WArhafftiger/ Ewiger/ Almechtiger Gott/ Vatter vnsers Heylandts Jhesu Christi/ schöpffer himmels vnd der Erden/ sampt deinem ewigen Son/ vnd heyligen Geyst/ wir bekennen/ das wir leider vil sünde haben/ vnd nicht allein vnwissentlich/ sonder auch wissentlich mit grosser vndanckbarkeit gesündiget/ vnnd haben deinen zorn vnd straff wol verdienet/ vnd haben ein herzlich mißfallen an vnsern sünden.

Wir bitten aber von hertzen/ du wöllest vns alle vnsere sünde/ vmb deines lieben Sons willen Jesu Christi/ den du zum versöner gesetzt hast/ gnediglich vergeben/ vnd mit deinem heiligen Geist vnsere hertzen regiern/ das wir in rechtem glauben/ rechter anruffung/ rechtem gehorsam für dir allezeit leben.

Vnd ddieweil du sihest die grosse not vnser Herrschafft/ vnser aller/ man/ weib vnd Kinder/ vnd wir one deine hülff keinen schutz haben/ Erkennest auch aller Menschen hertzen/ vnd sihest das vnsere Feinde fürnemlich suchen vertilgung rechter lere/ vnd auffrichtung vnd bestettigung jrer schendlichen Abgötterey vnd vnzucht/ So bitten wir dich von hertzen/ durch vnsern Heilandt Jesum Christum/ du wöllest vmb deiner Ehre willen/ vnser Herrschafft/ vnser Kirchen/ vns/ vnser kinder vnd heußlin/ gnediglich jetzund vnd allezeit schützen vnd bewaren/ wie du dein volck Israel im roten Meer erhalten vnd geschützet hast/ vnnd wöllest der feinde rath vnd macht zerstören/ vnd die mördische frembde Nation/ jhre vnzucht vnd grausamkeit nicht an vnsern Weib vnd Kindern üben lassen.

Du wöllest auch vmb deiner Ehre willen/ fürthin deine lere vnd Christliche selige regiment/ in disen Landen gnediglich erhalten/ vnd vnsere Herrschafft mit deinem heyligen Geyst/ zu Christlicher seliger regierung neigen/ das sie vnd die Vnterthan/ in rechter erkentnus Jesu Christi/ in rechter anruffung vnd gehorsam gegen dir/ vnd in frieden leben vnd bleiben/ vnd dich ewiglich preisen vnd dir dancken. Du hast gesprochen/ Ruff mich an in der not/ so wil ich dich erhören/ das du mich preysen solt/ Solche deine wort sind one zweiffel war/ Darumb bit ich dich/ du wöllest vns in diser grossen not auch erhören/ vmb deines Sons willen Jesu Christi/ vnnd wöllest vns gnediglich bewaren/ AMEN.