Dieterich, Veit - Summaria christlicher Leer - Am dritten Sontag/ nach Trinitatis/ von dem verlornen schefflein/ welchem der Hirt nachgehet/ vnd es suchet/ Luc. 19..
ES wirdt frewde im Himel sein/ vber ein sünder/ der busse thut/ für neun vnnd neuntzig gerechten/ die der busse nit bedürffen.
DAs ist zu gleych ein trost/ vnd ein lehr für alle arme sünder/ die gern vom zorn Gottes wolten ledig sein/ Denn vnser lieber Herre Christus sagt in disem gleichnuß/ eim sünder sey eben/ wie eim Schefflein/ das in die jrre gerathen/ vnd sich von seim hirten verlassen hat/ Er aber wölle die sünder nicht in der jrre lassen/ sonder durch sein wort sie suchen/ vnd wider zu recht bringen/ das ist doch ye ein grosser trost. Denn wir gedencken/ wenn wir vnser sünde gewar werden/ Got sey vns feind/ vnd wölle sich vnser nicht mehr annemen/ so er doch wie ein Hyrt/ dem jrrigen Schefflein nachgehen/ vnd es wider suchen/ vnnd inn sein stellin bringen will.
Dagegen aber sollen die Schefflein auff des Hirten stymm gute acht haben/ vnd jnen nit vergebens lassen nachgehn/ sonder sich zu irem Hirten der sie suchet/ wenden/ das ist/ die sünder sollen buß thun/ vnd wenn Christus sie durch sein Wort suchet/ von sünden abfordert/ straffet vnd vermanet/ sollen sie hören/ vnd in der jrre nit fort lauffen/ sonder von der sünde ablassen/ rew vnd leyd drüber haben/ vnd sich des Herrn Christi vnd seiner gnade trösten/ so wil Christus sie mit frewden annemen/ vnd wie ein hirt jr warten/ das sie nicht allein ihr futter haben/ sonder auch inn ewigkeyt/ wider den wolff den Teuffel sollen beschützet sein/ Amen.
Gebet
HErr Got himlischer Vatter/ wir sind leyder wie die Schaffe in der irre/ vnnd haben vns durch den Sathan/ vnnd vnser sündhafftes fleysch vom rechten wege lassen abfüren/ wir bitten dich aber/ sey gnedig/ vnd vergib alle vnsere sünde/ vmb deines Sones Christi Jesu willen/ vnd erwecke vnsere hertzen durch deinen heyligen Geyst/ das wir an deinem wort fest halten/ vnnd im Schaffstal deyner Christlichen Kirchen/ in rechter Buß vnd warem glauben/ biß ans ende beharren/ vnd selig werden/ Amen.