DEr versucher trat zum Herren Jesu/ vnd sprach: Bist du Gottes Son/ so sprich/ das dise stein brod werden. Aber er antwortet/ vnd sprach: Es stehet geschriben/ der mensche lebt nicht allein vom brod/ sonder von eim jegklichen wort/ das durch den Mund Gottes gehet.
DIse Histori/ wie Christus vom Teuffel versucht sey/ ist darumb geschriben/ das erstlich wir gewarnet würden/ vnd für sicherheyt vns hüteten/ Denn so der Sathan an dem Son Gottes selb sich hat dürffen versuchen/ wirdt er vnser nicht schonen/ das ist gewiß. Zum andern/ das wir auch lerneten/ wie allein durch Gottes wort/ wir vns wider den Sathan weren vnd auffhalten können. Nun sinds aber dise anfechtung/ damit der Sathan die Christen gemeinigklich plaget. Die erst/ wenn es jnen vbel geht/ treybt er dahin man soll verzweyffelen/ Gott hab vnser vergessen. Aber Christus lehret/ wir sollen Gottes genad nicht nach dem vrtheylen/ wie es vns hie auff erden gehet/ sonder nach seim wort/ vnnd wie er vnns zusaget durch Christum/ Denn allein im wort Gottes stehet das rechte leben/ vnnd sonst in nichte/ es heisse brod/ gelt/ gut/ ehr rc. Die ander anfechtung ist/ wenn der Sathan mit verzwyfflung den glauben nicht kan dempffen/ versucht ers/ ob er vns vermessen könn machen/ das wir mer glauben vnd wagen denn Gott befolhen hat/ Solchs saget der Herr hie/ heysse Gott versuchen/ vnd sey vnrecht. Die dritte/ das er durch gelt/ gut/ ehr/ vnd anders die hertzen vom wort auff Abgötterey abfüret. Aber da sollen wir wissen/ das wir nit dem gelt/ noch der welt/ sonder allein Gott dienen/ vnd ihn allein anbeten sollen. Wer also mit dem wort wider des Sathans anfechtung sich wehret/ der siget/ vnd muß der Sathan ablassen. Ja die lieben Engel werden kommen/ retten/ trösten/ vnd dienen wo nit leyblich/ wie zu Christo/ doch geystlich vnd durchs wort.
HERR Gott himlischer Vater/ wir bitten dich/ weil der arge feind/ für vnd für vns nachschleichet/ vnnd wie ein brüllender Löwe vmbher gehet/ vnd suchet/ ob er vns köndte fressen/ Du wöllest vmb deines Sones Christi Jesu willen/ mit dem heyligen Geyst zu vns setzen/ vnnd durch dein wort vnsere hertzen stercken/ auff das der feinde vns nicht obsiege/ vnnd wir in deiner gnade für vnnd für bleyben/ vnd endlich selig werden/ Amen.