Vorrhede Mart. Luther.

Unser Herr Jhesus Christus hat Matth. 18 klerlich gnug verkundigt/ das seine liebe kirche imer müsse/ Rotten und Secten leiden/ da er spricht/ Es müssen ergernisse komen/ Aber doch wehe dem menschen/ durch welchen die ergernsse komen/ So hat auch S. Paul 1. Corin. 11 gesagt/ Es müssen Rotten odder Ketzerey sein/ auff das die bewereten offenbar werden/ Und 2. Pet. 2. Es werden aber unter euch falsche lerer sein/ wie unter jhenen auch falsche propheten waren/ Wie denn solchs von anfang der Christenheit/ auch zur Apostel zeit bis daher/ mit der that vollenkömlich geschehen ist/ Und bis an der welt ende geschehen wird. Denn Christus ist ein König und Herr/ darumb mus er auch streiten und kriegen/ Er streitt aber geistlich mit der warheit/ widder die lugen/ so weret sich die lügen und wil nicht unterligen/ Also geben denn die Rotten an/ und hebt sich solcher lerm und rumor inn der Christenheit.

Der halben sol niemand sich wundern noch entsetzen/ ob er Rottengeister und ketzer unter den Christen sihet auffkomen/ und so greulich poltern wider die warheit/ Bistu ein Christ/ und gleubest Christo und seinen Aposteln/ so mustu ja das auch gleuben und gewarten/ da sie sagen/ Es müssen Rotten und ergernis komen/ Und solch ihr wort fur keine lügen odder lose leichtfertige rede halten/ sondern das sie von redlichen/grossen/ grewlichen sachen reden/ wie Gottes wort zu reden gebürt/ Und must dirs lassen nicht seltzam sein/ wenn sie komen/ sondern dich daran gewenen/ das du könnest sagen/ Wolan/ las hergehen und komen/ was da kompt/ ich habs legest wol gewust/ das Rotten komen musten/ Sind es diese nicht/ so müssens andere sein/ lassen diese ab/ so fahen andere an. Wiltu das liebe Evangelion haben/ so mustu die hellische pforten und teuffel auch haben/ das du das selbige Evangelion/ nicht mit liebe noch friden habest/ wie Christus spricht/ Ich gebe euch meinen friden/ Nicht wie die welt gibt.

Und inn Summa/ der teuffel ist ein poltergeist und rumpelgeist/ poltern und rumpeln kan er nicht lassen/ Bis her unter dem Bapst/ hat er gepoltert in heusern/ inn kirchen/ auff dem felde/ in den welden/ und hat da mit einen seel marckt gestifft/ hat sich fur menschen seelen veil geboten und verkaufft/ da durch die Messe und alle Christliche werck ins fegfeuer/ ja inn die helle geschleifft/ und aller welt güter inn faulfressige beuche gesteckt/ ja inn der klöster und stifft Cloacas und heimliche gemach versenckt/ Nu aber solcher seelen marckt ihm nidder gelegt ist/ richt er ein new gepolter und ein ander gerumpel an/ durch die Rotten geister/ Darumb wie man für den polter geistern inn heysern itzt sich nicht mehr fürcht/ also solten wir uns auch für seinem poltern inn den Rotten nicht mehr entsetzen/ Es mus doch gepoltert und gerumbelt sein/ so lange die wellt stehet.

Aber es mus uns doch alles zu gut komen/ und nicht einerley nutz schaffen. Erstlich/ das wir da durch geubt werden/ das wort Gottes deste vleissiger zu handeln und halten/ und da mit jhe lenger jhe gewisser der wahrheit werden/ Denn wo solche Rotten nicht weren/ da durch uns der teuffel so auffwecket/ würden wir zu faul/ schliefen und schnarchten uns zu tode/ Wurden auch beide glauben und wort bey uns vertunckeln und verrosten/ bis es gar alles verdörbe/ Aber nu sind solche Rotten unser schleiffstein und polirer/ die wetzen und schleiffen unsern glauben und lere/ das sie glat und rein/ wie ein spiegel glentzen/ lernen auch daruber den teuffel und seine gedancken kennen/ und werden rustig und geschickt gegen ihm zu streiten/ Welchs alles nachbliebe/ wo wir ruhe hetten fur den Rotten.

Zum andern/ so wird auch das wort selbs/ da durch deste bas und heller an tag bracht fur der welt/ das viel die warheit/ durch solchen krieg erfaren/ odder jhe drinnen gesterckt werden/ die sonst nicht da zu kemen/ Denn es ist ein schefftig ding umb das wort Gottes/ darumb gibt ihm Gott auch zu schaffen/ henget und hetzet dran/ beide/ teuffel und die wellt/ auff das sein macht und tugent offenbar/ und die lügen zu schanden werde/ Ob nu etliche da durch verfuret werden/ ist auch recht/ und geschicht zur straffe und rache/ uber die Gottlosen/ stoltzen verechter und undanckbarn menschen/ die unser lere verfolgen/ lestern odder verachten/ Denn was frumer einfeltiger hertzen daneben verfuret werden/ da ist hoffnung/ das sie widder zu recht komen mügen/ Die stoltzen aber und kluglinge sollen drinnen verstockt/ und ihrer undanckbarkeit und eigener hoffertigen klugheit/ lohn also inn sich selbst empfahen.

Solchs alles wirstu hie inn diesem feinen buch reichlich finden/ wie Gott unsern glauben durch der Widdertaufer/ faule/ lame zuoten ubet und sterckt/ Widderumb/ auch wie billich er ihren stoltzen dünckel und undanckbarkeit strafft/ das sie verblendet und verstockt/ solch nerrisch ding reden/ und darumb auch nicht gern an das liecht wollen/ sondern ihr gifft im tunckel bergen. Und wie wol all ihr lügen inn diesem buch/ klerlich und gewaltiglich sind uberwunden/ will ich doch auch ein wenig anzeigung thun/ das man greiffen mag/ der teuffel habe sie ausgesand/ und mit eitel lügen umbgeben/ wie wol es alles vorhin inn diesem buch begriffen ist.

Erstlich/ ist das ein gewis zeichen des teuffels/ das sie durch die heusser so schleichen und lauffen im lande umb/ Und nicht offentlich aufftretten/ wie die Apostel gethan/ und teglich alle ordentliche prediger thun/ Sondern sind eitel meuchel prediger/ komen auch inn frembde heuser und ort/ dahin sie niemand beruffen noch von jemand gesand sind/ können auch solchs schleichens und lauffens keinen grund noch wahrzeichen Bringen/ Dis stückt feilet nicht und ist gewis/ das sie vom teuffel komen/ wie Christus sagt Johan. 10. Alle die vor mir komen/ sind diebe und morder/ So habe ich vorhin Psalm 82 vermanet beide/ oberkeit und unterthan/ das man solche schleicher/ meuchellerer und winckelprediger schlecht nicht leiden sol/ Denn da ist kein Gott nicht/ sondern gewis der teuffel selbs/ Es gleisse wie es wolle.

Zum andern ist ihr lere/ nichts anders denn welltliche guter/ zeitliche/ fleischliche/ und irdissche verheissung/die der pobel gern höret/ nemlich das sie wie die Juden und Turcken auff erden/ ein Reich errichten/ darinn alle Gottlosen erschlagen/ und sie allein/ gute tage haben sollen/ Wer möchte das nicht? Das ist doch ja eine offentliche greiffliche lugen/ denn Christus hat den seinen nicht ein weltlich reich/ sondern ein himlisch reich bestellet/un spricht/ Inn der welt werdet ihr angst und not haben/ Item: Mein reich ist nicht von dieser welt/ Und heisst uns diese wellt verleucken und des himel reichs warten/ sonst kemen die vorigen heiligen und merterer/ Christus und alle Apostel ubel dazu/ das sie hetten solchs welltlichen reichs müssen entperen/ Darumb ist dis stück ein gewis zeichen/ das sie der teuffel reite.

Zum dritten/ das sie leren/ Christus werde die Gottlosen durchs schwerd umbbringen/ und werde das schwert solchen bundsbrudern befelhen/ Da sihestu offenberlich/ den mördisschen auffrurisschen/ rachgirigen geist/ dem der odem nach dem schwert stinckt/ Und das noch viel feiner ist/ Sie predigen sich selbs/ sie wollen solche gesellen sein/ das schwert zu furen/ Und das sie doch die lügen also hetten geputzt/ das nicht sie selbs/ sondern andere thun solten/ wie die Propheten von den kunfftigen Christen weissagen/ so hette es doch ein wenig frabe/ Aber diesen gesellen/ sind ihre nachbar nicht wol geraten/ drumb muhsen sie sich selbs predigfen un nicht Christum noch seine werck/ sonder was sie gern thun wolten und ihre mördissche werck/ Wir wissen aber/ das Christus den seinen kein schwert befolhne/ sondern verboten hat/ da er sagt. Ihr aber solt nicht so sein odder thun/ Solch wort hat er nicht widderruffen/ wird sich selbs auch nicht lügen straffen/ Und wird die Gottlosen nicht mit dem schwert/ sondern mit dem odem odder geist seines mundes tödten/ und durch die erscheinung seiner zukunfft/ sie hinrichten/ Darumb ist dis aber mal ein gewis greifflich zeichen/ das der leidige teuffel sey.

Zum vierden/ sihe/ wie fein sie von guten wecken leren / Sprechen/ sie geben ihre gute werck umb einen grosschen/ damit wollen sie unser affen sein/ und uns nachleren/ weil sie gehört haben/ das wir leren/ Gute werck machen nicht frum/ tilgen auch auch die sunde nicht/ versünen auch Gott nicht/ Uber solchs thut hie der teuffel seinen zusatz/ un veracht die guten werck so gar/ das er sie alle umb einen grosschen verkeuffen wil/ Da lobe ich Gott meinen Herrn/ das der teuffel sich selbs inn seiner klugheit so schendlich mus beschmeissen und betoren/ Wir leren also/ das Gott versunen/ frum machen/ sunde tilgen/ sey so hoch gros/ herrlich werck/ das allein Christus Gottes Son thun müsse/ und sey eigentlich/ ein lauter/ blos/ sonderlich/ werck des einigen rechten Gottes und seiner gnade/ dazu unser werck nichts sind noch vermügen/ Aber das darumb gute werck sollten nichts sein/ odder eines srosschen werd sein/ Wer hat das jhe geleret/ odder gehöret/ denn itzt aus dem lügenmaul des teuffels.

Ich wolt meiner predig eine/ meiner lection eine/ meiner schrifft eine/ meiner Vater unser eins/ ja wie kleine werck ich imer gethan odder noch thue/ nicht fur der gantze wellt güter geben/ ja ich acht es theurer/ denn meins leibs leben/ das doch einem iglichen lieber ist und sein sol denn die gantze wellt/ Denn ists ein gut werck/ so hats Gott durch mich und in mir gethan/ Hatts Gott gethan/ und ist Gottes werck/ Was ist die gantze wellt gegen Gott und sein werck? Ob ich nun wol durch solch werck nicht frum werden (denn das mus zuvor geschehen durch Christus blut und gnade on werck) dennoch ists/ Gott zu lob und ehren geschehen/ dem nehesten zu nutz und heil/ Welch er keines man mit der wellt gut bezalen odder vergleichen kan/ Und diese feine Rotten/ nimpt einen grosschen dafur/ Ah wie fein hat sich der teuffel hie verborgen? Wer kündte ihn doch hie nicht greiffen? Widder den glauben leren sie ein welltlich reich/ Widder die gute werck leren sie zeitlich gut und gelt/ und halten sie geringer denn einen grosschen/ Widder das Creutz leren sie schwert und rache/ Ach das müssen mir zarte und ja feine Christen sein/ Darumb ist der billich verdampt/ der solche offenberliche greiffliche lügen und lesterung des teuffels gleubt/ Aber weiter wirstu inn dem buch selbs finden und sehen/ wie Christus/ diesen lügengeist/ angreifft/ Stürtzt und zu scheitert/ Dem sey lob und danck inn ewigkeit/ sampt dem Vater und heiligen geist/ wahrhafftigem Gott und Herrn/ AMEN

Aus dem Original abgeschrieben