durch Doctor Gerhart westerburch von Coellen Neulich auszgangen.

Gedruckt in jar. M.D.xxiij.

Den Ersamenn fursichtigenn vnd weysen herrenn Burgermeystern vnd Radt der Stat Cöln/ meynem gunstigen lieben herrenn Entpiet ich Gerhart Westerbürch meynen wylligen dienst vnd alles guttes.

FUrsichtigen weysen herren. Nach dem ich befind/ das alle oberkeyt vnnd gewalt von got seyn/ sollenn aüch dye selbige/ so vonn got den christlichenn menschen vorgesatz mit allem fleyß darnach machten vnd arbeyten/ das alles so nutz/ erlich/ gut vnd götlich geschehen/ erhalten vnd gehandthabt wurd/ widerumb dz unnutz/ vnerleich/ böß vngöttlich nit inbrech/ vnd so es ingebrochen were/ hinweg genomen vnd aüßgetilget wurd/ Sollen darneben zu solchem guten regiment alle die ir vatterland lieben/ trewlich radten vnd helffen. Die weyl nun ewer lieb mir vngezweyfelt sych in diesem weg schicket/ eynen gemeynen nütz zu vnderhalten/ vnd ich ewer liebe mitbürger eyner byn/ werdenn E. L. diese meyn meynüng wie ich verhoff in guter meynung annemen/ vnd ob sye recht sey erfaren vnd ergrunden/ vnd so bey E. L. diese meyne meynung so ich aüß der geschrifft bestettiget hab/ vnd sye aüch nit bißher von der Christlicher kirchen verworffen ist/ eynen gründt zu haben angesehen wurdt/ were meyn gantz begirliche bit E. L. wölle dareyn sehen/ dz hinfur der vnnutz vnkost vnd teüffliche bracht (so allein auß hoffart geizigkeyt vnd vnerkentnüs der/ die da dz wort gottes newlich vnd nit mit vnnütz geschwetz vermischt/ solten an den tag brengen/ erstanden ist) hingelacht oder ye gemindert wurdt Wurd als dan an den teyl nit wenig eyn gemeyn nutz gebessert/ die armen bey den yren bleyben vnd E. L. vmb got den almechtigen nit eynen kleynen lön gewynnen/ dem selbigen ich ewer lieb hie mit wil befollen haben.

NAch dem vnser heylant Christus saget/ dz der mensch nit alleyn von dem naturlichen jrdischen brodt/ sunder vil mehr von der hymelyscher vbernaturlicher speiß des worts gotes/ lebt vnd vffgehalten wyrt/ volgt/ das wo die geystliche narung des worts gottes/ der selen entzogen ist/ keyn warhafftig christlich leben seyn mag. Ist derhalb eynem yeden christen erstlich von nöten/ das er das wort gottes oder euangelium lerne vnd erkenne/ darnach von dem erkandten warhafftigen gottes wort nit weyche.

Zum anderen Das er eyn recht vnderscheydt wiß vnder dem wort gottes/ vnd dem wort der menschen/ vnd diß ist eynem yeden christen von nöten der zu vnsern geferlichen zeyten sych nit wil verfüren lassen/ die weyl auch vnd alleyn durch diß vnderscheydt die verfurischen ketzerischen leren mögen erfunden vnd erkandt werden.

Zum dritten ist zu wissen dz eyn groß vnerderscheidt ist vnder gottes wort vnd der menschen leren. Die weil alle menschen lugenhafftig seyn/ vnd got alleyn warhafftig. Psal. vi.

Zum vierdten/ gottis wort mach nirgenst besser/klärlicher erkandt vnnd erfunden werden dan in der bibel/ welche das new mit dem alten testament begreyffen ist. Da hat got selbst seynen willen durch seyn wort vnns verkundiget vnd außgesprochen/ vnd alles das der bibel entgegen ist/ oder nit mässig vnnd gleichformig/ das ist auch nit gottis wort/ dann got in seynem wort ist nicht wider sych selber/ Darumb lebt die sele auch nicht von anderen leren/ sunder alleyn von dem warhafftigen wort gottis. Vnd wa das nicht den schäffen wyrt vorgehalten vnd verkundiget/ da seyndt auch keyn rechte hirten oder prediger/ sunder eytel hungerige/ verfürische/ reyssende wölffe.

Diß hab ich darumb vorgesagt/ das eyn yder nun wol kan mercken/ ow her aller mißbrauch/ ketzerey vnd vnglaub vnder den Christen erstanden vnnd erwachsen seynt/ Nemlich durch die naturlichen/ lügenhafftigen/ vnnd menschlichen leren/ die vns an stat des wort gottis (durch geschäfft des bösen geistes) seyn vorgelagt/ vnd wyr sye angenomen haben/ darumb wyr arme leudt auch eyn sulchen lön des jrtumbs haben entpfangen/ das sych auch eyn heyd vber vns möcht erbarmen.

Derhalben mych auch die cristliche warheyt mit sampt der brüderlicher lieb erweckt vnd bewegt hat/ dem gemeynen armen verfurten hauffen/ nach meynem kleynen vermögen etlichen vornemlichen yrtümen (dar von er schwerlich besessen ist) anzuzeigen/ vnd vor eygen schaden trewlich warnen/ hoff darneben Christus meyn herr/ wyrt mynem furnemen behülfflich seyn/ vnd seyn schäff durch seyn eygen blut thüer erkaufft/ eynsmals vß dem mündt der wölffen nemen/ vnd mit seynem götlichen wort durch rechtschaffene hirten selbst weyden.

Nun aber der jrtumb gar vyl seynd/ vnnd meynes furnemens nit ist/ sey al zu erzelen/ hab ich darumb nür eynen wöllen anzeigen/ als der vom fegfewer vnd verscheyden selen durch falsch erdychten leren erstanden ist/ wyl darbey meyn pfundt/ so myr von got ist verlihet/ der gemeyn christlicher brüderschafft nicht vorhalten vnd durch helle lichte vnnd götliche schrifft anzeygen/ wie gröblich etlich an diesem ort geyrt haben/ darbey wil ich auch diß vorgesagt haben/ dz ich vff keyne treüme gesicht/ fabelen/ erdychten exempel/ menschlichen leren wil achten/ sunder alleyn vff das warhafftige wort gottes/ dar von alle gelärten heyligen gezeugnüs der warheit haben/ durch welchs auch hymel vnd erdtrich/ vnd alles was darinnen ist/ sol gericht vnd geurteilt werden.

Nun wollen wir sehen was die geschrifft von den verscheyden selen sagt/ vnd wie man sych gegen jnn halten soll/ vnd das lernet vns der heylig lerer Sant Paulus in seyner ersten epistel zu den Thessalo. am .iiij. Capit. da er von den die da von hynnen gescheyden seynt/ also schreibt. Wyr wollenn euch lieben brüder nicht vorhalten von dne die da schläffen/ vff das yr nicht trawrig seyt wie die anderen die keyn höffnung haben. Den so wyr glauben das Jesus gestorben vnnd vfferstanden ist/ so wyrt got auch die da entschläffen seynt durch Jesum/ myt jm füren. Hie sehen wyr/ wie eyn gar tröstlich meynung vns der heylig Paulus von den vnseren gestorben freunden vorgibt. Want welcher möcht sych nun bekümeren oder betrüben vmb seynen glaübigen/ vatter oder mütter/ seyn weyb/ kynder oder ander freündt/ wan er sölche hoffnung hat/ das er weyß vnd verstehet/ das er nicht alleyn seyn freündt widerumb wyrt erlangen/ sunder dz er darzu mit seynen freunden wyrt jm gewolck auffgeruckt vnd Christo entgegen faren/ vnd ewiglich neben jnnen mit dem herren Jesu Christo bleiben/ das ist eyn güldener gewünschter tröst/ welchen eyn christ dem andern zu tröst sol verkundigen.

Nun möcht eyner fragen/ welche die anderen werden vorkommen/ vnd wie die vfferstehung sol geschen. Antwort Paulus in der genanter epistel am iiij. Capittel vff diesse weyß. Das sagen wyr euch als eyn wort des herren/ das wyr die wir leben vnnd vberbliben in der zukunfft des herren/ werden denen nicht workommen/ die da schläffen/ dan er selb der herr wyrt mit eynem feltgeschrey vnd stymme der bosaunen gottis hernyder kummenn vom hymel/ vnnd die tödtenn in Christo/ werden aufferstehen zum ersten/ darnach wyr die wyr leben vnd vberbliben/ werden zu gelisch mit den selbigen hingeruckt in den wolcken dem herren entgegen in der luft/ vnd werden also bey dem herren seyn altzeyt. So tröstet euch nun mit diesen worten vnder eynander.

Allhie sehenn wyr nun jnn welcher form/ maß vnnd weyß das auffwecken wyrt geschehen/ nemlich in eyner stymme/ da durch wyrt got seynn almechtigkeyt/ starck vnnd magt beweysen/ das er der alt got ist/ welcher alle dyng in seynem wort wyrckt. Also geschags aüch da got myt wenyg worten dem gestorben Lazarum ryeff/ vnd er ist von stündt auffgestanden. Joan. am vi. vnd der exempel seint vil/ die vns solche sorg benemen mögen/ wie auch myt den todten beynen geschehenn ist/ da eyns zu dem anderen sych zufüget vnnd darnach myt aderen/ fleysch/ vnd haut ist bekleydt worden. Ezechielis im xxxvij. Capittell. Dan gott yst nicht vnmüglich/ vnd dyß sall alles geschehen jm augenblick vnnd jm gesang eyner besaunen/ vnd werden vnsterblych aüffstehen/ da auch diesser sterblycher leib moyß sych verwandlen vnd zychen in die vnsterblicheit vnd als dan werden die stachelen des tods zu grund vnd boden verschwynden. in der ersten zu den Corint am xv. ca.

Auß disem allen/ kunnen wyr nun wol verstehen/ wie vnuerstentlich vnsere priester vns verkundigen/ wir sollen betrübt seyn vmb der gestorben wegen/ vnnd Paulus wil dz wir nicht betrübt seyn/ wan die in Christo verstorben seyn oder entschläffen/ die werden in den schöß Abrahe zuruwe genomen. Dan got ist nit eyn got der verstorben sunder der lebendigenn/ warumb wollen wyr sye dan myt vigilien/ opferen/ mänstunden messen etc. darauß brengen/ Vnd ist den selen eyn grosser abbruch/ vnd wünschen vns vnd betten got fur vns/ das wyr zu jnen kömen vnd in rechter senlicher lieb vnd begerung noch got rüweten/ vnd sye begeren das yr stand vnnd wesen von tag zu tag meher vnd hitziger werd/ so lang byß sye gereyniget werden. Ey wie eyn freündt were das gewesen/ der Lazarum auß dem schoß Abrahe het wöllen erlösen/ darinnen alle menschen eylen vnd begeren sollen. Mit diesen worten sollen alleyn gemeynt werden die selen in Christo verscheyden vnd nicht dye verdampten/ want in der hellen ist kein erlösung.

Wir solten nichts anders betten von got dan das er wyl/ das ist/ das seyn will geschehe. Also saget Christus wan yr bettet solt yr nit vil wort machen gelycherweyß wie die heyden die da meynen sye werden erhort/ wan sye vil wort machen/ darumb solt yr eüch inn nit vergleichen ewer vatter weyß wol wz yr bedorffet ehe dan yr in bettet/ darumb solt yr also betten. Vatter vnser etc. Deyn wil geschehe etc. Mat. vi. Des gleichen schribt aüch Joannes/ das ist vns zuuersycht die wyr haben zu gott das so wyr etwas betten nach seynem wyllen/ so erhört er vns. Jo. in syner erste epistel am .v. cap. Wan wyr nun anders wölten betten dan got wil/ so were vnser gebet wyder got vnd bößs.

Darumb sollenn wyr nit betten das die selen eher in eyn besser esen genomen wurden dan got wil. Aüch so werden sye alleyn durch eyn fewer geleütert vnd gereyniget das da geystlich vnnd vorstentlich ist/ vnnd nicht durch furbit/ sunst wurd vns geantwurt ide antwurt der kinder Zebedei/ da die mutter vmb yr törliche begerüng oder gebet gestrafft ward/ sprach der herr. yr wisset nicht was yr bedtet/ Möcht yr den kelch drincken den ich werd drincken/ vnd eüch taüffen lassen mit der taüff da ich mit getaüfft werde etc. Mat. am xx.

Also wirt es aüch mit vns geschehen/ vnd da wirt nit anders aüß/ eyn jeder muß den kelch Christi drincken/ das ist/ seyn eygen Creütz durch absterbüng seyn selbst/ vnd haß vnd neyd seyner eygen selen mit Christo tragen/ vnd da durch gereynigt vnd gefegt werden. Mat. am x. vnd xvj. Mar am viii. Luce am xiiii. vnnd xvii. Capittel geschichts nun nit alhie/ so muß es dort in angst vnd not der selen geschehen/ vnd die stat muß dem geyst gottes durch das Creutz bereydt werden/ da hilfft keyn betten vor.

Zum anderen Christus sagt Joan. am vi. Das alle menschen die seyn fleysch essen/ vnnd seyn blut drincken in seyn natur/ art/ leben vnnd wesen werden vorwandlet. Also das yr leben nit mehr yr leben bleibt/ sunder eyn leben Christi/ das sye warhafftig mögen sprechen/ ich lebe nit sunder Christus lebt in mir/ zu den Gala. am ii. Capittel. Vnser leben geht zu boden vnd grundt nyder vnd wechst das leben Christi vff. Nun wie sye Christum essen/ also versterben sye durch Christum/ die Christum essen die leben vmb Christus willen/ vnd haben den eyn wonenden geyst Christi in yren hertzen/U der yr sele hat lebendig gemacht/ vnnd den leyb zukunfftiglich auch wurt lebendig machen.

Dem nach seynd die verstorben durch Christum/ in warhafftigem leben/ wesen vnd in der art Christi/ doch eyner mehr dan der ander/ darnach eyner mit seynem pfundt oder gaben von got entpfangen seer arbeyt/ darnach kömpt eyner in die tieff oder höhe Christi/ zu den Ephe. am iii.

Allhie die Christum essen/ das ist/ die seyn krafft vnd schätz erlangen/ die haben das leben/ vnd werden aüfferweckt von Christo. Jan. vj. Welche aber Christum nit essen/ die haben keyn leben in jnn/ Sie haben wol eyn fleyschlich/ betriglich/ vergenglich leben/ aber das geystlich/ warhafftig/ vnd ewig leben haben sye nicht/ darumb das sye Christum nit essen/ das ist/ darumb das sye Christus nit ym grund yrer selen speyset vnd erneret.

So aber ymand Christum in warhafftigem lebenn annimbt der hat das ewig leben/ derhalben wyrt er in ewigkeyt nit sterben/ welcher in dem herren Christo lebt vnd gleübt der wyrt nit sterben in ewigkeit/ als geschriben sthet Joan. am vj. vnd am xi. Ich bin die vfferstehung vnd das leben/ wer in mych gleubt der wirt leben ob er gleych stürb/ vnd wer da lebt vnd gleubt in mych der wyrt nit sterben ewiglich.

Das edel vnd ewig leben faht hie an/ dan eyn yglicher der in Christum gleubt der hat bereidt das ewig hymelisch leben/ stirbt er also leiblich in dem selben leben/ das ist/ geht er leyblich ab/ so mag er doch ewiglich nit verderben/ sunder er rastet vnd ruwet in Christo/ vnd wirt im der tod eyn süsser schlaff/ darumb spricht Paulus/ ir tod ist kostbarlich in den aügen gottes/ die weyl yr leben trefflich vnd köstlich worden ist durch abkleydung yrer beschwerlicher leychnamen.

Zum dritten spricht auch Christus/ das ist das ewig leben/ das sye dych erkennen/ das du alleyn warer got bist/ vnd den du gesandt hast Jesum Christ Jo. am xvii. Dyss erkantnus gottes geschicht nicht in der vernunfft oder im naturlichem licht/ sunder im grund der selen jm gotlichen vnbetrichligem licht/ vnnd macht den menschen eynen freünd gottes/ vnnd vereynt die selen got dem herren als Christus sagt. Nun heyß ich eüch nit mehr knecht/ sunder fründ/ darumb das ich eüch alhie geoffenbart hab was ich vom vatter gehort hab. Joan. am xv. Der halben byt aüch Christus alleyn vor die/ die seyn wort annemen vnnd warlich erkennen das er vom vatter außgangen ist Joannis. am xvii.

Nun ist tzu wissen das das ewig leben hat drey grad Den ersten in diesem leben anfänglich. Den anderen in abscheydüng der selen vom leychnam vor dem ingang des hymels. Den dritten ym hymel.

Zum ersten erkennen wyr hie got in der vinsternis vnd verwunderen vns vom herren vnd von seynen reden/ Im anderen erkennen wir got gleich als die sonne in der morgenröt. Im dritten sehen wyr got gleich wie die sonne ym klaren mittag.

Die weyl nun also ist/ das wyr hie groß verhyndernüs haben in diesem vergenglichem leben des sterblichen leychnams halben/ ist darumb mehr tzu frewen dan zu trawren vor die/ welche der manichfeltigkeyt vnd hinderlichen burd vnd arbeyt enzogen seyn. Ir stand vnd wesen ist besser dan vnser/ vnd wie wol ich sie aller sunden nit ledig zele/ doch seynd sie in starcker hitziger geystlicher begird tzu got/ vnd seynd gern darinne/ warumb wollen wir sie dan külen mit vigilien/ opfer oder messenn? ye hitziger vnd häfftiger yre liebe ist/ ye mehr sie zu dem aller laütersten ewigenn leben nahen/ gleich als das licht des vffgangs züm klaren mittag.

Man pflegt tzu sagen das die selen so in Christo abscheyden im grösem fewer ligen/ aber man brengt keynen grundt der schrifft das also sey/ so ist jnn die historien von Lazaro aüch entgegen/ dieweil die geleubigen in die stat des tröstes faren. Aüch die schrifft nicht anzeigt eyn naturlich fewer in dem schoß Abrahe/ ist auch nicht gleublich/ das yrgent eyn elementisch fewer die selen solt ängsten wie wol das nicht mag geleügnet werden/ das der heylig geyst das böß vnnd gut volck zeyten eym holtz/ vnd gottes wort eynem fewer vergleicht/ nach dem Hieremias spricht. Nym war ich gebe meyne wort in deynen mündt zu eynem fewer/ vnd das volck zu holtz vnd es wirt sye verzeren Hieremi. am. v. vnd an eym anderen ort Das wort gottes ist worden in meynem hertzen eyn brinnend fewer/ vnd ist beschlossen in meynem gebeyn/ vnd ich byn schwach wordenn so ich es nicht mocht leyden Hier. am xx. Desselben gleychen sagt der selb prophet. Ist es nit also/ das meynn wort seynd gleych als eyn fewer Hieremi. am xxiii.

Nun ist das wort gottes dermassen brennend/ vnnd durchgeht gebeyn vnd marck/ vnd teylt den geyst von der selen/ wan es von got im grund der selen vnd gutem acker vffgeht/ dan so es im glauben ist angenomen/ was ist es anders dan das fewer das Christus geschickt hat das brennen sal. Luce am. vij. Es gebert lieb/ gerechtigkeit/ weyßheit/ vnd newheit des menschen/ sol es dan nit brennen/ fegen/ vnd reynigen. Demnach mag man sagen/ dz die brennende vnd hitzige begerung noch got/ alles holtz hew/ vnd stoppelen in den selen brennet/ vnd allen mangel/ rost vnd gebresten abfeget.

Darzu gehört auch das Esaias spricht. Das alles fleysch ist gleich als hew/ vnd sein glorien gleich als die blumen vff dem acker/ das hew ist verdörret/ vnnd die blume ist abgefallen/ wan der geyst des herren hat darynne gewehet/ das volck ist warhafftig hew/ es ist verdörret/ vnd seyn blume ist abgefallen/ wan das wort des herren hat gewirckt jm volck. Esaie am xl. cap. Als solt er sagen/ das wort des herren das da ewiglich bleybt das ist eyn fewer/ welches in das hertz geht/ vnd wan es begirlich entfangen ist/ so vnderdruckt vnnd tödet das fleysch/ vnd alles das vff das fundament (welches Jesus Christus ist) wirt gebawet/ das ist es vnderscheyden/ vnd darnach wyrt es behalten oder verworffen. Also saget Paulus zu den Corinthiren am dritten. Cap. so eyner bawet vff das fundament das Christus ist/ golt/ silber/ edel gesteynn/ jtem holtz/ hew/ stoppelen/ eynes yglichen werck sal offenbar werden/ vnd welcherley eynes yglichen werck seyn/ wirt das fewer bewerenn/ das ist. Alle werck die nit jm rechten lebendigen glauben vnd gut zuversycht gegen got durch denn geyst Christi geschehen/ seynd böß vnd sundtlich/ vnd müssen alle durchs fewer in bewegung der krefften der selen bewert werden. Vnd also muß dye sele von aller vngeordenter creaturischer begerung vnd vnuol kümerheit gereyniget/ vnd zu einer stat oder tempel gottes bereydt werden. Er wirt aber eyn abbruch leyden/ das ist/ er wirt verhindert werden von dem jngang des reychs gottes/ vnd Christus wirt im nit am klaren tag erscheynen als lang er in er lieb/ damit er das seyn sucht/ kranck ligt. Ja er wirt auch nit sälig so lang im die gebrestenn anhangen/ das ist das Paulus sagt/ er wirt schadenn leyden/ aber er wyrt sälig werden/ doch also gleich als durchs fewer/ das ist durch eyn hitzige brennende begird/ das er got lieb hab auß gantzem hertzenn vnd durch haß seyner eygen selen/ dan die warheit kan nit liegenn die da saget/ der seyn sele sucht der wirt sie verliesen. Mat. am xvi. vnd am x.

Weyter ist es auch zu besorgen das etliche selen nach dem tod mangel und gebrechen haben in der lieb gottes/ in jrer gerechtigkeyt/ in jrer weyßheyt das sie got nit mit gantzen vnd vollen herzen lieben/ vnd ir gerechtigkeyt noch zu kleyn sey/ die dann durch Christum ist/ auch ir erkentnus noch zu dünckel/ vnnd so lang dunckel bleibt/ als sye got nit jm hellen liechten mittag erkennen. Ir hertz ist villeicht nit gäntzlich beschnitten/ vnd hat etwa noch eyn vnerfarenheyt des glaubens/ vnd ist yr aug noch nit allenthalben gereyniget/ dar vmb mögen sye got nit sehen vonn angesycht zu angesycht/ die weyl sye vnreynigkeyt in iren augen habenn/ das ist in irem erkentnus/ dar vmb sye noch mussen mit dem fewer (das da geystlich ist) in langweyligkeyt gefegt werden wie da . Hier. am xxiii spricht. das ist/ sie mussen gereyniget werden von aller creaturischer lieb vnd vmbständiger vinsternis/ dan man muß got lieben mit vollem gantzem hertzen/ sele/ krefften etc. So kan das nit geschehen die weyl irgent eyn geschepfte creaturische lieb da ist.

Dar nach nahen sych nün die selen in Christo abgescheiden/ zu solchem erkentnüs vnd lieb gottes/ vnd haben schmertzlich verlangen dar nach/ vnd stehen so in langweyligkeyt oder lang zeyt/ vnd werden als die versängten oder die verbrandten baume/ von welchen die bletter most vnd rinden abfallen vnd sych abschelen/ das sye ire klare/ weysse stäme zu licht brengen/ solch hitzig vorlangen brengt die selen in eynen gestrengen haßs vnd grymmigen neydt der creaturischen verhyndernüs dz sye zu gotlichem erkentnüs gern fliegen wolten/ das ist in vns eyn fegfewer welches vns eygen sele eyn neydt macht/ vnd alles das yr anleygt/ verdörret vnd zu nicht macht.

Aber solch fewer wyrt in diesem betrübten leben vilmals verdämpfft/ vnd ist in stetem kampff mit vnserm fleysch/ darumb kans hie nit so hitzig seyn als in den abgescheyden selen/ die da on alle hyndernüs kunnen hören was jnn got ym gründ der selen zuspricht Den selbigen selen wyrt aüch nit geholffen dan durch solch fewer/ darumb sollen wyr sye nit daruß brengen/ also wenig als wyr wölten begeren vnd betten das vnser glaüb/ lieb/ vnnd hoffnüng solt kalt werden.

Das ist von den selen gesagt/ die hie Christum haben gelernet vnnd angefangen zu erkennen/ vnd seynd also durch Christum entschlaffen. Aber von den selen die wenig vrteyl gottes alhie haben lernen erkennen/ vnd scheyden also von hynnen/ sollen sye sälig werdenn/ so muß sye sollich fewer auch angreyffen/ vnd langzeyt/ vil jar reynigen vnd fegen/ deshalben sye sollychs leyden nit gewont fallen in angst, meinen got hab sye gantz verlassen vnd verdampt/ kommen etwan durch verhengnüs gottes zu yren freunden/ meinen jn sey zu helffen mit messen/ vigilien/ walfarten/ wie sye dan hie gelernt haben/ vnd wen nun dyse genandten messen vigilien oder walfarten von den freunden geschehen/ vnd sye mercken das solch eusserlich werck jnn nit mögen helffen/ suchen sye dan den rechten weg& nemlich Christum/ durch welches geyst yr begirliche stat oder grundt der selen wirt gereyniget so lang biß das sye kömen in die volkomenheyt der erkantnus Christi vnd seynes hymelschen vatters/ das ist dan yr säligkeyt. Joannie. am xvii. Capittel.

Die freund aber/ so sye mercken dz soliche geyster nach den gethanden messen walfarten etc. außbleyben/ meinen inn sey da mit beholffen/ das doch nit seyn mag die weyl keyn euserlich werck mag in die sele gain schweig dan reynigen/ Es ist das eynige zunemen des glaubens vnd vertrawens zu der gütikeyt gottes durch Christum vnns bewysen/ welches die sele dem geyst gottes vereyniget. Auch ist solchen rumplen geysten schwerlich zu glauben/ die weyl da gemeynlich des teufels gesphens wyrt erfunden.

Zum letsten das man anzeucht das geschicht Jude Machabei so geschriben steht jm zweyten buch am .vii. Capit. Wie das Judas eyn summ gelts gen Jerusalem sandt/ vnd das selb vor die jm krieg gestorben waren hat lassen opferen/ ist meyn antwurt/ so diese bucher sonn sant Augustino vnnd Hieronimo/ auch anderen gelerten zu der zall der warhafftigen bücher der heyliger schrifft nit angezeigt syndt/ sollen darumb in diesem fall gen mir auch keyn macht haben.

Das aber die kyrch nit gäntzlich sye verworffenn hat/ ist der historien halben geschehen/ welche vns anzeygung gibt wie mänlich/ etliche freund gottes vor Christi zukunfft in erhaltung gottes gesatz/ auch in grossem leyden bestanden seyndt. Disse eynige vrsach ist vns sant Augustinus anzeygen/ so er schribt wyder die ander epistel Gaudencij im zweydten buch am .xxiii. Capit. Item Von der stadt gottes am .xviii. buch. xxxvi. cap. Was aber daruber in den selbigen oder der gleichen bücheren geschriben steht/ das wil der genante doctor an radt vnd vrteyl der heyliger schrifft nit annemen/ dazu füret er vff disse bücher den spruch Pauli .i. tessalo. v. capit. Geforschet oder prüfet allels/ vnd bedhaltet das da gut ist Dar vyß man wol verstehen kan/ dz diesse vnd der gelichen bücher nit in allen stucken seynt anzunemen/ wie er dan weyter vnnd klärlich wyder die genandte epistel anzeigt. Dise zwen teyl Augustini werden auch von eynem wolberedten/ subtilen/ höch schrifftgelerten Byschoff auß Engelland herfur gebracht/ da mit er dan vermeinet die mißbruchung des fegfewers zuerhalten/ die weyl er aber merckt/ das disse eynige vrsach (welche Augustinus an beyden orten anzegt) jm nit dyenet ya auch wyder ist/ derhalben kan er sye meysterlich vnberurt leygen lassen.

Zum anderen sant Hieronymus in seyner epistel als zu Paulino geschriben/ da er alle bücher der heyliger schrifft des alten vnnd nuwen testaments erzelet/ ist nie dyesser gedächtig worden/ schweig dan das er vil solt dar von halten. Vnnd an eym anderen ort meinet er/ das Josephus der eyn Jud gewesen ist/ diß zweydte buch mit grekischer sprach hab außgebracht. Nun ist dyesem juden Josepho alleyn in historien vnd geschichten (sso er von den juden schreibt) zu glauben/ was er weyter schreibt dz vnsern glauben antrifft/ dar von ist im von got nichts befollen darumb auch on grundt der eyliiger schrifft nit zu glauben. Derhalbenn hat auch Augsutinus das geschicht Razij aynes namhafftigen alters/ welches jm selbigen buch hoch gelobt vnd erhaben wirt/ als vnchristlich verworffen die weyl es mit keyner schrifft mag vergleicht werden. Sol nun der grundt dieser sachen starck vnd vest seyn/ so muß er mit bewerten vnd vnuerdechtlichen schrifften gebawet werden. Es ist auch zu clagen das diß verdechtlich buch so schwere vnd grosse sachen sunder hulff der anderen warhafftigen schrifften/ alleyn muß außrychten vnd vorfechten.

Hie mit wyly ich meynen dynst allen glaubigenn christen/ in besunderheyt meynen mitbergeren (als ich schuldig bin) angezeigt haben. Byt darnebenn/ das eyn ieder eynmals die augen vffthu/ vnd die warheit durch das warhafftig euangelium Christi oder gottes wort erkenne/ dar von nit abweyche. Auch die grossen vnkost an begrebnus/ begengnuß/ vigilien/ commendatzien/ seelmessen/ jarmessen/ jargezeyten/ mönstunden/ hochgyfferen/ wachssen kertzen/ seyden balcken/ glocken leuten/ gräber weyhen/ vnd der gleychen vngegrundes erdichten ceremonien vnnd weysen/ anlagen/ wyl ich trewlich vor jrem schaden warnen/ auch auß berurten beschlussenn erkennen kunnen/ das solche weyse vnd werck/ die noch grund noch boden in der heyliger schrifft haben/ den verscheyden selen wenig behulfflich seyn mögen/ nach dem got wol weyß was innen vonn nöten ist/ er wirts jnn auch wol geben/ wan sye nun geschickt werden das sye mögen/ die gaben entpfahen vnd annemen. Wer weyther fur die selen betten wil/ dem laß ich seyn gute meynung alleyn das er sehe vnnd bette nach dem willen gottes. Auch mag eyn yeder vff seyne sprach got anruffen/ das er wiß vnd verstehe was er bette/ als geschriben steht. Got ist eyn geyst vnnd wer in anbetten wil der muß in im geyst vnd warheyt anbetten. Joannes. am iiij. Capit.

Von der vnkost/ wer besser (meynes bedunckens) dz ma sölch gelt/ so fur die toden vnbarmhertzlich vnd geweltlich von den armen gedrungen vnd abgeschetzet/ sunst vnnutzlich außgeben wyrt/ den lebendigen armen nodturftigen/ das ist/ vnseren brüderen nach Christus leer/ mitteylte/ vnd lyeß sye keynen mangel lyden/ da wurdt es an zweyfell wol vnnd nutzlich außgegeben seyn/ vnd dyß sey dem gemeynen man gesagt.

Den anderen aber die mit alten gewonheyten/ alt herkomen/ vnd (als sye sagen) löblichen gebrauch vnder dem heyligen namen der kyrchen/ on grundt der schrifft/ in nachteyl der christlicher warheyt/ yren nutz vnnd gewyn/ vnderstan zu beschutzen oder beschirmen. Wunsch ich durch den glauben vnd zuuersicht in Christum/ die erkantnüs der warheit/ so das nicht seyn mag/ so geschehe als Joannes in seyner offenbarung am lesten Capit. schriebt Die zeyt ist nahe/ wer beleydiget der beleidige weyter/ vnd wer vnreyn ist/ der vnreynige sych weyter/ vnd wer rechtfertig ist/ der rechtfertige sych weyter/ vnnd wer heylig ist/ der heylige sych weyter/ vnnd sehe ich kom baldt vnnd meyn lön mit myr zu geben eynem yglichenn wie seyn werck seyn werdenn/ Des zukunfft wir auch alzeyt seyn warten der da mitsampt dem vatter vnd dem heyligen geyst lebt vnnd herschet jn ewigkeyt. AMEN.