Dieterich, Veit - Summaria christlicher Leer - Das Gleychnuß von den arbeytern im Weinberg/ die vngleich arbeyten/ vnnd doch gleichen lohn empfangen/ Matth. 20.
ALso werden die letzten die ersten/ vnnd die ersten die letzten. Denn vil sindt beruffen/ aber wenig außerwelet.
Vnser lieber Herr Christus vergleichet das himelreich oder die Christliche Kirch einem Weyngarten/ da etliche vil/ etliche wenig stunde jnne arbeyten/ vnd doch gleychen lohn bekommen/ Denn ob wol alle Christen/ im Weinberg/ ein yeder seinem beruff nach/ arbeyten sollen/ vnd keins wegs müssig gehen/ so wil doch Got mit vns nicht nach vnserm verdienst noch arbeyt/ sonder nach seiner gnaden handelen. Aber da finden sich die Juden/ welche das Gesetz/ vnnd einen geordneten Gottesdienst hetten/ die wöllen einen vorteyl vor den Heyden haben/ vnd derdreust sie/ das Gott gnedig ist/ vnd die Heyden halten will wie sie/ Geschicht derhalb/ da sie hetten sonst können die ersten sein/ wo sie trewlich gearbeytet/ vnd an Gottes gnad sich gehalten hetten/ das sie die letzten werden/ vnnd in Gottes tieffe vngnad fallen. Denn Gott will nach gnaden mit vns menschen handelen/ vnnd nicht nach verdienst/ Solches sollen wir zu höchstem danck annemen/ vnd dennoch darumb nicht müssig gehen/ sonder vns in Gottes gehorsam/ vnnd willen nach bestem vermögen vben/ vnd doch allein auff sein genad sehen/ vnd der selben vns trösten.
Gebet.
HErr Got himlischer Vatter/ der du durch dein liebes wort/ vns in dein weingarten beruffen hast/ Wir bitten dich/ gib deinen heyligen Geist in vnser hertz/ das wir in solchem weingarten trewlich arbeyten/ für sunden vnd allem ergernuß vns hüten/ vnd deines worts vnd willens vns fleyssigen/ vnnd alle hoffnung allein auff dein gnad/ so du vns durch deinen Son Christum Jesum reychlich erzeyget hast/ setzen/ vnd also ewig selig werden. AMEN.