Erb, Matthias - Befragung vor dem Abendmahl

Erb, Matthias - Befragung vor dem Abendmahl

So ettliche knaben sich mitt der kirchen/ in niessung des HERREN NAchtmals vereinbaren wöllen/ die werdent vor dem tisch des HERREN in der gmeind also befraget.

Frag. Was ist eüwer beger?
Antwort. Wir begeren danck zusagen Gott dem himlichen vatter/ vmd den tod vnsers HERREN JEsu Christi/ vnd mitt seinem erwirdigen Nachtmal vns vereynbaren mitt dem leib Christi/ welches ist seine Kirche.

Frag. Was ist das Nachtmal Christi für ein Handel?
Antwort. Es ist ein heyliges vnnd gewissen puntzeichen/ des neüwen punts oder testaments.

Frag. Was ist der neüw pundt?
Antwort. Er ist ein steiffe verhiessung der gnaden Gottes/ vnd verzeihung der sünden/ on allenn vnseren verdienst/ durch den treüwen heylandt Jesum Christum/ vnns als ein freye schenck überkummen vnd eroberet.

Frag. Erlangt man mitt dem nachtmal die verzeihung der sünden?
Antwort. Nein/ sunder mann entpfacht ein heyliges zeichen der verzeihung/ durch den todt Christi beschehen/ vnd gibt man aber dem bedeütenden zeichen/ den namen dessen daß es bedeütet.

Frag. Wer hat daß nachtmal auffgesetzt?
Antwort. Christus Jesus der ewig sun Gottes/ vnd obrister priester.

Frag. Mitt was weiß vnd gestalt haltet man sie?
Antwort. Also haltet man die ware einsatzung Christi, wan man in der gmein Gottes/ nach dem befelch Christi außspendet den einsatz/ der heylsamen vnnd danckbaren gedächtnuß des gecreützigten vnd hingebnen Christi.

Frag. Wie geschieht aber das?
Antwort. So der gleübig isset das brott vnd drinckt den wein der dancksagung eüsserlichen mitt seinem mund/ innwendig aber wirdt er nach dem wort Christi warhafftiglich gespeiset/ mitt dem leib Christi/ vnd getrenckt mit seinem heyligen blut/ also daß Christus in ihm/ vnd er inn Christo bleibe.

Frag. Wie lautend die wort dises handels?
Antwort. Jesus an der nacht da er verrathen ward/ nam er das brott/ vnd als er gedanckt hette/ hatt ers gebrochen vnnd gesagt/ Nemment/ essent/ das ist mein leib/ der für euch hingeben wird/ das thund zu meiner gedächtnuß. Deßgleichen nach dem Abentmal/ nam er das trinckgeschirr/ vnd sagt danck/ vnd gabs den Jüngeren/ sprechende/ Das tranck/ das neüw Testament ist inn meinem blut/ das für vyl vergossen wirdt/ zu vergebung der sünden/ so offt ihr das thund/ so thunds zu meiner gedächtnuß.

Frag. Was nutz vnnd frucht bringt dir das Nachtmal?
Antwort. Denn nutz bringts mir/ daß wir mitt denn jrdischen zeichen erinnert vnd gereitzt werden/ durch Gott den heyligen geist zu glauben/ daß Christus das brott des lebens sey/ der vns ewig mitt seinem leib speyse/ vnnd ewig liebe/ vnnd daß wir auch also mitt brüderlicher liebe alß einn brott zusamen gewürckt/ in einigkeyt vnnd brüderlicher treüw gegen vnserem nechsten leben.

Frag. Begerent jr also gemeinlich nach dem befelch Christi/ mitt einfalt zu glauben/ vnnd mitt besserlichem leben der Kirchen Christi einn vorbild zu sein?
Antwort. Ja/ mitt beistand vnnd hilff des HERREN/ dann durch vnns selbs vermögen wir weniger dann nichts/ darumb wir uns ernstlichen befleissen wöllen/ für alle vnsere gepresten vnnd mangel ihn anzuruffen/ rc.

Darauff bittet der diener des Nachtmals.

Der HERR Gott aller gnaden vnd barmhertzigkeyt/ lasse eüch erwachsen vnd erstarcken inn der erkantnuß vnsers seligmachers Jesu Christi/ durch die krafft des heyligen geists/ auff dz jr im willen Gottes frommlich vnd erbarlich lebend/ nach disem leben/ das ewig besitzen/ Amen.

Cookies helfen bei der Bereitstellung von Inhalten. Diese Website verwendet Cookies. Mit der Nutzung der Website erklären Sie sich damit einverstanden, dass Cookies auf Ihrem Computer gespeichert werden. Außerdem bestätigen Sie, dass Sie unsere Datenschutzerklärung gelesen und verstanden haben. Wenn Sie nicht einverstanden sind, verlassen Sie die Website.Weitere Information
autoren/e/erb/erb_abendmahl.txt · Zuletzt geändert: von 127.0.0.1
Public Domain Falls nicht anders bezeichnet, ist der Inhalt dieses Wikis unter der folgenden Lizenz veröffentlicht: Public Domain