Geiler von Kaysersberg, Johannes - Trostspiegel - Das achtest Glaß.

Geiler von Kaysersberg, Johannes - Trostspiegel - Das achtest Glaß.

DAs achtest Glaß ist/ Propria utilitas, Eygner nutz/ Gedenck was grosser nutz/ zum dickern mahl/ einem menschen erwachset/ auß dem todt seiner freund/ so wirst du nicht also vnuernünfftigklichen trawren/ es bringt vns dick nutz/ geistlich vnd zeitlich/ wiewol es vns nit dunckt/ wann in waarheit vnsere freund/ jrrend vns dick am heil vnserer seelen. Ein gezeugt ist Christus Jesus vnser Herr im Euangelio/ der da spricht/ diie feinde des menschen sind seine haußgenossen/ sein Beywoner vnnd verwandten/ Nun sprichst du/ was schadens fügend sie vns dann zu/ so antworte ich dir/ sie bringen vns/ sibenerley schaden vnd gefahr.

Der erst Schad ist/ Liebe zu diser Welt/ das ist zu zeitlichem gut/ ehren/ gewalt/ würdigkeiten/ darzu neigend vns dick vnsere lieben freund/ rhaten vnnd helffend darzu/ das vns offt dient zu vnserer grossen verderbnuß/ an Seel vnd Leib/ welcher dingen etwann ein frommes gutes hertz/ ledig stehen möchte/ aber er muß seinen freunden volgen/ als er wähnet/ vnnd darff sie nicht erzürnen/ daran er sich doch nicht kehren soll.

Der ander Schad/ Den sie vns zu fügen ist/ trawrigkeit/ wann vnsere freund/ schaden/ widerwertigkeit vnd vnglück habend/ das gehet vns dann zu hertzen/ vnd betrübt vns offt/ da wir sonst vnbetrübt weren/ hetten wir sie nicht.

Der dritte Schad ist/ Der zorn Gottes/ o wie gar dick/ fallen wir in den zorn Gottes/ vmb vbertrettung willen seiner Gebotten/ von vnserer freund wegen/ das wir sie nicht wöllen betrüben/ das doch ein hart schedlich ding ist/ dir sol niemands also lieb sein/ das du vmb seinet willen Gott erzürnest/ in vbertrettung seiner Gebott/ als die Torechten elteren thund/ das sie jre Kind/ hoch mögen bringen/ Gott geb wie das zu weg möcht bracht werden/ vnd setzen also jhr Seelen/ für jhr Kind/ ist ein grosse Thorheit/ vnd vnsinnigkeit/ darumb daffst du nicht weinen (als S. Augustinus sprcht) das dir entzogen/ werdend durch den todt/ deren leben vnd gegenwertigkeit/ die dir zu schaden dienend vnd verderbnuß.

Der vierd Schad/ Ist üppige Ehr/ Glori vnd Hoffart/ sprechen/ etlich/ sonders die Edlen/ das bewein ich vnd betrübt mich das mein geschlecht sol ab gehn/ nam vnnd stamm/ Schilt vnd Helm/ ich hab keinen Leibs erben/ meines namens wirt vergessen/das ist darumb ich meinen Sohn bewein.

O Du grosser Narr du beweinst das dein Nam/ Ehr vnd Glori abgehn soll inn diser zergenglichen welt/ vnd hast kein oder kleine sorg/ wie dein nam oder Glori bleibt ewigklich/ des künfftigen Lebens/ im Himmel/ das ohn end sein wirt. Gedenck wie ein groß torheit das ist/ sich also in der üppigkeit des Namens/ vnd Ehren/ Rühms vnd Glori verrieffen/ vnd wie so gar ellendigklich die selben betrogen werden/ Wa sind die grossen König vnd Keiser/ vnnd alle diser Welt kind/ die also gefochten haben/ nach solchen Ehren/ vnd Namen/ sie sind vergraben/ vnd weißt niemands nichts von jnen zu sagen/ jhr gedechtnuß ist vergangen/ mit der Glocken thon/ haben wöllen auß diser Welt ein Paradeyß machen/ vnd darinn jr Namen grössen/ vnnd ist das grab worden jhr hauß ewigklich/ als Dauid spricht/ vnd haben/ (nach den worten/ vnsers Herren) hie ihren lohn eingenommen/ Matth. am vi.

Dise Torheit/ des Nammens vnd Stammens/ haben etlich recht Edle menschen/ betrachtet/ die haben verlassen Gewalt/ Güter/ Lust vnd Ehr/ dise ding haben sie allesammen verachtet/ also hat auch gethon/ Sanctus Arsenius/ deßgleichen auch Sanct Elisabeth/ eines Königs Tochter in Vngern/ vnnd vil andere/ die allhie vil zu lang wären zu erzellen/ ich laß sie aber fallen vmb kürtze willen/ biß an vier Söhn eines reichen Königs inn Schotten/ vnd Sanct Mechtild jrer Schwester/ ware auch des Königs in Schotten Tochter/ die hatte vier Brüder/ der eine was ein Hertzog/ der verließ sein Hertzogthumb/ gienge willigklich in das elend vnd litte groß armut.

Der ander was ein Graffe/ der verließ sein Graffschafft/ vnd warde ein Eynsidel.

Der dritte Bruder was ein Bischoff/ der verließ das Bisthumb/ der warde ein Cartheüser.

Der vierd Bruder hieß Alexander sechtzehen Jar alt/ den zwang der König sein Vatter/ das er solt regieren/ da sprach Mechtild die Jungfraw/ sein Schwester/ Alexander mein liebster Bruder/ was wilt du nun thun/ diene eltern bruder haben das Erdreich verlassen/ das sie den Himmel vberkämendt/ vnd haben verschmähet das tödtlich Königreich/ auff das sie die ewigen reich besessendt/ vnd darumb ist dir allein verlassen das Reich/ vmb welches Reich willen/ du die Himmelische Glori/ vnd dein Seel verlieren möchtest/ von stund an ward alexander sein Hertz getroffen/ vnd sprach mit weinenden augen/ o wehe Schwester was rahtest du mir/ ich bin bereit/ alles das zu thun das du mich heissest/ des fröwt sich von hertzen sein Schwester/ vnd nam jhren Bruder/ vnd verwandlet jm seine kleider/ vnnd führt jn weit hinweg/ an ein ort/ da lehrt sie jn Küh melckenn/ vnnd milch luppen1)/ vnd die aller besten Käß machen/ vnnd verdingt jhn darnach/ an ein ort/ für ein Kühmelcker.2)

Das waren recht Edelleut/ die sich nichts/ an die Narrey/ vnd üppigkeit/ Nammens vnd Stammens/ Schilt vnd Helm kertend/ sunder herrlich verachtend/ vnd erlangten dadurch/ hie vnd dort ewige ruhm. Grösser Ehr/ Ruhm/ vnd gedechtnuß hat erlanget/ S. Elizabeth/ durch verachtung des nammens/ weder alles jhr geschlecht hat/ deßgleichen ander mehr vil heiligen/ die da Edel waren/ Söhn der König von Hertzogen/ vnnd klein schetztend die Glori diser Welt/ verliessen all jhr Freund/ Reichthum/ vnd besitzungen Land vnd Leut/ auff das sie sich gantz möchten in den dienst Gottes geben/ hatten keinn acht ob jhr geschlecht abgieng/ hie in diser Welt/ wenn allein jhr nam blibe/ in ewiger gedechtnuß/ mit denen die da getrewlich Gott hatten gedient/ dem do fleissigklichen dienen/ ist regieren vnnd herrschen/ vnd wir sehen auch augenscheinlich das die lieben heiligen in grössern ehren/ Lobs vnd Ruhms sind/ die da verachtet haben/ alle Glori/ diß tödlichen lebens/ weder die do haben vnderstanden/ die Glori diser welt/ zu erlangen.

Der fünfft Schad/ Den vnsere freund vns bringen/ ist geitzigkeit vnnd vnrhu/ wie vil sind deren die sich vmb jhrer kind oder vetteren willen/ dem geitz vnnd allen seinen Töchteren heim geben/ auff das sie die selben versorgen mögen/ vnnd hoch bringen/ sie fallen inn grosse vnrhu/ haben weder tag noch nacht rhu/ werden in jhnen selbs verbittert/ vnbarmhertzige/ Rauber/ Dieb/ Betrieger/ Lugner/ Wucherer/ Abtröwer/ Symonier/ vnnd wenn es Pfaffen sind/ die kein kind zu versorgen haben/ so haben sie doch vetteren/ brüder oder schwester kind/ die tricht jhnen der böß geist auff den halß/ sie zu versorgen/ Deß sprach der Bapst Alexander/ Gott hat vns genommen die Söhn/ aber der Teüffel hat vnns geben Vetteren.

Von diser vnrhu/ redt Franciscus Petracha vnd spricht/ du hast deinen Sohn verloren/ so hast du auch mit jm vil forcht verlooren/ vnd ein vnendtliche martern der sorgen/ vmd welcher sorgen willen7 das du jhr abkommen möchtest/ ist dir zu sterben oder deinem Sohn nutzlich. Nichts machet einen Vater ohne sorgen/ weder der tod/ darumb saget der weise Salomon/ Ich hab gesehen ein grosse vppigkeit vnder dem Himmel/ einen menschen/ der da geitzigklichen zusammen hauffet grosse Reichthumb diser Welt/ hört auch nit auff/ vnd hat kein rhu/ vnd weißt nit wam es zu letst wirt.

Der sechste Schad/ Ist Ewige verdammnuß/ vil sind die sich vmb obberührte geitzigkeit/ vnd andere ding als vor erzellet sind/ setzen sich vnd jren die sie also vnderstehen zu fürderen vnd ehren bringen/ in den staht ewiger verdammnuß/ vnd deß haben wir vil Exempel/ deren ich nicht mehr dann ein s melden will/ das vns beschreibt der groß MEister Petrus Damianus/ (und wir in seinem wärdt bleiben lassen) es was jnn Teütschen LAnden ein Reicher vnd mechtiger Graffe/ der was aber eines guten leumbdens vnd eines vnschuldigen lebens/ nach dem vrtheil der menschen/ das doch ein seltam ding ist/ vnder ddem geschlecht der menschen/ diser starb/ vnd nach seinem tod/ da ward ein geistliche person verzuckt/ vnnd im geist in die Hell geführet/ da sahe er das ein leitern auffgerichtet ware/ inn einem grausamlichen fewrenden tieffen tobel/ da die flammen auffschlugen vber die leiteren/ da sahe er den Graffen auff dem höchsten sprossen der leiteren stehen/ vnd sahe das die leitern darumb auffgerichtet was/ das sie alle/ so von des Graffen geschlecht weren entpfahen solten/ vnd was also geordnet/ wenn einer starb auß dem selbigen geschlecht/ vnd zu der Hellen fuhr/ auff die leitern/ so mußte der/ so da stund auff der höchsten sprossen/ hinab steigen auff den nideren/ vnd also die andern nacheinanderen/ so vnder ihm waren/ mußt ihr einer dem andern weichen/ das der so zum ersten gestorben zu aller ober ist/ auff den ersten sprossen der leiteren kame/ biß das aber einer auß disem geschlecht starb/ so mußten sie aber ein andern statt geben vnd tieffer hinab steigen. Diser geistlich mensch verwundert sich/ ab diser Gesicht/ vnd fraget was die vrsach were/ diser grausamlichen verdammnuß/ besonders warumb diser Graff/ also gepeiniget wurde/ der doch so Erbarlichen gelebt hette/ auch ziemlich vnd recht/ da hort er/ das es werre/ von wegen eine ligenden guts/ das da zu stünde der Kirchen zu Metz/ welches gut/ des Grafen Vrann/ Sanct Stephan der selbigen Kirchen Üatron/ abgezogen vnd genommen hat/ vnd war diser Graff der zehende Erb/ desselbigen guts/ darumb stunden die neun vnder ihm auff der leitern/ vnd er auff dem obern sprossen/ biß das ein ander Erb jm nach kam/ also hatte sich der alte Graf vnd alle seine nachkommnen/ zu ewiger verdammnuß gebracht/ dann kein Geitziger/ kein Dieb/ kein Rauber theil hat am Reich Gottes/ wie S. Paul spricht 1. Cor. VI.

Der sibend Schad ist/ Hinderung am Gottes dienst/ Wie dein freund/ besonder deine kind/ Söhn vnd Töchtern/ dich jrren am Gottes dienst/ kanst du wol mercken/ du seyest dann gantz blind/ vnd ein Narr/ darumb danck Gott seiner gnaden/ so er dich entbindet von den dingen/ die dich jrren an seinem freyen dienst/ so er dir nimpt deien Gemahel/ kind vnnd freun d/ oder andere ding dergleichen/ daran du hangest vnd dich jrret/ wie dick geschicht das/ vnnd wir das täglich sehen/ das sich etlich menschen nach dem tod/ jhrer kind oder gemahel/ Gott ergeben/ jm gantz dienen/ Almusen reichlich armen leuten vmb Gottes willen geben/ die bey leben jrer kinnd/ freund vnd gemahel/ nit einen pfenning geben hetten/ vmb frcht willen/ das ihr freund nach jrem tod/ des bedörffen würden oder manglen/ darumb ist es ein grosse barmhertzigkeit Gottes/ das durch den tod/ solche freund hin genommen werden/ Ich lise von zweienn reichen Eheleuten/ welche von Gott begerten zu haben ein kind/ darumb sie vil Almusen armen leuten mittheilten/ dardurch die armen offt erfröwt wurden vnnd auffenthalten/ der Almechtig Gott/ der voll gütigkeit ist/ vnnd dick erhöret die gebett vnd begirden der menschen/ sie zu ziehen vnd zu reitzen zu seiner liebe/ derhalben erhort Gott jhr gebete/ gab jnen ein sehr schönes vnd geschickt kind/ was geschach/ von stund an/ fiengen sie an zu gedencken/ als ander Leut pflegen zu thun/ wie sie es möchten versorgen/ vnnd von stund an horten sie auff Almusen zu geben/ das sie solch gut dem Sohn behielten/ das er bey seinem leben nit mangel dörfft haben/ das sahe Gott an/ das seine armen/ die seine glider sind/ dardurch jhre narung vnd jhren auffenthalt verloren hatten/ vnd nam hin/ das er jhnen geben hat/ vnnd ließ das kind sterben/ deßgleichen solt du glauben/ das es Gott noch heutgs tags thue/ dz er zu nutz etlicher menschen/ sie solcher kind beraubt oder freund/ wiewol wir dz nit mercken können/ deßhalb wir also ersoffen sind in liebe diser Welt. Es möchten vil ander Exempel/ herein gezogen werden/ aber es ist nicht not/ alle Bücher sind vol/ vnd täglich erfahrnuß zeigts vns/ wir sehend/ das die reichen menschen/ diealso durch anschickung/ Gottes/ kein kind haben/ oder der gehabten beraubt sind/ durch den tod/ vnd kein leibs Erben habend/ werden Regierer/ Vätter vnd auffenthalter viler armen menschen/ das jnen ohn zweiffel vnd jren Eltern/ vnd der gantzen Christenheit nutzer ist/ weder nutz wären zwentzig oder dreissig Söhn/ die eines verkehrten bübischen lebens wären/ (als es dann gemeinlich beschicht) die das gut oder Reichthumb jrer Eltern schandtlich vnd vnnutzlich verthäten/ nicht für sie betten/ zu jrem grossen schaden/ darzu erlangen sie grösser Ehr in diser welt/ ruff vnd lob/ geen allen menschen/ vnd nach jrem tod/ vor Gott vnnd den menschen/ weder sie erlangten von allen jren Erben/ wenn vnder zwentzig geraht nicht einer.

Sa<nct Elisabeth/ bath Gott/ der sie auch gewähret/ das er jr von jhrem hertzen n#me/ liebe zu jhren kinden/ vnd das sie jr gleich gulten/ als andere menschen.

Doch durch dise stuck/ so ich gesagt hab/ will ich nicht außschliessen/ das ein mensch/ nach vernunfft nicht möge/ von Gott begären oder bitten/ vmb ein kind/ das da ist ein frucht der Ehe/ doch so man das vberkompt/ sol man es recht brauchen/ vnd nicht zu vil liebe vnd sorg darauff legen/ das man vergesse/ des heyls eigener Seelen seligkeit/ vnd ob man solches kind oder anders darumb man bittet/ schon nit gleich von Gott erlangt/ sol man jhm doch kein zyl setzen/ sonder mit gedult harren/ ohn alles murmlen wider Gott/ vnnd also schaffet ein mensch vil nutzes inn allen dingen/ es seye glück oder vnglück.

1)
gerinnen lassen
2)
Das Ganze ist eine Legende aus dem Mittelalter; der benannte Alexander soll Alexander von Foigny sein, seine Schwester wird auch Mathilde genant.
Cookies helfen bei der Bereitstellung von Inhalten. Diese Website verwendet Cookies. Mit der Nutzung der Website erklären Sie sich damit einverstanden, dass Cookies auf Ihrem Computer gespeichert werden. Außerdem bestätigen Sie, dass Sie unsere Datenschutzerklärung gelesen und verstanden haben. Wenn Sie nicht einverstanden sind, verlassen Sie die Website.Weitere Information
autoren/g/geiler/kayersberg-trostspiegel-10.txt · Zuletzt geändert: von 127.0.0.1
Public Domain Falls nicht anders bezeichnet, ist der Inhalt dieses Wikis unter der folgenden Lizenz veröffentlicht: Public Domain