auff den yenigen angestelten Reichßtag zu Augspurg einzulegen/ In Sibentzehen Artickel verfasset.

Im XXX Jar.

DAs man fest vnd aintrechtigklich leere/ das allain ain ainiger warhafftiger Gott sey/ Schöpffer hymels vnd der Erden/ Also das in dem ainigen warhafftigen Göttlichen wesen/ drey vnnderschidliche person seind/ Nemlich Got der Vatter/ Got der Son/ Got der hailig gaist/ Das der Son vom Vatter geborn/ von ewigkait zu ewigkait rechter natürlicher Gott sey mit dem Vatter/ Vnd der hailig Gaist/ baide vom Vatter vnd Son ist/ auch von ewigkait zu ewigkait/ rechter natürlicher got sey/ mit dem vatter vnd Son/ wie das alles durch die schrifft klärlich vnd gewaltigklich mag beweißt werden/ Als Johann. am.1. Am anfang war das wort/ vnd das wort war bey Got/ vnd Got war das wort/ Alle ding seind durch dasselbig gemachet/ rc. Vnd Mathei vltimo/ Geet hin leeret alle Hayden/ vnd tauffet sy im namen deß Vatters/ vnnd deß Sons vnd deß hailigen Gaists. Vnd dergleichen sprüch meer/ sonnderlich im Euangelio Johannis.

Das allain der Son Gotes sey warhafftiger mensch worden/ von der rainen Jungkfraw Maria/ geboren mit leyb vnd seel volkommen/ vnd nicht der vatter oder hailig Gaist sey mensch worden/ wie die ketzer Patripassian geleert haben/ Auch der Sun nit allain den leyb on seel angenomen/ Wie die Photner geirret haben/ Dann er selbs im Euangelio gar offt von seiner Seel redet/ Als da er spricht/ Mein seel ist betrübt biß in den tod rc. Das aber Gott der Son sey mensch worden/ steet Johannis primo klärlich also/ Vnd das wort ist flaisch worden rc. Vnnd Gal. am vierdten capittel/ Da die zeit erfüllet ward rc.

Das derselbig Gottes Son warhafftiger Got vnd mensch Jesus Christus sey/ ain ainige vnzertrennliche person/ für vns menschen gelitten/ gecreütziget/ gestorben/ begraben/ am dritten tag aufferstanden vom Tod/ auffgefaren gen hymel/ sitzend zur rechten Gottes/ Herr über alle Creatur/ Also das man nit glauben oder leeren kan oder soll/ das Jesus Christus als der mensch oder die menschhait für vns gelitten habe/ Sonder also/ weyl Gott vnd mensch/ hie nit zwo person/ sonder ain vnzertrennliche person ist/ soll man halten vnd leeren/ das Got vnd mensch/ oder Gottes Sun warhafftig für vns gelitten hat/ wie Paulus zun Römern am 8. Cap. spricht/ Got hat seines ainigen Sons nit verschont/ sonder für vns alle dahin gegeben rc. Vnd 1. Cor. 2. hetten sy es erkannt rc. vnd dergleichen sprüch meer.

Das die erbsünd ain rechte warhafftige sünd sey/ vnd nit allain ain feel oder gebrechen/ Sonnder ain solche sünd/ die alle menschen so von Adam komen/ verdampt/ vnd ewigklich von Got schaidet/ wa nicht Jesus Christus vns vertretten/ vnnd solche sünd sampt allen sünden/ so daraußfolgen auff sich genomen hette/ Vnd durch sein leyden gnug darfür gethan/ vnnd sy also gantz auffgehaben vnd vertilget in sich selbs/ Wie dann Psal. 52. und Rom. 5. von solcher sünd klärlich geschriben ist.

Nach dem nun alle menschen sünder seind/ der sünden vnd dem Tod/ darzu dem Teüfel vnderworffen/ Ist es vnmüglich das ain mennsch sich auß seinen krefften/ oder durch seine gute werck herauß wircke/ damit er wider gerecht oder frumb werde/ Ja kan sich auch nicht beraitten oder schicken zu der gerechtigkait/ Sonder ye meer er fürnympt sich selbs herauß zu wircken ye erger es mit jm wirdt/ Das ist aber der ainig weg zu der gerechtigkait/ vnd zu der erlösung von sünden vnd Tod/ so man on alle verdienst oder werck glaubt an den Sun Gottes für vns gelitten rc. wie gesagt/ Solcher gelaub ist vnser gerechtigkait/ dann Got will für gerecht/ frumb vnd hailig gerechnet vnd gehalten werden/ alle sünd vnnd ewigs leben geschenckt haben/ Alle die solchen gelauben an seinen Son haben/ daz sy vmb seines sons willen/ sollen zu genaden genomen/ vnd kinder sein in seinem reich rc. Wie das alles S. Paul/ vnd Johannes in seinen Episteln reichlich leeren/ als Rom. 10. Mit dem hertzen gelaubt man rc. Johannis 3. Alle die an den Sun glauben sollen nicht verloren werden/ sonder das ewig leben haben rc.

Das solcher gelaub sey nicht ain mennschlich werck noch auß vnsern krefften müglich/ Sonder es ist ain Gotes werck vnd gab/ die der hailig gaist durch Christum gegeben in vns wirckt/ Vnd solcher glaub/ dieweyl er nit ain loser won oder dunckel deß hertzen ist/ wie die falsch glaubigen haben/ Sonder ain krefftiges/ newes/ lebendiges wesen/ bringet er vil frucht/ thut ymmer guts gegen Gott mit loben/ dancken/ bitten/ predigen/ vnd leeren/ gegen dem nechsten mit lieben/ dienen/ helffen/ rathen/ geben vnd leyhen/ vnd leyden allerlay übels biß in den tod rc.

Solchen glauben zu erlangen oder vns menschen zu ergeben/ hat Got eingesetzt das predig ampt/ oder mündtlich wort/ NEmlich das Euangelium/ durch welches er solchen glauben vnd sein macht/ nutz/ vnd frucht verkündigen laßt/ vnd gibt auch durch dasselbig/ als durch ain mittel den gelauben/ mit seinem hailigen gaist/ wie vnd wa er will/ sonst ist kain ander mittel noch weyse/ weder weg noch steig/ den glauben zu bekomen/ dann gedancken ausser oder vor dem mündtlichen wort/ wie hailig vnnd gut sy scheinen/ seind sy doch eytel lugen vnd yrrthumb.

Bey vnd neben solchem mündtlichen wort/ hat Got auch eingesetzt eüsserliche zaichen/ die man Sacrament nennet/ Nemlich die Tauff/ vnd Eucharistian/ durch welche Gott neben dem Wort/ auch den glauben vnd seinen gaist anbeüt vnd gibt/ vnd sterckt alle die sein begeren.

Das die Tauff das erst zaichen oder Sacrament/ steet inzwayen stucken/ Nemlich im wasser/ vnnd wort Gottes/ oder das man mit wasser tauffe/ vnnd Gottes wort spreche/ vnnd sey nicht allein schlecht wasser/ oder begiessen (wie die Tauffs lesterer yetzund leeren) Sonder weyl Gottes wort dabey ist/( vnd sy auff Gottes wort gegründt/ So ist es ain hailig/ lebendig/ krefftig ding/ Vnd wie Paulus sagt Titon. 3. Ephesios 5. Ain bad der widergeburt/ vnd vernewerung deß hailigen Gaists rc. Vnnd das solche Tauff/ auch den kindlein zuraichen vnnd mitzutailen sey/ Gottes wort aber/ darauff sy steet seind dise/ Geet hin vnnd Tauffet im namen deß vatters/ vnd deß Sons/ vnd deß hailgen Gaists/ Mathei am lesten cap. Wer gelaubt rc. Da muß man gelauben.

Das Eucharistia oder deß Altars Sacrament/ steet auch in zwayen stucken/ Nemlich/ da sey warhafftigklich/ gegenwertig im brot vnd im wein/ der war leyb vnd blut Christi/ nach laut der wort/ Das ist mein leyb/ das ist mein blut/ vnd sey nit allain brot vnd wein/ wwie yetzund das widertail fürgibt/ Dise wort fürdern vnd bringen auch den glauben/ üben auch den selbigen/ bey allen denen/ so solches Sacrament begeren/ vnd nicht darwider handeln/ geleich wie die Tauff auch den glauben bringt vnd gibt/ so man jr begert.

Das die haimlich Beicht nit soll erzwungen werden mit gesetzen/ so wenig als die Tauff/ Sacrament/ Euangelion sollen erzwungen sein/ sonder frey/ Doch das man wiß wie gar trostlich/ vnd hailsam/ nutzlich vnd gut sy sey den betrübten oder irrigen gewissen/ dieweyl darinnen die absolution/ Das ist/ Gottes wort vnd vrtail gesprochen wirdt/ dadurch das gewissen loß vnd zufriden wirdt von seinem bekümmernuß/ Sey auch nit not alle sünd zuerzelen/ Man mag aber anzaigen/ die so das hertz beissen vnd vnruwig machen rc.

Das kain zweyfel sey/ es sey vnd bleyb auff erden ain hailige Christliche kirch/ biß an der welt end/ wie Cristus spricht Mathei vltimo/ Sihe ich bin bey eüch biß an der welt end/ Solche Kirchen ist nichts anderst dann die glaubigen an Christum/ Welche obgenannte artickel vnnd stuck halten/ glauben vnd leeren/ vnd darüber veruolget vnd gemartert werden in der welt/ Dann wo das Euangelion geprediget wirdt/ vnd die Sacrament recht gebraucht/ da ist die hailig Christlich kirch/ Vnd sy ist nicht mit gesetzen vnd eüsserlicher pracht/ an stett vnd zeit/ an person vnd geberde gebunden.

Das vnnser Herr Jesus Christus an dem Jungsten tag komen wirdt/ zu richten die lebendigen vnd die todten/ vnd seine gelaubigen erlösen von allem übel/ vnd in das ewig leben bringen/ Die unglaubigen vnd Gotlosen straffen/ vnd sampt den Teüffeln in die hell verdammen ewigklich/ rc.

Das in deß/ biß der Herr zu gericht kompt/ vnd allen gewalt vnd herrschafft auffheben wirdt/ Soll man weltliche Oberkait vnd herrschafft in eeren haben vnd gehorsam sein/ Als ainem stand von Got verordnet/ zu schützen die frommen/ vnd zu steberen die bösen/ Das solchen stannd ain Christ/ wa er darzu ordenlich beruffen wirdt/ on schaden vnd far seines gelaubens/ vnnd seiner seel säligkait/ wol füren oder darinnen dienen mag.

Auß dem allen volgen/ das die leer so den Priestern vnnd gaistlichen/ die Ee vnd in gemain hin/ flaisch vnd speiß verbeüt/ sampt allerlay Closterleben vnd gelübten (weyl man dadurch gnad vnd seel säligkait sucht vnd mainet/ vnd nit frey laßt) eyttel verdampte Teüffelsleer sey/ Wie es Sant Paul. 1 Thi.4. nennet/ So doch allain Christus der ainig weg ist zu der gnaden vnd seel säligkait.

Das für allen grewel/ die Mess so biß hieher für ain opffer oder gut werck gehalten/ damit ains dem andern gnad erwerben hat wöllen/ abzuthun sein/ Sonnder an statt solcher Mess ain Götliche ordnung gehalten werde/ Das hailig Sacrament deß leibs vnd bluts Christi/ baider gestalt zu raichen/ ainem yetlichen auff seinen gelauben/ vnnd zu seiner aignen notdurfft.

Das man die Cerimonien der kirchen/ welche wider Gottes wort streben/ auch abthun/ die anndern aber frey laß sein/ derselbigen zugebrauchen oder nit/ nach der liebe/ Damit man nicht on vrsach leichtfertigeergernuß gebe/ oder gemainen frid on not betrübe rc.