Dieterich, Veit - Summaria christlicher Leer - Am fünffzehenden Sontag/Matthei am 6.
CHristus spricht: Ir solt nicht sorgen/ vnnd sagen: Was werden wir essen? Was werden wir drincken? Womit werden wir vns kleyden? Nach solchem allem trachten die Heyden/ Denn ewer himlischer Vatter/ weyß das jr das alles bedürffet. Trachte am ersten nach dem Reych Gottes/ vnnd nach seiner gerechtigkeyt/ so wirdt euch solches alles zufallen.
DIß ist ein nötige waarnung das wir Christen/ vnsers beruffs vnd arbeyt trewlich warten/ vnd aller zeitlicher sorg vns entschlagen/ Got aber im himel drumb trawen sollen/ wie er durch seinen segen vns enthalten/ vnd was wir bedürffen/ schaffen werde. Dahin aber sollen wir alle sorg vnnd fleyß wenden/ das wir zu Gottes reich/ das ist/ zu Gottes wort/ vnnd seiner gerechtigkeyt/ das ist/ zu vergebung der sünden kommen. Wenn wir das haben/ so hat es nicht not/ Denn wir haben einen Vater im himel/ der vns seine kindlein nicht wirdt lassen not leyden/ er weyß was wir bedürffen/ will es auch nach notturfft vns widerfaren lassen. Solches ist ein nötige lehr/ aber leyder der weniger teyl folget/ Des sorgens können wir nit lassen/ vnnd wöllen mit dem glauben nit hinan/ Nun hengen aber dise zwey grosse vnglück an der sorg/ das wir erstlich nichts damit außrichten. Denn es ist alles allein an Gottes segen gelegen. Zum andern/ ists auch ein grosse sünd/ die vns vom Gottesdienst gar abzeucht/ vnd macht Mammons knechte auß vns. Darumb lerne yerderman für der sorge sich hüten/ Nemme sich aber mit hertzen vnd ernst vmb Gottes wort an/ vnnd sey in seim beruff/ vnd in der arbeyt fleyssig/ vnd lasse Gott sorgen/ wie wir ernehret werden.
Gebet
HErr Gott himlischer Vatter/ Wir dancken dir für alle deine wolthat/ das du leyb vnd leben geben/ vnd bißher vns gnedigkliich erhalten hast/ Vnd bitten dich/ nimme deinen Segen nicht von vns/ sonder behüte für dem geytz/ auff das wir dir allein dienen/ dich lieben/ vnd dir anhangen/ vnd vns nit mit Abgötterey vnd dem schedlichen Mammonßdienst versünden/ sonder alle hoffnung/ trost vnnd zuuersicht/ allein auff dein güte vnd gnad setzen/ durch Christum deinen Sun/ vnd vnsern Herren/ AMEN.