Greiffenberger, Hans - Von der Nachfolge

Greiffenberger, Hans - Von der Nachfolge

Die welt sagt Sy sehe kain besserung von den die sy Luterisch nennet was besserung sey ain wenig hierinn begriffen.

Augsburg 1523

Allen vnnd yegklichen glaubigen in Christo wünsch ich Hans Greyffenberger die gnad gottes vnd merung Christenlichs glaubens.

Brüder in Christo/ Es begibt sich offt das man sagt/ man sehe niemandt der sich besser diser zeit/ in welcher das wordt gottes so in vollem schwanck geet/ Darauff ich fürgenommen mit der gnad Christi meines gottes/ ain wenig vnterricht zugeben/ was die recht warhafft besserung ains menschen sey/ der widerumb geborn wirt auß dem gaist der warhait/ wie Christus sagt Johannis am iii.

Es wardt Christus gefraget Luce am .xvii. wenn das Reich gotes köme/ Sagt er zu inen/ Das reich gottes kommet nit mit aussern berden/ Man wirdt nit sagen/ Sihe hie oder dort ist es/ Sonder das Reich gottes ist inwendig in eüch rc.

Darumb ist die besserung des menschen nit also gethon/ das man sy offenlich sehe/ Sonder es ist ain sollich ding/ das es gantz haimlich vnd still zu geet/ vnd ist ain solche besserung/ das sy niemant ee erfert dann die Liechtelmacherin Götzenschnitzer/ vnd Meßkramer/ die Bruderschafften werdens auch gewar/ Dann das ist eben die recht warhafft besserung des menschen/ so jn Got erlößt von seinem gut beduncken/ vnd aigner gerechtigkait/ die er thut auß dem falschen liecht der vernunfft vnd aigen willen/ diser besserung werden wenig menschen gewar/ dann die welt wirt jr nit gewar/ wann sy kompt on mitel/ durch den gaist der warhait/ welchen die welt nit erkennet/ dann sy sicht jn nit. Johannis am xiii. Vnd Paulus sagt in der ersten zu den Corinthiern am ,iii, capitel. Der natürlich mensch (on gottes gaist) versteet oder vernimbt nit/ der ding die des gaist gottes seind/ sonder es ist im ain torhait/ so man jm daruon sagt. Es ist auch gewiß vnd felet nit/ das dise menschen verfolgt vnnd verspot werden von allen gleyßnern vnnd werckhaylgen/ dann die selbigen sagen yetz. Oho es ist yetz ain seltzams ding/ man darff nit mer beten vnd in kirchen geen/ vnd darff nit mer fasten/ man hat genug am glauben/ man darff nichts guts mer thun/ ich wil gern sehen was darauß will werden rc. Got erbarme sich diser menschen/ sy seind nit zuschelten/ sonder zu erbarmen/ wenn sy ainer fragt was gut sey/ so sagen sy wild strobutzen/ vnd nitt anders dann was sy gut gedunckt/ wie wir bißher laider alle gethon haben/ darumb kan nyemant yetz von kainer besserung sagen/ dann in dem sy geschicht/ der selbig streyt nit seer von seiner frümkait/ sonder erkent sich den aller ellendisten menschen/ so er sein mag/ vnnd hat warlich wol zu bitten/ darff nit mer zelen/ darff auch nit vil liechtlein auffstecken/ er hat ain ander liecht das erleicht jm sein gewissen/ das er sich nit wirdig gedunck am tag zuwandern/ er laßt auch kain busaunen vor jm plasen/ so er sein lieb erzaigt gegen seinem nechsten Wiewol Christus sagt Matthei am .v. Laßt ewer liecht leychten vor den menschen/ das sy sehen ewre gute werck/ vnd got preysen/ So thund sy nichts das sy gesehen wöllen werden/ Geschicht es dann/ das sy gerügt oder lautmer werden von den/ den sy brüderliche lieb erzaigt haben/ so wöllen sy doch nur das Got gepreyset werde/ dann sy wissen/ das nit ire (sonder gotes) werck seind/ Wie sollen sy sich dann vast spreyssen hin vnd her/ wie die gleyßner thun/ die haben zu zeyten ain viertel stund liechtlein an zu zünden/ aim yegklichen götzen ains/ das er ia gesehe/ das er nit vber den altar ab vnd ain loch in kopff fall/ der lieb hailig (er were mir auch lieb im ofen) Darumb schreyt offt ainer vnd waißt selbs nit was.

Darumb lieben brüder laßt vnns Got bitten, das jnen Got auch zaige die besserung/ dann es ist nit ain solche besserung/ wie des Babsts hauf gelert hat/ daruon vns Christus gewarnet hatt. Matthei am .xxiiij. sprechend. Es werden auffersteen falsche Christen/ vnd falsche lerer/ vnd sagen. Ich bin Christus/ das ist/ ich hab die sünd zu vergeben thu was ich dich haiß/ so kombst gen hymel. Vnd mer. Sy werden sagen. Hie oder dort ist Christus/ so glaubt es nit (geet nit hinein zusuchen) O got wie fleyssig hat er vnns gewarnet/ aber wir haben frembde stimm gehört/ darumb sein wir irr gangen. Darauff sag ich/ das nyemant erkennen kan die warhafft vnd recht besserung dann der mensch in dem sy geschicht/ man kan sy auch mit nicht den menschen leeren/ sonnder gottes gaist muß thun/ Es ist nit ain solliche besserung wie wir gemaint haben/ wenn ainer von ainem rohen leben der iugent felt auff ain gleyßnerisch leben/ Als die gethon haben/ die auß vnwissenhait gottes/ seind in die Clöster geloffen/ vnd in die kutten geschloffen/ vnd jr hail darinn gesucht haben. Wie ich dann selbs gehört hab von ainem alten gleyßnerischen Barfüsser der prediger lang was also geschehen was durch den glauben/ vnd zuletst sagt er. Ja sollt ich got nit vertrawen das er mich im Closter stand selig macht/ vnd solt so hart ligen auff ainem strosack/ vnd in der kutten stecken/ das wer übel. Also bochet der ellendt mensch auff seinen strosack vnd kuten/ dann laider er erkant Christum nit/ vnd des gab er ain ellende gleichnuß/ daran man spiret seinen glauben/ Vnd sagt. Wenn ainer ainem kauffman saget/ er solt auf dise meß ziehen/ so wurd er hundert gulden lesen/ thet ers nitt/ wer ain zaichen das er den rechten glauben nit hette/ oder habe.

Also sehet ir lieben brüder/ was dise leüt erlangen mit irer besserung in kutten. Helff inen got das wünsch ich inen (ist es anders sein götlicher will).

Darumb ist ain Christliche gaistliche besserung vil ain anders dann wie die vernunfft für gibt/ die maint/ wenn sy nur ain seltzam klaid an leg vnd eß vnd trinck nit wie ander menschen/ so sagen sy Ich bin im gaistlichen stand/ Ach got der blindthait/ ain rechter Christ fleücht solliche ding selber/ man darff ims nit gebieten/ das er sich nit fülle mit gutem geschleck vnd tranck/ sonder er waißt vnd hat grosse acht darauff/ das er kain grössern feind hat/ dann seinen schelmen den alten Adam. Darumb wirt ain rechter Christ nit seer erschrecken/ wenn man jm vom todt sagt/ daruon wissen die hailigenkusser nichts Sonnder sy ruffen sy all an/ das sy nur nicht leyden dörffen/ geben ainem ainen aiichin fuß/ dem andern ain wechsine nasen/ dem dritten ain wechsen maulkorb/ sollicher guter werck stecken sy vol/ vnnd die sollichs nit thun/ die seind LLuterisch/ sagen sy. Wenn man sy fragt/ was ist Luterisch/ so geen sy hin vnnd winden die helß wie die Genß auff dem müst/ vnnd verschmacht in übel/ das mans nit loben will/ vnd den Christen jr gauckelwerck nit gefelt/ wiewol jr vil seind die diser gaucklerey aller abgestanden sein/ nitt das sy es für gut halten/ sonnder haben vorhin kain lust darzu gehabt/ vnd so sy es gebraucht haben/ haben sy es nur gethon den menschen zu gesicht/ haben auch Christlich gescholten wöllen werden/ Dise vermainen yetz sy sein gut Christen/ sy sauffen/ fressen vnd buben aber geleich als vor/ das ist kain besserung/ vnd seind erger dann vor/ vrsach/ sy verachten vnd spotten aller der die noch nit ledig seind/ mit den sy sollen ain mitleyden haben. Der ist auch nit gebessert/ der ain handel hat oder ain hantwerck/ damit sein nechster betrogen oder verergert wirdt/ vnd nit daruon laßt/ wie etliche thun/ als Bildschnitzer/ Maler/ vnnd Formschneyder rc. Ey sagen sy/ gelten die hailigen nicht/ so wil ich huren vnd buben machen/ ob die gelt gulten/ das ist falsch vnnd vnchristlich/ sollich leüt machen/ das man das wort gottes verlestert vnd verspot/ vnd man sagt/ schaw das thund die Euangelischen/ vnd der gleichen. Aber nit also/ man muß es anders versteen/ Es ist ia kain besserung da/ Aber wo ain warhaffte besserung geschicht/ fleyßt man sich zu meyden alles des/ das dem wordt gottes wider ist/ vnd fleyßt sich zuthun was got gefellig ist.

Darumb sol ain yegklich Christen mensch sich tag vnd nacht üben im gesatz vnd wort gottes/ Wiewol etlich gelert sagen/ der gemain man sol nit mit der gschrifft vmb geen/ wann es zimm sich nit/ das ain schuster das Euangelion leß/ oder mit feder vnd tindten vmbgee/ sonder mit leder vnnd schwertz rc. So sag ich darauff/ Ich hab nie kain Esel gehört singen/ als ain Nachtigal/ es seind leüt von zerriten sinnen/ vntichtig zum glauben/ die sollichs sagen/ blodern wissen nit was.

Lieben brüder in Cristo laßt vns got anruffen (im gaist vnd in der warheit) das er vns mittail sein krafft an vnsere erlösung/ das wir die frölich leyden nach gottes willen. Amen.

Cookies helfen bei der Bereitstellung von Inhalten. Diese Website verwendet Cookies. Mit der Nutzung der Website erklären Sie sich damit einverstanden, dass Cookies auf Ihrem Computer gespeichert werden. Außerdem bestätigen Sie, dass Sie unsere Datenschutzerklärung gelesen und verstanden haben. Wenn Sie nicht einverstanden sind, verlassen Sie die Website.Weitere Information
autoren/g/greiffenberger/besserung.txt · Zuletzt geändert: von 127.0.0.1
Public Domain Falls nicht anders bezeichnet, ist der Inhalt dieses Wikis unter der folgenden Lizenz veröffentlicht: Public Domain