[Aufschrift:] Den Ehrsamen, vorachtbaren, weisen vnd fürsichtigen Hern Bürgemeistern vnd Rath der Stadt Mengerinchausen in der Graveschafft Waldeck, meinen in sonders großgünstigen Herrn vnd werthen Freunden.

Erbare, Ehrsame, vorachtbare, fürsichtige, weise, großgünstige Herren vnd Freunde. Neben meinem gebet zu dem allmechtigen für Ewer Acht: Günsten alß auch deroselben ganzen Stadt, meines lieben Vatterlandes, glückseligen heyl vnd wolfahrt vnd erbietung meines bereitwilligen diensts jederzeit zuvor, mag Ewer Achtbarkeit vnd Günsten ich hiemit zu verstendigen kein vmbgang haben, dass durch schickung des allmechtigen alß auch auff raht guter Herrn vnd Freunden vnd bewilligung beider seits Freundschafft ich an die Erbare vnd tuggentsame Fhraw Catharina, des Ehrwürdigen vnd hochgelehrten Herrn Petri Dornbergii, der H. Schrifft doctoris, weiland in Dortmünden zu Sanct Peter gewesenen Pfarrers seligen nachgelassener Wittiben mich ehlich versprochen vnd eingelassen habe.

Wenn nu wir vnsern Christlichen Kirchgang vnd Ehrentag des Dinstages nach den heiligen Drey königen (: welcher der achte tag Januarii des künfftigen Jahres stylo veteri¹⁾ seyn wird:) alhie zu Vnna zu celebriren vnd zu halten entschlossen vnd zu Ew. Acht: vnd Günst: vnd ganzer Stadt, meinem vielgeliebten Vatterland (: da ich von kind auff erzogen vnd vieler freundschafft, ehr vnd gutthaten zum offtermal genössen :) mich jederzeit aller günstigen zuneigung getröstet vnd noch getrösten thu,

Alß²⁾ gelangt an E. Acht. vnd G. meine freundliche dienstvleißige bitt, dieselbige auff obbenannte Zeit vnd tag sampt andern geladenen Herrn vnd Freunden allhie zu Vuna vnserm Christlichen kirchgang vnd hochzeitlichem Ehrentag in Gottseliger freude mit beyzuwohnen, günstiglich erscheinen wöllen.

Welchs vmb E. Ach. vnd G. alß auch deroselben ganzen Stadt vnd loblicher Bürgerschaft ich nach vermogen mit meinem geringen dienst jederzeit wider zu verschülden mich pflichtig thu erkennen vnd bereitwillig anbieten.

E. Acht. vnd G. sampt der ganzen Stadt hiemit dem Schutz des Allerhochsten vnd seiner heiligen Engeln alß einer fewrigen Mauren zu erhaltung lieblicher Fried vnd einigkeit vnd befürderung des gemeinen Nutzen vnd wolfahrt in meinem Christlichen gebet zum trewlichsten befehlend. Datum Vnna den 8. December stylo veteri Anno 1599

E. Acht. vnd Günsten
Dienstwilliger
Philippus Niccolai. D.³⁾
Ecclesiast⁴⁾ zu Vnna.⁵⁾

[Unter der Adresse die Kanzleibemerkung:]

IIII - Rchth. 4 alb. hirauff dem Hern Doctorn vff seinen hochzeitlichen ehrentag verehrt
Anno 99
den letzten Decembris.