Langenmantel, Eitelhans - Diss ist ain anzayg: ainem meynem etwann vertrawten gesellen, über seyne hartte widerpart, das Sacrament und anders betreffend

Langenmantel, Eitelhans - Diss ist ain anzayg: ainem meynem etwann vertrawten gesellen, über seyne hartte widerpart, das Sacrament und anders betreffend

Vorred

Aerbern lieben Brieder und schwestern in Christo unserm seligmacher / ICh bin verursacht / von ainem meinem vertrawten gesellen / diß nachfolgend anzuzaygen mein glauben / und des genannt Sacrament betreffend / ob mangel darinne / das ainen Christlichen man zu verweysen wer / beger ich freuntlich mitt der hailigen schrifft underreicht werden / volgt / mein entliche mainung / und glauben zuvernemen / das walt Gott der herr.

Auff sollichs / so merckt lieben brüder und schwestern / in Christo / als der herr Jesus sein letsts / news und ewigs Testament einsetzen wolt / Da sy aber assen / nam Jhesus das brot / dancket und brachs / und gas seinen Jungern und sprach / Nempt esset / Das ist mein leyb (der für euch geben wirt). Deßgleichen nam er auch den Kelich nach dem nachtmal / dancket und sprach / Trinckt all darauß / das ist der Kelich des newen Testaments in meinem blut / wellichs vergossen wirt / für euch und für vil / zur vergebung der sünden / so offt jr das thut so thuts zu meinere gedechtnuß.

Paulus spricht / der mensch brüfe aber sich selbs / und also esse er von dem brot / und trinck von dem Kelch ec. Das gaystlich essen und trincken / Ist glauben / das Christus JEsus / warer Got und mensch / für uns dargeben / und sein blut für uns und vil vergossen hab / zu vergebung der sünden / wer das glaupt hat das ewig leben / wers nit glaubt ist schon verdampt / dann on glauben Gottes wort / wirt niemandt selig / aber on das genandt Sacrament / unnd zaychen / brot und wein / mügen wir wol selig werden / dann Gott ist ain gayst / und seine worte seind gayst und leben / und der gayst ists der lebendig macht. Christus verwirfft alle flaischliche ding / so er selb spricht / das flaisch ist kain nütz / verstand / eusserlich leyplich zu essen ec.

Derhalben uns meer am glauben Gottes wort und zusag gelegen / dann an allen Ceremonien / zaychen / und eusserlichen flaischlichen dingen / und spricht doch selbs / warlich / werden jr nitt essen vom flaisch des menschen sun / und trincken von seinem blut / so hapt jr kain leben in euch / und wer mein flaisch ysset / und mein blut trinckt / der hat das ewig leben / und bleißt in mir und ich in jm / Wie mich gesandt hatt der lebendig vatter ec. Dise ding sollen und müssen gaystlich und nitt eusserlich oder flaiscchlich verstanden werden / Nemlich wie es der herr selb anzaigt hat da er spricht / der gayst ists ec. Dann wie das eusserlich essen unnd trincken / ist ain speyß des leybs / also auch das gaystlich essen und trincken / ain speyß der seelen / das eusserlich betreugt / und geet wider durch sein gang ec. Aber das innerlich betreugt nit / und quelt in das ewig leben / Das ist glauben / das Christus warer Gott und mensch / uns hab erlößt am Creutz / mit seinem blut / derhalben wir die vergebung der sünden / nit in den zaychen Brot und weyn suchen / noch haben werden / besonder allain in seinem leyden und blut vergiessen.

Summa summarum / wellicher glaubt das JEsus Christus warer Got und mensch / für und dargeben / und seyn blut für uns vergossen hatt / zur vergebung der sünden / so wir ye die zaichen nit haben möchten / der ysset und trinckt nichts destminder den leyb und das blut Christi / im gayst und in der warhait / in der gedechtnus des leyden und blut vergiessen Jhesu Christi / am Creutz vergossen für unsere sünd / in ainem starcken vesten vertrawen unnd glauben / seinem wort / on alle zaychen / und zuthun der menschen / es geschech an welchem ort es woll / dann der mensch lebt nit allain vom brot / sonder von ainem yeden wort / das da geet auß dem mund gots. Und so wir dem herren sein wort glauben / und jm also gantz uns ergeben / und auff unsere werck / thun und lassen / nichts achten / und uns mit hertz und mund / Got dem almechtigen / offt arm sünder bekennen / mit ainem rechten reuwigen hertzen / über unser sünd so will uns Got die sünd verzeyhen / und nit mer gedencken / dann er spricht / ICh bin allain der dir dein sünd verzeycht. Ich bin der weg / die warhait / und das leben / und spricht nit / gang hin und beycht ainem Priester / gang Walfarten / stifft Messen / baw Gotshewser / und ander gaugelwerck für dein sünd / oder mach krömerey auß meinem wort / und sperr es in die hewßlin oder gefeß / und hab so vil Römischer Messen umbs gelt / dann Got der die welt gemacht hat / und alles das darinn ist / seytmal er ain herr ist hymels und der erden / wonet er nit in Templen mit henden gemacht / sein wirt auch nit von menschen henden gepflegen / als der yemandts bedürff / dieweyl er selbs yeder man leben / und Atham allenthalben gybt.

Dise ding spricht der herr / der Hymel ist mein stul / und die erd ain schämel meiner füß / wellichs ist das hawß / dz jr mir bawend / und wellichs ist die statt meiner ruw / mein hand hatt alle dise ding gemacht / spricht der herr.

Darumb hüten euch / wann sy sagen hie / hie ist Christus oder da / glaubts nit / das ist / glaubts nit wann sy sagen / das der leyb Christi im brot / und das blut Christi im wein wie sy uns lang zeyt betrogen / und Got den herren so greylich gelestert haben. Derhalben so laß das brot und den weyn / ain gemainschaft des herren leyb und blut sein / und nichts anders / dann was ausserhalb des raynen wort Gots und seines ewigen letsten Testaments gehandelt / mit meß haben / bucken / bugen /brechen / auffheben / das macht anbetten / umbtragen / macht eerentbieten / des dann alles allain Got dem almechtigen zugehört / zu beweysen / dann Christus allain gesagt hat / an seinem letsten Abentmal / NEmpt hin esset / Nempt und trincket all darauß ec. und so offt jr das thut / so thuts in meiner gedechtnuß / das ist essen und trincken / wie vor anzaigt / hat auch nichts weyters damit befolhen zu handlen.

Das hat Christus seinen Jungern befolhen / geet hin in die gantzen welt / und verkündigt das Evangelium allen Creaturn. Derhalben ist uns von nötten / frumm erber geleert männer / die allain ains weybs mann / nit geytzig / nit weynsichtig ec. Die uns das clar lautter wort Gottes trewlich predigen / und underweysen / Ist nit von nötten / das dieselben mit den Fladen zun Ostern geweycht sein / Ist fast gnug das sy glauben Gottes wort / und getaufft / und von ainer gemainen Oberkait erwolt.

Sollich geleert frumm männer / wie vor anzaygt / sollen und müssen wir haben / die uns / so wir von hertzen begyrig werden / des herren widergedechtnuß zu halten / so wir zusamen kommen / mit Christlichen brüdern / und nit mit widerchristen / die uns die zaychen / brot und weyn raychen / und andre Christliche brüderliche lieb / wort unnd werck uns mitzutaylen / umb ain zimliche belonung / dann nit ainem yeden befolhen ist / sollichs zu handlen / Nemlich wie vor anzaygt. Und wellichst also berattig wirdt / des herren Abentmal / oder widergedechtnus halten will / und der nit underschaydet / dise gaystliche speyß und tranck / von der leyplichen / mit dancksagung und glauben des herren leyden und blut vergiessen / für unser sünd am Creutz / der ist schuldig an dem leyb und blut des herren / wie vor anzaigt Creutz tragen / verfolgung im herren ec. leyden.

Darumb lieben brüder und schwestern / so jr des herren Abentmal halten wolt / so besecht / das es nit on glauben Gottes wort geschech / wie vor anzaigt / wellichs aber ainen starcken gegründten glauben hat / und ain guten fürsatz / grober weyß nitt zu sünden / der gee frölich hinzu / er wirdt nit zu schanden. Darumb lieben brüder und schwestern in Christo / habt Got lieb im hertzen / und glaubt seim wort / unnd den nechsten als euch selbs. Seytt fraydig im glauben / in Got den vatter / und unsern herren Jesu Christo / Amen. Got hab lob in awigkait.

Aus dem Original abgeschrieben

Cookies helfen bei der Bereitstellung von Inhalten. Diese Website verwendet Cookies. Mit der Nutzung der Website erklären Sie sich damit einverstanden, dass Cookies auf Ihrem Computer gespeichert werden. Außerdem bestätigen Sie, dass Sie unsere Datenschutzerklärung gelesen und verstanden haben. Wenn Sie nicht einverstanden sind, verlassen Sie die Website.Weitere Information
autoren/l/langenmantel/langenmantel_diss_ist_ain_anzayg.txt · Zuletzt geändert: von 127.0.0.1
Public Domain Falls nicht anders bezeichnet, ist der Inhalt dieses Wikis unter der folgenden Lizenz veröffentlicht: Public Domain