der ein Pfarrher vnd dyener ist im wort Gottes zu Straßburg. Von wegen grosser lügen vff jn erdiecht.

Darinn ettlich stoltze Sophisten angriffen sein/ als D. Murnar. D. Jo. Cocleus Bruder Conrad Treger/ Augustiner ordens Prouincial so iüngst mit vil lügen die Christlichen prediger vnderstanden hat zu verunglimpffen.

Was schwach ist vor der welt/ das hat got erwelt/ das er was starck ist/ zu schanden macht.
1. Corint. i.

Mein schuldigen vnderthenigen/ gehorsamen vnd willigen dienst mit darreichung aller geistlichen vnd leiplichen gaben/ meiner eeren/ verstantnuß/ leyb vnd lebens/ mit sampt meim ruffen seüfftzen vnd gebett gegen got/ enbiet ich Katharin schützinn allen erwölten liebhabern göttlicher warheyt/ mit hertzlicher wünschung gnaden/ frieds vnd heyls von got vnserm vater vnd dem herrn Jesu Christo.

Ich hett mir fürgefaßt/ so ich etwas nach der gegeben goben gots/ durch geschrifft wolt lossen außgon/ Wolt ich ettwas nützlichers vnd nottürfftigers haben gemacht/ dann das/ so in disem büchlin verfast ist/ als ich dann noch vil geschrifften hinder mir hab/ die dan ichan ettlich personen geschickt hab/ die villeicht den gleubigen vil nützlicher vnd nottürfftiger werend dann diß/ vnd aber nach bißher hinder mir behalten/ aber das auß ettlichen vrsachen/ als ich hoff/ brüderliche lieb berüren. Das ich aber yetz hie schreib/ bekenn ich/ villeicht nit seer nützlich nach notturfftig sein/ Dann es allein berüren ist mein Eegemahel Mattheum Zell/ verkünder des worts gotts/ der Christlichen gemein zu Straßburg/ der dann mit solchen grossen lügen versagt wirt vnnd lang zeyt her ist worden/ das mich solchs zu schreyben dannocht bewegt hat/ auß vrsachen/ nemlich so ich bedacht hab/ das abertriben/ vnd erschrecken/ das so manig frum/ einfaltig mensch ab solichem reden empfaht/ so es hört soliche vnchristliche ding/ mit solchem grossen freuel vnd gewalt reden.

Zum andern/ sein vnschuld/ vnd aber eim yeden Christen gezimpf sein nechsten als sein mitglid in Christo zuuerantworten vnnd jm bey zuston/ so er vnrecht leydet/ wie er wolt das jm auch geschee/ dann got sagt Deutero. vi. Hab dein nechsten lieb als dich selbs/ Nun würd ich mitt lügen versagt/ das der einfaltig würt dardurch abgeschreckt/ vnd ich sihe das dasselb nit allein mir schedliich ist/ sundern auch andern menschen/Wie gern möcht ich haben dz ich versprochen vnd mein vnschuld angezeigt würd/ Ey wie möcht ich mich dann enthalten/ so ich glaub den worten gotes das meinem nechsten nicht auch zu thun? Nit darumb das er mein Eegemahel ist/ sondern allein/ das er mein mitglid vnd bruder in christo ist/ anders wer es nit nach götlichem wort/ sunder nach menschlicher lieb gehandelt/ dann in gott vnd Christo/ ist weder man nach weyb/ oder kein person anzusehen nach zu kennen. Denn das wort gottes handelt allein im geyst/ wie wol er solchs nicht begert/ auch gar nit vmb diß mein schreyben weyst/ vnd glaub gentzlich so er das erfaren hett/ mir solichs nit zugelassen/ dann er bedenckt die wort Christi/ dy er denn teglich predigt/ da er sagt Mat. v. Selig sint jr wann euch die menschen schmehen vnd verfolgen vnd reden allerley args wider euch so sy dann ligen/ vmb meinet willen/ habt freud vnd wonn/ es wirt euch im hymmel wol belont werden.

Vnd got so vil mal in der geschrifft sagt/ laß mir die rach/ ich bin der recher/ so kan ich aber mich in meiner conscientz nit entschuldigen vnnd bereden/ das ich darzu schweigensol/ als ich bißher/ über so grosse teüfelische lügen von mir außgeben vnd gesagt seind worden/ thon hab/ ja in selber auch nit in disem/ denn eim Christen gezimpt wol vnnd hört zu/ zu leyden/ aber nit gar zu schweigen/ das dann ein halbbekennen ist/ vnd ich wol gesehen hab&/ was mein zuuil gedult that hat/ nemlich eben das/ so ich also gar nit versprochen hab/ der grossen lügenhafftigen schmach/ so mir ist gescheen/ das gut vnd böß dardurch sind argwänig worden/ Ich sey schuldig/ o schon die gutten mein gedult haben angesehen vnd bedocht/ haben sy es doch in solcher gestalt bedocht/ als ob ich thu wie einer den man henckt/ der spriche zu n herrn vnd hencker/ Ich verzeihe euch allen/ vnd wil diß/ schmach vnd todt mit gedult leyden/ dann ich habs verdient/ Also habens sy mein gedult auch vffgenommen/ vnd dann dardurch sich geergert/ wie dann das flesch nit nachlaßt/ habent einander gesagt/ vnd die aller frümbsten vnd wissenhafftigsten bey jn selbs gedacht: Ist das jr Euangelium/ folgt das auß jren predigen? so will ich jr müssig gan/ vnnd bey meinem alten wesen bleyben. Ist der yetz nit an mir geergert worden? das ist böser worden. Dann ergern kumpt von argen vnd arg heißt böß/ So sagt Christus/ we dem der ergernuß gibt/ jm wer besser/ ein mülsteyn an sein halß gehenckt vnnd ins moer geworffen/ Nun kan ich mich selbs diß vrteyls nit vnschuldig sagen/ dann ich weyß kein schedlicher ergerung/ dann die im glauben/ Nun kumpt ye der glaub vß dem gehörd vnd das gehörd auß dem wort Nun kumpt manig frum mensch in ein solichen vnwillen/ gegen denen/ so solich lügen vff gesagt werden/ die da verkünder vnd fürer des Euangeliums sind/ das es gedenckt vnnd sagt/ Solt ich das gottswort von solichen leütten hören/ vnd ein Christlich leben dauon leren füren/ die also stracks darwider thun vnd leben? das wöll gott nit/ vnd kert sich dann zu andern die ein gleyßnerisch geystlich leben füren/ aber on got/ vnd wil dann von dem selben leben lernen gott dienen/ vnd kumpt also vmb seinen glauben/ den es auß dem wort gots empfahen solt.

Hett ich aber/ wie dann eim Christen gebürt/ solich schmach vnd lügen mit gedult gelitten/ wie Christus leert/ aber dabey/ vmb der einfeltigen willen mein vnschult in sollichem angezeyget. Lieber fründe ich bin alles übels vor gott schuldig/ wie der Prophet sagt/ Aber in disem eusserlicchen werck der sünden/ thustu mir vnrecht/ bezeüg ich mitt Gott/ aber gott well dir verzeihen/ ich will/ so du dich der warheit nit wilt lossen beriechten/ solchs gedultiglich mit Christo leyden/ der mich leert dem bösen nit widersteen/ vnd den andern backen auch dar zuheben so man mich an einen schlecht/ vnd den mantel zum rock lassen faren/ Dann möcht ich für got entschuldigt sein/ vnd also frölich in gedult leben des worts Matt. v. Selig sind jr/ so euch die menschen schmehen vnnd verfolgen/ vnd alles übel wider euch sagen/ vnd liegen vmb meins namens willenn/ habt freüde vnd wunne/ euwer lon ist groß im himmel/ Also thet auch Christus da jn Annas knecht ins antlit schlug/ da schlug er nit wider/ flohe auch nit/ widerstund dem übel gantz nit/ wie er daruor seine jünger gelernt hett/ er schwig aber nit still darzu/ als ob er jm recht thet/ sunder er sagt/ hab ich übel geredt so gib gezeügnuß/ hab ich aber nit/ warumb schlechstu mich/ dann es ist genug das wir Christen vnrecht leyden/ wir sollen nit vnrecht für recht bekennen/ das schweigen ist kein gedult/ das leyden ist gedult/ ich soll jm mein vnschuldt sagen/ vnd darnach so er sich nit wil daran keren/ sein vnrecht leyden/ sunst gib ich jm mit meinem stillschweigen vrsach/ vff seiner erdachten lügen zu beharren/ vnnd das ist meins vrteyls/ wider brüderliche lieb/ dann ich vngern wolt in irrung vnd lügen vlossen sein on bericht worüber sol ichs das auch nit widerumb meinem nechsten thun/ vnd sunderlich den frummen/ die dannocht alle weg der warheit begeren/ beriecht zu werden. Diße vnd dergleichen vrsachen habent mich yetz bewegt zu schreyben/ des ich doch sunst nit willens byn gesin/ darumb ich dann hie den gutten vnd bösen schreib/ den gutten zu nutz vnd lieb das sy der warheit beriecht werden/ vnd sich vor solchen teüfels kyndern wissen zu hütten/ vnd jren worten nit glauben geben/ dann sy nit anders sind dann des teüffels postbotten/ die er allenthalben außschhickt/ gleich wie ein zeyttlicher herr/ der ein groß her volcks in sein landen ligt/ die zu gewinnen/ so hat er allenthalb schnelliglich sein botschafft zu warnen vnnd zu bewaren/ auch an die ort da er förcht sy nach hyn kommen werden/ also thut der teüffel auch/ er sicht das gott ein heer mit starckem züge/ das sind seine diener/ mit verkündigung seins worts/ das so starck ist/ das es himmel vnd erden vnd alle creaturen geschaffen hat/ vnd ein zweyschneydigschwert ist/ wie Paulus sagt Hebre. IIII. yetz in allen landen hat ligen/ die zu gewinnen/ die so lang irr sint gangen/ wie die schaff on ein hirten/ das thut dem teüffell wee/ vnnd mag das nit leyden. Da schickt er denn auß solche seine botten/ das sy sollenn waren/ die feindt seyen gifftig vnd böß/ das sy ddie nit inlassen/ das ist mit solchen grossen lügen / die auch ein ansehen haben/ wil er das volck allenthalb bereden/ das sy sich darab schüwen vnd wol hüten vnd solichs wort nit zu jnen lassen. Da schelten sy die leer/ wie schädlich die sey/ da das leben/ wie bübisch vnd böß das sey/ vnd seint aber nicht so frum vnd geleert/ das sy deren eins mit der heyligen biblischen geschriff (vff die man sich doch allweg berufft) darthun/ vnd das auch nit vermögen zuthun.

So hat aber gott auch seine botten/ die frumen Josue vnd Caleph/ die seim volck sagen/ die leütt seint frum/ begerent dass volck auß dem eysenen offen der schwert gefecnknuß Egypti in das gut land/ ds gelobt erdtrich zu füren/ das ewig vatter landt/ wie es dann auch was zu den zeyten Moysi/ da die x. falschen kuntschaffter/ das volck forchtsam machten/ das sy nitt in das gut land wolten. Schüchtern auch die bösen menschen/ daruon sy jn sagten/ Aber nit dester minder liessent die zween/ Josue vnd Caleph nit ab/ ermanten das volck hyn ein zu gan. Da sy aber jnen nit folgeten/ sunder den .x. bösen/ da fiel der zorn gottes auff sy/ das sy auch nymmer hin ein komen/ da sy gern hetten gewölt.

Also lugent alle die so yetz berufft werden für sich/ das sy nit vmb der lügenhafftigen willen/ jn zu glauben außscchlagen/ das jn hernach/ so sy gern wolten/ nit meer werden mag. Dann Josue vnd Caleph werden das yr thun/ jr bottschafft so jn gott befolhen hat sagen/ vnd darnach sy in das gut land gan vnd das ein nemen rc.

Das hat mich auch geursacht allen guthertzigen/ nit in diser statt/ die gnug hörn vnd wissen/ sunder in andern landen/ da solich schrecklügen hyn kommen/ zu schreiben/ das s sich in solchem wissen zu halten. Auch schreib ich in disem vnd andrem den bösen/ jnen zu einer schand/ so sy also vngefüge Ryßen lügen haben erdacht/ Vnnd aber darin erfunden werden als lügenhafftig/ das sy sich müssen schämen/ Dann Paulus auch seim jünger Timotheo befalhe/ das er die/ so offentlich sündten solt offentlich straffen/ vff das die andern forcht haben. Also wil ich auch thun/ ob doch gott der mol eins wolt solchen harten halßbeinigen gnad geben/ dann sy solche lügen in alle land haben gespreytt/ billich sol die warheit in allen landen jnen/ auch widerumb begegnen vnd schenden/ auch darumb/ das jr vrteyl desto schwerer werd vnd sy je meer versstockt werden. Christus sagt wer ich nit kommen vnd mit jn geredt So hetten sy kein sünd/ aber nun habent sy keyn entschuldigung. Vnd der Prophet Isaias sagt am .vj. Beschließ jr augen vnd versteck jr oren/ vnd verblend jr hertz/ das synit sehen mit den augen/ noch hören mit den oren/ vnd verblend jr hertz/ das sy nit sehen mit den augen/ noch hören mit den oren/ nach versteen mit dem hertzen/ vnd denn kommen vnnnd ich muß sy gesundt machen rc. Vnnd gott sagt zum Pharao/Eben darumb hab ich dich erweckt/ das ich in dir wil mein krafft erzeigen. Seine krafft erzeigen ist/ das er den gottlosen jr boßheit läßt fürgan/ vnd ye stercker werden/ biß zu letst so sy am höchsten sind/ dz keyn menschliche krafft genug darwider mag sein/ so kumpt denn gott vnd vertilgt sy mit seiner krafft vnd nit eins menschen darumb sagt er/ mein krafft wil ich in dir erzeigen/ wie er denn auch thet mit Pharom den er ließ in seiner boßheit verharren/ vnd sein volck in grossen leyden vnder jm/ vnd das sy auch müsten inn solcher forcht daruon gan/ als ob sy got nit möcht für jm beschirmen/ biß zu letst da sein gwalt am höchsten was/ das er mit allem gewalt dem volck nach eylet/ vnnd sy kein hülff meer wüßten/ da kam gott vnd brach jm den. Also wil got allweg thun/ die weil der gewalt klein ist/ das er kleinen widerstant bedarff/ so vil er dem menschen geben hat/ das sy jn mögen bruchen/ wil er nit helffen dann es wer nit meer denn menschen krafft/ Da aber alle menschliche krafft vnnd hülff auß ist/ vnnd nit meer zu warten/ da will dann gott sein krafft bruchen/ wie dann alle Propheten sagen/ vnd Dauid vil mal im psalter meldet/ das man sehe das gott im etwas vor allen hat vorbehalten. Also muß der gläubig in gott still schwygen/ in sein glauben probiert vnnd gesterckt werden/ vnd der vnglaubig in seiner boßheit verblent werden so er meint gott werd also schweigen vnd sein sünden nit sehen. Wie der Prophet sagt psal. xiij. Der vnweiß hatt gesagt es ist kein gott/ das ist/ er hat sich gehalten vnd sein leben gefürt als ob kein got wer. Also thun vnser lügner yetz auch sy liegen/ schenden vnd lestern gott/ sein wort vnd alle die sich des gebrauchen/ Als ob kein gott wer der das sehe vnnd höret.

Was sollend aber solche truchen schlünde anders thun dann füwerig gifft speyen/ wie jr art ist. Vnd wie sollent teüffels kynder anders mögen reden denn jr vatter/ der ein lügner vnd todschlager von anfang ist geweßt/ Nit destweniger muß man aber dannocht die frumen verwarnen/ das sy nitt also von solichem gifftigen feür speyen verderbt vnd von der götlichen gesunden ler abgefürt werden. Also auch ich yetzundt hie muß thun/ mein Eegemahel Mattheum Zell/ der grossen lügen halben so über jn erdiecht/ verantworten/ nit von seinetwegen allein/ sonder vil guthertzigen/ wy vorgsagt. Doch dweil ein böse leer schedlicher ist dann ein böß leben. Die leer geet in ander vil/ aber das leben/ der gröst schad in sich selbs/ Muß ich auch ein wenig von der leer sagen/ nit allein für meinem Eegemahel/ sonder den gantzen hauffen aller deren so das Euangelium predigen/ Als Luther mit allen denen so sich mit jm des Euangeliums brauchen/ deren namen denn zu vil sind zu erzelen/ Sag ich den gyfftmeulern/ ia außgiessern des aller bösesten giffts/ welche nach zu Straßburg/ ob sy schon groow oder schwartz kutten tragen/ oder hetten tragen/ vnnd in allen landen noch sindt. Ist Luther vnd seins anhangs leer falsch&/ Wenn haben sy denn die ein mal gefelsche vnd überwunden mit heller göttlicher geschrifft.. Sye wöllen als nur hübsche heüßer vnd hohe münster bauwen mit leymen vnd stro/ so sy doch die andern mit gutem kalck vnd steynen bauwen.

Vnder denen denn auch einer ist/ fast hefftig vnd fast redliche argument wider Luthern fürt/ vnnd sein kunst laßt mercken/ den ich auch/ so bald ich mag ermanen will mit geschrifften seiner weißheit/ mir auch ein teyl/ mit schreiben lassen zukommen/ ob ich doch auch etwas von jm möcht lernen/ oder jm widerumb antworten. Gleich wie die künigin von Saba begert zu sehen die weißheit Salominis. Also beger ich auch disen Salomon zu hören. Wie wol ich etwas daruon hab gesehen/ nemlich zwey büchel vom glauben vnnd wercken/ darauff ich jm villeicht/ gibt gott gnad/ ein wenig wird antworten/ hat aber nach groser weißheit gebraucht/ in eim latinischen büchlin/ wird ich villeicht von jm in tüscher sprach begeren vnd jm antworten rc.

Vff das jn aber menglich mug kennen/ dann er sich/ als ich hoff/ seins namens nit scheüt heyßt Joannes Cocleus/ ich hett schir gesagt kochleffen/ Dann er eben thut wie ein kochleffel/ der vil gekläpppers jnn eim leren hafen macht/ vnd doch auß bösem thannen holtz gemacht ist/ do man nit ein kynds bäpp mit rüren möcht.

Nach ander auch des gleichen mer sind würd ich villeicht/ so ich baß gerüst byn/ dann yetz/ inn einer summ anzeigen. Dann Christus sagt Matth. vij. Hüten euch vor den falschen Propheten/ die inher gan in schaffs kleydern/ aber inwendig zuckend wölff sind/ so muß man ye wissen welchs die seindt.

Vnder welchen denn fast ein schädlicher ist/ nennet sich bruder Conrat Treger Augustiner ordens durch hohe deütsche land prouicial/ also nennt er sich vff einem büchlin/ hat er nach anfang yetziger Franckfurter mess erst lassen auß gon/ an ein löblich gemeyne Eidgnoschafft/ ion welchem büchlin ich vnd alle Christen jn nennen mügen/ ein hundt vnnd bösen arbeitter/ der den weingarten gots mit füssen zertritt/ vnd ein reissenden wolff ja ein vatter aller wölfe vnd ein dieb vnd mörder/ der da kompt zu würgen vnd vmbringen. Darumb ich nit allein ein ersame Eidgnoschafft/ sunder alle die so begeren selig zu werden/ vor jm verwarne/ dann er ein feind des creützs Christi ist/ des end die verdamnuß vnnd sein bauch sein gott ist/ vnd sein eer zu schanden wirt. Von welchen Paulus offt gesagt hat/ vnd zu letst mit weynen zun Philipam.iij. Vnd im buch der Apostel geschicht sagt er/ er hab vns allen rott gots verkündigt/ darumb sol man acht haben vff die gemein gottes rc. Dann das wiß er/ das nach seim abscheid werden kommen schwere wölff/ die der härt nit verschonen werden. Ja nicht allein ist er ein solcher wolff wie dann der münch zun predigern/ genant der leßmeyster/ daselbst ist/ der frist doch nit mit seiner falschen leer/ dann die gern zu im kommen vnd deren begeren/ Sondern diser ist vil mer ja das vierd thier dz Daniel der Prophet beschreibt/ das eim trachen gleich/ vnd ser erschrocklich ist/ das do aß vnd zerknürst/ vnnd das übrig mit füssen zertratt/ welchs ich im selbs wil zuschreiben vnd diß büchel verantworten. Dann er vnd sein buch nit wert sein/ das die so sich on vnderlaß des wort gots sollen bruchen/ jren befolhenen scheflin zu geben/ sich darin sollen verhindern mit einer antwort gegen im. Es wer denn das sy meher ansehen der gemeinen nutz/ weder solich närrisch lesterung vnnd vnuerschämpte schmach wort/ die kein verstendig mensch bewegen mögen/ aber villicht die einfaltigen etwas irren vnd anstoß geberen/ auch so hat ers also mit fleyß gespart auff dise spotte zeyt der angefangen messen/ das es also in die land komme vnd aber kein gegen antwort macht gemacht werden.

Darumb ich alle Christen erman bey jrer gelübd so sy gott im tauff gethan haben/ sich disen gifftspeyer nit lassen verderben/ sonder wöllend bleyben bey der gesunden lebendmachenden leer Christi Jesu/ der allein ist vnnser weißheyt/ gerechtigkeyt/ heyligmachung vnd erlösung/ Wie Paulus sagt i. Corinth. i. Ja der Eckstein dauon Jsaias vnd Petrus sagen der den gleubigen köstlich ist/ den vngleubigen aber zum eckstein des anstoß vnd zum felsen der ergernuß. Dann sy sich stossen an das wort vnd nit glauben dran rc.

Darumb sy jn gern auß dem weg theten er wirt aber vff sy fallen/ vnd sy zerknirschen.

Gibt mir gott gnad/ so will ich mitt jm gern vnd von hertzen handeln. vnd gentzlich verhoffen/ die hilff gotts/ welche Judith bey gestanden wider den holofernen das sy im sein haupt abschlug vnnd das volck gottes erlöset/ vnd der Hester gnad verlihe/ damit das volck gottes behalten vnd Amos selbs an galgen gehenckt wart den er bereyt hette Mardocheop/ Dann krefftiger ist der bey vnns ist weder der do ist in der welt rc.

Nach ist einer heyßt Thomas Murner Het ich sein namen wol nit durffen nennen dann er freylich nit für ein schaff wirt angesehen/ dann er sein geschrey zu vil hat lassen hören/ das jn yetz yederman wol kennet/ dann sein gröst schreiben vnd diechten bißher ist gesein/ von der gouchmatten vnd narren zunfft damit sein lob so weyt erschollen das menglich wol weißt dz er der meyer vnd zunfftmeyster der selben handtwerck ist. Doch ist er gern rumreich/ vnd hat sein namen gern weit bekant/ muß ich jm sein willen erstatten. Was thun dise allesamen anders/ dann mit eyttel stroenen argumenten fechten vnd vil lügen erdenken? damitt sy grosse bücher machen/ vnd also die leüt nur touben mit jrem geschwetz/ da mit sy meinen in jrem gottlosen wesen zu bleiben/ Sy widerfechten den glouben damit sye meinen jre eigen vnd nit gotts gute werck Vnd heyligen dienst/ nit rechten/ aber falschen zu erhalten. Daruon sy bißher reich vnd geyl sind worden. So sy jr kauffman schatz mit haben getriben/ das wil jn das Euangelium abschneiden/ das mögent sy nit leyden. Sy fechten auch wider die pfaffen Ee/ die doch in götlicher geschrifft/ nit duncklen/ sunder hellen/ heyttern grund hat/ das kynder vnd narren mögen lesen vnd verston/ im alten vnd neüwen testament/ wie ichs denn dem bischoff von Straßburg mit langer gschrifft gezeigt vnd bewisen hab/ Da ich die Ee vnd die hurey gegen einander auß götlicher geschrifft gehalten hab. Wolt got das er ein mal so zornig über mich würde/ vnnd die yederman ließ zu lesen werden. Warumb halten sy aber (so ich doch ye der ee zu red würd) hart ob der selben/ das sy meinen/ auch gott zu trotz die widerumb mit gewalt wider hinder sich zu tringen/ eben darumb (ich muß es sagen) zwo vrsachen habend sy. Die erst/ Bäpst vnd Bischöff/ vnd jr gesind/ Vicarien vnd jr mitgesellen hebent/ nit souil geltz zu huren zinß vff von eeleütten als von huren vnd buben. So ein pfaff ein eewyb hatt/ helt er sich wie ein andrer redlicher frummer burger/ vnd gibt den Bischöffen kein zinß daruon/ dann gott hats jm fry geben. So sy aber huren haben/ dieselben seint der Bäpst vnd Bischöff eigen leüt. Welcher dann eine haben will/ muß sy wol vmb jn lehenen/ vnnd sein erlaubnüß haben/ billich gibt er jm ein zinß daruon. Also habents in jr stähelen gült gemacht iärlichs fallen für hagel vnd hör/ der pfaff werd arm oder rich/ so muß erß dannocht geben/ glich wie einer der einem andren ein gült gut licht/ vnd sin iärliche gült daruff schlocht/ also thunt sy auch.

Sy habend auch ein eignen meyer oder schaffner über die selbigen gült güter gesetzt/ der den zinß iärlich innimpt/ heyßt Viscal/ hat auch iars sin lon daruon. Solche schand vnd laster beschirmen vnd verfechten sy wider alle göttliche geschrifft/ darin der heilig geyst die hurer so hart verbant vnd vßschleüßt vom rich gottes/ vnd verbüt das man weder essen noch trincken mit jnen soll. Als Paulus sagt in der ersten epistel zu den Corintheren am fünfften vnd sechßten capittel/ vnd zu den Epheseren am fünfften. Vnd aber die ee die gott allen menschen hat ingepflantzt in der ersten schöpffung/ vnd deren auch kein mensch ledig gesagt/ dann die dryerley menschen Matth. am nünzehenden/ vnd die auch offentlich den priesteren zueiget/ als Paulus sagt zum Timotheo vnd Tito in sinen epistelen zu jnen/ die gott also will haben/ die wöllen sy verdammen/ vnd pinnigen vnd marteren soliche die darein komen wo sy die mögen in jren gewalt bringen. Vnd aber die vnkeüsch keuscheit die sündtflüssische Sodomitische Noezytische hurery straffen sy nit/ vnd habents nye gestrafft/ sunder die beschirmpt/ io weltlich vnd geistlich habend des ein bundt zusamen gemacht also gewaltigklich wider gott zu stritten. O blintheit der häußter/ wie sehen jr hie einander zu/ die aller erberkeit solten geneigt sein/ vnd die helffen hanthaben die miessen selbs von jnen lassen sagen/ das einer fünff/ sechs huren hab/ der ander syben kindtbetterin vff ein zyt/ vnd dannocht ein hüpsche metzen im huß auch/ vnd der glichen stuck vil. Es ist doch eben wie Esaias sagt/ Kein gesuntheit ist von der fußsolen bitz inß haußt. O gott syh harab/ ich weiß das du zu merung deines zorns schwigest. Die ander vrsach ist/ solten die pfaffen eewyber haben/ so dörfften sy nimmen also ein vmb die ander geben/ wie sy mit den metzen thunt/ eine vßschlagen/ die ander innemen/ dann Paulus sagt/ Ein bischoff soll sin ein man einß weybß. Darumb miesten sy erberlichen leben/ vnd wenn jnen schon die selb nit gefiel/ dörfft er nit also sin wechsel triben. So ist in der ee vil kummers den man miteinander haben vnd lyden muß/ des wellen sy vnuerbunden sein/ doch lydet einer offt von einer huren er lit das halb nit von einer frummen eefrawen. So es aber also erberlich zuging mit pfaffen ee/ so bedörfften sy dester dapfferlicher der eebruch straffen an der Cantzel. Sunst wie sollend sy das straffen darin sy huffecht stecken/ domit ists eben/ Ibersyh du mir/ so übersyh ich dir. So aber ein pfaff ein eewyb hett/ vnd darnach übel thet/ wüst man jn zu straffen/ aber also habend sy alwegen ein werwort/ sagen nüt anders/ Ir weltlichen habendt gut sagen jr habendt eüwer eewyber/ so bin ich auch ein mensch/ wie kan ich mich an den hymmel heben etc. vnd ist auc hwar/ ey warumb laßt man dann nit solche ding wie sy gott gemacht hat eim ieden sin eewyb vmb der hurerey willen/ weyßt dann gott nit baß dann der teüffel was gut ist/ nun kumpt dz verbot der ee allein vß dem teüffel/ vnd die ee vß gott sagt der heylig geyst selbs in der epistel an Timotheum. Jo solt es aber also sin/ so möchten es die wetlichen nit erliden die solche huren pfaffen vnder jnen haben wann sy sterben/ so nemen die eekinder das erb in/ sunst nements die frind/ vnnd stossen bastert daruon/ was gödt es sy an das der teüffel die seel hyn fürt. Aber es konnens dannocht ein theil huren vnd irs kinder wol fürsehen das sich man täglich wol/ dz ietzt ein tei ldem adel glich inher göndt/ vnd thun inen auch recht. Auch würden die eelichen pfaffen dapfer den eebruch miessen straffen/ vnd wie Joannes saget/ Es zimpt dir nit syben kindtbetterin einß mals zu haben/ also in huerey zu sein/ vnnd dannocht land vnd leüt helffen regieren/ an galgen solt man ein solchen setzen/ vnd nit in ein rott ein huffen stein an jm verwerffen hart jm zu. Darumb sagt ein mal ein junger gesell/ da man jn strafft vmb sein hurey/ Solt ichs nit thun thuts doch mein vatter/ wann er miris wolt weren wolt ich zu jm sagen/ das er sich vor strieff.

Diß ist der weltlich bresten/ die also wider die pfaffen Ee sind/ Ein teyl genist jr das dann mit amptern vnd vilerley weyß zu geet. Die andern sint jr fründ/ vatter/ mütter/ geschwister/ mumen/ vettern rc. Der gleichen dy da förchten Eelich weyber vnd kynder bringen jnen ein abbruch am gut/ vnd der gleichen. Die dritten sindt selbs in hurey verwickelt/ das sy förchten/ es werd jn darnach auch ins spiel gesehen. Also wirt zu letst Sodoma vnd Gomorra mit einander im schwebel vnnd bech von hymmel verzert werden. O gott mach schir ein end/ Wie lang sol doch die seel des gerechten Lots also gequelt werden? Vnnd erlöß´also den rechtuertigen Loth/ wie du hast geredt durch deinen Engel/ Das du also habst ein exempel gesetzt denen die zukünfftig gottlosig sein würden. Dann die weil der gerecht/ gerecht vnder jnen wör muß er von tag zu tag gequelt werden/ Aber du weißt die gotseligen auß der versuchung zu erlösen/ dy vngerechten aber behalten zum tag des geriechts zu peynigen.

Noch sind vil stück wil ich yetz vnderlassen/ Dann gar geystreichere menschen genugsam geschriben haben dann ich byn.

Vnder welchen stucken ist auch der dienst der heyligen/ daruon ich dannocht ein mal muß ein wenig schreiben. Wie Paulus vns heyß zun Hebreern am .xj.xij.xiij. capitel der heyligen ein gedechtnuß haben rc.

Möchte man yetz zu mir sagen/ das ist ein vngeschickter langer außgang/ du bist doch gar von deinem anfang gefallen.

Antwort. Ich bekenn es/ Es ist war/ aber villeicht nit on geferd bescheen/ Meinstu das mir dise sach nit auch anlige/ das ich sihe wie vil selen bißher vnd noch/ also des teüffel sind worden/ Welchs auch ein vrsach ist gsein/ das ich die pfaffen Ee hab helffen vffrichten/ Vdie erst in Straßburg mit gots hülff hab zu wegen bracht/ da ich dannocht nach willens was überal kein man zu nemen. Da ich aber sahe die grosse forcht vnnd wütenden widerstand auch die groß hurey/ Hab ich selber einen genommen/ damit ich meint allen Christen ein hertz vnd weg zu machen/ als ich auch hoff ist gescheen. Darumb als ich dann auch ein büchel gemacht hab/ darin grund meines glaubens angezeigt vnd vrsach meiner Ee/ Ab deren sich denn mäniglich hat größlich verwundert. Dann niemant solicher weiß/ wort nach werck an mir hatt mögen spüren/ als ob ich willen hett inn die Ee zu kommen. Darumb mich dann hat nott bedunckt/ den frummen mein entschuldigung vnd vrsach darzuthun. Wie vns dann Petrus lert. Welche vrsachen dann auch mein Eegemahel/ so weyt ich jn erfaren hab/ vnd nach nicht anders finden nach spüren kan/ bewegt haben/ Das er gottes eer/ sein vnd aller brüder heyl gern hett auffgericht solche Ee hat angefangen Dann ich kein vnerberkeyt/ dem lust oder anderem nach an jm spüren kan. Dann weder hübsche reichtumb/ oder andere tugent mich also überschüttet hant/ das einen möcht bewegen.

Auß welcher also seiner handlung/ mittler vnd leben er ein sollichen nyd von den gotlosen vff sich geboren hat/ das sein leyb vnd leben schir den vöglen im lufft/ vnnd den würmen vff erden erloubt vnd geben ward/ ich geschweig den menschen.

Vnd damit ich widerumb also zu meim anfang komm/ jn zu entschuldigen/ Ist solcher neyd so tieff ingewurtzelt in die hertzen der gotloßen vff jn/ Das so sy im nit schaden mögen an leyb/ seel vnd leben/ So haben sy vnd thuns nach solche grosse teüffelische lügen vff jn erdacht vnnd geredt/ vnd in alle landt außgeschrieben.

Zum ersten gesagt/ Ich sey von im gelauffen/ Das darff kein antwort. Die lügner müssen sich bey jn selber schamen/ denn mein kein tag inn Straßburg nie gemangelt ist worden.

Zum andern sagten sy/ Er hat sich selber erhenckt vor leyd das er mich genommmen het/ darff nach mynder antwort/ es ist villeicht ein iunger auß im gewachsen/ der jn so widerwertig ist/ ia sy gebent yr halb gutt darumb das es war wer.

Zum dritten. Da er nit hencken wolt da funden sy ein ander lügen/ Er het ein bürgerin in ein garten gefürt. Da es alles nit hett gewölt helffen/ vnd sy allenthalben an der lügen sind funden worden/ habent sy aber ein anders versucht vnd teüffelisch schandtlich lugen erdacht/ vnd die in der gantzen statt Straßburg vnd im gantzen land außgespreyt vnd gesagt/ wie er mich so übel halt mit schlagen vnd dergleichen/ vnd mich wil mal hab außgeiiagt/ Vnnd schandtlich gelogen wie ich jn hab bey der magt funden/ da ichs nit hab wolt leiden hab er mich geschlagen vnnd zum hauß außgeiagt. Vnd wie ich sey weynend für den Ammeister gelauffen/ vnnd acht tag von jm in meins vatters hauß gsein/ vnd der gleichen meer/ vnd doch so vngleich gelogen/ dz ye an eim ort anders dann an dem andern ist gesagt worden. Was sol ich darzu sagen anders dann das es teüffels kynder seint? Der auch ein lügner ist/ der solliche lügen in jnen wirckt/ Dann sy on all vrsach allein auß teüffels eingeben/ solichs hant erdacht. Dann er /das ist gott mein zeüg) dz ich hie nit liegen bin/ kein grössern mag ich haben/ mit mir/ vnd ich mit jm/ nye keyn viertel stund/ das ist/ in summa gar kein zeyt nie sint vneins gsein/ oder mir ye leyds gethon/ groß oder klein/ mit worten oder wercken/ deßgleichen ich jm auch als ich hoff. Ich weiß auch nüt anders vff dise stund/ dann möchten wir einander vnser gedencken/ so fer sy götlich weren erfülten wir theten das. Auch der magt halben Ich hab doch kein magt/ dann nur ein frummes kleines döchterlin/ noch gar iung vnd vnuerschalckt/ dz von solchen dingen noch gar nüt weyßt/ zu der er noch nit fier wort geredt hat so lang es im huß ist gesin. So hab ich auch noch kein solche geylheit noch mutwil by jm befunden ob es schon alt genug wer/ das ich solicher sorgen bedürfft/ des Endtchrists gesind gibt jm souil zu thun/ dz solche wol vergieng/ ob es schon in jm wer.

Inn summa mitt kurtzer reden zu beschliessen wie er vorhin hat huß gehalten eh ich sin fraw bin worden/ will ich nit verantwurten/ er hat sich eben gehalten wie es dann Bäpst vnd Bischöff haben wollen die die ee verbieten/ die gott gebüt/ vnd huren erlauben die gott verbüt/ darumb ich jn dann auch genummen hab sin vnd anderer leben angesehen/ mich vnderstanden sin vnd vil selen durch gots gnad vnd krafft zu gewinnen/ als ich auch hoff ich zu gott hab gethon/ aber sither ich sin fraw bin gefin do will ich jn vertretten vnd min eer/ lyb/ vnd leben für jn setzen/ das jm soliche lügner gewaltigklich vnuerdient on alle vrsach also widerstreben/ vnd jn verliegen. Vnd das diße reden so von jm vßgangen/ seint alle miteinander erlogen vnd erdocht on alle vrsach vff jn sind/ vnd sich auch in solchem gegen mir vnd allen menschen haltet/ das jm kein mensch mit warheit vor der welt mag straffen/ dy kräfft des hertzen hat allein gott zu richten/ ist dem menschen vnerfarlich etc. gott wöll das vnser ee also blib/ wie sy ietzt ist bitz an das end/ so hoff ich sy werd vnd sey gott wolgefellig/ vnser beyder selen nutzlich/ vnd vil menschen/ fürderlich an seel vnd lyb/ ob sy aber dem antechrist vnnd seinem gesind nit nützlich vnd gefellig ist/ da kan ich nit für. Vnd ob sich dann auch der selb empört/ vnd die Fürsten diser welt zu hülff nimpt/ das wir also veriächt vnd den todt darüber müsten leyden/ Ey so habent wir doch ein trost/ das Christus sagt/ Ir thoren vnd treges hertzen zu glauben/ allem dem das die Propheten geredt haben/ müst nit Christus so lichs leyden vnnd also in sein herrligkeyt gan/ Vnnd so wir leyden/ so leydet Christus in vns/ dann wir sein glider sind. was haben die Propheten geredt? Liß Dauid den grossen propheten im psalmen sagt er/ Es haben gegrißgramt die heyden/ vnd die völcker haben betracht vnnütze ding. Die künig der erden stunden einander bey. Vnd die Fürsten samleten sich zu einander wider gott vnd seinem gesalbten. Haben sy sich yetz nit gesamlet wider gott vnnd sein wort? in welchem Christus verkündiget wirt. Des gleichen Isaias am .lvij. saget/ wie der gerecht werde verterben hie/ vnd niemant sein gedencken/ aber es würt kommen der friden zu jm rc. Vnnd alle Propheten sagen wie die gerechten werden verderben vnd die gotlosen über hand nemen biß zu dem vrteyl gottes behalten werden/ Darumb wir Christen solloent in aller gedult des ends erwarten. Darumb ich hab mich vnd mein gemahel gott in sein handt gestellt/ mit frölichem gemüt/ sein will geschehe in vnns. Ich weiß kein grösser eer an vns zu erleben sein/ dann so wir in schanden diser welt sterben/ vnd er mir vnd ich jm frölich am creütz einander zusprechen vnd stercken werden/ Darumb ich vnd er solich lügen vnd alle schmach ja auch den tod in aller gedult/ fryd vnd freüden/ der frucht des geysts empfahen wöllen vnnd sagen mit dem Propheten Isaia am .xlj. Thunt wol oder übel wie ir mügent/ so werden wir reden vnd sehen mit einander/ vnnd vns für niemants förchten. Wie gott vilmal im propheten Isaia sagt/ Förcht dir nit/ dan ich byn mit dir/ vnnd sagt abermal. Worumb föchstu dich für einem tödtlichen menschen vnd dem sun des menschen der da dorret wie das graß/ Vnd hast vergessen deines schöpffers/ der da starck ist rc.

Er wil nit haben das wir die menschen förchten sollen/ wie er auch sagt Mat. am x. vnd Luc. am .xij. So wenig wil er auch haben das wir in die menschen vnd jr hülff vertrauwen sollen/ vnd schreyt im propheten Isaia am .xxxj. Wee über die selben/ das sy sich versehen in die vile vnd sterck der mensche3n/ vnd nit in den heyligen Israhel/ vnd gott nicht suchten/ vnd sagt wie er wöll das übel uber sy senden/ vnd aber sein wort nit lassen vndergan/ vnnd wöll vffsteen wider die bösen vnd jr hülff rc.

Trost gnug haben wir in aller geschrifft/ den sollen wir allwegen vor den augen vnseres hertzen haben. So wir aber schwach in vnserem fleisch seint/ sollend wir allzyt einander ermanen des wort gottes/ darin wir getröst werden durch vnsern glauben so wir vnder einander haben. Wie Paulus zun Römern am ersten sagt/ Darumb ich dann auch hab lossen trucken ein trostbrief/ welchen ich geschriben vnd geschickt hab/ den vngetrösten gleubigen weybern zu Kentzingen/ da sy in jrem grösten leyden vnd schwerer anfechtung warent vnd aber verlassen vnd vngetröst von aller welt. Das sy wol möchten gesagt haben mit Dauid Psalmo. xij. Herr wie lang vergist du vnser vnd kerest dein antlit von vnns? rc. Wie lang werden vnser feynde erhöcht über vns? rc. Vnd am xxj. psalm Wir seind ein verdriessung den menschen vnd ein verwerffung allem volck etc. vil hund habend vnß vmbgeben/ der rat der boßhafftigen hat vnß vmbsessen. Disen psalmen würd ich vilicht ein mol/ gibt mir gott gnad/ den lydenden zu trost ein wenig beschriben/ als ich dann auch disen brief denen von Kentzingen geschickt/ auch allen so in lyden seint/ zu tost hab lassen vßgon/ gott wöll den vnd anders nutz vnd tröstlich machen allen glaubigen Amen. Nun zum bschlussz/ möcht yetz yemandt sagen/ wie dan dz fleysch nicht bessers versteet/ Ist dz Christlich/ Du hast welche du wilt entschuldigt/ vnd aber ander leütt geschmeht vnd geschuldiget/ Antwort ich. Niemant mag mich hie einer lüge straffen/ Den vnschuldigen hab ich billich entschuldigt/ so hab ich auch damit den schuldigen billich angezeigt. Ich hab nit geschmeht/ Sunder allein die warheit gesagt/ Sunst wer Christus vnd alle Propheten vnd Aposteln/ auch schmeher/ die etwan wol gröber haben angezeigt die laster vnd die bösen teüffels kynder/ schlangen/ natterzucht/ hund vnd riechend brend genant haben. Wann es schmeelich ist/ die laster zu sagen/ wie schmelich ists dann eim zu thun/ möcht man sagen eß stünd mir nit zu/ eß weren ander lüt do dann ich. Antwurt/ Hat doch ein esel ein mol geredt/ vnd den engel gesehen den der Prophet nit sehen wolt/ Numeri am xxij. Ist es dann ein wunder ob ich die warheit red/ so ich doch ein mensch byn.

Vnd gott sagt durch den Propheten Ezechiel am xxij. Du kind des menschen/ vrteylest du nit die statt der sünden vnd zeigest jr alle verfluchte werck rc. Welchs capitel seer erschröcklich sagt/ wie geystlich vnd weltlich jetz das vnschuldig blut vergiessen/ vnnd wie die Fürsten das thund in jren landen/ darumb gott über sy wöll senden das übel. Vnd wie sy sein gsatz verachten/ vnnd nit ein vnderscheid haben zwischen den heyligen vnd den verbanten. Darumb er ein solichen im nechsten capitel daruor nennet/ ein vngütigen schnöden fürer seines volcks. Vber welches ich gibt gott gnad/ auch villeicht ein mal schreyben würd/ was die heyligen vnd verbanten sind. Möcht man sagen/ Es stehet du sun des menschen/ das ist nit zu dir gesagt sunder zu den gelerten mannen/ Paulus sagt die weyber sollent schweigen. Antwort ich/ Weißt aber nit auch das er sagt Galat. iij. In Christo ist weder man nach weyb/ Vnd das Gott im Propheten Johel sagt am ij. capitel. Ich würd außgiessen von meinem geyst über alles fleisch/ vnd euwer sün vnd döchter werden weiß´sagen rc. Vnnd weißt auch da Zacharias ein stumm ward/ das Elizabeth Mariam die Jungkfrauw gebenedeyet.

Also nem man auch vor gutt von mir/ ich beger nit dz man mich hör als Elizabeth/ oder Joannes den teüffer/ oder Nathan den Propheten/ der Dauid sein übel anzeiget/ noch als einichen Propheten/ sunder nur als den esel/ den doch der falsche Prophet Balaam hört/ dann ich doch nit anders beger dann das wir möchten selig miteinander werden/ Das helff vns gott durch Christum seinen lieben sun.

AMEN.

Ich verzeyhe allen menschen wie ich glaub das mir gott thu.

O Herr laß sy nit verharren vnd verderben inn jrer blintheyt/ vnd nit setz jn jre lügen zu einer sünden. Actorum vij.

Isaie. lvij.

Ir sün der warsagerinn/ Ir som des Eebruchs/ vnd gemeynen vnkeüschen/ Geent herzu/ über wen haben jr gespielt/ über wen haben jr vffgethan ewern mund vnd außgeworffen ewer zungen? Ir ein verlogner som.