…/ warumb deß Luthers Discipel/ fürnemlich Herrn Caspar Schwenckfelden/ vnd die mitbekenner der glorien vnd rainen Lere des Euangelij Christi hassen/ verfolgen/ vnd fälschlich beschrayen..

DEr Erste ist/ Daß C. S. vnd andere/ den Herrnn Jesum Christum/ den waren ainigen vnd natürlichen Sune Gottes/ wie jhene achten/ zu hoch preisen/ ihm zu vil eer anthun/ Die bekörung vnnd gantze seligkmachung dess menschens/ jme allain vnd rain on aller Creaturen mithülff/ zuschreiben: Das Ampt der gnaden/ so Christus imb H. gaiste selbs füret/ vomm Ampt der Diener gebürlich vnderschaiden: Vnd daß sie Christum/ nach dem Er von den todten aufferstanden/ vnd auf den Thron der Maiestet Gottes zur rechten seines Vatters ist gesessen/ rc. mit glauben in ainem Götlichen wesen/ krafft/ macht vnd vermögen/ mit Got seinem Vatter vnd dem H. gaist/ nach seiner gantzen Person vnzertrennt/ anrüffen/ vereeren/ vnd mit dem H. Apostel Thoma/ für jren Herren vnd Gott erkennen vnd bekennen. Das ist die höchste sünd/ darwider dise Theologi so seer zürnen/ vnnd Schwenckfelden vnd andere/ als verleügkner der menschait Christi frefelich dörffen schelten.

Der ander Artickel ist/ Daß sie die Prediger vnd jren selbst angemaßten dienst/ nit hoch genug achten/ jr vnbestendige/ irrige vnd zweifelhafftige Lere/ den hohen H. beruffnen/ vnnd von Christo außgesandten Aposteln/ jrem Ampt/ dienst/ gaben/ gnaden/ segen/ vnd leben& rc. nicht wissen zu vergleichen.

Item/ dfaß man sy vnd jren vnfruchtbaren dienst Christo/ nit als mithelffer in der seligmachung deß menschens/ an die seiten setzt/ Sunder (wa gleich jr dienst recht/ vnd sie von Christo bestalt wären) gebürlich als den knechten vom Herren vnderschaidet/ Das ist die ander Sünde.

Nu were es je billich/ ja hoch von nöten/ daß sie ainmal bey sich selbst berechneten/ auch andern bezeügten/ von wannen sie kemen/ vnd ob sie der Herr Christus zu Dienern angenommen vnd gesandt habe/ Ja was jr Dienst vnd Ammt sey/ wie weit es raiche/ Vnd kurtzlich/ daß sie Gottes vnd deß Herrn Christi Diener seyen/ sollten sie darthun/ Dann solchs glauben nit alle/ die nach dem wort Christi hallten/ daß man sie an jren früchten soll erkennen.

Sie solten beweisen/ daß wir ainem yeden/ der ain Lutherisch büchlin/ zway oder drey gelesen/ vnd vff dem Predigstul etwas sagen kan/ bald für ainen Diener Gottes vnd Christi/ vnd für ainen Prediger seines hailigen worts solten annemmen: Die H. Schrifft zeüget wol von den vorigen Aposteln vnd Dienern Christi/ wie auch der Herr mit mancherlay krefften/ vnd mit außtailung der gnaden vnd deß hailigen gaists/ in jrem dienste/ zur bekörunge vnnd seligkait der mensche jre Ler/ vnd daß sie seine Diener gewest/ bekrefftiget vnd bestedtiget hat.

Nu mag sich aber mit recht/ niemands der Apostolischen befelch/ vnd der reden oder sprüche/ so sonders von jrem Ampt vnd von jren personen zeügen/ annemmen/ vnd zu jme ziehen/ noch sich damit schutzen vnd verthedigen/ er beweise dann/ vnd wisse mit grund zu berechnen/ daß solichs zu jme gesagt/ ime befolhen/ vnd er zu solichen ämptern von Christo sey bestellt vnd angenommen. Es schreibt je Paulus gantz klar vnd hell/ Daß Got gesetzt hab/ etliche zu Apostel/ etliche zu Propheten/ etliche zu Euangelisten/ etliche zu Hirten vnd Lerern/ rc. Ephes. 4. Vnd Act. 20. sagt er zu den Eltisten oder Lerern der gemainde Gottes: der h. gaiste hat eüch gesetzt zu Bischöfen/ zu waiden die gemainde Gottes/ welche ER durch sein aigen blut hat erworben. Sihe/ wer der ist/ der die Gemainde Gottes mit Amptleüten/ Lerern vnd Predigern versihet vnd bestellet.

Wer wolte dann so vermessen sein/ vnd sich on deß Herren Christi/ als deß haupts/ seiner Gemainde/ one den H. gaist/ one beruff vnd sendung/ in soliche ämpter eintringen/ vnd sich frefelich vndersteen/ dieselbigen zu verrichten?

Es seind wol alle glaubige/ nach der lere Petri schuldig/ daß sie die tugenden/ die güte/ liebe vnd barmhertzigkait Gottes vnd Christi jres erlösers/ der sie auß der finsternus/ zu seinem wunderbarlichen liecht beruffen/ verkündigen/ von jme rümen/ zeügen/ loben/ predigen/ schreiben/ singen vnd sagen/ Aber daß sie sich darumb bald in die höchsten Apostolische befelh vnd ämpter eintringen/ vnd dieselbigen zuuerrichten sich anmassen/ Solichs mag jnn drumb nit zugegeben noch zugelassen werden. Aber von disen Puncten/ ist hie nit nach der lenge zehandeln/ Es soll nur ain wenig angereget sein/ Ain annder mal etwas mehr dauon.

In Summa/ so läßt es sich ansehen/ als ob jren vil diser zeit gern übern Glauben Herren sein wolten/ vnnd daß man oren vnd augen zu thete/ sie lereten/ predigten/ vnd schriben wie verwirrt/ irrig vnd schödlich als sie wolten/ so sollte man schweigen/ dawider nichts reden noch schreiben/ Dann sonst möcht jnn das Interesse bald schmeler werden/ vnnd jr Predigampt/ darauß etliche ain Handtwerck machen/ vnd Weib vnd kind damit neren/ nimmer wöllen geltten.

Darumb so befilhet Johannes/ daß man die Gaister prüfen soll/ ob sie auß Gott seyend/ Das werden wir thun/ vnd soliche Currenten lassen löstern/ schmehen vnnd zürnen so lang sie wöllen.

Sie wöllen noch nit erkennen/ daß Gott der Herr Christus jres dienstes/ wie er yetzt steet/ nit will/ noch denselbigen mit gnad/ frucht vnd segen befürdert/ Noch dienen sie anhin/ so lang es in die Küche dienet/ sehen nicht/ gleich wie Bileam/ wer wider sie steet/ die augen werden jhnen gehallten. Dann die weil sie dem vffgeenden Liecht der gnaden Christi/ ja dem Hailigen gaiste widersteen/ vnd die ware/ raine vnd vngefelschte lere dess Euangelij Christi tadlen/ seine gloria vnnd herlichait verspotten vnd verachten/ Was sollte denn anders folgen/ dann das heut vor augen ist/ vnd das sie auß gerechtem wolverschuldten vrteil Gottes/ widerumb in die vorige alte finsternuß/ blindthait/ vnd gefencknus gefürt sollen werden/ darauß sie aber der barmhertzige Gott gnedigklich hatte angefanngen außzufüren vnnd zu ledigen/ Er geb jhnen solchs zuerkennen.

Dargegen ist zuhoffen/ Daß der güttige Gott die seinen/ so vnnder allen Secten/ durch betrug vnd falsche lere gefangen werden gehalten/ auß aller verfürung/ finsternus vnd irrung/ vmb Jesu Christi seines geliebten Suns willen/ vnd durch sein erkantnus werde füren/ retten vnd freyen/ vnnd jm ain Völcklin zurichten/ das in seinen Gepotten vnd wegen wirt wandlen/ zu lob vnd preiß seiner vnmesslichen Glorien/ eere/ vnd herrlichait/ darumb alle glaubige sollen pitten/ vnnd von hertzen Amen sprechen.

AMEN.