Seydt barmhertzig/ wie ewer Vatter barmhertzig ist. Richtet nicht/ so werdet jr nicht gerichtet. Verdammet nicht/ so werder jhr nicht verdambt. Vergebt/ so wirdt euch vergeben. Gebet/ so wirdt euch gegeben/ Ein vol gedrückt/ gerütelt/ vnd vberflüssige maß/ wirdt man in ewer schoß geben/ Denn eben mit dem maß jr messet/ wirdt euch wider gemessen werden.

ES hat vnser lieber Herr Gott/ dreyerley stend auff erden verordnet/ die richten vnnd straffen sollen/ doch ein yeder nach seinem maß/ Vatter vnd Mutter im hause/ sollen richten vnd straffen jhre Kind vnd gesind/ mit worten vnd schlegen/ vnd ja nicht zusehen noc hgedulden/ das sie vnrecht thun/ solches ist Gottes ernster befelh. Darnach ist ein höhers vnd weytleufftigers Regiment/ Dem hat Gott das schwerdt geben/ vnnd befolhen/ alle offentliche ergernuß damit zu straffen/ vnnd die leut also zur forcht vnd zucht halten/ Solchen befelh hat weltliche Oberkeyt/ vnd ist grosse sünde/ wo sie gnedig sein/ vnd das schwerdt nicht flugs will gehen lassen. Das dritte vnd höhest Regiment/ ist das Kirchenampt/ dem ist auffgelegt durch das wort/ vnd nicht durchs schwerd oder gewalt alle menschen zu richten/ vnnd alle sünde zu straffen. In disen dreien stenden/ muß das gericht vnd die straff gehen/ vnd soll gar nichts vergeben noch geschencket werden/ Denn damit würde man die leut nur erger machen. Wo aber kein solcher befelh noch Regiment ist/ dir ist weder das schwerdt/ noch das wort/ noch Haußregiment befolhen/ Da sagt Christus/ sollen wir vns des richtens vnd verdammens enthalten/ vnd yederman vergeben vnd geben/ vnd verheisset/ wer solches thut/ dem wölle Gott gnedig sein/ jn auch nicht richten noch verdammen/ sonder vergeben vnd geben. So lerne nun yederman dem es nit befolhen ist/ das er andere leut zufriden lasse/ vnd nit richte/ er richte aber sich selb/ da wirdt er gnug zu schaffen finden/ seim nechsten aber sey er freundlich vnd dienstlich/ vnd lasse ja dem zorn den zaum nicht/ denn damit verdienet man Gottes vngnad. Denn mit dem maß wir andern messen/ will Got vns auch messen.

HErr Got himlischer Vatter/ der du barmhertzig bist/ vnd vns durch Christum zusagest/ du wöllest nit richten noch verdammen/ sonder genedigklich alle sünde vergeben/ vnnd was wir bedürffen/ reychlich geben/ Wir bitten dich/ mache solches vertrawen auff dein barmhertzigkeyt/ durch deinen heiligen geyst in vnsern hertzen gewiß vnd fest/ vnd lehre vns dergleychen gegen vnserm nechsten auch thun/ das wir niemand richten noch verdammen/ yederman gern vergeben/ vnd geben/ vnnd aber vns selb richten/ vnd in deiner forcht seligklich leben, AMEN.