Dieterich, Veit - Summaria christlicher Leer - Am Palm Sontag/ vom leyden vnsers Herren Christi/ Esa. 53.
FVRwar er trug vnser kranckheyt/ vnnd lud auff sich vnsere schmertzen/ wir aber hielten jhn für den/ der von Got geplagt vnd geschwechet wwer/ Aber er ist vmb vnser missethat willen verwundet/ vnd vmb vnser sünde willen zuschlagen/ Die straff ligt auff jm/ auff das wir fride hetten/ vnd durch seine wunden sind wir geheylet/ Wir giengen irre/ wie die schaffe/ ein yegklicher sahe auff seinen weg/ Aber der Herr warff all vnser sünde auff jn.
DAs leyden vnsers lieben Herren Christi sollen wir dazu brauchen/ das wir drauß lernen Gott fürchten/ Gott trawen/ vnd Gottes willen gedultig tragen/ Denn weyl die Sünd durch kein Creatur hat können versönet werden/ der Sun Gottes selb/ hat dafür leyden vnd bezalen müssen/ solchs soll vns dahin treyben/ das wir Gott fürchten/ vnd vns für der sünde alß für dem vntreglichstem last/ vnd schedlichstem vnnd ewigem gifft/ mit höchstem fleyß hüten/ Aber die welt/ wil leyder solches nicht glauben/ sie achtet die sünd für gering/ vnd hat noch lust dazu/ das ist ein anzeygung/ das sie vnsers Herren Christi leyden nie recht bedacht hat.
Zum andern/ sollen wir auch lernen Gott trawen/ vnd vns aller genad zu im versehen/ sintemal sein eyniger Sun/ vnser Gott/ für vnsere sünd mit seinem eygnen leyb vnd blut bezalet/ vnd durch solches opffer Gottes zorn gestillet/ vnd vns mit seinem Vatter versönet hat/ Darumb/ wen seine sünde engsten/ der sehe den Sun Gottes am Creutz an/ vnnd bedencke warumb er doch da also ellendigklich hange/ so wirt er finden/ wie der Prophet sagt/ das es vmb vnsert willen geschehen sey/ das vns dadurch würde geholffen/ wie er spricht: Durch seine wunden sind wir heyl worden.
Zum dritten/ sollen wir auch lernen gedultig sein/ vnd Gottes willen tragen/ Denn so der Sun Gottes selb/ vmb vnsert willen das Creutz auff sich genommen hat/ der doch keiner sünde schuldig war/ wie können wir vns des Creutzes beschweren/ die wir durch eygne sünd für vnnd für dazu vrsachgeben/ vnd der sünden halb/ der ruten oder straff sehr wol bedürffen? Wir sollen aber auch im leyden dise hoffnung fest halten/ gleich wie Christus auß dem leyden zu seiner herrligkeyt ist gangen/ also soll vnser leyden auch zur freude werden/ wenn wir nur gedultig sind/ vnnd in festem glauben vmb hilff bitten.
Gebet.
HErr Gott himlischer Vatter/ der du auß väterlicher gnade/ deines eingebornen Sunes nit verschonet/ sonder in den todt vnd an das Creutz hinan geben hast/ Wir bitten dich/ gib deinen heyligen Geyst in vnsere Hertzen/ das wir solcher gnad vns hertzlich trösten/ für sünden ferner vns hüten/ vnnd was du vns zu leyden zuschickest/ gedultig tragen mögen/ auff das wir durch jhn/ mit dir ewigklich leben/ Amen.