Das vierdte Glaß ist/ Fraterna utilitas, Brüderlicher nutz/ Gedenck was grossen nutz/ deinem freund/ auß dem tod entspringe/ sihe auß was jamers/ leidens vnd elends/ das in diser zeit ist/ er hingenommen wirt vnd entladen/ wer wolt erzehlen die vnseligkeit/ so alle menschen (sie seyen in was stands sie wöllen) erleiden müssen/ es bedörffte eines eygenen grossen Buchs/ das alles zu erzehlen/ Lise S. Augustinum im Buch von der statt Gottes/ lise Maffeum Vegium im sechsten Buch am ersten Capitel/ lise Franciscum Petrarcham/ vom Glück vnd vnglück/ desgleichen in einer Epistel von disem leben/ so findest du wunder daruon/ was ein mensch doch leiden muß/ in leib vnd seel/ heut gesundt/ morgen siech/ heut frölich/ morgen traurig/ jetzt in ehren/ morgen in schand/ jetzt reich/ morgen arm/ jetzt gelobt/ morgen gescholten/ heut gnediger Herr/ morgen stosset man die zungen vber dich auß/ vnd macht dir Eselohren/ heut lebendig morgen tod/ was sol ich vil sagen/ ich sprich mit dem Job/ Der mensch geboren von einem weib/ lebt ein kurtze zeit/ vnd wirt erfüllet mit vil vnseligkeit/ dafür hilfft weder goldt noch silber/ weder Edelgestein noch Bärlin/ weder Sammat noch Seiden/ weder gewalt noch Adel/ weder kunst noch vernunfft/ nun wolan/ auß disem jamer ist dein lieber freund hin genommen/ auß diser kahtlachen gezogen/ vnd auß disem schweißbad gangen/ da du noch innen sitzest/ was ist daß/ das du also klagest/ vnd so vnuernünfftiglichen trawrest/ wann wir in diser welt/ kein vnseligkeit vnnd widerwertigkeit nit hetten/ sonder alle ding nach vnserem willen giengen/ so wer es nicht ein wunder/ das wir vnsere abgestorbenen freund beweinten/ so wir aber ansehen den jamer/ noht vnd das elende leben diser welt/ so osltne wir billich messiglich frölich sein/ so vnsere lieben freund von hinnen auß disem jamerthal scheiden.

wie gut vnd nutzlich es seye/ auß diser welt fahren (spricht Cyprianus) hat Christus selbs der Meister vnsers heils vnd nutzes angezeigt/ welcher/ da seine junger trawreten/ von wegen das er sprach/ er wölte jetz hingehen/ sie also anredt/ vnd sprach/ Hetten jhr mich lieb/ so wurden jr euch frewen/ Dann ich gehe zum Vatter. Damit hat er gelehret/ das wir mehr freud/ dann leid haben vnd tragen sollen/ wann vnsere geliebten von hinnen auß diser welt scheiden. Nun so sprichst du/ Ja wenn ich wißte das mein freund auß disem jamerthal käme in ewige fröud/ ich förcht aber das er vom Karren diß elends/ gespannen werde in den Wagen des ewigen fewers/ es darff sich ein Dieb nicht frewen so man jhn auß dem Thurn lasset/ vnd jhn an Galgen führet/ Er ist in Todtsünden villeicht gestorben/ ohne rechte rehw vnd besserung seines lebens/ darzu so ist er villeicht all sein lebtag/ ein Weltmensch gewesen/ vnd Gott nie recht vor augen gehabt/ allein seinem mutwillen nach gelebt.

Ich sprich aber zum ersten/ Es weiß niemandts wie er sich an seinem letsten ende hat gehalten/ ob er villeicht rehw vnd leid gehabt/ vnd rechtgeschaffne buß gethan/ vnd jm also durch Gott gnade beschehen/ derhalben so gebe sich niemandts leichtfertig in solche gefahr/ damit es jm nicht fehle/ dann vnder hundert tausend deren so jr rewen sparen biß auff das letste/ nicht einer wirt behalten/ als der H. Lehrer Jeronimus spricht/ vnd das alles in Angelica bestetiget wirt/ daran ich dann keinen zweiffel hab.

Ich sprich zum andern mal/ Ist dein freund in Todtsünden begriffen vnd also gestorben/ vnd zu der Hellen gefahren/ So trawre nicht/ er sitzet da er sitzen soll/ vnd nirgend rechter/ ein Dieb gehört an Galgen/ vnd ein Mörder auff ein Rad/ vnd ein Bawren vygel inn ein profeit/ Sich frewet der gerecht/ so er sihet die gerechte vnd billiche straff vnd raach Gottes/ Wißte ich meinen Vatter/ spricht S. Augustinus( in der Hellen/ ich wolte nicht für jhne bitten. Judas sitzt als füglich inn der Hellen/ als S. Peter im Himmelreich/ Gang müssig/ schaw in das erste Hauptglaß in den willen Gottes/ das eingeweid gehört auff den mist den Rappen/ das Veldthun auff den Tisch für die Herren/ das volck gehört nicht iin Himmel/ es solle sein der schemel/ der füssen Gottes.

Ach Gott sprichstu/ hette er lenger gelebt/ so hette er sich villeicht bekehrt/ Wie kan jhm das zu nutz dienen/ das er in seinen sünden tod ist?

Ich sprich zum dritten/ es wer zu besorgen gewesen/ er were nicht besser worden/ ob er schon lenger gelebt hette/ dann so bald Gott einen menschen/ durch den tod hinweg nimpt/ so were der selbig mensch hinfüro doch nit mehr besser worden/ als S. Johannes der gulden mund offentlich spricht/ vber Mattheum inn der ein vnnd dreisigsten ermanung.

Ich sprich darzu weiter/ das es jhme zu nutz diener/ das er tod ist/ auch inn seinen sünden/ dann dardurch hört er auff sünden/ das er sonst nicht thäte/ vnnd wurde hertigklicher verdammet/ als vor gesagt ist/ auß der meinung Johannes Chrysostomi.