Gemayn Schlußred. durch Theobaldum Pillicanum/ Geprediget zu Nöllingen.

M.D. xxiiii.

IN der Mess seind zway ding/ sunders an zusehen. Das erst ist die maynung/ darinn die Mess gelesen wirdt vnnd auffgestelt ist. Das ander seind breüch vnd zusetz in eusserlichen yebungen.

Von dem ersten/ das ist die maynung der Mess das die Mess sey ain teglichs opffer/ für die lebendigen vnd todten/ darinn teglichen Christus für die sünd der welt geopffert wirdt.

Darumb seyn auch die Pfaffen von den Bischoffen/ als ain sonder gesegnet volck/ mit newer maynung/ yebungen/ vnnd breuchen angericht. Darumb seynd auch die jarteg für die todten/ das lesen für die wandler/ jeger/ yetzigen vnnd der gleychen angericht.

Darumb auch das fegfewer so hart helt/ dann die Mess wirdt geopffert für die todten/ sy zu erledigen. Wa nun kain fegfewer ist/ So ist auch das lesen für die todten vergebens.

Von den andern der breüch halben/ So kumpt daher das seltzam weyhen/ mit Platten, Pfaffenröcken/ ölungen/ Darnachh der kasten mit Messgewanden/ Almen/ kaßlen/ allerlay farben/ mitt newem segen vnnd wunderlichen breüchen. So kumpt auch daher die hostien in drey tayl getailt wirdt/ vnd anders die maynung der Mess/ das sy sey ain opffer für die todten vnnd lebendigen/ das dann teglich geschicht/ ist die ergest vnd bitterest sünd/ vnd lesterung der erlösung christe/ der ja in die welt kommen ist.

Dann Christus ist ain mal geopffert/ für der gantzen welt sünde/ vnd wirdt nymmer mer geopffert Hebre. viiij. vnd Roma. x. Vnd das ist geschehen zu den zeytten seynes lebens.

Da er seyn leyb hat geben für vns dar. Vnd dar durch hatfür die sünde der forigen veter/ Col. iij. vnd der zkünfftigen Johan. ij. gnugthon/ das ist hatt widerlegt den zorn Gottes Col. iij. Ephe. i. vnnd ij. Colo. ij. Da er seyn blutt hatt vergossen vnd also aller seligen gerayniget/ vnd sy angenem gemacht dem vatter.

Solchs opffern Christi/ geschicht nit mer/ dann er ist nit mer sterblich/ Rom. vj. Sonder es wirt ewig/ wie er ain ewiger priester ist/ Psal. c. viiij. Vnnd ist ain mal in den hymel gangen/ das ist er hat ain mal vns erlöst durch sich.

Solchs opffer/ gedechtnuß/ hatt er eingesetzt/ vnd die seinen/ das sy weren der erlösung durch jn gewiß/ das sy dann belangt/ der den leyb vnd das blutt nyeß/ damit ermant sy auch/ das sy erkenneten wa durch sy erlößt weren Luce xxij. 1. Cor. xi.

Darauff ain newes opffer ist/ Christi erlösung vernichten/ vnd vnsern gantzen glauben sambt dem herren christo verwerffen/ vnd ain andern weg zu der seligkait suchen/ die weyl das erst nit genugsam würt geacht.

Also ist die Mess ain geschwinde lesterung vnder dem namen Christi/ Christum frey verlaugnen/ seyn opffer außtilgen/ vnd es vnkrefftig machen/ vnd nit gnugsam für die sünd rc.

Vber das so ist auch die gantz maynung vnd ordnung Christi auffgehebt/ dann er hatt vnns eingesetzt/ seyn leyb zu nyessen/ seyn blutt zu trincken/ yederman/ das sy darinn sich trösten gemaynklich/ vnd der erlösung gedencken.

Herauß folgt/ das alle abgestorben durch die Mess/ der Pfaffen/ haben ain grewel über sich lassen bereden/ der villeycht jnen on schaden ist/ dann gott erhelt seyne hayligen in dem fewer.

Vber das folgt/ das die Mess für die todten/ ist nichts dann ain abkeren von der waren erlösung Die milte erdichte erlösung durch die Messen/ vnd auff die höchst Gottes lesterung.

Es folgt auch darauß/ das für die lebendigen ain gleycher spot/ also die Mess ist/ das sy ain teglich opffer nemen für die sünd/ damit das sy gott über die todten vnd lebendigen erzürnen/ das er verwerff die gantz Kirchen auß den hayden.

Es folgt auch/ das solch sonder priester/ seynd nichts dann nachtail Christenlichs glaubens/ vnd zertrenner der aynigkait des gaysts/ vnnd seynd der hauff des widerchrists.

Was ist grössers dann die erlösung Christi am Creütz/ Darumb was ist ergers/ dann die selben vernichten/ vnd ain teglichs auff dem Altar anrichten. Christi opffer erlöset all glaubigen/ der Pfaffen opffer verdampt all irrigen.

Darumb soll kain Mess/ für die todten oder lebendigen/ für die oder ander sachen ymmer gelesen/ gesungen/ oder angericht/ bey verlust ewiger seligkait.

Der betrug halben/ ist kain sunderer far darinnen/ dann das ain vnnützer kost wirdt den armen abgewendt/ vnd ain Spiegelfechten/ betreügt das arm Christen volck/ auff dem newen won. Die mess soll von dem rechten priester (wann das volck soll bericht werden) gehalten vnd angericht werden/ Das er segne/ predige/ vnd dem volck die erlößung Jhesu Christi vnnsers herren verkünde. 1. Corinth. xj. Er soll nicht opffern/ nicht brechen/ nicht nyessen/ dann mit den andern brüdern.

Vnd das soll on schaden/ bracht/ kosten/ oder anders/ vnd zur wuchen auff den sontag/ oder sunst angestelt werden/ vnnd die glaubigen mitt lobgesang zu tisch sich yeben/ das einmütigs mit grossem ernst/ vnsers herren reych/ vnd erlösung vns betreffen wirdt/ gelobt vnnd geyebet/ vns zu der ewigen seligkait dienstlich.