Abraham sprach zum Reychen Mann: Gedencke Sun/ das du dein gutes empfangen hast in deinem leben/ vnd Lazarus dagegen hat böses empfangen. Nun aber wirdt er getröstet/ vnnd du wirdst gepeyniget.

DIsen spruch sollen wir fleyssig mercken/ Denn weyl die Christen auff erden sich vil müssen leyden/ vnd es dagegen den vnchristen vnd bösen buben/ nach all jrem willen gehet/ Haben die Christen allein disen trost der hie stehet. Nemlich/ das es nach disem leben sich zu beden theylen werde vmbkeren/ Welchen es hie auff erden wol gehet/ vnd alles gnug haben/ vnnd one anfechtung sind/ vnd derhalb alles thun was sie gelüstet/ one alle schew/ den selben soll es dort in ewigkeyt/ wie dem Reychen Mann/ vbel gehn/ Widerumb aber/ die sich hie auff erden vil müssen leyden/ vnd doch im leyden gedultig sind/ vnnd durch Christum auff denewigen trost hoffen/ die sollen mit dem armen Lazaro ewig selig werden. Derhalb erschrecke niemand für dem Creutz vnd leyden/ weyl dise ewige hoffnung dabey ist. Widerumb vberhebe sich niemand gelts vnd guts/ sonder fürchte Gott/ vnd brauche seines segens/ zu Gottes ehr/ vnnd des negsten nutz/ so soll es nicht not haben.

HErr Gott himlischer Vatter/ Wir bitten dich/ du wöllest vnsere hertzen durch deinen heyligen Geyst/ also füren vnd regieren/ das wir dein liebes wort/ nit/ wie der reyche Man/ one frucht hören/ vnd mit dem zeytlichen gut nit also vmbgehn/ das wir des ewigen dabey vergessen/ sonder armen leuten gern vnd miltigklich nach vnserm vermögen helffen/ vnd mit hoffart vnd vberfluß vns nit versündigen/ auch wo wir mit dem Creutz vnnd vnglück bedranget werden/ nicht verzagen/ sonder alle hoffnung an deiner ewigen hilffe vnd genad haben/ vnd in gedult alles vberwinden. Amen