben.