S. Petrus.

ICh Glaub an GOTT Vatter Allmechtiger/ Schöpffer hymels vnd der Erden.

DAs ist/ ich versag dem bösen Geyste aller Abgötterey/ Zauberey vnd misglauben.

Ich setze mein trawen auff keinen Menschen auff erden/ auch nit auff mich selbs/ auff noch mein gewalt/ kunst/ gut/ frömbkeyt/ oder was ich haben mag.

Ich setze mein trawen auff keine Creaturen/ sie sindt im Hymel oder auff Erden. Ich erwege und setze mein trawen/ allein auff den blossen vnsichtlichen/ einigen got der Hymel vnd Erden geschaffen hat/ vnd allein vber alle creaturen ist. widerumb entsetze ich mich nicht/ für aller bosheit des Teuffels/ vnd seiner gselschafft/ den mein Gott vber alle ist.

Ich glaub nichts dest weniger an Gott ob ich von allen Menschen verlassen/ oder verfolget werd.

Ich glaub nichts desto weniger/ ob ich arm/ vnuerstendig/ vngelert veracht bin/ oder alles dinges mangel.

Ich glaub nichts dester weniger/ ob ich ein sünder bin/ denn diser mein glaub sol vnd mus schweben vber alls/ was da ist vnd nit ist/ vber Sünd vnd Tugend vnd vber alles/ auff das er an Gott sich lauterlich vnd rein halte/ Wie mich das Erste Gebot dringet.

Ich begere auch kein zeychen von jm/ jhn zuuersuchen.

Ich trawe bestendigklich/ auff jhn wie lang er verzeuhet/ vnnd setze jme kein ziel/ zeyt/ mass/ oder weis/ sonder stelle es heim seinem Göttlichen Willen/ in einem freyen richtigen Glauben.

So er denn allmechtig ist/ wz mag mir gebrechen/ das er mir nit geben oder thu mög.

So er Schöpffer Himels vnnd der Erden ist/ vnd aller ding ein Herr/ wer wil mir etwas nemen oder schaden? Ja wie wollen mir nit alle ding zu gut komen oder dienen wenn er mir guts gan/ dem sie all gehorsam vnd vnterthan sind.

Dieweil er denn Gott ist, so mag er/ vnd weis/ wie er es mit mir machen sol, auff das beste.

Dieweil er Vater ist/ so wil er es auch thun/ vnd thut es hertzlich gern.

Dieweil ich daran nicht zweiffel/ vnnd setze mein trawen also auff jn/ so bin ich gewis sein KInd/ Diener vnd Erbe ewiglich/ vnd wird mir gehen/ wie ich glaube.

S. Andreas

Vnd an Jeusm Christum seinen einigen Son, vnsern Herren.

DAs ist ich glaub nit allein das Jesus Christus warhafftiger Gottes Son ist in einer ewigen Göttlichen Natur vnd wesen/ von Ewigkeytjmmer geboren/ Sonder auch das jm von dem Vater alle Ding vnterworffen sind/ vnd auch nach der Menschheyt/ mein vnd all Ding ein HERR gesetzet ist/ die er mit dem Vater nach der Gottheit geschaffen hat.

Ich glaube/ das niemand an den Vater glauben/ vnd zu dem Vater kommen mag/ weder durch Kunst/ Werck/ Vernunfft/ noch alles das man nennen kan/ im Himmel vnd auff Erden/ dann allein inn vnnd durch JEsum CHRIstum/ seinen einigen Son/ Das ist/ Durch den Glauben/ in seinem Namen vnd Herrschafft.

Sanct Jacob Maior.

Der empfangen ist vom Heyligen Geyst.

DAs ist/ ich glaube vestiglich/ das er mir zu gut empfangen ist/ von dem heillgen Geist on alles menschlich vnd fleischlichs Werck/ on leyblichen Vater oder Manns samen/ Auff der er mein/ vnd aller die an jn glauben/ sündlich/ fleischlich/ vnrein/ verdamnus/ empfengnus/ reinigt vnd Geistlich machte/ durch gnedigen willen seins vnd des Allmechtigen Vaters.

Geboren von der Jungfrawen Maria.

Ich glaube/ das er mir geboren ist/ von der reinen Jungfrawen Maria/ von allen schaden jrer leiblichen vnd geistlichen jungfrauschafft/ auff das er nach ordnung vetterlicher barmhertzigkeit/ mein Sündliche vnd verdampte geburt/ vnd aller seiner gelaubigen/ gebenedeit/ vnschedlich/ vnd rein machte.

Sanct Johannes der Euangelist.

Gelitten vnter Pontio Pilato/ Gecreutziget.

ICh glaube/ das er sein Leyden vnd Creutz/ für mein vnd aller Glaubigen Sünde getragen hat/ vnd dardurch all Leiden vnd Creutz gesegnet/ vnd nicht allein vnschedlich/ Sonder auch heilsam/ vnd hoch verdienstlich gemacht hat.

Gestorben/ und Begraben.

Ich glaub/ das er gestorben vnd begraben ist/ mein Sünde/ vnd aller seiner glaubigen/ gantz zu tödten vnd begraben/ darzu den Leyblichen Tod erwürget/ vnd gantz vnschedlich/ nützlich und heylsam gemachet hat.

S. Philippus.

Nidergestigen zur Hellen.

ICh glaub/ das er zu der Heleen nidergestigen ist/ den Teuffel vnd all sein Gewalt/ list vnd Bosheit mir vnd seinen glaubigen zu dempffen vnd gefangen zu nemen/ das mir der Teuffel hinfürt nit schaden kan/ vnd mich von der hellen pein erlöst/ dieselb auch vnschedlich vnd verdienstlich gemacht.

Am dritten Tag wider aufferden von den Todten.

Ich glaube/ das er aufferstanden/ am dritten tag von den Todten/ mir vnd allen seinen glaubigen/ ein newes Leben zugeben vnd hinfort nimmer zu sündigen/ sonder jm allein zu dienen/ inn allerley Gnaden vnnd Tugenden/ vnd also die Gebot Gottes erfüllen.

S. Bartholomeus.

Auffgefaren gen Himel/ sitzend zur rechten Gottes/ des Allmechtigen Vatters.

ICh glaube/ Das er auffgefaren sey gen Hymel/ vnd von dem Vater empfangen/ Gewalt vnd Ehre/ vber alle Engel vnd Creaturen/ vnd also sitzt zu der rechten Hand Gottes/ Das ist/ Er ist ein König vnd HErr/ vber alle GOttes Güter im Hymmel/ Hell vnd Erden/ derhalben er helffen kan/ mir vnd allen glaubigen in allen vnsern nöten/ wider vnser Widersacher/ vnd Feinde.

S. Thomas.

Von dannen er kommen wird zu richten die Lebendigen vnd die Todten.

ICh glaube/ das er wider von dannen vom Hymel kommen wirt/ am jüngsten Tag/ zu richten die lebendigen/ die dann erfunden werden/ vnd toden die in des verstorben sindt alle menschen alle engel vnd teuffel/ für seinen gericht stul kommen musten/ vnd jn leyblich sehen/ mich vnd alle seine glaubigen zu erlösen von dem leiblichen todt/ vnd allen gebrechen/ vnd zu straffen ewigklich seine Feindt vnd widersacher/ vnd vns von jrer gewalt ewigklich erlösen.

S. Mattheus.

Ich Glaub an den Heiligen Geyste.

DAs ist/ ich glaube nicht allein/ das der Heilig geiste ein warhafftiger Gott ist/ mit dem vatter vnd Son/ sonder auch in vnd zu dem vater durch Christum vnd sein leben/ leiden/ sterben/ vnd alles was von jm gesaget ist/ niemand kommen noch etwas desselben erlangen mag on des Heiligen geistes wercke/ mit welchem der Vatter vnd Son/ mich vnnd alle die seinen rürt/ wercket/ ruft/ zeucht durch vnd in Christo/ lebendig/ heylig/ vnd geystlich macht/ vnd also zu dem vatter bringet/ Denn das ist das damit der vatter durch Christum vnd in Christo alles wircket/ vnd lebendig machet.

S. Jacob Minor.

Ein Heilige Cchristliche Kirch.

ICh glaube/ dz da bey auff erden/ so weit die welt ist/ nit mer denn ein heilig gemeine Christliche kirch/ welch nicht anders ist denn ein gmein oder samlung der heiligen/ der frömmen glaubigen menschen auff erden/ welch durch den selben heiligen geist versamlet/ erhalten vnd regiert wirdt/ vnd teglich in den Sacramenten vnd wort Gottes gemehrt.

Ich glaub/ das niemand kann selig werden/ der nit inn diser Gemein erfunden wird/ eintrechtiglich mit jr haltendt inn einm Glauben/ Wort/ Sacramenten/ Hoffnung vnd vnd kein Jüde/ Heyde/ Ketzer oder Sünder/ mit jr selig werde/ es sey denn dz er sich mit jr versöne/ vereinige/ vnd jr gleichformig werd/ in allen dingen.

Die Gemeine der Heiligen.

Ich glaube/ das mit diser gemeine oder Christenheit/ alle ding gemein sindt/ vnd eines jeglichen güter des andern eigen/ vnd niemand des nichts eigen sey/ darumb mir vnd einem jeglichen glaubigen/ alle gebet vnd gute wercke/ der gantzen gemeine zu hilff kommen/ beystehen/ vnd stercken müssen/ zu aller zeyt/ im leben vnd also ein jeglicher des andern bürde tregt/ wie S. Paulus leret.

S. Simon.

Vergebung der Sünden.

ICh glaub/ das da sei in derselben gemeine/ vnd sonst nirgendt vergebung der sünden/ dz ausser derselben nicht helffe/ wie vil vnd gros die guten werck jmmer sein mögen zur sünde vergebung/ aber jmmer derselben nicht schade/ wie vil/ gros vnd offt gesündiget werden mag/ zu vergebung der sünden/ welche bleibt/ wo vnd wie lang die selbige eynig bleybt/ welcher Christus die schlüssel gibt/ vnd spricht matthei am xviii. was jr werdet aufbinden auf erden/ sol aufgebunden sein im himel/ desselben gleichen zu dem einzelen petro/ an stat vnd bedeuttung der einzelen eynigen Kyrchen/ Matth. xvi. was du wirst auffbinden.

S. Judas Thadeus.

Aufferstehung des Fleischs.

ACh glaub/ das da zuküftig ist/ ein aufferstehung der toden/ in welcher durch denselbigen heyligen Geyst/ wird wider aufferweckt werden/ alles fleisch das ist/ alle menschen/ nach dem Leyb oder Fleisch/ fromme/ vnd böse/ das eben dz selbige fleich/ das gestorben/ Begraben/ Verwesen/ vnd mancherley weyse vmbkommen ist/ wider kommen soll/ vnd lebendig machen.

S. Mathias.

Vnd ein ewigs leben/ amen.

ICh glaube/ das nach der aufferstehung sein wird/ ein ewiges leben der heiligen/ vnd ein ewigs sterben der sünder/ vnd zweiffel an dem allem nicht/ der vatter durch den Sone Jhesum Christum vnsern HERRN/ mit vnd in dem Heyligen Geyst/ werden mir die Stücke alle lassen geschehen/ das heyst Amen/ das ist das es trewlich vnd gewislich war ist.

Ehr sey Gott in der Höhe/ Friede auff Erden vnd den menschen ein Wolgefallen.

Nürnberg 1563. Gedruckt bey Valentin Geyßler.