DER alte Simeon sprach: Herr nun lessest du deinen Diener im fride faren/ wie du gesagt hast/ Denn meine augen haben deinen heyland gesehen/ welchen du breyttet hast für allen völckern. Ein liecht zu erleuchten die Heyden/ vnd zum preyß deinem volck Israel.

DIß ist ein krutze/ aber seer treffentliche predigt von dem Herren Christo/ was sein ambt sey/ vnnd warzu wir sein geniessen sollen. Der alte Simmeon heyst in einen Heyland Gottes/ das ist/ ein hilf/ welche Gott selb vns menschen geordnet hat/ das vns wider die sünde/ den tod/ vnd den Sathan soll geholffen werden. Darumb sollen wir von Got im hymel anders nit gedencken/ noch glauben/ denn das er gnedig vnd barmhertzig sey/ vnd vns/ ob wir gleych arme sünder sind/ hertzlich lieb hab/ sintemal er vns verlornen/ verdambten menschen selb hilff vnnd rettung wider die sünd vnd den todt schaffet. Auff das aber nicht yemandt gedencke/ solche hilff sey allein den Juden vermeyndt/ sagt Simeon/ diser heyland Gottes sey bereytet/ das ist/ geordnet vnd vest gesetzt allen völckern/ den heyden gleych so wol als den Juden/ Die Heyden soll er erleuchten/ das ist/ Gottes wort vnd erkendtnuß vnter sie bringen/ das sie auch selig werden/ vnnd den Juden soll er ein preyß sein/ das sie zu ehren kommen/ vnd die sünde vnd der tod sie nit schenden möge noch vberweltigen. Derhalb soll ferner dise frucht bey vns folgen/ welche wir an dem alten Simeon sehen. Er förchtet sich für dem tod nicht/ sonder sagt/ er wölle mit frölichem hertzen dahyn faren/ wenn Gott jn abfordere. Denn warumb wolten oder solten wir vns für dem tod förchten/ sintemal wir Gottes Heylandt vnnd hilff haben/ die vns in ewigkeyt nicht kan fehlen?

HERr Got hymlischer Vater/ der du dein en Sun vns zum Heylandt bereyttet hast/ das er der Heyden liecht/ vnnd der Juden preyß sol sein/ wir bitten dich/ errleuchte vnsere hertzen/ das wir dein gnad vnd Vätterlichen willen gegen vns in jm erkennen/ vnd hilff vnd schutz/ wider die sünd& verdamnuß vnd den Sathan an jm haben/ vnd durch jn ewig selig werden/ AMEN.