Dieterich, Veit - Summaria christlicher Leer - Am Fasznacht Sontag/ wie Christus von seim leyden weyssaget/ vnd einen Blinden sehen macht/ Luce am 18.
VNser Herr Christus sprach: Des menschen Son wirdt vberantwortet werden den Heyden/ Vnd er wirdt verspottet/ vnnd geschmehet/ vnd verspeyet werden/ vnd sie werden jhn geyssel vnd tödten/ vnd am dritten tag/ wirdt er wider aufferstehen/ Aber seine Jünger vernamen der keines.
WArumb vnser lieber Herr Christus solches hab müssen leyden/ wissen wir/ Denn er hat darumb sich angenommen/ vnd ist darumb mensch worden/ das er für aller welt sünde hat bezalen wollen. Darumb sollen wir erstlich vns hie erinnern/ wie ein grewliche last es vmb die sünde sey/ vnd die selben mit höchstem fleiß meyden/ sintemal niemand denn der Son Gottes/ durch so ein hefftige marter/ vnd hefftigen todt dafür hat bezahlen können. Zum andern/ sollen wir dises leydens vnd sterbens/ vns auch wider die sünde trösten/ vnd nit zweyfflen/ obgleych wir den ewigen todt/ durch die sünde verwircket haben/ das doch Gott vmb seines Sons willen gnedig sein/ vnd die schuld an vns ferner nicht wölle fordern/ so durch Christum bezalet ist. Zum dritten/ sollen wir vns auch drein ergeben/ vnnd nicht dran ergern/ ob wir auch müssen mit leyden vnd mit sterben/ Denn der Jünger ist nit vber seinen Meyster/ noch der Knecht vber seinen Herrn. Solches wusten die Jüngern dazumal nit/ aber hernach lerneten sie es.
Das Christus den blinden sehend machet/ merck das wort: Dein glaub hat dir geholffen/ Denn wer vmb hilf den Herrn Christum anschreyet/ vnd glaubt/ dem soll hilff widerfaren.
Gebet.
HErr Got hilischer Vatter/ der du dem Blinden menschen/ durch deinen Son Christum Jesum gnedigklich die augen geöffnet/ vnd das liecht hast sehen lassen/ Wir armen sünder bitten dich/ du völlest durch dein liebes wort vnsere blinde hertzen erleuchten/ das wir dich durch Christum deinen Son/ der für vnns am Creutz gestorben/ vnd für vnsere sünde bezalet hat/ recht lernen erkennen/ vnd in allen nöten vnd anfechtungen allein auff dein gnedige hilff vnd barmhertzigkeyt sehen/ die selbe durch ein glaubiges gebetsuchen/ vnd also trost vnd rettung wider Teuffel/ sünd/ vnd todt finden/ Amen.