Corvinus, Antonius - Am Tage der geburt Christi/ Lection aus der Epistel Pauli zu Tito am 3. Capitel.
ES ist erschienen die freundligkeit vnd leutseligkeit Gottes vnsers Heilandest/ nicht vmb der werck willen der gerechtigkeit/ die wir gethan hatten/ sondern nach seiner barmherzigkeit machte er vns selig/ durch das bad der Widergeburt/ vnd ernewerung des heiligen Geistes/ welchen er ausgossen hat vber vns reichlich/ durch Jhesum Christ vnsern Heiland/ auff das wir durch desselben gnade gerecht vnd erben sein des ewigen lebens/ nach der hoffnung/ Das ist je gewislich war.
Kurtze auslegung der Epistel.
DAS Euangelium dieses tages/ jnn welchem der Euangelist Lucas beschreibt/ wie Christus zu Betlehem geporn/ den Hirten auff dem felde geoffenbaret/ vnd Gott durch die Engel gelobt worden sey/ preiset vberaus seer/ die Göttliche güte/ gnad vnd barmhertzigkeit/ vnd ist billich/ das wir dieselbigen gnad erkennen/ vnd ewiglich dafur dancksagen/ Denn wie Zacharias singt/ Durch solche barmhertzigkeit vnsers Gottes/ hat vns besucht der auffgang aus der höhe/ auff das er erschiene denen/ die da sassen im schatten vnd finsternis des todes/ vnd richtete vnsere füsse auff den weg des friedes. Wie nu solchs thut das heutige heilige Euangelium/ also thut es auch hie jnn dieser Lection gar meisterlich der Apostel/ denn er bekent/ das denen/ so vorhin vnweise/ vngehorsam/ irrig gewesen/ vnd allen wollusten gedienet hatten/ ein ander bekentnis gegeben sey/ nach dem erschienen sey/ die freundligkeit vnd leutseligkeit Gottes vnsers Heilands. Es sind disere wörter/ Erscheinen/ Leuchten/ liecht/ tag/ vnd dergleichen/ seer gemein jnn Göttlicher Schrifft/ vnd werden gemeiniglich verstanden von der offenbarung Christi/ vnd des Euangelii/ wie wir denn auch hie sehen/ das erschienen sey. Was ist erschienen?
Die freundligkeit vnd leutseligkeit Gottes vnsers Heilandes.
Es redet eigentlich der Apostel hie von der gnadreichen zeit des Euangelii/ jnn welcher Gott seine gnad/ erstlich/ durch seinen geliebten Son Jhesum Christum/ darnach durch die Apostel/ aller welt/ so gnediglich angeboten hat. Vnd heisset freundligkeit/ Gottes güte/ gnad vnd barmhertzigkeit. Leutseligkeit aber/ das er den menschen hold sey/ niemands (so fern man gleube) verwerffen wölle/ sondern zu heil vnd seligkeit suche/ vnd allezeit gesucht hab/ wie er denn sagt im Euangelio Matthei 12. Kompt her zu mir alle die jhr beladen seid/ Ich wil euch erquicken. Hörstu/ das wir sollen zu jm komen? Warlich der vns so freundlich zu sich rufft/ vnd seine gnade anbeut/ der wird freilich ein freundlicher leutseliger HERR vnd Heiland sein/ sonderlich dieweil er keiner furgehenden wercke odder verdienste gedenckt/ vnd den schatz der güter/ so gar vmb sonst ausruffet. Wie denn auch thut der Prophet Esaias jnn seiner personen/ Wolan spricht er/ Kommet her zum wasser/ alle die jr dürstig seid/ vnd die jr nicht gelt habt/ kompt her/ keuffet vnd esset/ kompt her vnd keuffet on geld/ vnd vmb sonst/ beide wein vnd milch rc. Es heisset hie der Prophet Gottes Wort/ jnn welchem vns die Göttliche güte/ gnade vnd barmhertzigkeit angeboten wird/ erstlich wasser/ darumb/ das wir dadurch erquickt werden/ wie auch Christus sagt/ Wer von dem wasser trinckt/ das ich geben werden/ den sol nicht dürsten ewiglich. Darnach heisset ers wein/ drumb das es vnsere hertzen frölich vnd freidig macht. Zu letzt heisset ers milch/ drumb das wir dadurch erneeret/ vnd zur volkomenheit erzogen werden. Nu/ solch gnadreich wort/ ist durch Christum der welt gegeben vnd gepredigt worden/ Hatte sie es aber auch verdienet? Awe nein/ sondern/ wie der Apostel sagt.
Nicht vmb der wercke willen der gerechtigkeit/ die wir gethan hatten/ sondern nach seiner barmhertzigkeit machte er vns selig.
Wie kündte Gottes gnade (durch welche wir vergebung der sunde vberkomen) der Apostel höher gepreiset haben? Widerumb/ Wie kündte er vnsern verdiensten vnd wercken/ jnn sachen/ die justification belangen/ grössern abbruch gethan haben? Es sind je helle klare wort/ das die freuntligkeit vnd leutseliigkeit Gottes/ nicht vmb der wercke willen/ die wir gethan hatten/ sondern aus gnad/ erschienen sey. Item/ das er vns nach seiner barmhertzigkeit selig mache. Demnach müssen auch wir mit dem Apostel schliessen/ vnd sagen/ Das jnn sachen/ vergebung der sunde/ die gerechtigkeit vnd seligkeit/ belangen/ kein werck oder verdienst/ wie herrlich vnd köstlich sie auch sein/ sondern nur die güte/ gnad vnd barmhertzigkeit Gottes/ so der glaube ergreiffen mus/ gelten vnd zugelassen werde/ Widerumb/ das jnn sachen/ den gehorsam vnd des glaubens frucht belangen/ die wercke gesehen vnd gespürt werden sollen vnd müssen/ allein das sie jnn die Justification nicht gemengt/ vnd zum Abgott nicht auffgeworffen werden. Vnd was soll ich viel sagen? Wir sehen hie aus den worten des Apostels gnugsam/ das vnser seligkeit allein in Gottes güte/ gnad vnd barmhertzigkeit stehet/ Allein das wir nur lernen/ wie vnd wo durch/ wir derselbigen teilhafftig werden/ NEmlich.
Durch das bad der Widdergepurt/ vnd ernewerung des heiligen Geistes/ welchen er ausgegossen hat vber vns reichlich/ durch Jhesum Christum vnsern Heiland.
Mercke fleissig/ das der Apostel/ die Tauffe/ ein bad der Widdergepurt heisset/ Denn es geschicht solchs freilich nicht vmb des wassers willen/ sondern darumb/ das das wasser in Gottes wort/ befehl vnd ordnung gefasset/ vnd also zum heiligen/ köstlichen vnd herrlichen wasser worden ist. War ists aber/ das wasser/ so fern Gottes wort/ befehl/ vnd ordenung nicht hinzu komen/ ein schlecht vnd leer Element ist/ Doch ists vmb solch wasser gar viel anders gethan/ wenn das befehl vnd wort Christi dazu komen/ denn wir vermeinen. Warumb solt es Paulus sonst nennen ein Bad der Widergepurt? Die Widergeburt kan je on Gottes wort vnd geist nicht geschehen/ wie Christus selber sagt im Euangelio Johannis/ Es sey denn das jemand geporen werde aus dem Wasser vnd Geist/ so kan er nicht jnn das Reich Gottes kommen. Sol nu die Tauffe ein bad der Widergepurt sein/ so mus sie auch mit sich bringen den heiligen Geist vnd vergebung der sunde/ Bringt sie aber den Geist vnd vergebung der Sunde/ so mus sie auch jnn Gottes wort vnd befehl gefasset sein/ sintemal/ Geist vnd glaub/ allein aus dem worte kompt/ zun Röm. am 10.
Ist nu bey der Tauffe Gottes wort/ befehl/ ordnung/ der heilige geist/ vnd vergebung der sunde/ Wer wolte sie denn verachten? wer wolte sie fur ein schlecht wasser halten? Hie müssen wir sie warlich ein bad der Widdergepurt bleiben lassen/ jnn welchem bade vns die gnad/ güte/ barmhertzigkeit Gottes/ der heilige geist/ vnd vergebung der sunde/ mitgeteilet werden/ Denn es sind gar helle klare wort/ das jnn diesem bade der widergeburt/ der heilige Geist vber vns reichlich gegossen sey/ durch Jhesum Christ/ also/ das wir an keiner geistlichen gabe hinfurt mangel/ fsondern/ viel mehr die kindschafft vnd erbschafft mit Christo ewiglich haben sollen/ wie auch weiter der Apostel sagt.
Auff das wir durch dieselbigen gnade gerecht/ vnd erben sein des ewigen lebens/ nach der hoffnung/ das ist gewislich war.
Bis anher/ hat der Apostel mit kurtzen/ aber doch mit lebendigen worten/ angezeigt/ wie/ vnd wo durch vns Gottes gnad/ welche er allen menschen jnn seinem geliebten Son Christo erzeigt/ mitgeteilt werden müsse/ nemlich durchs Wort vnd Tauffe/ so den Geist reichlich mit sich bringen/ vnd mich zur newen Creaturn machen. Nu wil er aber auch weiter (was solche dinge durch den glauben ergreiffen/ mehr schaffen vnd nützen) anzeigen/ Vnd widderholet das wörtlin/ Gnad/ nicht on vrsach/ Denn wie er dieselbigen allenthalben preiset/ als ein principal vrsachen vnser seligkeit/ Also wil er auch hie sagen/ Ob wol das Wort vnd Sacrament/ die mittel sein/ durch welche wir glauben/ geist/ vnnd die Widdergeburt vberkomen/ so müsse man dennoch auch eigentlich wissen/ das vns solche dinge/ nicht vmb der wercke willen/ so wir gethan/ sondern aus lauter gnad gegeben werden/ wie der Apostel auch zu den Römern sagt/ Ists aus gnaden/ so ist verdinst nichts/ Sonst würde gnad nicht gnade sein. Desgleichen/ das solche gnad mit glauben gefasset/ gerecht vnd erben mache des ewigen lebens/ das sonswt kein menschlich werck odder verdienst hette thun können.
Heisset nicht das Gottes gnade/ als ein vrsach vnsers heils/ recht gepreiset/ vnnd vnseren wercken/ den stoltz zu bodem geschlagen? Odder kündte auch der Apostel mit helleren worten gesagt haben (das wir durch gnad/ gerecht/ vnd erben Gottes werden) denn hie geschehen ist? Ich wil geschweigen/ wenn wir solche gnad mit glauben fassen/ das wir als denn des Apostels meinung nach/ die himlischen güter schon jnn der hoffnung zu besitzen angefangen haben. Wie widerumb/ vber die vngleubigen auch die sententz des verdamnis schon gesprochen ist/ wenn sie sich nicht bekeren/ vom vnglauben abstehen/ vnd zu Christo wenden wolten/ Wer nicht gleubt/ spricht Christus/ der ist schon gerichtet. Vnd was sol ich viel wort machen? Wir haben hie ein helle klare lere/ das wir aus gnad/ on zuthun vnserer wercke/ gerecht/ selig/ vnd erben Gottes werden/ von welcher auch der Apostel sagt/ das sie gewislich war sey. Bey derselbigen wollen wir mit der Gottes hülffe bleiben ewiglich/ also das wir vnsere justification allein der gnade Gottes zuschreiben/ vnd doch nichts deste weniger/ als gehorsame kinder thun/ alles was vnser Vater im himel/ von vns gethan haben wil.