DEr Engel sprach zu dem hirten/ Fürchtet euch nit/ Sihe/ ich verkündige euch ein grosse frewde/ die allem volck widerfaren wirdt. Denn euch ist heut geborn der Heyland/ welcher ist Christus der Herr/ in der stadt Dauid.

DIse Engelpredigt lehret vns/ wie wir von der geburt/ vnsers lieben Herrn Christi halten/ vnd vns dagegen stellen sollen. Er heist die Hirten frölich sein/ vnnd sich gar nichts förchten/ vnd sagt des vrsach/ Darumb das der heyland geborn sey/ der helffen vnnd retten soll/ nicht wie weltliche König/ wider zeytliches vnglück/ sonder wider die sünde/ den tod vnd alles vnglück/ so auß der sünden herfleust. Denn solches zeuget das wörtlein Christus/ das dises kind der gesalbte Gottes sey/ dauon Gott im Paradiß verheyssen hat/ Er soll der Schlangen den kopff zertretten/ vnd dem Sathan alle seine macht vnd gewalt nemen. Darumb sollen wir dises kindlins vns auch von hertzen frewen/ vnnd mit den Engeln singen: Ehr sey Gott in der höhe/ vnnd fride auff erden/ Vnnd/ den menschen ein hertzliche freud vnd wolgefallen. Denn wir sollen Gott von hertzen darumb loben vnnd dancken/ der durch dises kind aff erden frid gemacht/ vns mit Gott versünet/ Vnnd des Sathans Tyranney gewehret hat/ Sollen derhalb frölich sein vnd guter ding/ vnd an disen trost in allem vnglück vns halten.

HErr Gott himlischer Vatter/ wir dancken dir deiner grossen gnad vnd barmhertzigkeyt/ das du deinen eingebornen Sun inn vnser fleisch kommen/ vnd durch jn/ vns von sünden vnd dem ewigen tod/ genediglich hast helffen lassen/ Vnd bitten dich/ erleuchte vnsere hertzen/ durch deinen heyligen Geyst/ das wir für solche deine genad dir danckbar sind/ vnnd der selben vns in allerley not vnnd anfechtung trösten/ vnd also durch deinen Sun/ vnseren Herren Jhesum Christum/ ewig selig werden/ AMEN.