Kaspar, Ulrich - Form des gemeinen Gebätts/ vor der Kinderlehr by der übung des Christenlichen Catechismi.
Gnad/ frid/ und barmhertzigkeit/ des allmächtigen Gottes/ seye zu allen zyten mit uns armen sünderen/ Amen.
Andächtige Menschen/ lassen uns Gott anruffen/ und sprechen: O barmhertziger Gott himmelischer Vatter/ diewyl dyn wort ein kertzen ist unseren füssen/ und ein liecht/ das zünden sol unserem wäg: so bittend wir/ du wöllest uns durch Christum/ der das wahre liecht ist der gantzen Welt/ unsere gmühter ufschliessen und erlüchten/ daß wir dyne wort luter und rein verstandind/ damit wir dyner hohen Majestet nienen mißfallind/ durch denselben unseren Herren JEsum Christum dynen Sohn/ welcher uns gelehrt hat also bätten.
Vatter unser/ der du bis in himlen. Geheiliget werde dyn namm. Zukomme uns dyn rych. Dyn will geschehe uf erden/ wie im himmel. Gib uns hüt unser täglich brot. Und vergib uns unsere schulden/ wie auch wir vergebend unsern schuldneren. Und führ uns nit in versuchung/ sonder erlöß uns von dem bösen: Dann dyn ist das rych/ und die kraft/ und die herrlichkeit/ in ewigkeit/ Amen.
Nota
Hierauf solend die heiligen zehen Gebott/ und Die zwälf Artickel unsers Christenlichen Glaubens von dem Diener der Kirchen erzelt/ und den kinderen vor gesprochen werden.
Gott der Herr verlyhe uns abermal syn gnad/ daß wir alle/ samt der lieben Jugend/ in synem heiligen wort und seligmachenden erkantnuß zunemmind/ im wahren glauben und allem guten durch synen Geist gestärckt/ und darinnen bis an unser end erhalten werding/ Amen.