DER Aussetzige sprach: Herr so du wilt/ kanst du mich wol reynigen/ Vnnd Jesus strecket seine hand auß/ vnd rüret jn an/ vnd sprach: Ich wils thun/ sey gereyniget/ Vnnd alß bald war er von seinem Aussatz reyn.

DIse zwey wunderzeychen/ lehren erstlich das vnser lieber Herr Christus geren helffen will/ vnd wol helffen kan/ wider allerley leibliche not/ sonderlich aber wider die sünde/ auß welcher aller jammer herfleust. Doch so fern/ das wir erstlich in vmb hilff bitten/ vnd zum andern/ das wir an solcher hilff nicht zweyfflen/ sonder im glauben fest vnd gewiß sind. Wie wir aber/ wenn es zeytliche not belanget/ betten sollen/ lernen wir fein am Aussetzigen/ der spricht: Herr so du wilt/ kanst du mich wol reynigen/ Denn ob wir wol keins weges sollen zweyffeln/ es drucke vns für not was da wolle/ Gott werde helffen/ so sollen doch wir vnsern willen/ in Gottes willen setzen/ Vnd so es Gott so haben wolt/ das Creutz gedultig leyden/ Solchen gehorsam sind wir Gott schuldig/ vnnd Gott lest jm den selben sonderlich gefallen/ Wir müssen aber auch mit dem Haubtman alle hoffnung/ allein auff das wort vnsers Herrn Christi setzen/ alß das allmechtig ist/ vnnd auß nichte alles gemacht hat.

HERR Gott himlischer Vater/ der du auß sonderlicher lieb vnd barmhertzigkeyt vns deinen Sun geben/ vnnd für vns mensch werden/ vnnd am Creutz hast sterben lassen/ Gib deinen heyligen Geyst in vnsere hertzen/ das wir all vnser Vertrawen auff jn setzen/ vnd durch jn vergebung vnser sünde/ vnnd ewiges leben ja so fest glauben alß der Hauptman hie glaubt/ er werde sein krancken Knecht mit eim wort helffen. Wir haben ye sein wort/ Wer an mich glaubt soll den todt nit sehen ewigklich/ Gibe nur/ lieber Vatter im himel/ das wirs mit vnzweyffelnichem hertzen glauben/ vnd an vnserm letzten ende fest dabey bleyben. Amen.