WArlich warlich/ ich sage euch: so jhr den Vatter etwas bitten werdet inn meinem namen/ so wirdt ers euch geben. Bittet/ so werdet jr nemen/ das ewer freude volkommen sey.

VNser lieber Herr Christus vermanet seine jüngern zum Gebet/ Darumb das sie so vil not vnd ellend inn der welt gewarten vnnd außstehen müssen/ da sonst kein hilff noch trost ist/ denn das Got vns erhören/ vnd vns helffen wölle/ Wie denn vnser lieber Herr Christus vns gewiß vertröstet/ der Vatter im himel/ werde vns seine kinder nicht lassen vmb sonst beten. Es lehret aber daneben Christus auch wie wir recht sollen beten/ Nemlich/ in seinem namen/ vnnd nicht inn vnserm namen/ das ist/ wir sollen hoffen/ gleich wie Gott durch Christum vnser Vatter worden ist/ also wölle er auch vmb Christus willen/ vns erhören/ vnd auß allem vnglück helffen. So mercke nun bedes/ erstlich den befelh vnd die verheissung/ das wir sollen betten/ vnd Gott das gebet wölle hören/ vnnd darnach den vnterricht wie wir allein in Christus namen/ das ist/ auff sein verdienst vnd gnad sollen beten/ Denn sonst werden vnser sünde vnns am gebet hindern. Wer aber weyß/ das Got allein vmb seines Sones willen erhören will/ der tröstet sich solcher verheyssung mehr/ denn er seine sünde sich lest schrecken.

HErr Got himlischer Vatter/ der du durch deinen Son vns verheissen hast/ was wir in seinem namen bitten/ das wöllest vns geben/ Wir biten dich/ erhalt vns in deim wort/ gib deinen heyligen Geyst/ der vnns regiere/ vnd füre nach deinem willen/ Behüte für des Teuffels Reych/ für falscher lehr vnd vnrechtem Gottesdienst/ Bewar auch vnser leyb vnd leben/ für allem vnglück/ Gib deinen segen vnd frid/ auff das wir allenthalb deine gnedige hilff erfaren/ vnd dich hie vnd dort in ewigkeyt/ alß vnsern gnedigen Vater/ durch Christum preisen vnd loben.