Dieterich, Veit - Summaria christlicher Leer - Am neunzehenden Sontag/ wie Christus einem Gichtbrüchtigen menschen seine sünde vergibt/ vnd jn gesund machet/ Matth. 9.

CHristus sprach: Auff das jr wisset das des menschen Sun macht habe/ die sünde zu vergeben auff erden/ sprach er zu dem Gichtbrüchtigen: Stehe auff/ heb dein bette auff/ vnd gehe heym/ vnnd er stund auff/ vnd gieng heym.

ERstlichj lernen wir im heutigen Euangelio/ wie kranckheyt durch sünde verursachet werde/ Sonst solte der Herr dem Gichtbrüchtigen nicht ehe vergebung der sünden haben zugesagt/ denn jn geheylet. Derhalb weil doch yederman kranckheyt scheuhet/ vnd gern gesund leyb behalten wolt/ soll sonderlich das junge volck ksich für sünden hüten/ vnd in Gottes forcht wandeln/ Vnd wen Got angriffen/ vnd mit kranckheit beladen hat/ der versöne sich am aller ersten mit Gott/ vnd sehe wie er von sünden ledig wer/ so soll es mit der kranckheyt sich auch bald bessern.

Zum andern lernen wir hie/ wo wir vergebung der sünden sollen suchen/ Nemlich/ anderswo niergend/ denn bey dem Herrn Christo/ Der hat das predigampt/ vnd die heyligen Sacrament/ hinder sich auff erden gelassen/ vnd befolhen in seinem name Buß vnd vergebung der sünden zu predigen/ Derhalb so du vergebung deiner sünden begerest/ suche es in dem wort vnd bey den sacramenten/ vnd was das wort dir durch Christum zusagt/ das nimm mit vnzweyffeenlichem glauben an/ so soll es dir also widerfaren.

Gebet

ALlmechtiger Ewiger Gott/ der du durch deinen Sun Christum Jesumm dem Gichtbrüchitigen menschen an leib vnd seel/ hast gnedigklich helffen lassen/ Ich bit dein grundlose barmhertzigkeyt/ sey mir auch genedig/ vnnd vergib alle meine sünde/ stercke meinen glauben/ durch dein wort vnd heyligen Geyst/ vnnd leyte mich also/ das ich nit durch sünde zur kranckheyt/ vnd anderm vnglück/ vrsach gebe/ sonder in deiner forcht mich halte/ vnd also vom zeytlichen vnnd ewigem zorn vnd straff erledigt werde/ AMEN.