HAbe yedermann rüw vnd leid über sin vnd der gantzen wält grosse vnd schwäre sünd.

Bitte Gott yedermann/ das er vns allen die sünd verzyhen/ vnd vns gnädig vnd barmhertzig syn wölle.

Wüsse yederman/ dz er kein teil haben wirdt an dem rych Gottes/ vnd ewigem läben/ dann vß der luteren einigen gnad vnnd barmhertzigkeit des Allmächtigen Gott vnd Vatters.

Wüsse yederman/ das vns Gott die selbig gnad vnnd barmhertzigkeit bewysen wil: Aber vß keiner vrsach/ dann allein vß siner vätterlichen liebe. In keines nammen oder verdienst/ dann sines Suns Jesu Christi. Vnd keinen menschen/ dann die das gloubend/ vnnd sich deß zu jm versehend.

Vmb die gutthaat Gottes willen/ habe Gott yederman lieb von hertzen/ vnd diene jm sin läbenlang nach sinem willen.

Habe yederman sinen nächsten lieb/ vnnd thu niemands dem anderen leids/ sunder vil guts/ dann Gott hats vns ouch thon.

Sye yederman gedultig in allerley trübsal/ vnd trage sy willig: sy kumpt von Gott dem vatter/ vnd dienet sinen kinden zu gutem/ vnnd wirt nit lang wären/ so wirts ouch mit ewiger fröud vergolten werden.

So dann Gott kumpt/ vnd wil vns vuß diser zyt beruffen/ so lond vns frölich vff Gott dahin faren/ vnd der welt gern vrlob geben: dann wie vil Gott mü vnd Arbeit an die wält gelegt hat/ vnd täglich legt/ noch ists ein ergerliche vnd schandtliche wält vff allen syten/ vnd da sy meint am besten zusyn/ da sols gar nichts.

O das sy vns in vnseren hertzen recht erleide/ vnnd vns Gott mit sinem Rych warlich lieb werd/ Das wir ein gottsförchtig/ liebrych/ vfrecht vnd redlich läben fürind/ vor Gott vnd allen menschen/ verzeerind also die kurtzen vnd letsten tag vnsers läbens/ in dem dienst deß Allmächtigen Gotts vnd Vatters im himmel/ Damit wir nach disem zyt ewigklich behalten vnd sälig werdind. Da helff vns Gott zu/ Amen.