…wider vnsre Gottslesterliche Ketzer/ so Gottes allein Seligmachent Wort/ rede vnnd lehr/ auch die gnadenreichen Sacrament für vnkrefftige mittel zur ewigen seligkeyt/ schendlich lestern vnnd verachten.

Johannes 12.

Jesus aber rieff vnd sprach/ Wer an mich glaubet der glaubet nicht an mich/ Sondern an den der mich gesant hat/ Ich bin komen in die Welt ein liecht/ auff das wer an mich glaubet nicht inn finsternuß bleibe/ vnnd wer meine wort höret/ vnnd gleubet nicht/ den werde ich nicht richten/ denn ich bin nit komen das ich die Welt richte/ sondern dz ich die welt selig mache/ Wer mich verachtet vnd nimpt mein wort nicht auff der hat schon der jn richtet/ das wort/ welchs ich geredt habe/ das wird jn richten am Jüngsten tage/ denn ich habe nit von mir selbst gered/ Sondern der vater der mich gesant hat/ der hat mir ein gebot gegeben was ich thun und reden sol/ vnd ich weiß das sein gebott ist das ewige leben/ Darumb das ich rede/ das rede ich also/ wie mir der Vatter gesagt hat.

Dieser spruch alleine ist also starck/ klar vnd gewaltig wider die Gotslesterlichen stinckenden Wortstürmer/ das er all jre schwermereien/ so vil das seligmachent wort Gottes belangt/ gantz vnnd gar zu grundt hernider wirfft/ dann erstlich zeigt er klar vnnd deutlich an/ was das wort Christi sey das er als ein Mitler von dem Vatter hat empfangen den armen menschen zupredigen/ Nemblich/ Es ist eine lehr von Gott vnnd seinem willen gegen dem menschlichen geschlecht/ welche lehr auch die Gottlosen wol hören/ Aber sie Glauben jr nicht/ vnd solches wort ist in keinem wege das wesen Christi oder die person Jhesus Christus selbs/ Denn vnser lieber Herr Christus sonderts von sich mit allem fleyß abe/ also sagent/ Nicht ich werde richten/ sondern das wort/ welchs ich geredt habe/ Von solchem wort spricht er auch/ Johannis am xvii. Die wort die du mir gegeben hast/ wil ich jnen geben.

Item/ ich bitte für die/ so durch jr wort an mich glauben werden/ Allhie muß vnnd kan man durch das wort so hernach beschriben ist worden/ nichts anders verstehn noch außlegen/ dann die lehre/ vnd das gepredigte wort oder den dienst seiner Heyligen Aposten/ Merterer/ Bischof vnd anderer gleubiger/ dadurch Gott der Herr mit vns auß lauter gnaden vnd barmhertzigkeit den glauben vnd die Gotseligkeyt anfengt fort fert ja hand habt sterck vnd volfürt sein angefangen werck in vnns on all vnsre vorgehende vnnd nachvolgende gutte werck/ Summa fides ex auditu. rc per fidem sine operibus legis iustificamur. Rom. 10. ac. 3.

Vors ander/ Solich wort oder Lehre Gotes welchs der Almechtige Got durch die Propheten vnnd Christum hat geredt vnnd das Christus den Aposteln vnnd hernacher die Apostel allen Christen vberantwortet vnd als ein vertrawt edet leynot vnd die aller beste beylag auffs trewlichst/ durch den Heyligen Geyst: der inn vns wonet: biß an yenen tag zubewaren/ gleichsam hinderlegt vnd eingethan/ ist nie wie die stinckenden Schwermer lesterlich gayfern/ ein schlechter schal/ stymme laudt vnnd todter vngewisser buchstabe. Neyn du lester Teuffel mit nichte nit. Sondern es ist ein wircklichs krefftiges/ thetiges vnd Allmechtigs ding/ wie gehört/ vnnd wie alhie Christus die ewige warheit beweist/ das da die vnglaubigen stinckenden böcke wirdt richten vnd zum ewigen Hellischen fewr verurtheilen/ Vnnd dargegen die glaubigen frommen schefflein zur ewigen freud vnd seligkeit bringen/ wie dann der Heylig Paulus diß auch an vilen orten klar bezeuget/ Nemblich das das Euangelium von Christo oder Christi. Item das wort vom Creutz eine kraft Gotes sey zur seligkeit allen gleubigen rc.

Alhie hast du/ Lieber Christ/ je klar genug das die lehre von Got durch die Propheten/ Christum vnd Aposteln geredt vnd hernach beschrieben/ welche wir die Heyligen schrifft nennen/ sey das rechte Wort Gottse/ das Christus als ein Mitler von dem vatter empfangen/ vnd den Aposteln vbergeben/ vnnd nicht das wesen oder die Person Christi/ wie die stinckenden klügling vnd lesterlichen wortstürmer schwermen/ Solch wort vnnd lehr wird die vnglaubigen richten vnd verdammen vnnd die glaubigen zur Seligkeit zur Seligkeit bringen. Daher die tauffe ein bad der widergeburt vnd vnd Christi predigt/ wort des ewigen lebens genent werden/ Joha: iii. vj. Tit. iii. dadurch der Heilig Geist widergebirt/ tröst vnnd wircket wie vnnd wenn er will/ wie Christus spricht/ der Wind bleset wie er will rc. Drumb heist er vnns fleyssig am wort vnd Sacrament anhalten vnd wachen/ Dann wir wissen nicht welche stunde der Herr komen wirt/ derwegen soll einer vmb eins guten Stündleins willen/ sein lebenlang gern vnnd mit fleyß Gottes wort hören lesen vnnd lernen/ wie man spricht/ vmb einr bösen stund sol einer ein gantz Jahr ein wehre tragen.

Hierzu mercke sonderlich wol vnd fleysig wz von disem handel halt/ vnd Judicire der thewre heldt. D. Mart: Luther/ seligster gedechtnuß (der disem grewlichen schwarm vnd verdamblichen Gottslesterung : wie auch sonst all andern secten vnd rotten : auffs gewaltigst mit Gotes wort begegnet vnnd denselben gar als ein stinckenden teuffels Gifft verworffen vnd verdampt hat/ Im buch de Concilijs spricht er vnter andern worten/ Also/ Darumb hat nun Eclesi.i: das Heylige Christliche volck/ nicht schlecht eusserlich wort/ Sacrament oder empter/ wie der Gottsaff Sathan auch vnd vil mehr hat/ die er zur zauberey gebraucht/ Sondern hat sie von Gott gebotten/ gestiefft vnnd verordnet/ Also da er selbs: kein Engel: dadurch mit dem Heyligen Geist wil wircken. Vnnd soll nit Engel noch menschen/ noch Creatur/ sondern/ Gottes selber Wort/ Tauff/ Sacrament/ Ampt vnnd vergebung oder Absolution heyssen/ on das ers wil thun/ vnns armen schwachen blöden menschen zu trost vnd gut/ Nicht durch seine blösse erscheinende helle Maiestet (denn wer könte dieselbige in solchem sündlichen armen fleysch ein augenblick leiden? wie Moyses sagt/ Non uidebit me homo et niuet.) Sondern er wils thun/ durch leydliche/ seuberliche/ liebliche mittel die nit wol von vnns selbs kenten besser erwelet werden/ Als das ein from gütig mensch mit vns redet/ predigt die hend aufflegt Sünde vergibt/ teuffet brot vnd wein gibt zu essen vnd zutrincken. Wer kan sich für solchen lieblichen formen entsetzen vnd nicht vil mehr sich von hertzen frewen? Wolan das geschicht vnns blöden menschen zu gut/ darinn wir sehen/ wie Gott/ als mit lieben kindern vmbgeht vnnd nicht will : wie er wol recht hette : Maiestetisch mit vns handeln/ vnnd doch darunter seine Maiestetische Göttliche werck macht vnd gewalt vbet/ als Sünde vergeben/ sünd außfegen/ todt wegnemen/ gnad vnd ewiges leben schencken rc. Summa was Gott heyst schaffet vnnd verordnet/ das sollen wir mit allen freuden vnd danckbarkeit aunemen/ lieben/ loben/ Ja vor hoher heilthumb halten vnnd vns lieber lassen sein weder Himel vnd Erden ist/ Als mit wasser tauffen/ brot vnd wein/ das ist Christus leib vnd blut geniessen/ Item dz muntliche wort eins menschen/ hende aufflegen zur vergebung prauchen/ rc.

Denn Gott will hiemit selber wircken vnd soll sein wasser/ wort/ handt brodt vnnd wein sein/ dadurch er dich wölle heyligen vnd seligen in Christo/ der vns solchs erworben vnnd den Heyligen Geist vom Vatter zu solchem werck gegeben hat/ Kurtzumb/ Man soll seinem wort gehorchen/ man sol seine Sacrament brauchen/ man sol seine Kirchen ehren/ So wil ers genedig vnnd sanfft genug machen/ auch gnediger vnd senffter/ weder wirs künten begeren/ denn es heyst/ Ich bin dein Got/ du solt kein andere Götter haben/ Heyst auch/ disen solt jr hören vnd keinen andern/ Item es heist/ Der glaube kompt auß dem gehör durchs wort Gottes. Dergleichen sagt auch der Heylig Augustinus/ fragent Versuchen wir nicht den/ welchen wir geglaubt haben? so wir die kirchen meiden zuhören vnnd zulernen das Euangelium/ Sondern wollen harren vnd warten biß wir entzuckt werden in dritten Himl wie Sanct Paulus/ Billich hüten wir vnns für solchen hochfertigsten vnd geferischen anfechtungen dea Teuffels/ vnnd sprechen mit dem Küniglichen Propheten Dauid/ Das gesetze deines mundes ist mir lieber/ dann vil tausent stück Gold vnd Silber. Item dein wort ist meyner füsse leuchte vnnd ein liecht meyner wege/ Auch mit dem Heyligen Petro/ Wir haben ein Prophetisch wort vnnd thun wol dran/ das wir darauff achtung haben/ als auff ein liecht das da scheint im tunckeln/ Dann durch dz schrifftliche vnd gepredigte wort seiner ordenlichen beruffenen diener/ vnd also auch durch die Sacrament/ als ein sichtlich wort/ wie es Augustinus nent/ wirckt vnnd gibt/ Gott der Vatter auß lauter gnad vnd barmhertzigkeyt vmb seins lieben sons willen in der krafft seins heyligen Geist/ die ware buß mit jren früchten/ vnd den glauben in die hertzen seiner ausserwelten/ wie Sanct Paul zun Eph. am 1. sagt/ Drumb spricht der Herr Jesus Christus das ewige wort Gotes seins vaters selbs. Joha. xvii. Ich bitte aber nicht allein für sie/ Sondern auch für die/ so durch jr wort ann mich glauben werden. Diesen tröstlichen bericht sollen wir wol mercken vnnd vns fleyssig fürsehen für den fleyschlichen menschen/ denen Gottes wort/ Sacrament/rath vnnd weißheit/ ein torheit ist/ Solche verechter des Göttlichen worts/ vnd seiner Heyligen Sacrament wollen wir fliehen vnd mit Sanct Paulo sagen/ Wer anders lehret/ wens auch ein Engel vom Himel wer/ der sey verflucht/ vnnd mit Christo wider den Teuffel vnnd seine Apostel die wortstürmer vnd Sacramentschwermer sprechen/ Du solt Gott deinen Herrn nicht versuchen. Demselben vnserm eynigen Heyland Christo Jesu sey lob ehr vnd danck/ sampt dem Vater vnd Heyligen Geist/ einigem rechten Got vnd Herrn aller Herrn in ewigkeit/ Amen.

2. Timo. 3° vnd 4°.

Predige das wort/ halt an es sey zu rechter zeyt oder zur vnzeit/ straffe/ drewe/ ermane mit aller gedult vnd lehre rc.
thu das wercke eines Euangelischen predigers/ richte dein Ampt redlich auß. Die Heylige schrifft kan dich vnterweysen zur seligkeyt durch den glauben in Christo Jhesu.

Quelle: Erhard Schnepff, Warhaffte und auß heyliger Schrifft wolbegründte Sprüche, Nürnberg 1555