Dieterich, Veit - Summaria christlicher Leer - Am Ostertag Rom. iiij.
CHRIstus ist vmb vnser sünde willen hingeben/ vnnd vmb vnser gerechtigkeyt willen aufferwecket.
DAs ist/ durch das leyden vnd sterben/ vnsers lieben Herren Christi/ sind wir von all vnsern sünden ledig vnd loß worden/ Seiner aufferstehung aber geniessen wir dazu/ das wir gerecht werden/ das ist/ das wir inn solcher genad bleyben/ vnd die sünde fort an nicht mehr vber vns herrschen noch vns schaden möge. Denn Christus ist vom todt erstanden/ vnnd sitzt zur gerechten hand Gottes/ das er vns vertrette/ vnnd mit seinem heyligen Geyst/ nit allein den glauben in vns anzünde vnd erhalte/ sonder auch der sünde in vns wehre/ Vnnd vns leyte im willen Gottes vnnd heyligen gehorsam/ biß wir von disem argem/ mühseligem leben abscheyden/ vnnd durch Christum zum ewigen leben aufferwecket/ vnd ewig selig werden/ wie er ist. Solches alles fasset die fröliche aufferstehung vnsers lieben Herren Christi in sich/ vnd wir sollens mit rechtem glauben annemen/ vnd solcher gaben vnd gnaden aller gewiß warten/ Gott dafür teglich dancken/ vnd für sünden vns hüten/ das wir solche genad vnd hoffnung/ nit wider verlieren/ sonder mit Christo der welt absterben/ vnd in Gott vnnd nach seim wort leben.
Gebet.
HERR Gott himelischer Vater/ der du deinen Son vmb vnser sünde willen hingeben/ vnnd vmb vnser gerechtigkeit willen auferwecket hast/ Wir bitten dich/ du wöllest deinen heiligen Geyst vns schencken/ durch jn/ vns regiern vnd fürhin in waren glauben erhalten/ vnd für allen sünden in eim newen reynen leben behüten/ vnnd durch deinen Son Christum JEsum/ vns nach diesem leben aufferwecken zum ewigen leben/ Amen.