Bugenhagen, Johannes - Des Pomern bedencken von der Messe.

DAs ist yhe ein wunder: das die leut teglich wollen Mess horen vnd sehen/ vnd bisher nichts widder gesehen noch gehöret haben.

Denn Christum höret man/ wenn das Euangelium gepredigt wird.

Christum sihet man/ wenn man dem gepredigten Euangelion glawbt.

Das zeychen aber/ das ist/ das Sacrament/ seynes fleysch vnd bluts hat Christus nicht zusehen geben (will geschweygen/ das man das Sacrament nicht hören kan/ sondern alleyn die predig dauon) Sondern hats vns gegeben zu essen vnd zu trincken.

Derhalben ist es keyn gedenck zeychen/ wenn du es sihest/ sondern wenn du es issest vnd trinckest.

Denn Christus sagt/ So offt yhrs esset vnd trincket so thuts zu meynem gedechtnis.

Begerestu dises gedenck zeychens von hertzen teglich/ iss vnd trinck es teglich/ vnd befilh die sach keynem andern fur dich zu essen/ vnd zu trincken/ So wurdestu nach Christus aussatzung thun.

Du solt es aber nicht essen noch trincken/ es werd denn darneben gepredigt die vergebung der sunde/ vnd das Christus fur vnsere sunde am Creutz gnug gethan hab.

Denn dis Sacrament ist eyn losung vnd zeychen des gantzen Euangelion/ wenn so du es issest vnd trinckest/ so betrachtestu/ das Christus leyb fur dich dar geben/ vnd seyn blut fur dich vergossen ist/ am Creutz zur vergebung der sunde.

Damit hynfelt alle Bepstliche gnugthuung vnd alle menschliche gerechtickeyt zusampt allen verderblichen secten.

Denn so du nicht dem herrn Christo alle gerechtickeyt zu schreybest/ so bistu dises Sacraments vnwirdig.

Das ist eben das/ so S. Paul sagt/ so werd yhr den todt des herrn verkundigen/ bis er kompt/ so offt yhr werdet essen vnd trincken.

Darumb suchen die meynes achtens alleyn eyn verblumung yhres Gotlosen wesens/ die do sagen/ das sie dises Sacraments so seer begirig sind/ vnd wollen seyn doch mysbrauchen wider Christus aus satzung/ die des Euangeliums Christi des zeychen des Sacrament ist nicht eyn har achten.

Die Fursten leyden die felscher yhrer brieff nicht. Warumb misfelt vns denn die aussatzung Christi. Ja warum wird sie von vns verkeret vnd vmb gestossen? Gott sagt selbs Deuteronomij am achtzehenten Capitel/ Eyn yder der disen Propheten Christum nicht horen wird/ an dem will ich mich rechen.

Quelle: Etliche Christliche bedencken von der Mess vnd andern Cerimonien.
Johan. Pomer.
Philip. Melanchthon
Wittemberg
1525

autoren/b/bugenhagen/messe.txt · Zuletzt geändert: (Externe Bearbeitung)