die da haben geprediget / die Prelaten moegen das haylig Evangelium verwandeln / Nemlich in ainem Concilio auch der Bapst auß seynen aygen gewalt.

Zu Ulm geprediget im Barfüsser Convent Observantzer etc.

Celum et terra transibunt verba aut mea non transibut Luce 21. Himel und erd werden vergeen / oder verandert werden / nit bleyben in solcher form und gestalt / wie sy yetzund seind. Aber mein wort werden nit vergeen / man soll sy lassen bleyben / wie ich und got hailiger gayst / durch Propheten / Aposteln und Ewangelisten geredt haben / nit mit menschen glosen / und Haydnischer phylosophey in ain andern syn ziehen / und nicht umb ain har verwandeln / sonderlich in dem Ewangelio / das mit dem blut leyden und sterben / des Lemlin gots Jhesu Christi bestetiget ist / darynn er selber gesprochen hat dyse wort Celum et terra etc. Hoert jr Entchristischen prediger was Christus saget. Er spricht mein wort werden nit vergeen / maest ee hymel und erd zergeen / sollen unverwandelt bleyben / so sprechen jr blippenblapper / der Bapst unnd Prelaten moegen das ewangelium verwandeln / jr redt wider Christum / seyt jr nu nit des Entechrists Aposteln? Seyt jr nit botten des Teufels? O jr gots lesteer / schemet euch / was lalt jr? seyt jr unsynnig worden? habt jr Christi und seynes glaubens und Ewangelium verleügnet? Man solt euch die zung schaben / ja gantz außreyssen / Dann jr hayssen Christum ain lugner / strafft sein wort / und erhept den Bapst mit manchem buben über got wie Paulus davon geredt hat / das er moege gots wort abthun. Jr sehen das ewer ler mit des Bapsts gaistlichen recht wider das Ewangelium ist / jr moercken nu das jr nit Christi / sonder narrenstotiles / und Thome / Scoti junckherrn seyt / jr seyt in den notstall getryben mit schrifft / hilfft euch bapst Kayser und thomas nit. Dannocht woelt jr blind sein / und verderben nu gantz das spil mit gotslesterlichen lugen / und sprechen der Bapst und Prelaten moegen das Ewanglium verwandeln. O entchrist frew dich / dein Aposteln keren fleyß an dein reich zu meren. All engel im hymel / kain Apostel oder mensch in hymel und auff erd hat gewalt ainen buchstaben von dem ewangelio abzuthun / als Christus und Paulus leret. Auch nitt zu wandeln und jr falsche Propheten sprechen / die Prelaten haben gewalt das Ewangelium zu verwandeln / pfey pfey euch gotslesterer.

Von dieser Matery will ich zwen artickel sagen. Zum ersten bewegen auß dem ewangelio / das die ketzerlich irren die da sprechen Bapst und Prelaten moegen mit recht das Ewangelium verwandeln. Zum andern will ich antwurt geben auff der Papisten und dollen thomisten argument / plern / einred / und falsche bewerung / damit sy ain gestalt geben jren lugen und irrthumb.

Von dem Ersten / lautten die wort meines anfangs Celum etc. des gleichen Math. 5. spricht Christus. Für war sag ich euch / so lang biß das verget hymel und erd wirt nit vergeen ain buchstab oder stipflin von meinem gesetz byß all ding geschehen in meinem gesetz geschriben. Und sant Paulus spricht / wann wir Aposteln oder ain Engel von hymel euch anderst prediget / dann wie euch von mir geprediget ist auß dem ewangelio / So sey es jn ain fluch und bann. Hoert jr hie das kain Engel oder Apostel das ewangelium verwandeln mag? vil mynder der Bapst der kain Apostel ist. Jtem David spricht. Herr dein wort bleybt ewigklich / und Moses in person gots. Ir solt nichts zuthun meinem wort / solt auch nicht davon nehmen. Item spricht got Ich wil nit crafftloß machen die wort meines mans Got ist nit wie der mensch das er lyeg / oder das jn berew das er ainmal geredt und bestetiget hat. Christus / got und mensch hat das ewangelium bestetiget / uns sein testament darynn gemacht und ist sein letster will das wir das halten sollen als sein kinder ist darauff gestorben / darumb mag es nitt widerrufft werden / dann durch den todt wirt das testament bestetiget. Ja sprechen die Papisten / wer kan eytel ewangelische wort reden? man myeß darzu thon? Antwurt / Christus spricht woelcher nit wider mich ist der ist mit mir daran. Darumb woellicher also prediget das er bleybt auff der rechten ban / bey und in ewangelischer ler und synn der legt nit zu / sonder erklert das ewangelium / aber jr Papisten / Concilisten / Periuristen / Thomisten und was der rot ist / seind wider das ewangelium / dann jr sprechen die Prelaten moegen verwandeln das Ewangelium unnd was sy leren sollen wir halten ob es wider ist dem Ewangelio / als dann jr yetzund gethon haben / das Ewangelium sagt Christi wort moegen nit verwandelt werden / So sagen jr es moeg verandert werden von Prelaten. Was ist das anderst gelert / dann die Bepst und Prelaten moegen uns geben ain ander gesetz / ander ler / und das Ewangelium abthon? Also moechten sy uns auch ain andern glauben geben und leren. Mag das Ewangelium verwandelt werden an ainem ort / auß ursach / so mag es an allen oertern verwandelt werden / dann man findt alweg ursach / mag es dann an allen oertern verandert werden / so mag es gantz abgethon werden. Also werden wir nymmer sein Christen / sonder Papisten. Auß Christi ler werden christen menschen / auß des Bapsts leer und gesetzen werden eyttel Papisten. Sehet jr nun wa auch menschen ler hyn fiert? Sehet jr das jr unns von dem Ewangelio fiert auff menschen drem / gutduncken und erdickte fantasey? Darumb billich schwerlich wider uns erzürnet gott / so wir sein leychte burde und gesetz von uns werffen / seines hayligen worts nit warnemen. Eya darumb er verhengt das wir die grossen schweren lest und gesetz der Tyrannischen menschen tragen myessen / das wir moechten blut schwitzen / und verkündt werden durch Haydnische ler / das wir meer Aristotiles dann Christi jungern sein. Und mit disem allem verdienen wir kainen dannck von den menschen / kain lon von got / sonder spott und ungnad. O herr wie bist du so gerecht inn deinem urtayl / du kanst unns wol treffen und straffen mit unsern aygen sünden unnd erdachten gesetzen. Also hast du den Egiptern / Persiern und anndern voelcken in Orient / geschickt den dollen Machomet zu ainer rutten und straff. Unnd gegen Occident den Bapst mitt seynen gesetzen / die hoeren wir / unnd glauben jren lugen / dein wort lassen wir faren / Teüffels ler myessen wir halten für Christliche ler / als in speyß verbotten / in feyr tagen gebotten etc. O billich leyden wir sollichs und so wir werden sprechen / Ach herr umb deynet willen seyen wir gehorsam gewest den Prelaten / dann würstu uns recht antwurten. Hetten jr mein eer gefürcht / so hetten jr mein wortt behalten / Ich hab euch die Prelaten geben zu knechten / so setzen jr den Bapst über mich / eeret jn und sein wort hoeher dann mich / wie Paulus verkündt hat. Ir seind worden Papisten / und sein nit Christen / dann mein wort behalten jr nit. Nun moerck / mitt vernunfftlicher sach will ich anzaygen das daß Ewangelium (das melt das gantz new Testament) nit mag verandert werden / dann so die Prelaten yetzung (als Bapst Bischoffer) moechten in aym Concilio oder sunst das Ewangelium verandern. Aber dreyssig oder vierzig jar / moechten andern Prelaten / die eben der yetzigen gewalt hetten / aber all ler / schrifft und gesetz verwandeln. Also wer kain ungewyser unnstetiger gelaub auff erdtrich dann der Christen / Dann all dreyssig oder viertzig jar / weren wir warten was unser Prelaten uns wollten geben für ain gesetz und glauben. Der spyler / wucherer / reytter / Rawber / Bader / Poeten und handtwecksleüt gesetz / wer treflicher zuachten dann unser gesetz. Wa bleybt aber das wort Christi / mein wort werden nitt zergeen? Hat er aber gelogen? was lalt jr Papisten dartzu? Fürwar seyt jr nit das volck davon Paulus schreybt 1. thimoth. 50. Die anhangenden irrigen gaysten und Teüffels ler / unnd predigen lugen under der gestalt des gutten? Ja seyt jr die nitt / so werden es doch eben leüt sein wie jr seyt / Nemlich erdens leüt. Abe rjr laynet euch auff die grossen als Bapst / Kayser / Künig / Cardinel etc. Die stehen euch bey / ewer hauff ist groß / gots achten jr nit. Nun beyttet ain klayne zeyt / ewer arm und stoercke ist flaysche / Got wirt auch ain mal gewalt thon in seinem arm / wird absetzen die gewaltigen von jrem stul. Wider die Aposteln waren auch Kayser Künig Fürsten / landt / leütt Stett / allreych / Annas / Cayphas / Priester / gleyßner / schrifftgelerten / die Synagoga und Hochschul zu Jherusalem / die Pontifices der Abgoetter noch haben die Aposteln syg gehabt entlich / unnd seynd all jr feynd überwunden worden. In der zeyt Athanasij des hayligen Bischoffs von Alexandria / was der Kayser unnd gantz Pfaffhait wider jn / er was in der Acht / im bann / für ain Ketzer gehalten und geurtaylt sechs jarlang / man stalt jm nach seynem leben wie man yetzund thut Martini Luther. Was geschach? Es ward zu letst erfunden in der geschrifft / da man die ansach / das Athanasius ain gutter Christ / unnd all seine feynd Ketzer waren / wie schmecken euch die feygen? Ich wayß nit ob yetzund gleych daßselb spil in der welt sey / Got ist richten / und wirt urtyal fellen zu seyner zeyt. Das ist war / unser erd ist so vermaledeüt das uns Ewangelisch warhait nit aufgeet / kain frucht bringt es wird dann besprengt mit der manlicher blut / wie im anfang der kirchen Christi / und dann steet es wol. Aber das zart Papisten volck wart allain auff zeytlich glueck / eer / gut leben / wann es ain wenig übel geet / so leüt jr Gott wie dagon auff der nasen. Auß disem obgemelten moercken und urtaylen recht / was der fur ain prediger sey der da hat gesagt / Er woell glauben was der Bapst und Prelaten gelauben. Die Prelaten zu der zeyt Athanasij gelaubten yrrthum und ketzerey / So hoer ich wol / wan jm yetzund also wer / so wolltest du auch mit jn irren. Warumb sprichst du nit ich will glauben dem wort gottes / da mag ich nitt irren? O got / wir warten auff den Entechrist / und sein reich ist vil hundert jar in crafft gestanden / doch der letst entechrist ist noch nitt kommen / den werden die Juden mit uns annemen als ich halt.

Bey dem andern Artickel moerck / das des Teüffels botten unnd des Entechrists Aposteln / haben auch ain scheyn jrer lugen / das man moege das Ewangelium verwandeln / Sy wollten auch gern etwan subtyl lyegen / so will es nit lautten. Aber entchristen seynd scharpff lugener. Zu dem ersten sprechen sy / das die Concilia und Bapst / etlich ding haben verandert im Ewangelio / Als das Priestern verbotten ist Eeliche weyber zunemen (Aber huren zu halten erlaubt) Den layen nit geben das blut Christi zu drincken auß dem Kelch etc. Und sprechen das sey geschehen er familiari colloquio s. s. Auß haimlichem freüntlichem gesprech des hayligen gaysts / der hab es jn also eingeben. Dann der hailig gayst ist noch in der hailigen kirchen wie vor zeyten / und regier die Christlich kirch. Antwort / Warauß wolt jr Papisten diese lugen beweren? wa habt jr Prelaten und ir Concilisten gezeügknuß / das der haylig gayst euch sollichs hab eingeben? wie wann es euch der hellisch gayst oder Sathan het eingeben. Christus spricht / wer nit mit mir ist / der ist wider mich / so seind jr in obgemelten dingen wider Christum und in vil andern. Darumb ewer haimlich gesprech / ist gewest mit dem teüffel Sathana / halten jr den ahiligen gayst für ain feyndt und vertretter Christi / das er solt haimlich gesprech mitt euch haben wider Christi wort und leer? Ist Judas der verretter Christi ewer hailiger gayst / das ir jm sollichs zu messent? Christus erlaubt den Priestern unnd allen menschen den Eelichen standt / und spricht darbey / Nyemandt mag keüschait halten / es sey im dann von Gott geben. Christus hatt frey gemachet alle spreyß und dranck zu aller zeyt mit danckparkait / und nach ewer leer / so hett der hailig gayst euch in ain or gerawnet / es ist nitt war / Christus hat gelogen / Priester sollen huren haben / nit Eeliche weyber. Prediger orden und N. sollen essen Hecht / Carpfen / barben / grundeln / salmen und aller best visch. Aber sy sollen nit essen wie die bawren / speck und erbiß etc. Wider spricht der hailig gayst Christo / wa bleybt dann das / das er sagt / der haylig gayst wirdt nemmen von den meinen / und wirdt es euch sagen unnd verkünden? Syhe Entechrist wie stond dein Aposteln in lugen. Christus sprach ir solt all trincken auß dem Kelch mein blut / so sprechen ir der hailig gayst hab zu euch gesagt / Nayn / die bauren sollen nit darauß trincken mein blut / allain pfaffen. Sehent euch fur das nit der Teüffel sein gesprech mit euch hab gehalten. Item sagen mir / moegen jr machen das wider das ewangelium ist / oder verwandeln das darynn ist. Wa bleyben die wort Christi obgemelt / Himel und erd etc. hat er gelogen? ist er truncken gewest? hat er nit gewyst und beddacht was er sag / das ir jn woellen leren? Seind ir nit widerchristen odr Entechristisch / so ir wider Chrsitum thond. Item jr sagen recht / der hailig gaist sey noch in der hailigen Christlichen Kirchen unnd regier sy / es ist war / er ist aber nit in des Sathane synagoga oder Kirchen / der gayst der lugen ist bey den falschen Aposteln / die da auff das Ewangelium und auff den hailigen gayst lyegen / nit ist es als auß dem hailigen gayst das in ainem Concilio gehandelt wirt. Es mügen eytel buben / oder der meertayl schelck darein komen wie in Anne und Cayphe Concilio wider Christum / Die Prelaten seind nit die christlich Kirch.

Zu dem andern Arguieren die Papisten / Christus spricht / wa zwen oder drey in meinem namen versamlet seind / will ich mitten unnder jn sein / Vil mee in ainem Concilio da vil seind etc. Antwort / vileicht seind sy im concilio etwann in aller Teüffel namen versamlet so sy nit gott suchen / sonder aygen nutz / wie kann ich glauben das jr in des herren namen versamlet seyt / So jr wider den herren / wider sein wort und ler handeln / nach ewerem gut beduncken? Sathanas ist da. Item will Christus seyn under zwayen oder dreyen in seinem namen versamlet / als wann sy handeln nach seinem wort / so ist er auch bey Martin Luther / Carelstat / Philippus Melancthon / die bleyben bey des herren wort / jr fliehen davon zu menschen wort / und woellent die welt zwigen und binden mit ewern dremen / und erdachten fantasey / moerckt jr das?

Zu dem dritten sprechen sy / die Aposteln haben das Ewangelium verandert / Bapst und Prelaten seyen an jr statt / darumb moegen sy es auch thon. Antwort / Got grueß euch jr newen Aposteln / von Rom / Koeln / Pariß etc. Wann ist der haylig gayst in euch kommen wie in die zwoelff botten? Christi Aposeln haben gut gezeügknuß im Ewangelio und actum. Gebt jr auch gezeügknuß das also der hailig gayst auß euch geredt hab / inn ewern Concilijs / und gaistlichen rechten / so woellen wir euch glauben und für new Aposteln halten / Seynd jr darumb den Aposteln gleich so jr an irer stat seind / so ist auch ain weyb ain man / wann sy an des manß statt ist und handelt / ewer recht / sagt ir sollen sein nachfolger der Aposteln / das Ewangelium predigen wie sy / Arm sein / gutt exempel geben / gelt / gelt / eer / lust des leybs verachten / dann so seyt jr an stat der Aposteln. Aber vil auß euch sorg ich seind an Judas stat / der was auch ain Apostel. Habt jr der Aposteln gnad unnd gewalt / So erwecken todten auff wie sy / treybent die Teüffel auß / machen die krancken gesund wie die Aposteln. Ach jr armen elenden Aposteln / was nement ir euch an? Ezechias was ain frommer Künig / an sein statt kam ain boeß kind Manasses / Salomon was weyß / Roboam an seiner stat ain narr / waß seind jr des da besser / so jr sitzen an der Aposteln stat / wie Cayphas und gleyßner auff dem stul moysi? Item weytter ferben die Papisten und schmirrer ain subtil lugen zu bewern das die Aposteln das ewangelium verandert haben / also sprechen. Christus sprach zu den Aposteln / jr sollen teüffen die menschen in dem namen des vaters / und des suns / und des hailigen gaists. Aber wir lesen Actum. 2. das sant Peter sprach / ain yegklicher auß euch last sich teüffen in dem namen Jesu / Spricht nit in dem namen des vaters etc. Item acthuum 8. Stet also / man und weiber warden geteüfft in dem namen Jesu christi. Und actuum. 10. sant Peter hyeß Cornelium und sein gesynd teüffen in dem namen Jesu christi / deßgleychen Actu. 19. Und also haben sy nitt gehalten form und weyß zu teüffen / wie Christus im ewangelio lernet / sonder verwandelt sprechen die feind des Ewangelij Papiste. Antwort / schmecken was jr lallen / jr wyst nit was sy teüffen im namen Jesu christi / jr maynen wie die Doctores fantastici. in 4. sen. und Clas leyrer. Wann man geteüfft hab / so hab man gesprochen. Ich teüff dich in dem namen Jesu Christi / wann dem also wer / wa bleybt dann das der herr so bald auff die wort vorgemelt / da er spricht / waß ich euch gebotten und befolhen hab / das solt jr sy leren? Nun hat er jn gebotten zu teüffen im namen des vaters etc. Darumb haben sy das gehalten und die andern gelernet und haben nye kains anderst geteüfft dann wie Christus lernet / sunst weren sy ungehorsam gewest / und jhenen weren nit recht geteüft. Item hetten sy die form des teüffen verwandelt / wa bleybt dann bey warhait des wort des herren / da er sagt / mein wort moegen nymmer vergen etc. Darumb lernet was das sey geredt / der ratt zu Ulm hatt das gethan in des Kaysers namen / so wissent jr was das sey gesagt / die Aposteln haben geteüfft in Jesu christi namen. Das ist wie Christus gebotten hat wie der Kayser mandiert hat / moecht auch also verstanden werden / im namen Jesu das ist in seinem glauben und seiner crafft und gewalt / und ist ain ding mit vorgemelter red / dann der glaub ist auß dem wort Jhesu christi. Darauß volgt das es lautter geschwetz ist / so die Doc. in 4 sagen / im anfang der kirchen christi hab man geteüfft im namen Christi auff das sollicher nam von unglaubigen verhasset / kom in gedechtnuß und lieb der christen. Es seind blaw enten. Item solich erdachte geschwetz / wider christi wort / zu verglympffen / sagen sy das in dem wort (Christus) wird außgesprochen die form des tauffs von christo eingesetzt / dann sprechen sy / Christus ist so vil gesagt als unctus gesalbt. Also wirt verstanden pater ungens / gott der vatter der da salbt mit gnad / unnd die salbung / das ist die selbe gnad des hailigen gaysts / und der gesalbt wirt / der sun gots Jesus. Ach die ersten Christen haben nicht von der fantasey gewüst. Christus hatt woellen das die christen (woelcher zaichen der tauff ist) sollen bekennen und glauben die drey personen in der gothait / mit außgesprochen namen der personen / auff sollichs dient nit der lerer fantasey egemelt / der glaub der dryfaltigkait oder dreyainigkait wer mer verborgen in dem wort Christus / dann erclert. Item Act. 8 steet / sy werden geteüfft in dem namen Jesu / stet nit da Christi wa bleybt da das geschwetz der doctor? wa wirt das verstanden ungens / unctus / unctio / nit vil grunds des glaubens / leren die Doct. in 4. sen. Wider diß arguieren die subtilen Papisten. Nu stet doch clerlich Act. 8. Sy seind geteüfft allain in dem namen Jesu. Antwort / So ist noch ewer geschwetz falsch mit dem namen Christus / wie vorgesagt / dann christi namen steet da nit / wie jr selber bekennen. Also wyssen jr auch nit waß oder warumb. Also stet Act. 8. Allain in dem namen Jesu / aber das ist der verstand / sy waren allain geteüfft im namen jesu / wie er gehaissen hat. Aber die hend der Aposteln waren jn noch nitt auffgelegt wie andern / darumb spricht Lucas allain geteüfft.

Zu dem vierdten sprechen sy. Gott hatt den Juden ein gesetz geben durch Mosen / und hat vil darynn verandert / vertylcket / darnach ist uns vil verbotten darynn zu halten / als die beschneydung underschayd der speyß etc. Darumb mag das wort gotes verandert werden. Antwort / Ach wie wolt jr so gern Christum zu ainem lugner machen / und Ewangelium abthon / auff das jr war erscheynet und ewer dant vorgang hab. Christus hatt im Ewangelio gesagt Celum et terra transibunt / Hymel und erd werden vergen etc. Und das new testament hat er mit seynem todt und blut bestetiget / darumb soll nicht darinn verandert werden. Aber das gesetz Mosy was geben byß auff Christum den Juden verhayssen / den sollten sy hoeren / waß der wirt machen solt gemacht sein / was er wirdt abthon sol abgethon sein. Aber Moyses und Propheten haben nit gewalt das gesetz zu verandern / allain got / christus got und mensch. Darumb got hat sein gesetz verandert in der zeyt wie das verkündt hatt / jr sprechen die menschen moegen gots wort oder gesetz / das ewangelium verwandeln. Darumb seind jr gots lesterer / Christus ist der Prophet den man hoern sol / nit der Bapst oder Prelaten / das aber unser text ettwan haben in eternum / das ist ewigklich / soll das gesetz der Juden gehalten werden / da seind die text falsch / es solt sten ain lang zeyt / darumb es gut ist das die Bibel corrigiert und gerechtfertiget werd / das woellen die Papisten auch nit leyden etc. Wissent jr nit das ewer logica lernet locus a maior non uz. affir. Es volgt nit hernach / der Kayser vermag das / darumb vermag es ain Ritter. Also hie / es volgt nitt. Got hat sein gesetz verandert / darumb mag es der Bapst oder Concilium auch thon. Volgt auch nit die Aposteln haben das gethon. Darumb moegen Bischoffer und Prelaten auch also thon / sy kuenden jn doch in that nit nachvolgen in vilen dingen / darumb wenn auch die Aposteln hetten das ewangelium verandert etwann / auß dem volgt nit das sollichs die Prelaten / Concilia / oder Bapst auch thon moegen / woelt jr von uns den Aposteln gleich gehalten sein / und das wir euch glauben sollen / so miessen jr auch gezeücknuß in der schrifft haben / wie die aposteln daz ir auß dem hailigen gayst reden wie sy von jn redt der herr / Lu. 21. Ir seind nit die da reden / sonder der gayst ewers vaters im hymel / der redt auß euch / deßgleichen haben sy gezeücknus Mar. 13. Jo. 16. Jo. 14. act. 2. etc. Die aposteln redten wie jn der gayst gots eingab unser Prelaten reden offt wie jn das flaisch einspricht. Item jr sprechen der Bapst moeg nit irren / wann er auch blind wer / ja ist war / ursach / wann er vons einem palast will zu lateran oder sunst / miessen jn siben oder acht tragen / die wissen den weg wol / also irrt er nit / reyt er überfeldt / so reyten jm etlich vor die den weg wol wissen / also irrt er aber nit / in schrift wayst er nit was irren sey.

Zu dem fünfften / die Apostaten / hie die Aposteln solt ich sagen von Pariß / die den hellischen gayst narrenstultilis haben / also sprechen die Aposteln haben etwann ain urtayl und außsprach beschlossen an schrifft / als sy sagen Actum. 15. Darumb moegen wir Pariser Aposteln auch also thon / zu Koeln und Loenen Onse prelaten deßgleychen. Antwort / woelcher Teüffel hat euch zu Aposteln gemacht? Hatt es Aristotiles in metzen vesica gethon / oder in posteriorum der schoenen weyber / oder wa / wer? Ich hab vor bewert das die aposteln auß dem hailigen gaist geredt haben / wa bleyben ir? Ir lyegen auff die aposteln Christi / dann sy fingen das Concilium actu. 15. mit schrifft an / handelten darnach. Und actum 10. Wendet sant Peter die schrifft an. Warumb liegen jr Papisten so gern? Sicher wann ewer lyegen und gleyßnerey gantz entdeckt ist / dann ist des Entechrists sach nichts meer / und ist sein reich zerstoert. Spiritu oris Christi.

Zu dem sechsten / sprechen die newen aposteln des entechrists Die die hailige schrifft ist auch menschen ler / dann die Propheten / Aposteln / Ewangelisten / und Christus selber seind menschen gewest / als wol als der Bapst Bischoffer und ander unser lerer / Warumb vexiert uns dann jr N. mit der menschen leer / als ob jr gots leer vor augen habt? Antwort / Ir liegen aber wider Christum / sein Propheten / Aposteln und Ewangelisten / das jr leer sey menschen leer / dann Christus selber spricht / Mein leer ist nitt mein leer / sonder des hymelischen vaters etc. Und von den Aposteln spricht er / jr seind nit die da reden / sonder ewers hymlischen vaters gayst redt auß euch / wie vor bewert. und sant Peter spricht das die hailig geschrifft der Bibel sey / von dem hailigen gayst von hymel zu uns bracht. Also spricht Paulus. Ich hab mein leer nit von aim menschen / sonder von Christo. Darumb er auch sprach / wann er anderst redt dann er auß got geredt het / so solt sein ler und red sein ain fluch und bann. Darumb jr Papisten arguiert auß Archistultilis gayst / und machen ain triegerey genant fallacia equivocat. imp. pri. modum / so jr sprechen der Aposteln / Ewangelisten / und Christi leer sey menschen leer / dann sy auch menschen seind gewesen / ist eben geredt / als wann jr sprechen / das Duch ist auß Engeland / Engeland ist erd / darumb ist das Duch auß erden gemacht. Item der knecht verkündt des Kaysers gebott zuhalten / darumb sollen wir des knechts gebot halten / volgt nitt hernach / moerckt wa ewer kinder auff den hohen schulen / die Haydnische leer hynein fieret / da sy ewer blut unnd schwayß verzoeren / oder umb haydnisch Teüfels leer geben.

Zu dem sybenden mal / sprechen sy. Augu. spricht ich glaubt dem Ewangelio nit / mich zwung dann der kirchen würd und gewalt. Antwort / Wer hatt dann gezwungen die ersten Christen vor den kain Kirch was. Darumb Augu. red an dem ort ist / als da sant Thomas sprach / Ich glaub nit das Christus erstanden sey / ich leg dann mein finger in sein loecher der hend und fueß etc. Was gieng das die andern Aposteln an / daz er nit wolt glauben? Solten sy darumb auch also thon? Nayn. Christus lobt die da glauben und nit sehen / oder jr hend und finger nitt einlegen in sein wunden zaichen. Die christlich Kirch hat jren glauben von Christo auß seinem ewangelio / und nit widerumb / die christlich Kirch ist geboren auß dem ewangelio / und die das ewangelium auß der kirchen / die mutter ist ee dann das kind / wann das Ewangelium sein crafft und warhait het von der Kirchen / so volgt darauß / das / wann die Kirch das ewangelium nit het angenommen / so het es kain crafft und warhait. Und also wer sein wird / crafft und warhait auß dem menschen / das ist falsch / das Ewangelium ist auß dem / der da spricht ich bin der weg / warhait und das leben.

Zu dem achten sprechen sy / jr predigen doch auch vil gleich nussen und natürlich ding / die nit im ewangelio sten / auch nit in der Bibel. Antwort / Wir setzen aber nit dartzu wie jr N. das man bey todtsünd oder Ketzerey sey schuldig sollichs zu glauben / Juden / Türcken / Hayden und Christen seind gleich an dem ort / woelcher wil der glaub / woelcher nitt will laß da von / wir seind nit schuldig zu glauben dann dem wort gots der ist die warhait.

Zu dem neünten sprechen sy / Woelt jr verwerffen die gaystlichen recht / Thoma / Scotum etc. so woellen wir auch verwerffen und negieren die Bibel. Antwort / Das thond jr an vil oertern / darumb seind jr Samaritaner / halber Christen / halber hayden. Die Hayden verleügnen auch des ewangelij / den seind jr gleich. Ir haben aber im tauff / in nemmung der sacrament verhaissen das ewangelium / oder den Christenlichen glauben / das ist ain ding. Und das ewangelium ist principium fidei / ain anfang des glaubens / der nitt weytter bewert / sonder glaubt soll werden / pri. no. ptest proba. quia hoc esset per aliud pri. et sic processus in infinitum. Also bekent jr selber das jr nit gut Christen seind.

Zu dem zehenden sprechen sy / die Christlich kirch (das ist des Bapsts und Prelaten synagoga) hat das ewangelium verwandelt oder verandert in dem / das man den layen nit gibt daz blut Christi auß dem Kelch. Und kainer darff sprechen / das es unrecht sey. Antwort / Jr liegen aber / es seind vil die bey Christi wortt bleyben / und lassen faren das Concilium / und sy moegen nymmer bewern das ain Concilium oder all menschen und Engel / christi einsetzung und wort / gewalt haben zu verandern. Ich main daz sy achten Christus sey truncken gewest im letsten nachtmal / hab nit gewyst was er machte / darumb haben jn unser nyechtern Prelaten corrigiert / und besser gemacht dann er etc. Ich sprech so vil dartzu / die Prelaten haben wider Christi wort / dem Ewangelio ain abbruch gethon auß gewalt und nitt recht / das mag der Türck auch thon / Ja blut und flaysch verbieten den christen under jm gesessen / ist darumb nitt recht. Also hie / Sagent mir auß was schrifft haben die Prelaten (die dann knecht seind der kirchen) gewalt wider Christum und Paulum zu handeln? Ir sagen von vil ursachen und ferligkait die darauff stond / so layen das blut Christi trincken als clerici / hat Christus sollich ferligkait nit gewyst / hat Paulus sollich nit gewyst? Haben die ersten Christen sollichs nit gawyst? Secht auch für das jr nit got und magog des Entechrists anhang seind / jr seind ye wider Christum und sein wort / und des Entechrists oder widerchrists reich under der gestalt des gutten / mit menschen leer und philosophey streyt wider Christi reich: Jesus erleücht uns all. AMEN.