Kurtzer auszug ausz Doctor Martini Luther büchle.

Eyn Mensch musz vor allen dingen ain rechten Christlichen waren und vesten glauben und vertrauen zu got haben und es darfür halten/ das unns got auß lautter gnad und barmhertzigkayt wil selig machen/ und das uns kain wercke weder fasten/ noch betten/ noch stiften noch almüßen geben noch andere slig mügen machen.

Ein mensch soll sich auch kains gebets mer dann des / Vater unser/ des Ave maria/ unnd des glaubens befleissigen.

Mag auch also beten:

O herr behüt mich vor den zuneigung und gutduncken des fleysch und gib mir die zuneygung des geysts amen.

O got gyb mir deine werck/ verleihe mir zu betrachten deine werck/ unnd erlöße mich von meinem gutduncken/ und vor der geystlichen Hofart und vor allen heymlichen vordamlichen sünden/ unnd bevor vor der unere deines gotlichen namens amen.

Der herre JEsus unterweyße und erlöß uns durch sein barmhertzigkaytt in unnster freiheyt/ die gnad/ barmhertzigkayt/ und der frydt von Got dem Vatter/ unnd dem herren Jesu christo dem sun des vaters jn der warhayt und der lieb seint mit uns. Amen.

Die gnad gottes und der fryd gotes werd jn uns erfilt in dein erkentniß gotes und Christi Jesu unsers herren Amen.

O herre fure uns mit deinez liecht mach uns bekandt/ unnd weyse uns den weg den wir wandern sollen amen.

O gütiger barmhertziger got erlöße uns von d sund des unglaubens/ mere in uns den glauben/ Gib uns die warhafftige gerechtigkayt/ O herre straf uns nit in deinez zorn und grimen/ unnd gee mit uns nicht in dein gericht Amen.

O got der du hast zugesagt/ den die dich in eynem rechten glauben bitten alles das zugeben das sie bitten/ wir bitten dich gib unns dein götliche lieb unnd forcht. Gib uns die eererbietung deines götlichen namens/ gib unns gedultt in unsern schanden/ Gib uns das recht gebet/ die rechte meß/ gib uns gedult in unsern widerwertigkayten/ und kranckhaytten/ gib uns den gehorsam/ die mildigkayt/ die gütigkayt/ die barmhertzigkayt/ die keuchayt/ die armut des gaysts/ die ware demut/ und die warhayt amen.

O gott gib uns ein rechtten verstandt deines götlichen worts und willens amen.

O got gib uns frumme prediger und prelaten amen.

O Herr du ewiger beschützer und beschirmer sich uns an mit den augen deiner götlichen barmhertzickayt und erbarme dich uber uns/ und erhöre uns amen.

Got der fure unsere hertzen in D lieb gotes und in d geduld christi amen. Der almechtig got/ und sein götlich gnad sey alzeit mit uns amen.

O barmhertziger got/ wir bitten dich du wellest unns dein göttlich gnad verleihen dir in allen dingen vestiglich zu vertraueen unnd dich es gee uns wol oder ubel/ zu loben zu lieben und zu eren amen.

Ewiger got/ dir sey danck unnd lob in ewigkayt/ dein will geschee in himmeln und auff erden/ dein urtayl seyn recht/ wir seind arme sündige creatur/ dein namen sey gebenedeiet in ewigkayt Amen.

O güttiger gott/ wir sagen dir danck für alle gnadenn/ tugentt/ unnd gaben/ die du allen deinenn heyligen und außerweltten von anfang der welt bißher verlihen hast und bitten dich du wellest uns auch gnad geben durch die fueßstapffen und vorbild jres starcken glaubens und vesten vertrauens in dich in unserm leben unnd sterben zu handlen wandern und verfaren durch Christumn unsern hern Amen.

O herr erlöß uns dann du bist unßer got amen.

O güttiger got verleihe unns ain senften gayst unsern nechsten/ rechtt und von grunde unsers hertzens zu lieben amen.

O got wir bitten dich du wellest uns gnediglich ansehen/ den gantzen willen deiner gütte in uns erfüllen zu sampt dem werck des glaubens domit der namen unsers herren Jesu christi in uns erclert werd/ und wir in jm nach der gnad unsers herren christi Jesu verclert werden amen.

Unser herr Jesus christus und unser got unnd Vatter der uns geliebt hat/ und uns ain ewigen trost und gute hoffnung geben hat/ troste unsere hertzen und bestetig sie in allen gutten wercken und reden amen.

Man soll auch wissen das die hayligen/ Sacrament/ seint alle zaychen und versicherung der götlichen gnaden und zusagung das uns got unßer sün de durch sein sun Christum unsern herren vorgeben hat/ und vergeben will/ darauf sollen wir im leben und todt unnd beyleib auf kayn werck bawen/ steurn unnd uns vertrösten.

Meyn lieber gott ich bekenn es/ ich clage dirß/ das ich ein armer sundiger unfletiger unnd unrainer drecksack bin/ ich weyß aber das du mein got/ mein herr/ mein erlöster/ mein seligmacher bist/ Ich wey und glaub das dein sun Christus Jhesus mein seligmacher ist/ und das er die sind/ die welit/ den teuffel/ unnd die hell uberwunden hat/ des allein vertröst ich mich/ darauff baw ich/ do steet mein hoffnung/ da will ich mich lassen finden/ allein sey mir genedig/ wie ich deiner warhaftiger zusag nach nicht zweiffel/ dann du bist die warhayt selbst/ du felest nicht amen.

O herr gib mir ein vesten glauben gib mir ein bestendige hoffnung/ und gib mir ein rein lieb gegen dir unnd meinem nechsten amen.

Wir haben anfechtung am leib/ am gut/ an der eren/ am gewissen/ oder an der seel/ von den leutten/ von unserm aygen fleisch/ von der welt/ von den sunden/ od vom teuffel/ so sollen wir alweg zuflucht zu gott haben unnd jn umb seyn götlich gnad bitten unnd gedencken unnd glawben das solche anfechtung weil got unser erlößer ist nichts kunnen schaden. Solcher glawb machet unns selig/ dann nichts macht unns selig dann der glawb unnd das vertrauen zu got/ widerumb machet unns nichts unselig/ dann der unglawb unnd die mißtrew.

Ewiger barmhertziger gott ich armer sunder kum zu dir von dir zu hollen gnad/ heyl/ gesundthait und seligkayt/ dann ich weyß mich der bey kainer creatur weder jn himel noch auf erden zu erhollen. Darumb bit ich dich durch dein göttlich zusage/ du wellest mich dz werck deiner hende gnediglich an nemen amen.

O got verleich uns was du heyst/ und gib uns das du gebeutest.

O herr fure uns auß den wercken in den glawben/ auß unserm vermügen in dein vermügen/ und auß dem freien willen in dein götlich gnade.

O almechtiger got mach uns selig durch dein grundloße barmhertzigkayt und gib uns unnd allen Christglawbigen lebendigen und todten dein gnad und lieb deiner gebot und endtlich die ewig seligkayt amen.

Vatter unser der du bist in dem himel. Geheyligt werdt dein name.

Das erste und aller gröst ist die beheyligung des götlichen namens/ und wenn der selbig geheyliget ist/ so seint alle ding verbracht/ Aber gottes namen kan nicht volkommenlich geheiligt werden/ es kumme dan nach dez endt dises lebens das an sinde/ das ist/ on die unere des göttlichen namens nicht ergeet das Reich gotes. Also sollen wir bitten um das reich gottes nichtt umb unser selickaytt willen/ sondern das gottes ere unnd namen gewirdigt und erlich gehalten werdt.

Nun kan das reich gottes nicht kummen es geschee dann/ der will gottes das ist/ wir werden dann von den sunden gereinigt/ unnd todten unsere laster durch das Creutz Christi.

Dar zu wir bedirffen des götlichen worts unnd des hochwirdigen Sacramennts/ das ist des teglichenn brots. Weil wir aber in disem leben nicht on sund seint/ bitten wir unns unser sunde zu vergeben/ wie auch wir unsern schuldigern vergeben/ wenn wir die vergebung der sunde erlangen so mussen wir fest halten und nach dem wir viel anfechtung haben/ bitten wir gott er welle uns in den anfechtung nit lassen vergee/ sundern erhaldten.

Endtlich wenn wir gottes ere willen unnd reich gesucht haben/ so bitten wir das er unns welle von dem ubel erlößen.

Also sollen wir zum ersten got/ und darnach erst das unser suchen.

Die unfruchtigen betten das vater unser hindersich als nemlich.

Zum ersten erlöst zu werdenn von dem ubel.

Darnach in den anfechtung nit vergee Folgend jr sunde zu vergeben.

Darnach oder vileicht nimmer nicht Umb das gotlich brott/ das ist umb gottes wort und fronleychnam.

Um gotes willen/ umb gotes rei9ch/ umb gotes ere/ lob/ rum/ und glorie.

O barmhertziger/ gütiger/ geduldiger und warhafftiger got/ wir bitten dich du wellest uns eroffnen unsere augen das wir bekerdt werden von der finsternus zu dem liecht und von dem teufel zu dir zu enpfahen die vergebung der sünd und das erbe mit den heyligen durch dein heyligen glawben. amen.

Vor allen dingen soll man alle tag gott umb sein götlich gnad und hülf bitten unnd anruffen/ mit dem heyligen Vater unser etc.

Item wir sollen got um ain rechten glauben lieb/ und hoffnung biten/ dz wir in uber alle ding lieb haben/ jm vertrauen/ unnd alle unser lieb hoffnung und vertrawen auf jn allein setzen. Wir sollen es auch darfür haltten/ das unns unnser leben wie heylig und gut dz sein mag/ und gar kein werck mügen selig machen/ sunder alain die lauter gnad und barmhertzigkayt gotes/ und also sollen wir an unserm vermügen verzagen/ und unser hoffnung und vertrauen in got setzen/ und uns alle zeit vor sinder und sinderin halten/ und vest glawben dz wir nicht vermügen/ für unser sind genug zu thon/ sonder das unser herr christus allein durch sein bittern tod alle gebot gottwes Vaters erfilt/ und für unser sind gnug gethon habe. / Dann wenn wir in disem glawben und vertrauen steen leben und sterben/ so leben und sterben wir seliglich.

Wann der warhaftig und aller best dienst gotes ist/ das ich got lieb/ sein namen in meiner beschwerung nötten anruf und all mein hofnung und vertrauwen in jn setz es gee mir woll od übel.

Wir sollen auch um nichts anders bitten dann wie im Vater unser steet/ daz sein will geschee mit uns/ und das er uns gnad vorleihe in zu lieben/ eren/ und fürchten er gbeb und den himel od hell dann got wil alain sein lob ere/ und willen/ und nicht unser lob ere und willen leyden oder haben. Geet es uns wol so sollen wir got bitten uns sein gnad zu verleihen/ die glückselickait der welt zu verachten und uns sein göttlichen trost mit zuteylen.

Geet es uns ubel so solen wir gedencken/ wie die heyligen Veter gethun haben/ lieber got dennoch bistu unser got dennoch haben wir dich/ du bist je mein schöpfer/ mein gott mein erlößer/ des trost ich mich allein/ und sunst kaines andern dings.

Fechten uns die sinde/ und böse werck do zorn/ dort neyd und haß do hoffart do ander untugent/ so sollen wir abermals/ vor dem creutz nid' fallen/ unser sinde beichten/ und got um sein gnad biten/ und vestiglich glauben/ er werd und hab uns unser sind vergeben/ so kunnen sie uns nicht schaden.

Also wirt uns got gnedig sein und al unser sind vergeben/ wenn wir allain uns für sinder bekennen/ und glauben das got uns unser sind auß gnaden unnd barmhertzigkayt vergeben habe/ do musen wir gar nicht anzweiffeln.

Es dring uns nu unser eygnen gewissen/ od sinde/ so sollen wir allein auff got bawen steurn und uns trosten und sprechen/ got ist mein helfer und erlößer auf den verlaß ich mich allein/ wenn d' herr got mit/ bey/ und neben uns ist wer ist wider uns/ dann got kunen wir nicht liebers thun dann dz wir im glawben und vertrauen/ und es darfür an allen zweifel halten/ er werd uns haltten wz er uns zugsagt hat und widerum kunnen wir im nit unliebers thun/ dann wenn wir an seiner gnad zweiffeln.

Wenn uns einfelt wir seind nicht in der zal die von gott zu der seligkayt versehen seind/ so sollen wir für uns die hoffnung nemen/ und es dafür halten dz got uns gnedig sey und barmhertzig.

Dise hoffnung erhelt uns/ und lest uns nicht in verzweyflung fallen.

Wenn wir sterben sollen/ so soll das unser trost sein/ das wir getaufte cristen seinbd. Nun bedeut unser tauf nicht anders dann den todt unsers herren und seligmachers Christi/ sein todt ist unser leben/ ja sein todt ist unser todt/ und weil er unser haubt ist so werden wir durch jnen den todt/ die weltt/ unser fleisch/ den teufel und die hell uberwunden/ wie er sie bereyt alle uberwunden hatt. Sant Paul sprichtt: leyden wir mit dem herren Christus/ so werden wir auch in seiner glorien sein. Der herr Christus sagt Mathei am letzten/ ich wil alle tag bey euch sein biß an das endt der welt/ der herr christus sagt Joannis am XVI. habt ein guten vertrawen/ dann ich hab die welt uberwunden. Mathei am ersten wirt Christus genendt Emanuell/ das ist unser got der bey unns alzeyt ist. Der herr Christus sagt Joannis am sechsten Wer zu mir kumpt/ den werd ich nicht außtreyben.

Item er sagt Mathei am Eylften/ kumpt zu mir alle die jr arbait und beschwertt seydtt/ ich wiell euch erkwicken.

Sophonie am dritten/ der Künig zu Jsrahel Got der herr ist mitten in dir/ du selt dich hinfür nicht mer vor dem ubel forchten/ dann die zeyt wirt zu Sion das ist zu den Christen gesagt werden/ Sion fürcht dich nicht/ laß nicht ab/ got dein herr ist mitten in dir, der selbig starck gott wirt dich selig machen.

Summa summarum/ wenn wir glauben/ got hab uns unser sund vergeben/ und das got allain gerecht und frum sey und das wir sunder ungerecht und böß seind/ und das wir got loben und lieben/ so werden wir selig/ also hat er selbst gesagt/ wider den glawben wirt die hell keyn kraft haben.

Darumb wir sterben oder genesen so sollen wir uns allein an gotes gnad und barmhertzigkayt halten/ so seind wir selig.

Dann die sacrament seind nichts anders dann zeichen das uns got sein gnad unnd selickayt zugesagt unnd unser sind vergeben hat.

-der halben sollen wir got loben und dancksagen/dz er sein hayligen und uns so gnedig ist/ diser glaub lest uns und keyn menschen auf erden verdampt werden.

Dann all unser werck auf erden müssen alleyn in gottes ere/ unnd unserm nechsten zu helfen gericht sein/ da steets gar innen/ dazu unns allen Gott helff. Amen.