Dieterich, Veit - Summaria christlicher Leer - Vom Fest der heyligen Tryfeltigheyt/ Matth 4.
DA Jesus getauffet war/ steyg er bald herauff auß dem wasser/ Vnd sihe/ da thet sich der himel auff vber jm/ vnnd Johannes sahe den Geyst Gottes/ gleych alß eine Taube herab faren/ vnd vber jn kommen/ vnnd sihe/ eine stimm vom himel herab sprach: Diß ist mein lieber Sune/ an welchem ich wolgefallen (das ist/ alle frewde) habe.
DEN heutigen Sontag nennet man den tag der heyligen Trifeltigkeyt/ auff dz alle Christen lernen/ was sie von Gott glauben/ vnd wie sie Gott recht erkennen sollen. Denn an disem stück fehlet es allen menschen auf erden. Weder Türcken/ Juden noch Heyden wissen was Gott sey/ Allein die Christen wissen es/ das Got der ewige Vatter/ in ewigkeyt einen Sun gezeuget/ vnnd das der heylige Geyst vom Vatter vnnd dem Sune in ewigkeyt außgehe/ Das also Gott heyst/ vnd ist/ Got Vatter/ Gott Sun/ Gott heyliger Geyst. Diser eynige ewige Got/ aber drey vnterschiedne Personen/ haben sich gegen vns menschen also offenbaret/ das Got der Vatter/ durch sein wort vns/ vnnd alle Creatur erschaffen hat/ vnd für vnnd für erhelt. Got der Sun/ ist auß des Vaters willen mensch worden/ vnnd hat vns mit seinem todt von sünden erlediget/ vnnd mit Gott versünet. Gott der heylig Geyst/ kompt durch die predig des Euangelii in vnsere hertzen/ vnnd zündet den glauben in vns an/ vnd heyliget vns/ das wir durch den glauben vergebung der sünden haben/ vnd der sünde widerstehen. Also sihest du/ wie die gantze Gottheyt in gnaden gegen vns sich auffthun/ vnd wir alles zeytliches vnd ewiges allein durch die gnade Gottes haben. Darumb sollen wir solchen gnedigen Gott loben vnd lieben/ vnd gern alles thun/ das wir wissen das er haben will. Da vnser lieber Herr Christus getauffet ist worden/ hat sich Gott auff diese weyse offenbaret. Das Johannes den heyligen Geyst sihet/ vber dem Herren Christo in gestalt einer Tauben. Got Vatter aber im Himel redet mit verstendlicher stimme/ vnnd zeuget: Das ist mein sun/ Derhalben sollen wir an solchem glauben fest halten/ Gott Vatter/ Gott Sun/ Gott heyliger Geyst/ sey der eynige allmechtige ewige Gott/ vnser aller schöpffer/ erlöser vnd seligmacher/ vnd sollen solchen Gott in allen nöten anruffen/ vnd seiner gnad vnd hilff vns trösten.
Gebet
ALmechtiger ewiger Gott/ Gott Vatter/ Gott Sun/ Gott heyliger Geyst/ der du dein gnad vns menschen in dem erzeygt/ vnnd dein barmhertzigkeyt reychlich hast sehen lassen/ das erstlich du ewiger Vater/ vns zu menschen erschaffen/ vnd du ewiger Sun Gottes/ für vns mensch worden/ vnd für vnsere sünde am Creutz bezalet/ vnd du ewiger Geyst/ der du vom Vater vnd Sun in ewigkeyt außgehest/ vns durch das heylige Euangelion glaubig gemacht/ vnd geheyliget hast/ Wir bitten dich/ O eyniger/ ewiger vnd allmechtiger Gott/ Gott Vater\ gott Sun/ gott heyliger geyst erhalte vns in deiner gnad/ biß an das ende/ vnd mache vns ewig selig/ Amen.