Zwick, Johannes - Bekenntnis der zwölf Artikel des Glaubens

Der nam Gottes werde alle zeit allein geheilget. D. Joannes Zwick.

ALs wenig vyl Göt sein künnen son wenig künnen vil Glauben sein/ Vnd als gwiß nit mer dann ein einiger warer Gott ist im himel vnd auff erden/ so gewiß ist nit mer dann ein eyniger warer Glaub/ im himel vnd vuff erden.

Nun seind aber vil glauben vff erden/ Ist dann nit mer dann ein warer Gott/ vnd also nur ein warer Glaub/ so müssen die anderen allsamen nichts dann vnglauben sein/ Vnnd das seind sie auch/ Darumb ist es nütz vnd gut/ das man eigentlich verstande welchs doch der selb recht einig glaub sei.

Des gleichen/ die weil iederman seinen glauben für den allerbesten haben/ vnd mit dem selben alle seine sachen/ vor Gott außrichten wil/ so ist es abermals von grossen nötten/ den grund des eynigen glaubenns zuuerstehn/ damit niemandts mit seinem wahn betrogen werd/ vnnd meyne er habe/ daran jm noch treffenlich mangelt.

So halten aber wir Christen es darfür/ vnd wissends/ dz vnser glaub der recht war eynig glaub ist/ über alle glauben der gantzen welt.

Darumb so bschemen wir vns des selben nit/ vnnd zeygen den grund vnsers glaubens/ iedermann gern an/ der sollichs begert/ ia ob es gleich wol niemant begert/ so begerens doch wir vonn hertzen (die weil vns Got im hertzen dauon zeugnuß gibt) das iederman wißte/ den einigen waren weg/ zu dem einigen waren Glauben.

Darumb förchten wir vnns auch nit bei dem waren einigen Glauben/ vnd wie wir wol mögen von vnserm Glauben rechenschafft gebenn/ also mögen wir auch wol mit vns/ von allen anderen glauben reden lassen/ vnd haben gar keyn sorg/ das vns iemants werde überwinden (ia so nit gwalt für recht geht) dann alles das da gut/ nottwendig/ vnd gewiß sein mag/ einen handel des glaubens (auch nun eusserlich daruon zu reden) bey zu bringen/ das haben wir vilfaltig/ Vnd ist der Glaub/ in allen creaturen/ vnnd von allen creaturen deß himels vnd der erden/ ia auch durch alle weißheit/ krafft vnd macht/ durch vil liebliche vnnd erschrockenliche wunderzeichen/ vor Gott vnd der gantzen welt bewisen worden/ wie dann in vnserm Testament geschriben steht.

Vnd alle zeugnussen so auch die Juden haben jres glaubens halb/ die haben wir auch. Vnnd die weil wir gewißlich gelaubenn/ das Christus (durch den wir vns zu Gott alles guts versehen) der seie/ der durch alle geschrifft des alten Testaments/ durch alle History bücher der Juden/ vnd durch alle jre Propheten/ seie von Gott verheyssen worden.

Der Türcken vnnd der Heyden glauben/ fürchten wir vil minder/ die weil der selbig nichts anders ist/ dann ein zusamen gelesenn ding/ auß beyden glauben/ der Juden vnd Christen/ vnnd auß allem anderm/ das jren falschen predigern hat mögen anmütig sein/ on allen befelch Gots/ ia wider den befelch Gottes/ vnd allein nach jrem gut duncken/ vnd hübschen ansehen/ welches dann die eygenschafft ist alles falschen glaubens.

Es soll vns aber billich erbarmen/ dz auch aller falscher glaub/ warer glaub zu got sein sol/ vnd man durch allen vnglauben außrichten wil/ das doch allein durch einn einigen glaubenn soll vnd muß außgericht werden/ Dann es wil ie niemants gescholten sein/ in den Teuffel zu glauben/ vnd des Teuffels sein wollen. Wann aber dz hertz aller menschen also warlich zu Got stünde/ vnd Gott das end were aller hertzen auff erden/ wie möcht mann der sach so bald eins werden.

Ein ieder würd seinen glauben gern anzeygen/ dann sein meynung were/ in Got glauben.

Ein ieder würd von des anderen glauben auch mögen hören/ dann eins andernn meynung wer auch/ in Got Glauben.

Niemand würd den andern vmb des glaubens willen veruolgen/ dann er wurd gedencken/ Lieber/ des andern meynung ist gleich so wol in gott zu glauben/ als die meine.

Wann nun die gantz welt zusamen keme/ vnd hette gleich vil glauben/ vnd were doch nit mehr dann eine meynung aller glauben/ Namlich in Got zu glauben vnd selig zu werden/ so möchte dann zu mal ein iedes volck/ zeugknussen seines glaubes darthun/ Welcher glaub dann die besseren zeugnussen hette/ den selben solt man dann billich annemmen/ vnnd die anderen frey willig farenlassen.

Hette dann einer zeugnüssen von der erden/ der ander vom himel/ Einer von den menschen/ der ander von Got/ Einer hette vil guts ansehens/ vil loblicher bräuch und der gleichen/ der ander hette aber die warheit/ Einer hette alt brieff/ der ander noch älter/ Einer etwas vngewisses/ argwönigs/ der ander etwas nur gar gwissen/ Einer hette nit mer dann seine eygne meynung/ der ander ein befelch Gottes/ Welches solte dem anderen weichen?

O lieber Gott/ wann iederman in seiner meynung vnd hertzen/ Gott allein suchte/ wie möchte so vil einigkeit vnd seligkeit darauß komen. Aber das aug/ das auff Gott sehen solt/ vnd das hertz in dem Gott wonen solt/ ist nit in der welt.

Die weil dann iederman nun sich selbs sucht/ vnd daher seiner angenommenen oder angebornen weiß/ so hart anhanget/ so geht es zu/ wie wir wol sehen.

Einer der wil seinen glauben nit lassen an tag kommen, der ander mag vonn keinem anderen hören sagen/ der dritt flucht vnnd lesteret darzu/ der vierdt zwingt vnd tringt iederman zu glauben was er glaubt/ vnd wo nit/ so gilt es haut vnd har/ leib vnd gut.

Gleich aber wie ietz gesagt ist/ vom glaubenn zu Gott/ also mag auch gesagt werden/ von so vil wunderbarlichen/ seltzamen stucken vnd wercken/ mitt denen die welt Gott dienen wil/ es seie jm lieb oder leyd/ Das dannocht nit mer dann ein Gott ist/ vnnd also auch nit mer dann ein grund des gotßdienst. Des man dann auch wol möcht eins werden/ ia wann die welt nit mer sich selbs/ dann Gott/ vnd jr eygen wolgefallen mer/ dann allen offentlichen willen Gottes suchte.

Die weil aber der welt nit recht ernst ist/ was sie gleich vil von Gott singt vnd sagt/ darumb ist auch so vil widerwertikeyt allenthalb in der Welt.

Noch so ist es vnd bleibt war/ das nit mer dann ein Gott/ vnd nit mer dann ein glaub/ der jm gefalle/ vnd den er haben wölle/ das ist der Christenlich glaub/ der sölche zeugnüssen hat/ als keyn glaub auff dem gantzen erdboden. Daher wir gewiß seind/ das vns durh jn zukommen ist/ vnnd noch zukompt/ das reich Gottes/ hie in zeit/ vnd nach diser zeit ewigklich.

Spricht iemandts/ Soll dann diser Christenlich gelaub der beste glaub seinn/ so thund jm doch jr Christenn nit vast geleich.

Das erbarm Gott/ das mann sollichs mit warheit soll sagenn kündenn. Weß ist aber die schuld? Des glaubens? Neyn gar nit/ Sonder deren die sich des glaubens rhümend/ vnnd sich für Christen dargeben/ vnd doch nichts minders seind/ dann Christen.

Sölt es aber alles rechter glaube sein/ das ein glaub genent würdt? Solt alles rechter gottes dienst sein/ das den namen hat? Solt es alles rechte liebe sein vor Gott/ das die menschen für liebe haben? Solt es alles gute müntz seyn/ die übersilberet ist? Solt es alles gold sein/ das glitzet? Solt es alles einn schaff sein/ das woll tregt?

Darumb vonn Christen zu reden/ seind es nit all warhafft Christen/ die Christen genent werden/ vnd ist nit alles rechter Christenlicher glaub/ das den namen hat.

Ein rechter warer Christ ist nichts anders/ dann ein mensch/ der Gott als für seinen gnädigen Gott vnd Vatter/ vnd Jesum Christum/ seinen eynigenn aller liebsten Sun/ erkendt in seinem hertzen/ Vnnd daher anfahet Gott von hertzenn lieb haben/ vnd thun was jm lieb ist/ Von hertzen fürchten/ vnd lassen was im leyd ist/ sich demselben allein vertrawen/ mit leib vnd seel/ durch tod vnd leben.

Der alle menschen/ vmb Gottes willen lieb hat/ auch die/ so jm spinnen feind sind.

Der dem armen vil guttes thut/ vnd sich sein nit beschempt.

Der den krancken heimsucht/ den nackenden kleydt/ den gefangnen tröst.

Der iedermann thut/ wie er begeret das mann jm thue/ Willig tregt/ was jm Gott zuschickt/ NAch allem vermögen hie in zeit frumm vnnd vnergerlich/ auffrecht vnnd redlich wandlet/ mit worten vnd wercken/ vor Gott vnd der gantzen welt/ Vnd der also das reich Gottes hie anfahet nach dem willen Gottes/ in guter hoffnung vnd gwisser zuuersicht/ er werde das reich Gotes/ dz er hie von hertzen gesucht hat/ auß gnaden vnnd barmhertzigkeyt des almechtigenn/ nach diser zeit erst recht finden.

Das ist ein Christ/ eins Christen glaubens/ eins Christen gotßdienst/ eins Christen leben/ eins Christen sterben/ vnd sunst nichts überal. Vnnd daher soll auch einn Christ genent werden/ vnnd sonst niergen her.

Wer nun ein sollicher/ der ist ein Christ/ wann mann schon sagte/ er wer ein Türck/ ein Jud/ ein Heyd/ oder ein Samaritan/ vnd het gar einen teuffel bei jm. Wer nit einn sollicher/ der ist keynn Christ/ wann er schon alle die heyligen namen het/ die ie wurden.

Wer ein sollicher/ der ist ein Christ/ wann er schon ain Crautz oder baum hangete/ Wer nit ein sollicher/ der ist kein Christ/ wann er schon in allen ehren were.

Wer ein sollicher/ der ist ein Christ/ auch mitten in der Türckey. Wer nit ein sollicher/ der ist keyn Christ/ auch mitten in der Christenheyt.

Es seind aber Christenn/ die glauben was jre älteren glaubt haben/ Weren die selben Heyden gewesen/ so weren sie auch Heyden/ vnd würden vmb des selben glaubens willen gleich thun/ was sie vmb des willenn thund/ Darumb seind sie auch/ des glaubenns halb/ einen weg kinder Gottes wie den andern.

Es sein taufft Christen/ vmb des willen/ das sie Christen sein solten/ Aber vmb des willen das sie es nitt seind/ machet sie der Tauff/ auch andere Sacrament/ nit anderst zu Christenn/ dann eins herren farb/ den knecht treuw machet.

Es seind Christen/ die künden den glaubenn wol mit worten/ wie er in zwölf artickel kürtzlich verfasset ist/ Der selb glaub/ vnd die Christenn/ seind gemeyn in der Christenheyt/ seind sie aber darumb recht Christen? so möchte ein atzel in der keffich auch schier ein Christen sein.

Es seind Christen/ die verstehn den glauben/ auch nach seinen gründen vnnd vrsachen/ deren seind lang zeit nit vil gewesen/ dann man hat den rechten glauben vast auff ander leut gespilet/ die jn gleich so balsselbs nit gehebt haben.

Zu der ietzigen zeit/ ist der selb glaub treffenlich gmeyn worden/ also/ das iederman vil hoher ding/ vom Christenlichen glauben singen vnd sagen kan/ Noch seind es darumb nit Christenn/ sunder gschrifft gelert leut.

Es seind Christen, die erzeygenn sich mitt vil dingen/ die jnen anmutig seind/ vnnd nit so gar vnleidenlich/ von denen auch nichts geschribenn steht in vnserm Testament/ Aber hinwider/ das darin geschriben steht/ als das creutz vff sich nemen/ Der welt müssig gehn/ In aller liebe wandlen/ da rürenn sie es nitt mitt einem finger an/ Gott dem herren vnnd JEsu Christo hertzlich zu dienen/ nach seinem befelch vnd wolgefallen.

Darnach seind Christen/ vnnd deren nun vil/ die haben einen seltzamen glauben/ die liegen vnd triegen/ die schenden vnd lesteren/ sie stelen vnd wucheren/ sie schinden vnnd schabenn/ sie seind geizig vnd faul müssiggenger/ sie huren vnd eebrechen/ sie fressen vnnd sauffen/ es kan jnen mit nachred/ verachtung/ vnd vil anderen schandtlichen stucken/ niemants zukommen/ sie seind neidig vnd hessig/ sie rauben/ mörden/ kriegen vnnd vergiessen vil vnschuldigs blut/ vnd ist jnen keyn gut geschrey im land/ es sie dann ein lärmen/ der ist jr pflug vnd narung.

Was das für Christenn seind/ das wissen sie nit/ aber Gott weyß es wol/ vnn sie werdens auch noch wol innen werden.

Solten aber die alle recht/ warhaffte Christen/ vnd dannocht den rechten warhafften Christen so vngleich sein? das wöl Gott nit. Ja wann Christen auff beumen wachsen/ vnd der Christenlich gelaub ein menschlicher fund vnnd narrenwerck were.

So macht nun weder geburt noch tauff/ weder wort noch kunst weder nam noch titel/ weder angenomne weiß des menschlich gotßdienst/ vil minder mutwillige weiß des schantlichen lebens/ einen Christen. Was dan? Ein dapffers/ redlichs/ glaubigs hertz zu Gott haben/ Das macht einen Christen.

Do Christus vonn der widergeburt redet/ Spricht er nit/ Wer vonn der widergeburt vil weyß zu sagenn/ oder wer sich vil darauff versteht/ sonder/ Es sie dann/ das iemants wider geborenn werd/ so mag er nit in das Reich Gottes kommen. Vnd do er vom willen Gotes redt/ spricht er nit/ wer dauon sagen kan mit worten/ vnd sprechen/ Herr herr/ oder sich fein darauff versteht/ sonder/ der den willen Gottes thut/ der werde in das reich der Himel kommen.

Mann findt einen/ der ist von vatter vnd mutter ein Kauffman/ er hat eins Kauffmans zeychen/ er hat den namen eines Kauffmans/ er kan auch wol dauon reden/ er versteht sich auch darauff/ Solt er darumb auch ein Kauffman sein?

Die erzelten stuck machen keynen Kauffmann/ sie dienen wol darzu/ Aber treuw vnnd glauben haben und halten/ das macht einen glaubwürdigen kauffman. Also ist es vom Christglaubigen auch zu reden. Den glauben künden sprechen/ schreiben vnd lesen/ wol verstehn/ außlegen/ vnd der geleichen stuck/ dienen wol dem Christen/ sie machen aber darumb keinen Christenn/ Aber den glauben im hertzen haben/ das macht einen Christen.

Wol an/ so sehe ein ieder zum ersten auff sich selb/ wie seine sach stehe/ des glaubens halb/ Eins theyls/ welchs der recht einig warhafftig glaub sei zu Gott. Anders theyls/ ob er dann den selben rechten glauben habe oder nit.

Zu der ietzigen zeit ist vil spans des glaubens aber mer des halb/ wölches der recht gelaub sei eusserlich/ dann wer den rechten Glauben habe innerlich/ Vnnd zancken zwen/ vmb den rechten glauben/ vnd hat jn villeicht jren keiner/ weder im hertzen noch leben.

Vnd wie wol es die grösser gnad Gottes ist/ den glauben haben/ Noch so ist es auch ein gnad/ wissen/ welches doch der recht glaub seie/ damit man lerne Gott darumb bitten/ vnd jn auch also überkommen/ von dem/ der jn alleyn geben kan.

Dar zu dienet nun diß büchlin/ nit das durch sollichs der glaub geben werd/ sunder dz da durch anzeygt würt/ welches der recht glaub seie.

Vnd wie ich vom glauben sag/ von dem hierinn geschriben/ also sag ich auch vom betten/ das hin vnd her darinn steht. Dann ob gleich wol iemand das Büchlin all tag vil mal lesen/ vnd gar außen sprechenn würd/ der würd darumb nit gebettet noch geglaubt haben.

Er mag aber da bey abnemen/ wie wir so vil vursachen hetten von gantzem hertzen zu Gott im himel zuschreien. Thuts iemants auß rechtem anligen des hertzens/ so betet er recht vnd wol/ On das hertz aber/ kan der mensch weder glaubenn noch betten.

Vnd ob dann gleich wol deren büchlin mer dann eins ann tag kommen ist/ so ists doch eben vmb die menschen/ wie vmb kranck leut/ denen stelt man vilerley für/ lusts dann eins nit/ so glusts das ander.

Darzu so hat ein ietlicher seinen befelch vonn Gott/ wann in der selb im hertzen anreytzt/ etwas zuthun/ das zu Gottes lob vnd der liebe des nechsten dienen mag/ so sol ers nit vnderlassen. Gott wolte das iederman dem befelch Gotes treulich nachkeme/ Vil iner/ das niemand etwas handlete/ on den befelch Gottes/ Vnd am aller meysten/ das niemand wider den befelch Gottes handlete/ Wie würd es so wol stehn/ in zeitlichem vnnd geystlichem Regiment.

Also hab ich in disem schreibenn auch gesehen eins theyls auff etliche guthertzige vnd einfeltige Menschen die allweg sagen/ Ach Got/ es ist so ein widerwertigs ding vff erden/ Es weiß doch eins nit/ was es thun oder glauben soll/ das jm recht thut/ Den selben sol in disem schreiben gnug gschehen/ sie lassen sich nun nit weiter eyn eyniges ding anfechten/ Ich sag aber das den einfeltigen/ dann glert leut haben vil gelerters.

Anders theyls/ hab ich vff die iugent gesehen damit sie hierinn ein warhafftige übung habe/ des Christenlichen glaubens/ Ja so villeicht iemants so geflissen vnnd arbeytsam sein würd/ die kind zu solcher übung zuziehen.

Ha auch dabei sonderlich/ vnd nit on vrsach/ an mein hertz liebs volck zu Rüdlingen gedacht/ welchem ich von gantzem hertzen vil gutes günne vnd nit mer begeren/ dann das das selb/ von dem einigen Euangelio Jesu Christi/ nach dem einigen willen des allmechtigen Gott vnd vatters/ auß der krafft des heyligenn Geyst Gottes/ treulich vnd mit warheit gelert würde.

Der Allmechtig/ güttig vnnd trew Gott im himel/ wöll alle guthertzige vnd Christglaubige menschen/ daselbs vnnd allenthalb/ da ich seinen willen verkündt hab/ in dem einigen waren glauben/ alzeit mit seiner gnad erhalten/ vnd sie durch seinen heiligen geist erinnerenn/ deren ding/ die ich sie von Jesu Christo gelert hab.

Dem iungen volck daselb/ günn ich auch alles gust von hertzen/ vnd bit Got für sie vnd alle iunge leut/ dz er sie mit seinen heiligen geyst vfferziehen wöll/ vnd sie bhüten vnd bschirmmen/ vor so vil ergerlichen exempel diser welt/ dz sie sich jr leben lang der welt vnd aller bösen stuck entschlahen/ vnd gedencken dz nichts lustigers in der gantzen weiten welt/ dann schön iung leut/ ia die Gott von hertzen lieb/ vnd sein gbot tag vnd nacht vor augen haben. Darzu solte auch alle welt mit gantzem fleiß vnd ernst/ helffen vnd radten/ ob villeicht in vnseren nachkommen erstattetwürde/ dz in der ietzigen welt versaumpt ist. Woher kompt aber alles dz vor Got in der welt versaumpt wirt? Daher/ dz die welt nit recht vff Gott sihet/ dz sie Gott im himel weder förcht noch lieb hat/ vnnd will dannocht deß ongescholten/ vnd des glaubens halb alzeit vornen daran sein/ Das sie aber den willen Gotes thun wölle das ist jr noch nie in das hertz kommen/ so doch keyner in das reich Gottes gehört der nit also in Gott glaubt/ das er thun wölle seinen willen/ vnd nach allem vermögen/ vnder dem creutz/ vnd in der liebe Christi wandlen/ wie Jesus Christus gewandlet hat.

Der Allmechtig Gott erlöß vns von der wüsten schandtlichen/ abgöttischen vnnd ergerlichen welt/ vnd gebe das wir trachten nach dem auffrechten redlichen vnd gotseligen reich Jesu Christi/ wie er es hie gfürt hat/ das wirs auch also füren/ vnd wie er es nach diser zeit/ auß eygnem gewalt/ grechtigkeyt/ vnd vnschuld hat eingenommen/ Das wir arme menschen/ das selbig durch seinen verdienst/ vnnd auß der barmhertzigkeyt Gottes/ auch also einnemmen/ immer vnnd ewigklich/ AMEN.

Mein liebs Kind/ Dweil mann ietz vil sagt/ von einem alten vnnd neuwen Christlichen Glauben/ vnd iederman seins Glaubens Rechnung geben soll/ So sage mir doch auch an/ was dein Glaub sei zu Got/ durch den du vermeynest vnd hoffest selig zu werden?

Antwort.

• Ich glaube in Gott den Vatter allmechtigen/ Schöpffer Himels vnd der erden.
• Vnd in JEsum Christum seinen einigen Sun/ vnsern HEREN.
• Der empfangen ist vom heiligen Geyst/ Geboren auß der Jungfrawen Maria.
• Der gelitten hat vnnder Pontio Pilato/ Gecreutziget/ gestorben/ vnd begraben.
• Nidergefaren zur Hellenn. Am dritten Tage aufferstanden von den todten.
• Vffgefaren zu Himel/ Sitzend zur gerechten Gottes des allmechtigen Vatters.
• Von dannen er kommen würdt zu richten die lebendigen vnd die todten.
• Ich glaub in den heiligen Geyst.
• Ein Heilige Christliche Kirch/ die Gemeyne der Heiligen.
• Vergebung der Sünden.
• Vfferstehung des fleyschs.
• Vnd ein ewigs leben. Amen.

Das vns Got geben wölle durch disen heyligen Christenlichen Glauben, Amen.

Warumb glaubstu in jn?

Darumb glaub ich in jn/ dann es hat jn sunst nimands ie gsehen.

Was bewegt dich dann/ das du in Gott glaubest?

Er selb bewegt mich/ innerlich mit seiner genad/ vnd vsserlich mit seinem heiligen wort/ vnd allerlei wunderbarlichen wercken.

Was glaubstu nun von Got?

Ich glaub/ wie er von meinet willen/ hat künnen Himmel vnd erden erschaffen/ vnnd mir auch hie in zeit leib vnd leben geben/ mit allem das ich bin vnd hab/ Also kan vnd mag er mir auch nach diser zeit geben das ewig leben/ mit allem das er ist vnd hat. Vnd also glaube ich in Gott den allmechtigen.

Ich glaub auch/ das er mein vnd aller glaubigen vatter sei/ vnnd wie er alles vermag/ das er auch alles an mir beweisen wölle/ das einem trüwen vnd lieben vatter müglich ist an seinem kinde zubeweisenn. Vnnd also glaub ich in Gott den Vatter.

Sag mir das noch einest mit kurtzen worten.

Gottes allmetigkeit kan vnd mag alle ding vns zu gut. Seien vätterliche liebe vnd trew wil alle ding auch vns zu gut.

Was glaubstu weitter?

Ich glaub in Jesum Christum/ seinen einigen Sun/ vnsern HERREN.

Was heyst Jesus?

Jesus heißt ein behalter oder seligmacher/ vnd also behallt vns Jesus/ vnd mache vns selig vor Gott/ von allen vnsern sünden.

Was heyßt Christus?

Christus heyßt ein gesalbter/ Dann also wurden im Alten Testament die Künig und Hohen Priester vonn Gott gesalbet/ das ist/ ausserwelt. Also heyßt diser Jesus auch Christus/ das er von Gott gesalbet vnd ausserwelt worden ist/ zu dem allerhöhsten Künigreich vnd Priesterthumb des ewigen lebens im Himel.
Vnd dannen her heyssend wir auch Christen/ als außerlesene menschen vonn Gotte/ zu einem glaubigen/ lieblichen vnnd gedultigen leben hie/ vnd nach diser zeit/ zur besitzung aller güter die Gott imm Himel hat.
Vnd O almechtiger Got/ gib gnade/ das wir solche ausserwelte Christen seiend. Amen.

Varumb sagst Seinen einigen Sun?

Da sind alle menschen vnehliche vnd verlame Kinder an Gott worden.

Wie geht das zu?

Adam und Eua/ vnsere ersten vatter vnd mutter/ waren am anfang auch einige Kinder vnnd erstgeborne menschen von Gott/ vnnd hat Gott vil liebe vnd genad an sie gelegt/ Aber sie haben diß auß dem geschlecht geschlagen/ vnd sich des stammens vnd namens/ das ist/ der wort vnd werck der liebe vnnd gnaden Gottes verleugnet/ mit allen jren nachkommenen.
Das hat aber Christus nie gethon/ sonder hat allein vnd einig allzeit nach Gottes willen gelebet/ vnd Got seinen vatter geliebt/ auß ganzem hertzen/ seel/ leib/ vnd allen krefften/ vnd hat Got allein an dem einigen sun recht lob vnnd eer erlebt.
Darumb/ do Joannes Christum taufft/ redet Gott von Himel/ vnd sagt. Diser ist mein geliebter sun/ in dem ich ein wolgefallen hab.
Vnd also glaub ich in Jesum Christum den einigen Sun Gottes.

Wie ist Christus/ vnser HERR?

Vmb der sünde willen haben die ersten menschen/ alle gütter Gottes im Himel und auff erden verloren/ Vnd ist der Todt/ die Hell/ vnnd der Teuffel/ jrer vnd aller sündtlichen menschen eygner Herr vnd meyster worden.
Vmb der vnschuld aber willen/ hat Christus alle gütter Gottes im Himel vnd vff erden/ widerumb gewunnen/ Vnd ist des Todts/ der Helle/ vnd des Teuffels gwaltiger Herr vnd meyster wordenn.
Vnd also glaube ich in JEsum Christum vnsern HERREN.
Der almechtig Gott geb vns allen gnad/ das wir nit knechte seiend der sünde/ sonder das wir Christum Jesum/ vnsern treuwen vnd lieben Herren/ in rechter trew vnd liebe erkennen/ Vnd das wir nit zu jm mit dem munde sagen/ HErr/ heerr/ vnd vns aber im hertzen vnd leben nit ernst sei.

Warumb sagstu/ Ich glaub in JEsum Christum/ der empfangen ist von dem heiligen Geyst?

Ich vnd alle menschen sind ovn dem vnheiligen fleysch vnd blut empfangen/ vnd haben daher vil Sünd vnd ellend an leib vnd seel ererbt/ sunderlich das wir vor Got/ als vnreyne Creaturen/ ewiglich haben sollen verdampt sein.

Christus aber ist vonn dem heiligen Geyst/ on alle sünd/ durch ein lautter wunderwergk Gottes empfangen/ damit durch sein heilige/ reyne/ vnd himelische empfengnus/ vnser vnheiliges/ vnreyns/ vnd irdisch fleysch widerumb geheiligt/ gereyniget/ vnd ewiglich gesegnet würde. Vnd also glaub ich in JEsum Christum/ der empfangen ist von dem heiligen Geyst.

Warumb hat Christus also von einer Jungfrawen müssen geboren werden?

Da werden wir menschen alle von vnkeuschen weibern/ in dise vngotsförchtige vnnd vntrew Welt geboren. Chrristus aber/ wie er nit als andere menschen hat müssen empfangen werden/ also hat er auch anderst müssen in dise wellt geboren werden/ namlich/ von einer keuschen vnd reynen Jungfrawen Maria. Damit wir auch also durch jn widerumb inn ein Gotsförchtig leben geboren würden.

Vnd also glaub ich in Jesum Christum/ der geboren ist von der Jungfrawen Maria.

Warumb sagst/ Ich glaubs?

Da kan ichs sunst nicht wissen noch verstehn/ Vnd die Jungfraw Maria sagt selbst zum Engel/ wie das zugehn würd/ das sie on einen man/ ein Jungfrawe/ Christum empfahen vnnd geberen solte. Do antwortet jr der Engel vnd sagt/ Der heylig Geyst würdt von oben herab kommen in dich/ vnnd die krafftt des höchstenn würdt dich überschatten. Vnd darumb so glaub ich/ das solichs geschehen/ vnd ein werck des Geysts vnnd der krafft Gottes gewesen sei.

Der barmhertzig Gott geb vnns auch seinen heiligen Geyst/ vnd theyle mitt vns sein götliche krafft/ das wir als neuwe vnd wunderbarliche menschen/ auch widerumb geboren werden zu allem daran Got der HERR ein wolgefallen hat.

Das gib vns barmhertziger Got/ in dem namen vnsers HERREN Jesu Christi. Amen.

Warumb hat Christus vnder dem gelitten/ Vnd wer ist der Pontius Pilatus gewesen?

Es hat Gott im Alten Testament den Juden vorgsagt/ sie würden in jrem Land/ die Oberkeit nit verlieren/ biß der Welt heyland/ das ist Christus/ geboren würde/ Das war nun zu der zeitt Christi schon gschehen/ vnd hatt der Keyser seine Landtuögt allenthalb inn der Juden Land/ hin vnd her verordnet. Also regiert auch diser Pontius Pilatus/ ein Heyd vonn Rhom/ die Landtschafft Judeam in des Keisers namen/ das war den Juden ein vnerhörts.

Darumb überantwortteten sie Christum dem Pilato/ vnder welichem er gelitten hat/ den Judenn zu einner zeugknus/ das sie jre Oberkeytt dazumal biß auff den heuttigenn Tag verlorenn haben/ vnnd dannocht nit glaubenn/ das der welt Heyland noch geborn sei/ wie jnen das Gott hat vorgesagt. Vnd vns armen Christen zu einem gewissen trost/ das/ so war die Juden ire zeitlich Oberkeit ietz so lange zeit verlorn haben/ so warlich haben all gleubige menschen/ den warhafften Heyland der Welt funden/ Christum Jesum/ der gelitten hat vnder Pontio Pilato.

Was oder wie hat Christus gelitten/ vnd wie ist er creutzigt worden vnd gestorben?

Sein eygner Jünger/ mit namen Judas/ hat in den Juden vmb drei silberling verraten vnnd verkaufft.

Am abend/ als er im Geyst wißt/ das die zeitt seins sterbens kommen war/ schitzte er blutigen schweyß/ vor angst des schweren tods/ der über jn gehn solte.

Vnd als er bettet/ kam Judas mit den Juden vnd wolten jn angreiffen/ do fielen sie all mit einander an reguken/ als ob jnen onmachtig were/ Do sie aber die krafft Gottes nit erkandten/ ließ jnen Gott nach zuhanndlen/ wie sie wolten/ vnd lust darzu hatten.

Die hohen Priester vnd Schrifftgelerten der Juden/ haben jnen/ als einen Gottslessterer vnd Vffrhürer/ vor der Heydnischen Oberkeyt verklagt. Da werd er krönet mit dornen. Er ward nackend außgezogen vnnd geyßlet. Man legte jm ein spöttlich kleyd an. Etlich verspeieten jn.

Ettliche schlugen jn ann hals. Alles volck schrey über jn/ Creutzige jn.

Die Juden hatten ein freiheyt/ das man jnen vff das Osterlich fest/ einen gefangnen ledig ließ/ Do wolt jnen Pilatus Christum geben/ Aber sie wolten sein nit/ sunder baten für einen Todtschleger/ mit namen Barrabas/ der ward ledig/ vnnd Christus/ der niemand ie getödt hat/ müste sterben. Er müste das creutz/ daran er hangen solt/ selbst auff dem rugken hinuß tragen/ an die Schedelstat/ da man die übelthäter abthet. Da schlügen sie jn an das Creutz/ vnd hiengen jn vff/ mitten zwischen zwen mörder/ als einen hauptmörder. Do jn durstet/ trenckten sie jn mitt gallen vnnd essig. Sie schrien jm zu mit schmählichen worten/ Bistu Gottes Sun/ so steig vom Creutz herab. ein bistu/ der den Tempel zerbrichet/ vnd in dreien tagen wider vffbawet? Sihe er hat andern können helffen/ aber jm selbs kan er nit helffen/ Trawet er vff Got? so komm er jm zu hülff.

Nach dem vnd der gleichen vil leiden/ schrey er mitt heller stimm/ Vatter in deine hennd befilh ich meinen geyst/ neygt also sein haupt/ vnnd starb.

Das hat Christus eusserlich gelitten/ vnd in seinem leben alle menschen geliebt/ vnnd doch von allen/ vnd vmb aller menschen willen vil gelitten.

Warumb vnd von wes wegen hat Christus also gelitten?

Seinethalb hat er on alle vrsach also gelitten/ dann er ist vnschuldig gewesen durch all sein leben/ inder aller minsten verachtunge/ vnrecht thun/ gschwigen/ das sie das gerecht blut zu dem schäntlichen tod verurteylt haben. Das hat er aber alles williglich gelitten/ Zum ersten vmb der liebe vnd die gehorsamkeit willen gegen Gott seinem vatter/ der im soliches beuolhen hatt/ Zum andern/ vmb der liebe willen gegen dem gantzen menschlichen gschlecht/ damit mein vnd aller menschen liebloß vnd vngehorsam leben/ vnd also auch vnser aller ewig vnd woluerschuldet leiden/ durch sein vnschuldig/ gehorsam/ vnnd liebreich leiden widerumb vor Gott ewiglich gebüßt würde.

Was wunderwerck haben sich verlauffen/ do Christus gelitten hat?

Es ist ein finsternus worden inn dem gantzen land/ von der sechsten stund an biß vff die neund. Der umbhang im Tempel zu Hierusalem/ hat sich mitten von einander zerrissen/ vonn oben und biß zu vnderst. Auch ist ein erdbidmen kommen/ vnd die felsen sind zerspalten/ vnd die gröber haben sich auffgethon/ vnd vil heiligen sind herauß gangen/ Alles zu einem warzeychen des vnschuldigen leidens Jesu Christi/ des lebendigen Sun Gottes.

Gott der HERR gebe vns gnad/ Wie die vnuernünfftigen vnnd todte Creaturenn/ Jesu Christo in seinem leiden warhaffte zeugnus geben haben/ das wirs die vernünfftigen vnd lebendigen/ auch thund/ in wortten vnd wercken/ vnd in all vnserem leben. Vnd wolle Got/ was das leidenn Jesu Christi gewirckt hat/ im Tempel/ am himel/ an der erden/ an den felsen/ vnd an den todten/ das esauch solichs wircke an vnserem hertzen vnd willen/ an leib vnd seel/ Das wöll Gott der allmechtig.

Was ist das gröste leiden Christi gewesen?

Das er in seinem hertzen erkennnt hat/ wie seine mühe vnd arbeyt vnd groß leiden/ an souil menschen verloren sein würde. Das seinem heilgen vnnd ernstlichen leiden/ souil menschen gar nitt glauben/ sonder für ein torheit vnd ergernus haben würden. Das souil menschen sein heilig wort vnd werck/ vffs höhest würden verfolgen. Das auß seinem heylsamen leiden vnnd sterben/ souil fleyschlicher vnd eygennütziger abgotterei erwachsen würd. Vnd das seiner lere vnd leben/ so ein grosser hauff/ allein mit wortten vnd namen/ on alle warheit/ on alle besserunge jres lebens/ anhangen würden/ Vnd das er zu seiner zeit an seinem eygnen Jünger/ an Pilato/ an den Kriegsknechten/ an Juden vnd geystlichen/ an den Heiden vnd Weltlichen erlebte/ das er solichs künfftiger zeit/ vnd biß zu end der welt/ an vil hundert tausent menschen erleben würde. Das ist sein gröstes leiden vnd hertzleydt gewesen.

Wie bettestu nun von dem leiden Christi?

Ach Gott vonn Himmel/ gib vns armen menschenn genad/ das wir das leidenn Jesu Christi mit ernst zu hertzenn fassen vnd erkennend/ das er alle dinggeredt/ gethon vnnd gelitten hat/ vmb meiner vnd aller menschen seel seligkeit willen. Ach Got gib vns gnad/ das wirr solichs in rechter Christenlicher danckbarkeit erkennen/ durch alle vnser leben. O Got gib gnad/ das wir vmb zeitlich gut vnd gelt willen/ nit handlen wider die liebe vnsers nehsten/ wie Judas. Das wir die menschen nit mer förchten dann Gott/ wie Pilatus. Dz wir niemand wider die Liebe verkalgen vnd anliegen/ wie die Juden vnnd Heyden. Ach Gott von Himel gib vns gnad/ das wir vnsern nehsten nit schlagen mit worten oder wercken. Das wir kein böß geschrey/ oder falsch vrtheil fellen wider vnseren nehsten. Das wir vnsern nehsten/ so jn dürstet vnnd mangel hat/ nit trencken mit bitter gallen auß neide vnd haß/ sonder jm auß rechter liebe mittheylen/ alles das vns Got eben darumb mittheylt hat. Almechtiger Got/ gib vns gnad/ das wirr niemande so mitt schmehlichen wortten zusprechen/ wie die Juden Christo am Creutz/ sonder das wir mitt iederman in seiner not/ ein brüderlich mitleiden haben. Behütte vnd beschirm vns barmhertziger Got/ das wir auß dem leiden Christi kein Abgötterei machen/ Das es an vns armen menschen nitt verloren werde. Das wir durch vnser leben vnd sterben/ vonn dem leiden Christi nit abfallen/ Sunder begnade vns güttiger Gott/ das wirr hie in zeit auch williglichen leiden vmb Christi willen/ vnd zu letzst vnser leben also beschliessend/ wie Christus/ vnnd also durch das leben vnnd den todt Jesu Christi/ nach diser zeit erlangen die ewige freud vnd seligkeit. Amen.

Wie ist Christus begraben worden?

Es was ein reicher/ehrlicher vnd frommer Ratsherr/ mit namen Joseph von Arimathia/ der nitt inn der Juden handlung verwilliget hatt/ der gieng zu PÜontio Pilato/ vnd begerete den leib des HERREN/ Damit aber Christus villeicht nit lebendig dauon keme/ vnd also das heyl der menschen gfürdert würd/ schickt Pilatus zum hauptman/ zu erfaren/ ob er gestorben were oder nit/ Do ers nun erfür/ do ließ er jn dem Joseph. Do kaufft Joseph ein new leinwat tuch/ vnd kam zu jm auch ein anderer heymlicher iunger/ ein Oberster der Sinagog/ mit namen Nicodemus/ Der bracht salb mit jm/ von Myrrhen vnd aloes vermischt bei hundert pfund. Die zwen haben Christum vom Creutz herab gethon/ vnd in die neuen leinwat gewunden/ vnd nach Jüdischem brauch gesalbt/ vnd in ein new grab glegt/ nit weit vom Creutz/ in Josephs garten/ in stein gehawen/ da noch niemands inn begraben was/ vnd haben einen fast grossen steyn für den ingang des grabs geweltzt. Dabei sind auch etlich fromme gottsforchtige weiber gewesen/ die dem HERREN nachgeuolget waren.

was thaten die Juden darzu?

Es versamleten sich die Obersten Priester vnd Phariseer bei Pilato/ vnd sagten. Wir haben daran gedacht/ das diser betrieger/ do er noch lebte/ gesagt hat/ Nach dreien tagen werde ich wider vfferston/ drumb schaff das das grab biß ann dritten Tag verhütet werde/ damit seine Junger nit kommen/ vnd in stelen/ darnach dem volck sagend er sei vfferstanden/ vnd der letzst irthumb also erger werde dann der erst. Darumb gab inen Pilatus ettliche Soldner/ die das grab verhüten vnd bewaren solten/ Das haben sie gethon/ vnd den stein versiglet mit allem fleiß/ damit Christus nit wider zum leben keme/ vnd vns auch allso durch jne widerumb zum ewigen leben geholffen würde.

Wie bettestu von der begrebnus Christi?

Almechtiger Gott/ gib mir vnnd allen menschen gnad/ wie Christo nach seinem sighafftenn tode/ durch ettlich frumme menschen vil Eer bewisen wordenn/ das jm auch gleicherweiß vonn vns vil Eer bewisen werd/ in all vnserem leben. Begnad vnß güttiger Got/ wie Christus so herlich ist begraben worden/ vnd die tücher darin er gewunden/ vnd das grab darin er gelegt/ gantz new/ auch die salb/ damit er gslabet/ fast kostlich gewesen/ das also vnser sündtlicher leib täglich mit jm begraben werd/ vnd wir nit gleich seiend den wüsten todten vnnd stinckenden menschen/ sunder das es vmb vnser leben vnnd sterbenn auch also rechtschaffenn zugehe/ wie es dozumal zugangen ist/ Amen.

Warumb sagstu/ Ich glaub in Jesum Christum/ der nider gestigen ist zu der Hellen?

Ich glaub/ wie Christus warhafftig gelebet hat/ das er auch allso warhafftig gestorbenn sei/ Vnnd wie er mit seinem warhafften leben/ allen glaubigen menschen gewunnen hat das lebenn des ewigenn Paradiseß/ das er auch also mit seinem warhafften tod überwunden habe den todt der ewigen Hell vnd verdamnus.

Wie ist Christus von den todten aufferstanden?

Es waren ettlich frumme weiber/ die kauffeten Specerei/ das sie den HERREN im grabe salbeten/ vnd als sie hin giengen/ kam ein groß erdbidem/ vnd erscheyn der Engel Gottes jn in wunderbarlicher gstalt/ vnnd weltzet des steyn vom grab/ des angesicht war so klar als der blitz/ vnd seine kleydung als der schnee. Also giengen sie hin in das grab/ vnnd wolten jn salben/ do funden sie jn nümmer.

Vnnd zween menner in klaren scheinbaren kleydern/ stunden zu handt bei jnen/ ab denen sie noch mer erschiachen/ biß sie anfiengen reden vnd sagen. Waß thund ir hie/ Warumb sucht ir den lebendigen bei den todten? Den jr suchet/ ist nit hie im todten grab/ sunder erstanden. Gedenckt daran/ das er euch sagt/ do er noch inn Galilea war/ by euch/ wie es also hat sein müssen/ das des menschen sun in der sünder hend geben würd/ das sie in creutzigten/ vnd er aber am dritten tag erstünde. Do gedachten sie gleich an dise wort/ lieffent also vom grabe/ suchten die Jünger vnd sagtens inen/ aber sie glaubtens nitt/ vnnd hieltens nur für ein gespenst/ biß das Petrus vnnd Joannees hinlieffen/ vnd das grab auch also ler funden.

Der allmechtig Gott gebe vns gnad/ wie das Erdtrich erbidmet ist/ zur zeit der aufferstehung Christi/ das wir ab solchem wnderwerck auch erbidmen in vnserm hertzen und leben. Ach Got/ das wir dich auch also mit einfaltiger/ aber hertzlicher begird allzeit suchten/ wie dich dise fromme weiber gesucht haben/ vnnd wie du sie durch deine wunderbarliche Engel vnnd diener/ vonn der Aufferstehung Christi vnderrichtet hast/ also wöllest vns auch gnediglich vnderrichten/ vnd zu verstehn geben in vnseren hertzen/ das Christus vnser HERR nit todt/ sunder lebendig seie/ vnnd das wir vor schwachheit vnserer augen/ den handel Jesu Christi/ nit für ein gespenst/ sunder für die Göttlich warheit halten/ vnd derselben ernstlich glauben. Amen.

Was haben die Juden darzu gesagt/ do Christus also erstanden was?

Die Soldner die des grabs gehüt haben/ sind hinein in die stat Hierusalem gangen/ haben den obresten Priestern alle ding gesagt/ wie es beim grab ergangen/ Da haben sie mit den ältern einen rath versamlet/ vnd also den Soldnern/ die des grabs gehüt hatten/ ein mercklich Summ gelts geben/ damit sie allenthalb in der stat außgeben/ die Jünger weren bei der nacht kommen/ dweil sie geschlaffen/ vnd hetten jn heymlich hinweg gestolen. Darzu sagten die Juden/ Ob schon dem keyserlichen vogt Pilato fürkommen würde/ das sie so übel gehüt hetten/ wölten sie wol dauor sein/ das er sie nit straffte/ Vnd also hat auch die red zu Hierusalem lang geweret/ biß Christus darnach offenlich ghen himel gefaren ist/ vnnd dauor meer dann ein mal den seinen erschinen/ das sein Aufferrstehung iederman kündtlich gnug worden ist.

Der gerechte Got/ der billich alles übel straffen solt/ verzeihe vilen bösen menschen jre grosse sünd/ die der vfferstehung Christi in allen jrem thun vnd lassen/ so mechtig widerstreben/ vnd so das Wort Gotes vnd Euangelion vfferstehn wil/ dz sie es mit so mancher falschen Practic vnd vnwarheit vnderston zuhindern/ vnd was Christus selber thut/ vnd in der warheit ist/ verneynen sie.

Der gütig Got behüt vns vor solchem vnglauben/ das wir auch durch kein zeitlich gut verfürt werden/ also von der warheit abfallen zur lügen/ Sunder das vns die warheit Gots lieber sei dann alles das die welt ist vnnd hat/ damitt wir dem warhafften Gott/ dann der verlognen welt/ auch lieber werden. Amen.

Wem vnd wie ist Christus erschinen?

Zum ersten erschin er Marie Magdalene/ die weynet beim grab/ vnnd dauchte sie/ sie sehe den gartner/ dem der boden zughört/ darinn das grab was/ biß das er jr mit namen zusprach/ do erkant sie jn erst/ vnd sagt/ Mein meyster/ Er aber sprach sie solte hingehn zu seinen brüdern/ vnd jnen sagen/ wie er zu seinem vnd jrem vatter/ zu seinem vnd jrem Gott gehn würde.

Darnach erschein er auch zweyen Jungeren/ die zohend von Hierusalem in ein stätlin/ mit namen Emaus/ Wie nun der Herr Christus vorhin der Magdalene in eins gartners gstalt erscheyn dweil sie jn den lebendigen bei den todten sucht/ also erschein er den zweien iungern in eins fremblings gstalt/ vnnd er sprach jnen zu/ fraget sie wovon sie redten/ vnd warumb sie so traurig weren. Vnd einer auß jnen/ Cleophas/ Antwort jm vnd sprach. Bistu dann allein also frembd zu Hierusalem/ vnd weyst nit was sich dise tag verlauffen hat von Jesu dem Nazarenischen/ der ein Prophet gewesen ist/ vast gwaltig von worten vnnd wercken/ vor Gott vnd dem gantzen volcke/ wie jn die Bischöff vnd vnser Oberkeit zu dem tod verurteilt/ vnnd an das creutz bracht haben? Wir aber hatten einen trost/ er würdt das volck Israel erlösen/ vnd ist aber heut der dritte tag/ nach dem die ding gschehen. Mit anderen wortten mehr rc.

Christus antwort jn hinwider/ vnd sprach. O jr torechten leut/ vnd trägen hertzen zu glauben/ die ding auch/ die vonn den Propheten geschribenn seind/ Versteht jr nit das Christus das alles hat müssen leiden/ vnd also in sein ewige glori gehn/ fieng an von Mose vnd allen Propheten/ zeygt jn an/ was von jm gschriben stund/ Vnd als sie zum stettlin kamen/ nam er sich an weiter zugehn/ vnd sie nötigten jn zubleiben/ vnd mit jnen einzukeren/ das thet er/ Vnd ob dem tisch nam er das brot vnd brachs nach seinem brauch/ gabs jnen. Da erkanten sie jn erst/ Er aber verschwand vor jrn augen/ vnd sie sagten zusamen/ War vnser hertz nit inbrünstig in vns/ do er mitt vns auff dem wege redet/ vnd vns die Schrifft außleget? Kereten also widerumb zur selbigen stund ghen Hierusalem/ da sie die Eylff Jungern bei einander fundenn/ vnd andere meer die bei jnen waren/ sagten jnen an/ was jnen auff dem wege begegnet/ vnd wie sie jn darnach an dem brotbrechen erkennet hetten. Nach dem waren die Junger aber bei einander vonn forcht wegen der Judenn/ Do kam der HERRE durch verschlossene thür zu jnen/ stellt sich mitten/ vnnd sprach. Der frid sei mitt euch/ Straffet dabei jrenn vnglaubenn/ zeyget jnen seine hend vnnd füß/ darumb solten sie nitt erschrecken/ dann er wers/ sagte also noch eines tzu jnen/ Der fride sei mit euch/ Vnd das sie jn noch eygentlicher erkendten/ hieß er jm zu essen bringen. Do brachten sie jm von eim bratfisch/ vnd honigseim/ das hat er vor jren augen geessen.

Thomas aber der ein Jünger/ war nit dabei/ vnd sie sagtens jm/ wie der Herr bei jnen gwesen were/ Er wolts aber nit glauben/ er sehe jn dann selb. Do nun die Jünger über acht tag wider bei einander waren/ kam der HERR aber durch verschloßne thür/ mitten vnder sie/ bot jn den friden/ wendet sich also zum Thoma/ zeygt jm hend vnd füß/ hieß jn die finger in seine malzeychen legen/ Vnnd als Thomas den Herrn anrürt/ vnd an der rede vnd gstalt kennet/ das sein Herr on allen zweifel erstanden were vom tode/ sprach er zu jm. O du mein HERR vnnd mein Gott. Der HERRE aber sprach zu jm/ Thoma/ darumb das du gsehen hast so hastu glaubt/ Selig sind/ die nit gesehen/ vnd dannocht glaubt haben.

Also hat er sich in andere wege mer erzeyget/ als Petro vnd Joanni/ vnd vff dem berg in Galilea/ dahin sie der HERR bescheyden hatt/ haben jn bei fünffhundert brüder gsehen/ vnd jn anbettet/ das also sein vfferstehung aller welt offenbar vnd gewiß worden ist/ vnd das jn Got vom tod widrumb zum leben vfferweckt hat.

Wie bettest von der erscheinung Christi?

Almechtiger Got/ biß treulich gebeten/ gib vns gnad/ das wir der vffersteung Christi recht glauben/ damit wir auch also durch jn/ von tod zum leben vfferstehen. O almechtiger Gott/ laß vns rechtschaffne brüder vnd schwestern sein deines suns Jesu Christi/ vnsers Herren/ derselbig wolle vns erscheinen wie er seinen lieben iungern erschinen ist/ er wöll vns auch trösten wie er sie tröstet hat/ des gleichen auch straaffen vmb vnser torechten reden willen/ wie er sie gestraft hat.

Güttiger Gott/ leg vns auch also die gschrifft aus von dir selbs/ wie du sie jnen außgelegt hast vnd thu vns auch die augen vff/ das wir dich inn deinen wercken erkennend/ Gib vns gnad/ das vnser hertz inbrünstig sei/ zu allem das du mit vns redest/ Beut vns den frid an/ als deinen liebenn Jungern/ vnd verzeih vns alle schwacheit des glaubens/ Vnd ob wir schon etwan vnuolkommen sind wie Thomas/ so behüt vns doch das wir nit gar von dir abfallen oder verzweiflen/ sunder gib genad/ das wir durch die wunderbarliche vfferstehung Christi/ vnd seine warhafftige erscheinungen/ des rechten glaubens/ hie in zeit wol versichert werden/ damit wir nach diser zeit mit Christo vom tod auch vfferston/ vnd vor dir vnserm treuen Got in deinem ewigen reich mit freud erscheinen mögen. Amen.

Wie ist Christus ghen himel gstigen?

Nach dem vnnd Christus aufferstanden ist/ hat er sich viertzig tag lang den gläubigen erzeyget/ vnd vil mit jnen geredt vom reich Gottes/ sunderlich auch vom heiligen Geyst/ durch den sie in kurtzen tagen solten erleucht werden/ Vnnd als sie vff ein zeit bei jm versamlet waren/ vnnd er mitt jnen von solichen dingen geredt hatt/ ward er zusehens vffgehebt von der Erden/ vnd ein wolck nam jn vff von jren augen.

Warumb glaubstu das er ghen Himel gefaren sei?

Wie ich glaub das er mir mit seiner aufferstehung/ den weg vom tode zum leben gemacht habe/ vnd mir zu gut aufferstanden sei/ also glaube ich auch das er mir mit seiner himelfart/ den weg von dem reich diser elenden erden/ inn das reich Gottes gemacht habe/ vnd mir zu gut ghen Himel vffgefaren sei.

Derr allmechtig Gott gebe vns zu erkennen/ dz wir so tieff in die hell hetten müssen farn/ wo diß nit gschehen were. Im sei auch lob vnd danck gesaget vmb die treuw vnd liebe die er an Christum gelegt hat/ verleihe vns das wir auch allein gesinnet seien des das droben ist/ vnd nit des das vff erden/ damit wir auch nach diser zeit mitt Christo seliglich mögen ghen Himel faren/ Amen.

Wie sitzt Christus zur gerechten gotes?

Das weyß ich nit. Got wöll aber dach ichs nach diser zeit auß seinen gnaden mög innen werden.

Was verstehstu aber bei der gerechten handt Gottes?

Wie der mensch all ding mit der rechten hand recht/ ordenlich vnnd mit gewalt außrichtet/ also was Gott recht ordentlich vnd gewaltiglich außrichtet/ sagt man seine rechte hand habs gethon. Wie er nun durch seinen sun Christum/ alles heyl der welt/ hie vff erden vnd mit gewalt hat außgericht/ vnd jn widerumb von der erden inn Himel vffgenommen/ also hat er jn daselbst auch zu seiner eygnen gerechten hand gesetzt/ vnd jm geben allen gewalt der sünd vff erden/ vnd des ewigen lebens im Himel. Da wölle er vns auch gnediglich hin helffen. Amen.

Christus ist ein mal kommen im fleysch/ damit wer an jn glaubt/ habe das ewig leben.

Zum andern mal/ wie er ghen Himel vffgestigen ist/ also würt er an dem letzsten vnd Jüngsten tage wider kommen zu vrtheylen alle die jm glaubet oder nit glaubet haben.

Wenn würdt das geschehen?

Das weyß Gott alleyn vnnd sunst niemand/ auch nit die Engel Gottes/ Aber vor dem iüngsten tage werden sich allerley Zeychen verlauffen/ wie die Christus angezeygt hat/ Namlich/ die liebe würt erkalten/ boßheit würt überhand nemen/ vil krieg vnd kriegs gschrey würt vorhanden sein/ auch werden zeychen in der Sonn/ Mon/ vnd Sternen/ vnd auff erden angst/ iamer vnd wee. Es werden sein vil falscher Propheten/ vnd der greulich vnlust des Endchrists würt an der statt Gottes sitzen/ vnd das heilig Euangelion würt allenthalben predigt werden/ zur zeugnus der seligkeit/ denen die jm glaubt haben/ vnd zur zeugnus der verdamnus/ den die jm nit glaubt haben.

Nach dem würt des menschen sun gechlingen kommen/ wie der donderblitz/ vnd würt in den wolcken des Himels daher ziehen/ auch seine Engel vnd Vorbotten/ mitt einem heerhome vnd grossen gschrey/ die werden von allen orten der welt daher die vier wind gehn/ die ausserweleten Gottes zusamen bringen.

Der barmhertzig Got geb vns die zeychen diser letzsten vnd sorglichen zeit/ gnediglich in vnseren hertzenn zu erkennen/ das wirs nit für einen schimpff haben/ vnd vileicht ab der erschrockenlichen beruffen Gottes zu tode erschrecken/ sunder vnsere haupter zu Got vffheben/ vnd wissen das dann zumal herzu kommen sei vnser erlösung Vnd o Gott im himel/ erlöse vns alle zeit/ vnd sunderlich zu der selbigen/ von allem übel an leib vnd seel/ Amen.

Wie würdts weiter gehen/ vnnd was würt Christus für ein vrteil fellen?

Gleich wie ein hirt die schaaff von den böcken scheydet/ also würdt auch Christus alle välcker scheyden/ vnd die gleubigen zur rechten/ vnd die vngleubigen zur lincken seitten stellen/ vnnd zu denen vff der rechten seitten sagen. Kommend her jr gebenedeiten meines Vatters/ bsitzet das reich das euch bereyt ist von anfang der welt/ Dann ich bin hungerig gewesen/ vnd jr habt mich gspeistet/ ich bin durstig gewesen/ vnd jr habt mich getrencket/ ich bin frembd gewesen/ jr habt mich bherbergt/ ich bin nackend gewesen/ jr habt mich kleydet/ ich bin kranck gewesen/ jr habt mich heymgesucht/ ich bin gfangen gewesen/ jr habt mich tröst.

Da werden die gerechten sagen/ Herr wenn haben wir dich also gsehen? So würt er antworten vnd sagen. Warlich ich sag euch/ wie jr gethon habet einem vnder disen geringsten brüderen/ das habt jr mir gethon. Dann würt er zu denen zur liincken seitten gleich das widerspil sagen/ vnd sie heyssen hingehn ins ewig feur/ das dem Teuffel vnd seinen engeln bereyt ist/ dann sie haben jn weder gespeiset noch trenckt/ weder kleydt noch geherbergt/ vnd in seiner kranckheit vnd gfengnis nit heymgsucht. Da werden sie dann auch sagen. Herr/ wwenn haben wir dich also gesehen/ das wir dir nit dienst haben? Denn würt er jnen antworten vnd sagen/ Warlich ich sage euch/ was jr nitt thon habt einem vnder disen geringesten/ das haben jr mir auch nit gethon. Dann werden sie gehn in die ewig pein/ Aber die gerechten in das ewig leben.

Da geb vns nun der allmechtig Gott die werck des glaubens vnd warer brüderlickher liebe in vnsern hertzen vnd leben zu erkennen/ das wir mit Gott auch bekandt werden.

Was glaubstu weitter?

Ich glaub inn den heiligen Geyst/ ein heilige Christenliche Kirchen/ die da ist/ gemeynschafft der heiligen. Ablassung der Sünd/ Vffersteung des fleysches. Vnd ein ewigs leben.

Warumb sagstu/ Ich glaub in den heiligen Geyst. Was ist der heilig Geyst?

Das mag innerlich vnd aus hertzen grund niemand wissen noch verston/ dann eben/ der denselben Geyst hat/ Aber eusserlich sind namlich zwei ding/ durch die man sich vff jn verstehn mag/ das ist die heilig gschrifft/ vnd darnach der widerwertig vnheilig böse geyst.

Wie versteht man sich auff den heiligen Geyst auß der Geschrifft?

Die gschrifft sagt/ do man Christum taufft hab sei der heilig Geyst in einer Taugen gstalt ob ime erschinen/ da würt eusserlich durch das reyn/ einfaltig vnnd fruchtbar thierlin anzeyget/ wie der geyst Gotts auch so reyn/ einfaltig vnd fruchtbar.

Des gleichen leret Christus den Geyst Gottes bei dem wind erkennen/ des dösen hört man wol man sihet jn aber nit/ weyß auch niemands wo er anfaht oder vffhört/ so ist er auch seinr natur halb so ein mechtig Element/ das er nit allein in keins menschen gwalt/ sonder das er aller andern mechtigen Creaturn/ auch des grossen tieffen Meers gwaltig ist/ Also ist auch die krafft vnd macht des h. Geyst Gottes/ mit welchem er aller seiner ausserwelten hertz vnnd leben/ zu allem gutten/ vnnd in dz ewig leben gwaltig vnd krefftig machet.

Auch sagt Christus/ der heilg geist sy ein tröster/ ein geist der warheit/ vnd der alle ding leere/ darumb er in auch seinen gläubigen verhieß/ dß er sie in diser verlognen welt/ warhafftig/ in aller trübsal wol getröst machen/ vnnd in mittenn aller vnwissenheyt der narrechtigenn weltt/ sie götlicher dingen/ nach aller noturfft/ wol vnderrichten wirt.

Als sie nun auff den selbigen/ nach der himelfart Christi/ wartend/ vnd an dem heiligen Pfingsttag bey einanderenn versamlet warennd/ kam schnell ein getöß von himel/ als eins gwaltigen winds der daher fart/ vnd erfült das gantz hauß da sie sassen/ vnnd man sahe die zungen zerteylet als wernde sie feurig/ vnnd sie wurden all vol des heiligen Geists/ fiengen an reden mit allerley frembden sprachen/ vnd das wolck lieff zusammen mit grossem verwunderen/ vnnd sagt/ Wir hörenn sie mit vnseren sprachen reden die grossen gutthatten Gottes/ Was will doch darauß werden. Etlich aber machten ein gspöt daruß.

Das ist aber groß wunder vnd der groß ernst gwesen des heilgen geist Gotes/ welcher als ein feur erschinen ist/ der zwar das fleisch übel brent/ verzeret aber dabei alles das im fleisch ist wider Gott/ vnd erwermbt auch das kalt gefroren hertz mittem im fleisch vnd zünts an/ mit allerley götlicher liebe/ vnd mitt erkantnuß der vnseglichen liebe vnnd grossen gutthattenn Gottes gegenn vnns/ darumb auch die liebenn junger so gar zu andern menschen würden/ dann sie vorhin waren. Das vnd der gleichen vil anders/ redt die Geschrifft von dem heiligen geyst Gottes.

Wie versteht man sich vff den heiligen Geyst/ durch den widerwertigen bösen geyst?

An den früchten versteht man dasselb/ dann wie der böß geyst eitel vnd alles böß redt vnnd thut/ also redt vnd thut der heilig geyst nichts dann eittel vnd alles gut.

Was sind die werck des bösen Geysts im fleysche?

O sie sind offenbar/ vnnd ligen grob am tage. Ehbruch/ hurerei/ Götzenehr/ zauberei/ vngunst/ feindschafft/hader/ zorn/ zwitracht/ secten/ haß/ mord/ geitz/ fressen/ sauffen/ vnd dergleichen alles Gotloß wesen.
Die stuck würckt der böse geyst/ vnd wo sie sind/ da ist der böß geyst.
Vnd lieber Got/ wie sind souil menschen mitt dem bösen geyst besessen/ die es dannocht nit da für haben/ vnd Christen heyssen.

Was sind die werck des gutten heiligen geysts?

Es ist göttliche liebe/ freude vnd frid/ gedult/ freuntlicheit/ gütte/ glaub vnd treuw gegen Got vnd dem nähsten/ sanfftmütigkeit/ Gottsforcht/ zucht/ erbarkeit/ vnd dergleichen alles Gotselig wesen.
Die stück wirckt der heilig geyst/ vnnd wo sie sind/ da ist der heilig Geyst.
Vnd lieber Gott/ wie sind so wenig menschen/ die den Geyst haben/ ia wie sind so gar keine iunge leut vnd kind/ die durch den geyst vfferzogen vnd also zu frommen Gotsfürchtigen Christen werden.
Auß dem man auch versteht/ was der heiliig gut geyst sei/ auch wo er sei vff Erden/ vnnd wie not es ist/ das man jn habe.

Wie not ists dann?

So not ists/ das wer den geyst nit hat/ der gehöret weder Gott noch Christo zu/ vnnd wer auß dem geyst nit wider geboren/ vnd zu eim andern menschen würt/ dann er von natur/ vnd nach dem fleysch ist/ der mag nit in das reich Gottes kommen/ Vnnd wie Christus gar durch kein menschlich werck/ sunder allein durch die krafft des heiligen geysts/ zum menschen worden ist/ also muß der mensch auch gar kein menschlich werck/ sondern allein durch die krafft des heiligen Geystes/ zum Christen werden.

Vnd wiewol der mensch eusserlich vil von got vnd göttlichen dingen hören/ sehen/ vnd auch selber sagen kan/ das jm nichts weder zu hertzen gehen noch lieben kan/ es bschehe dann durch den heiligen geyst.

Vnd wie not ists/ das böß lassen/ vnd das gut thun/ Got recht erkennen/ lieben vnnd förchten/ recht glauben/ leben vnd sterben/ vnd zu letzt selig werdenn/ so not ist lieber fründt/ das du den geyst habest/ Dann was Got der vatter durch Jesum Christum seinen sun eusserlich anrichtet/ das volstreckt er vnd richts aus im hertzen/ durch den heiligen geist. Vnd also glaub ich in Gott den heiligen geist.

Ist dann der heilig geist auch ein Got/ so hör ich wol/ es seind drei Gött in die du glaubest?

Wann sich Gott zu tusent malen offenbaret/ so ist er dennocht nur ein Got/ also offenbart er sich eusserlich in Christo vnd durch Christum/ der gestalt/ das der selben kein andere so wesenliche offenbarung/ die je geschehen ist/ mag vergleichet werden/ Darnach offenbart er sich durch den heiligen geist innerlich/ mit dem er lebendig macht/ alle andere offenbarungenn/ vnnd alles das er von vnsert wegen je vnd je geredt vnd thon hat. Also ist Gott der Vatter/ der ordnets alles/ sonderlich das werck der erlösung/ vnd verzeihung der sünd/ auß lauter seiner gnad vnd vätterlicher liebe. Also ist Gott der Sun/ Christus Jesus/ ein lieber sun des liebenn Vatters/ ein ebenbild des vätterlichen willen Gottes/ der richts eeusserlich als auß/ das mans sihet/ hört/ vnd greifft/ Also ist Gott der heilig Geist/ der richt es innerlich alles auß im hertzen/ das wirs verstehn/ erkennen vnd glauben.

Hastu den heiligen geist?

Hab ich jn/ so sei Gott zu hundert tausent malen darumb gelobt vnd danckt/ hab ich jnn nitt/ so sie doch Gott zu hundert tausent malen treulich darumb gebetten.

Wie bettest vom heiligen geist?

Almechtiger Gott im himel droben/ wie wer ich doch so einn seliger mensch/ künde ich dich so hertzlich vnd mit solchem glauben vmb den heiligen Geist bitten/ das ich jn erbitten möchte/ vnd durch jn alle böße geister/ vonn mir außtribenn würdenn/ wie würde ich doch eins mals so gar ein andern sinn/ vnd ein ander hertz überkommen/ wie würd ich so gar ein ander leben füren.

Aber allmechtiger ewiger Gott/ dieweil du durch deinen einigen gebornen sun vnseren herren Jesum Christum/ zu seiner zeit vil bößer geist von den menschen sichtbarlich vnd mit wunder außtriben hast/ Vnd darnach auch durch in/ den heiligen geist verheissen vnnd geben/ So bit ich dich mein Gott/ du wöllest des selbigenn deines zu sagen ingedenck sein/ vnd auch an mich gnädigklich gedencken/ das ich an dem wunderwerck Christi theil haben vnnd seiner verheissung auch genießen möge.

Barmhertziger Gott/ endtledige mich vnnd alle menschen von allen bößen geisten/ die vnns so vil vnruw vnd leyds anthun/ in allen vnseren sinnen vnd gedancken/ vnd durch all vnser leben vnd sterben/ Dann wie zu der zeit Christi vil beseßner menschen warent/ also seind gantz Legionen/ vnnd vil tausent bößer geist/ die werfennt vns in wasser vnd in feur/ vnd in alle angst vnd not an leib vnnd seel/ Sie seind vast grimmig/ das wir offt schaumen vor zorne/ haßs vnnd vnwillen.

Niemant kan vor vns beseßnen menschen sicher wandlen/ wie beleydigen vnnd thun schaden iederman mit wortten vnd wercken.

Wir ligen in den todten gräbern/ vnd all vnser wesen ist nichts dann ein wüst todten gspenst/ vff allen seitten. Wir lauffen in die wüstinen/ vnd in diser welt sind wir nichts anders dann wie wüste/ vnsinnige vnd vnfreuntliche thier im wilden walde. Nieman kan vns binden noch meystern/ wir wölln aller ding frei vnd meyster sein/ vnd wo man vns mit Gotes wort meystern wil/ da zerreissen wir alle strick vnd vnd band/ ob sie schon lautter eisen weren/ vnnd niemand kan dise böse geyst von vns beschweren/ dann mit grossem ernst vnd gebet deines lieben suns Jesu Christi.

Darumb so bitte ich dich barmhertziger Gott/ hat dein einiger lieber sun Christus/ ie böße geyst außtriben/ so laß jn dieselbigen auch von vns treiben/ vnd laß sie also außtreiben/ das sie nit mehr widerkommen. Entledige vns auch durch jn/ güttiger Got/ von allen bösen heymlichen geysten/ die vnß vil schädlicher verfüren/ die sind als die schaff/ vnd kein wolff kan so grossen schaden thun/ die sehen als die Engel des liechts/ vnnd sind doch eitel irthumb vnd finsternus.

Die so einn ernstlichen schein und ansehen haben/ als ob sie aus dem himel seiend/ vnd sie sind auß der Hell. Die herein gehen nach eygnem wolgfallen/ in demut vnd geystlicheit der Engel vnd haben doch deren keins nie gsehen/ wissen nit wass rechte Engel oder rechte geystlicheit ist.

Die vnsere ersten vatter vnd muter übel verfürt vnd vns allen grossen schaden gethon haben.

Die den samen des Wort vnd des willen Gottes alzeit von vnsern hertzen reissen/ vnnd souil vnkraut an die stat säwen.

Die vns versuchen/ mit so vil sorg des bauchs/ mit geistlicher vnd weltlicher hochfart gleich wie sie Christum auch versucht haben.

Aber allmechtiger vnd treüwer Gott/ behütt vns vor allen bösen geisten/ sie habenn ein gutt oder böß ansehenn/ das wir weder zur liinckenn noch zu der grechten seiten/ durch sie verfürt werden/ sunder gib genad/ das wir die heimlichenn auß rechtem vrteyl erkennen/ ob sie vß Gott seind oder nit/ vnd den offentlichen auß rechtem glauben allzeit widerstehn mögen.

Vnd über das sei treulich gebetten/ barmhertziger Gott/ mitteyl mir deinen heiligen geist/ mitt vil genaden vnnd gabenn/ durch den ich zu eim andern menschen werd/ denn ich bißher gewesen bin.

Vund wie ich in dise welt/ durch meinen vatter vnd muter/ ein gantz fleischlicher mensch gboren bin/ das ich also durch deinen heiligenn Geist/ in dein ewigs reicht/ wider vnd von neüem ein gantz geistlicher mensch geboren werd.

Der allmechtig Gott gebe mir/ das ich seine heiligen gebogt/ vnnd mein grosse sünd wider die selben alzeit erkenne/ durch die kraffseines heiligen geists.

Er gebe mir einen rechten fürsatz vnd willen/ all mein leben lang/ das böß zefliehen/ vnd das gut zuthun/ vil mer aber gebe er mir gnad/ das ich durch die krafft seines heiligenn geysts solliches thun müg.

Er geb mir einn grossen vnwillen ab meinem eignem fleisch/ vnnd ab der welt/ vnnd geb mir durch seinen geyst/ das mir die zwey stuck vonn grundt meines hertzens erleydenn/ das wöll Gott der almechtig.

Er wöll mich erleuchten/ das ich in den kurtzen tagen meins lebens wandle wie eim kind des liechts wol ansteht.

Vnd das ich mich auch mit meinem leben vnd sterben/ dem willen Gottes gantz ergebe/ wie/ vnd wann er mich heimsuche/ mitt kranckheit/ armut/ verfolgung/ vnd mit dem bittern tod/ das es mir alles gleich gelte/ vnnd das mein hertz allein sei/ meinem trewen Gott allein zu leben vnd sterben/ durch die krafft seines heiligen geists.

Ach das ich ein einfeltiger vnnd fruchtbarer mensch würde/ durch den heiligenn geist. Das der selbig einen sturmwindt anrichte/ widder alles das in mir ist wider Gott.

O das ich durch den heiligen Geist in der warheit getaufft würd/ das er alzeit auß mir redte/ vnd in mir alles guts würckte/ das er mich tröstete/ in aller widerwertigkeit vnd anfechtung/ das er mich warhafftig machete/ gegen Gott vnd meinem nechsten.

O das er die liebe Gottes außgüsse in mein vnd aller menschen hertz.

Almechtiger Gott/ laß mich des heiligenn Pfingstag teilhafftig werden/ das ich den heiligen Geist auch mitt wunder empfahe/ dadurch ich dich meinen trewen Gott vnd Vatter/ vnnd deinen lieben sun Jesum Christum/ mit aller barmhertzigkeyt vnnd liebe/ recht vnnd auß hertzenn grund erkenne.

Das ich recht glaube/ nach dem glauben recht lebe durch den glauben recht sterbe/ vnnd ewigklich recht selig werde.

Das alles/ wöllest mir vnnd allen menschen gnedigklichh mitteylen/ insunderheit der armenn iugent/ das sie durch den heiligen Geyst erzogen/ in jm auffwechse vnd zuneme/ damit frumb/ gotß förchtig/ vnd freuntlich leut auß jnen werden.

Das geb vns Gott der Vatter/ in dem namen seines suns Jesu Christi/ durch die krafft des heiligen Geists. Amen.

Warumb sagstu/ Ich glaub ein heilige Christenliche Kirch/ gemeinschafft der heiligen?
Was ist die heilig Christenliche Kirch?

Nichts anders dann eben die gemeynschafft der heiligen/ wie sich der Artickel selbs vßlegt.

Was ist aber die gemeynschafft der heiligen. Was ists für ein gemeynschafft?

Alles das Gott der Vatter vnd sein Sun Jesus Christus/ vnd der heilig Geist/ haben/ das ist gmeyn vnnd habens gmeyn mitt einander/ alle die in disse drei/ als einen Gott/ vonn hertzenn glauben.

Was ists aber/ das sie gmein haben?

Gerechtigkeit vnnd barmhertzigkeit/ treuw vnd glauben/ frid vnd liebe/ gedult vnd langmütigkeit/ gegen freünden vnd feinden/ alles gut/ vil gnaden vnd gaben/ vfferston vom tod/ gehn himel faren vnd ewigklichen leben.

Welche seinds aber/ die als gemein haben mitt Got dem Vatter Sun vnd heiligen Geist?

Alle die bekennen/ das Jesus Christus sei der war lebendig Gottes sun/ in dem vns Gott alles guts verheyssen vnd gleistet hab/ der in die welt kommen/ darin gelebt/ durch den tod widerumb daraus gangen/ vnd durch die aufferstehung vnd himelfart wider zu seinem Vatter kommenn sei/ alles vns zu gut/ die haben alles gmein mit Gott.

Was muß man aber mer darzu bekennen?

Nichts anders ist not darzu überal/ dann wie Christus allein das haupt vnnd der grund ist der kirchen also ist auch nit not etwas weiter zuglauben/ der glaub richt alles guts an vnd auß/ vnd on den glauben ist nichts guts/ sonder alles sünd.

Darumb do der heilig Petrus das bekandt/ dz Christus der lebendig Gotes sun were/ sprach Christus/ Fleisch vnd blut hets jm nit geoffenbart sonder der Vatter im himel mußts jn also gelert haben/ gab jm den namen des Velsen vnd sprach/ Vff den Velsenn/ das ist/ auff die bekantniß das Jesus Christus sei der war lebendig sun Gottes wil ich mein Kirchen bauwenn/ das ist/ Ich wil sie ewigklich in dem glauben erhalten/ also das alle portenn vnnd gwalt der hell/ vnnd der welt nichts darwider sollen vermügen.

Was ist für ein leer in der kirchen?

Wie wol der glaub allein steht im hertzen der glaubigenn/ noch so hat mann eusserlich/ wo die glaubigen seind/ auch das predig ampt.

Wie aber kein ander glaub in der kirchen oder gemeyn/ dann der in vnnd auff Jesum Christum gründet ist/ also weißt sie kein andere leer überal dann wie vnd was Christus gelert hat.

Mag man dann kein leer oder satzung etwan eins menschen darinnen haben?

Wenn ein leer dem Euangelio nitt zu wider/ sonder gleichförmig ist/ so ist sie wol zeduldenn/ aber denn ists eben die leer Christi/ vnnd nit des menschen/ dann das villeicht mit andern worten dargeben würt/ Wann aber ein leer/ wider das Euangelion/ so ists ein vardampte leer/ wenns gleich wol ein Engel von himel leerte/ Ist aber ein leer im Euangelio nit also außtruckt/ das sie gebotten oder verbotten/ so mag man sie auch leiden/ doch das man sie frei laß/ vnd man kein gewissene damit verbind/ kein todsünd daruff setze so mans nit halte/ vnd keinen hohen verdienst/ so mans halt/ vorauß vnd voran/ das man kein seligkeit darauff setze/ vnnd zu letst/ das mans der leer Christi keins wegs vergleich/ weder die leer noch den der es gelert hat.

So wer es gleich so gut/ mann ließ alles faren/ was Christus nit mitt außgetruckten worten gelert hat.

Wann der vnderscheid/ wie ich ietz gesagt hab nit ghalten würt/ so wer es ja vil besser/ man wißte nit ein wort von menschen leer/ würt er aber ghalten/ so möge es wol auch gut sein/ Dann es möge vil ding zu einer guten eusserlichen ordnung dienen/ so mag man dem bößwilligen vnd vngehorsamen fleisch vnd blut auch wol etwas vfflegen/ dz es züchtiger vnd ghorsamer werd. So hat die weltlich oberkeit auch vil satzungen/ on die niemands bei einander bleiben kündte/ dz als zusamen gut ist/ vnder der Christenlichen gmein/ aber dz trifft allein dz leiblich regiment an/ da kan ein mensch über den andern wol gbieten/ Aber der gewissen vnd der seel halb/ hat niemants gwalt/ dann Christus mit seinem Euangelio.

Warumb sagst du allein vonn dem Euangelio/ Ist das alt Testament nitt auch ein warhafftige leer/ die man in der Christelichen Kirchen brauche?

Ja was darin stat/ dz den glauben in Christum vnd die liebe zum nechsten antrifft/ dz mag man annemen/ Dann Christus spricht selbs/ dz Moses vnd die Propheten zeugnus von jm geben/ aber sunst steht vil darin von leiblichem gotßdienst/ von vil kirchen gepreng/ vnd sunst allerlei seltzamer exempel drin/ wo man dz selb alles halten wolt/ so würd ein wilds ding darauß werden/ aber wir seind Christen vnd nit Juden/ vnd ist das alt gesatz vffgehept/ vnd regiert im newen gsatz/ das ist im reich Jesu Christi vnd seiner heiligen kirchen/ alllein glaub vnd liebe/ was die zwei stuck erfordern/ dz ist gebotten/ was wider die zwei stuck/ das ist verbotten/ was on die zwei/ das ist vnnötig.

Vnd darumb ist auch der Kirchen kein irrthum/ vnd sie kan nit irren/ die weil man weder minder noch mer darin leert/ dann eben wie Christus auch gelert hat.

Was ist für ein leben in der Kirchen vnd gemeynschafft der Heiligen?

Es ist ein heiligs leben an leib vnd seel/ An der seel seind sie heilig/ dann Christus hat sie geheiliget vnd gereiniget durch den theuren verdienst seines lebens vnnd sterbens/ dardurch jnen all jr vnheiligs wesen/ frei geschenckt vnd nach gelassen würt. An dem leibe seind sie auch heilig/ denn sie machen sich des heiligenn lebens Christi on vnderlaß gleichförmig/ sie fleissenn sich seyner weis vnd geperd/ wortten vnnd werckenn/ Im glauben gegenn Gott/ In der liebe gegen allen menschen/ In der hoffnung vnd gedultigkeit in allem das jnen Gott zuschickt/ sie förchten Gott übel/ vnd seind den lastern mechtig feind/ sie haben Got von hertzen lieb/ vnd halten seine gbot/ es Strafft je einer den andern brüderlich/ hilffts nit/ so nimpt er zeugen darzu/ hilffts auch nitt/ so bescheit mans jn/ vnd zeygts der kirchen offentlich an/ wie jnenn Christus befolhen hat/ sie lassenn sich auch willig vnd gern straffenn. Es thut je einer dem anderen nit allein/ wie er wil das man jm thue/ sonder wie er weißt/ das Gott jm thon hat/ sie verachten die welt/ mit all jrer freud vnd wollust. So sie veruolgt werden/ so sprechen sie/ es sei jnen ein gewiß zeichen des glaubens/ die weil Christus gar hab müssen am creütz sterben/ vnnd sie sterben auch auff den glauben mitt freudenn/ vnd in summa/ es ist ein Christenlichs volck/ vnd ein gmeinschaft der heiligen.

Wo ist aber das volck/ vnnd wo seind die heiligen?

Wo die leer vnd das leben Christi/ vnnd man der leer glaubt/ vnd mit dem leben volget/ vnnd wo die guten frücht seind/ da ist der gut baum.

O so seind iren nit zuuil/ vnd wirt die Christenlich kirch nit fast groß sein/ wenn das war ist?

Das sei Gott im Himel klagt/ noch sinds beide war/ das ein Christenliche kirch oder gmeyne ist/ vnd das die kirch nit vast groß ist/ vnd der wenigest theil menschen warlich drein gehören/ dann wie fast Gott jedermann drein rufft/ so seind doch wenigi außerwelt.

Aber die welt rufft auch in jr kirchen/ vnd sie hat einen grossen hauffen außerwelter welt menschen/ nit der glaubigen/ vnd ist auch in der welt ein gmeinschafft/ nit der heiligen aber deren die wenig oder gar nit nach Gott fragen/ Die geitzigen/ fresser vnd sauffer/ blutuergiesser vnd krieger/ vnrein hurer vnd eebrecher/ verfürisch vnd üppig geselschafft/ vnd der gleichen/ habenn auch gemeyne/ jetliche nach jrer art/ aber dz ist nit die gemeinschafft der heiligen Gottes/ sonder der verdampten vnd hellischen menschen/ vnd in die kirchen laufft der gröst vnd fürnemest teil der menschen/ als ob sie vnsinnig seien/ sie leben darinn/ vnd sterben darinn/ aber beide vnseligklich vnd on Gott/ das sie doch nit glauben/ biß das sie sollichs werden erfaren/ mit grosser angst vnd not/ an leib vnd seel ewigklich.

Lieber zeyg mir etwa einen sollichen verdampten menschen.

Leiblich vnd zeitlich darff ich dir niemans anzeigen/ du sihest jren vil alle tag vor augenn#/ die sich durch vil ergernussen grob gnug verraten.

Wölte Gott das jren nit souil weren/ Aber nach der seel vnd ewigklich/ will ich dir niemants anzeigen/ dann Gott weißt allein wer verdampt ist.

So zeyg mir aber einen säligen menschen?

Leiplich vnd zeitlich kan ich dir manchen fromen menschen zeygen/ der Gott förcht vnd lieb hat/ wie ich auch vor gesagt hab/ was für ein leer vnd ein leben in der eusserlichen gmeyne Christi seie/ noch kan ich dir nit sagen/ ob er selig würt oder nit/ dann ich sihe sein hertz nit/ das ich wisse ob jm ernst sei/ so sihe ich auch sein end nitt/ das ich wiß ob er im glauben verharren/ vnnd auff Gottes barmhertzigkeit sterben werde oder nit.

Darumb sieht auch die Christenlich Kirch nit vff den menschen/ die auch gleich fromb seind/ sie sieht vff dem glauben vnnd im hertzen/ wo das sei/ das weyß Gott.

Vil minder sieht sie vff vngleubigen vnd abgöttischen/ fleischlichen vnnd weltlichen/ vnreinen/ hochfertigen vnd geitzigen menschen.

Deßgleichen/ wie man nit mitt warheit sagen kan/ die odder dise menschen seind die Christenlich kirch (dann es seinds alle glaubigen menschen/ die Gott allein kennt) Also kan man auch nitt sagen/ An dem/ oder disem ort ist die Christenlich kirch/ dann sie ist an allen orten/ wo glaubige menschen seind vff dem gantzen erdtreich.

Sag mir noch einest in einer summa was du von der Kirchen glaubest?

Ich glaub das eine heilige Christenliche Kirch sei/ vnnd Gott ein heiliges volck habe/ eusserlich nach dem leben vnd nach der leer Jesu Christi/ vnd innerlich nach dem glauben/ an das einig haupt der kirchen/ Jesum Christum.

Ich glaub das vil die den namen Christi tragen/ auß der kirchen gehören/ vnd vil die jn nit tragen/ darein gehören.

Ich glaub das der wenigest theil der menschen darein gehöre.

Ich glaub das niemants eigentlich wisse/ wer darein gehör/ dann allein Gott. Ich glaub dz die heilig Kirch von den falschen geistlichen vnd fleischliichen welt menschen/ hie auff erden müsse veruolget werden. Ich glaub das sich die kirch mit der zeit vnd vor Gott wol finden werd/ ob sie schon hie in schlechten ehren ist. Vnd zum letsten/ so gelaub ich an die heilige Christenliche Kirche/ das ich des glaubens vnnd der hoffnung bin/ ich sei auch ein glid der selbigen/ Da helff mir Gott zu.

Wie bettestu von der heiligen Christenlichen kirchen.

Allmechtiger vnnd barmhertziger Gott/ gib vns armen menschen gnad/ das wir dich vnsern treuwen Vatter vnd Jesum Christum deinen Sun vnsern lieben herren vnd meister/ auch deinen heiligen geist/ so warhafftig erkennen/ das wir dardurch ein götliche Christliche vnd geistliche kirch vnd volck Gottes werden/ Amen.

Ach Gott/ das wir ein rechte ware gemeynschafft hettend vnder einander/ vnd je eins dem andern sein leib/ ehr vnd gut/ gmein machte/ wie brüder vnd schwesteren wol schuldig weren.

Lieber Gott/ das wir recht wißtenn/ wie so gar kein anderer grund noch haupt ist/ in deiner heiligen kirchen/ dann dein Sun Jesus Christus vnd so gar kein ander leben vnnd leer/ dann wie er gelebt vnd gelert hat.

Almechtiger Gott/ behüt vnnd beschirm vns vor aller ander kätzerischen leer/ so die menschen vnnd nitt Christus gelert hat/ das vor vnserem hertzenn verflucht seien/ alle die anderst leerenn glauben/ dann Christus gelert hatt/ behüt vnnd beschirm vns auch vor allem falschen vnchristenlichen leben/ vnd das wir mit der vnheyligen welt nit gmeinschafft haben.

Gütiger Gott/ gib der armen jugent deinenn heiligen geist/ damit sie auch in dein heilige kirchen gehöre/ vnd wie sie eusserlich durch den wassertauff vnder die zal deines volcks zelt vnd eingeschriben wärt/ Ach Gott/ das sei auch also vor dir in der warheit des Christenlichen glaubens vnnd in der krafft deines heiligen geists/ in das buch der lebendigen eingeschriben werd/ Da biß ewiger Gott treulich vmb gebetten/ dann es thut vast not.

Gib auch sunst barmhertziger Gott allen menschen hertz vnnd gmüt/ das wir tag vnnd nacht vß diser welt/ nach deiner heiligen kirchen trachten/ vnd einem jedem angelegenn sei ein heiligs gelid deiner heilgen kirchen zu werden.

Aber almechtiger Gott/ wo seind die selbigen denen es von hertzen nagelegen sei/ vnd die darnach einen hertzlichen seufftzer lassen künden/ O Got wie ist des geschreiß soo vil in der welt/ vnnd die gantz welt li dein volck gnent werden/ sie wils auch sein/ vnd schreit jederman Herr Herr.

Ewiger Gott/ wie ist aber deins waren volcks so gar wenig/ wie fält es so weit/ das man sagen künd oder mög/ da oder dort ist ein warhafftigs Christenlichs volck bei einander versamlet.

Ach Gott möchten wir nur etliche heuser zeigen/ von denen wir sagen dürfften/ Das ist warlich ein Christenlichs haußgesind.

Vnnd wo gleich wol ein sollichs ist/ ach lieber Gott/ wie wirt doch das selb so gantz verspottet vnd so gar veruolget/ wie müssen die deinenn so gar schabab sein in der gantzen welt/ wie hat sich die welt/ vff allen seiten zu samen thon wider die heilig Christenlich kirch vnd alle die gern wölten darein gehören/ vnd selig vor Gott vnd den menschen wandlen?

Aber du treuwer Gott/ dem dise schmach selber geschicht/ verzeihe jederman sein grosse übelthat/ vnd hilff jederman in dein heilige Kirchen.

Voraus aber tröst alle die darein gehören/ vnd vmb deines heiligen namens willenn durchechtet werden/ gib jnen wo sie zerstreut seind/ vnnd wo sie zerstreut werden/ die einigkeit des glaubens/ vnd götlicher hoffnung in jr hertz/ dz sie alle widerwertigkeit ring achten/ vmb der grossenn eeren willen/ zu der du sie noch bringenn wilt/ vnd gwißlich würdest bringen.

Nun hilff vns frölich hindurch/ vnd mach vns den weg ring/gib gnad/ das wir nitt gedencken an eincherlei gegenwürtige not vnd angst/ sunder das wir gedencken wie die deinen noch so herlich vom tod aufferston vnd gen himel faren werden/ vnd hin wider/ wie alle feind Gottes/ vom leben zum tod/ vnd von eim todt in den andern biß inn die tieffe hell/ hauffweiß faren werden.

Sterck dein heilige kirchen/ Almechtiger Got im glauben vnd glaubigem leben/ in warer hoffnung vnd langmütigkeit/ vnd in allem gutem/ biß auff den tag/ so du kommen würst/ vnd an deinem heilgen volck leysten/ alles dz du jnen je verheissen hast/ So du die böck vonn den schaffen scheiden/ die spreuwer von dem weytzen schwingen/ vnnd alle vnglaubige falsche menschen/ vonn deinen glaubigen warhafftigen Christen/ sündern wirst.

So man auch dann zumal dein heilige Christenliche kirche auch zum ersten mal vor augen sehen vnd erkennen wirt. Da helff vnd Got durch dein genad vnd barmhertzigkeit/ das wir vnder der zal der gesegneten ewigklich erfunden werden. Amen.

Warumb sagstu/ du glaubest an die verzeihung vnd ablassung der sünd.
Was ist sünd?

Wann Gott etwas gebeut das man thun soll/ oder verbeut das man lassen soll/ vnd der mensch thut oder laßt das selb nit/ so ist die vngehorsamkeit ein sünd wider Gott.

Wer sagt mir aber was Gott gebeut/ oder verbeut?

Dein eygne gewissen vnd hertz sagt dir es in vil weg/ vnnd die natur leret es dich/ das du solt Gott über alles lieben/ vnd in allweg vor augen haben/ vnd darnach deinen nechsten/ als deines gleichen vor Gott erkennen/ vnnd einem jedenn thun/ wie du wilt das man dir thu/ vnd was du wilt überhebt sein/ das du des selben jederman auch überhebest.

Doch über das/ so ist die heilig gschrifft nichts anders/ dann ein buch darin geschriben stat/ was Gott haben wil vnd nit haben.

Wer hat die erste sünd wider Got gethan?

Die aller ersten menschen Adam vnnd Eua/ die es am aller wenigsten solten gethon haben.

Wie ist das zugangen?

Do sie Got erschaffen hat/ setzt er sie in einen feinen lustgarten vnd Paradiß/ das sie das selbig vnd die gantze weite welt/ mit allen lebendigen vnnd vnlebendigen creaturen/ solten innhaben vnd besitzen/ gab jnen darzu vil gnaden vnd gaben deß heiligen Geists/ vnd einen freien gewaltigen willen/ recht mögen zuthun/ wann sie wölten.

Doch damit sie wißtenn das sie nit vonn jnen selbs/ zu so grossen zeitlichen vnd götlichen ehren kommen weren/ gab er jnen ein schlechts gebot/ erlaubt jnen alles zuniessenn/ das sie gelust im gantzen Paradeiß/ außgenommen/ vonn eim einigen baum/ der hieß/ Erkandtnuß gutes vnd böses/ verbot jnen bei leib vnd seel sterben/ das sie nit dauon soltenn essen/ oder sie würdenn des tods sterben/ vnnd wol innen werden was gut vnd böß were/ das redt Gott mit jnen.

Do kam der Teuffel in einer schlangen gstalt/ die do zumal noch ein gheims lieplichs thier was vnd redt auch mit jnen/ sagt es hette nit die meynung/ wie Gott mit jnenn geredt/ Gott wißte wann sie dauonn ässenn/ das sie mechtig/ gelert/ kunstreich vnd klug/ darzu Got gleich würden/ das redt der Teuffel mit jnen.

Die red bewegt das weib Euam/ vnd war der baum sunst für sich selbs mit der frucht/ feinn lustig vnd lieblich/ vnnd die vrsach war auch fein/ da sie so klug wie Got werden solten/ brach also die frucht ab vnd aß/ gab auch dem man der aß mitt.

Also verachten sie beide Gottes wort vnd gebott/ vnnd wurden dem Teuffel gehorsamer dann Gott. Das ist die erste sünd gwesen wider Gott.

Was sagt aber/ vnd was thet Gott darzu?

Er verflucht die schlangen/ dz sie ein verworffen thier sein solt/ das sie solt auff dem hertzenn kriechenn/ vnnd erd fressenn all jr lebenn lang/ vil mer verfluchet er den Teuffel also/ der so ein schedliche gifftige schlang gewesen/ vnnd noch teglich ist.

Das weib strafft er/ das sie vil kommer haben solt/ die weils schwanger wer/ vnd wenn sie geberen wölt/ so müst sie auch groß angst vnd not haben/ vnd die weil sie Gott nit het wöllen fröchten/ so müste sie den menschen förchten/ vnnd sich vor jrem eignen man ducken vnd schmucken.

Dem man legt er vil arbeit auff vnd übelzeit/ vnd das jm dannocht nit nach seinem sinn gohn solte/ Das feld solt verflucht sein/ vnd er solt sich kümmerlich mit seiner arbeitt vnd schweiß erneren.

Vnd über das leiplich ellend/ müßten sie beide/ auch jnnerlich in jremm hertzen/ zu spott vnnd schand werdenn/ Verloren damit auch die gaben des heiligen Geists/ vnnd den gwaltigen freien willen/ wann sie schon gern hetten wöllenn recht thun/ so vermochtenn sie das nit mehr. Vnnd zu letst solten sie über alles/ auch des bitterenn tods sterben/ vnnd ewigklich verdampt sein/ an leib vnd seel.

Also wurden sie auch auß dem Paradiß triben vnd das selb verschlossen/ das man auff den heutigen tag nit weyß/ wo es gewesen ist/ so zu feinen Göttern/ vnd klugen leuten wurden sie/ vnd wißten so fein was gut vnd böß/ das sie am leib/ an allen glidern/ im hertzen/ im leben/ im sterben vnd an allen creaturen/ empfinden vnnd erfaren müßten/ wie so böß ist wider Got sünden/ vnd so gut gewesen wer/ wann sie des teuffels rath weren müssig gangen/ vnd hetten Gott vor augenn gehapt. Aber es ist leyder nit geschehen/ vnd hat der mensch auch noch seinen starcken lauff/ vonn allem guten/ zu allem bösen.

Ists aber nit mer dann die einig sünd/ das die ersten menschen vom verbottenen baum gessen haben?

Du magst wol nun für ein einige sünd haben/ aber in der einigen ersten sünd/ wirt begriffenn/ alles das man wider Gott/ synnen/ dencken/ reden vnd thun kan/ vnd alle sünd die in der weltt seind/ haben daher jren anfang/ vnnd ist also nit mer dann ein böse wurtzel/ vß der so ein böser baum gewachsen ist/ mitt souil hundert tausent bösenn ästen/ die gsteckt vol seind aller bösen/ vnzeitigen/ vnd ia nun zu frü zeitigen früchten vnd süünden/ die man täglichs vnnd hauffenweiß thut wider Gott.

So hör ich wol/ Adam vnd Eua leben noch auff erden?

O wie wer es so gut das sie todt weren/ aber die schlang/ ia der selbig Teuffel/ lebt auch noch/ vnd was wer zum ersten thet das thut er noch/ Was Adam thet/ das thun noch alle mann/ was Eua thet/ das thun noch alle weiber/ was sie beyde thetten/ das thund noch alle menschen/ Sie beyde sündigeten zum ersstenn wol allein/ aber do sie anfiengen kinder zuhaben vnd menschen zeugen do wurdens gleich wie sie/ vnnd die aller letsten menschen/ werden von natur gleich wie die aller ersten.

Der Teuffel thet große lügen/ das thut man noch. Der Teuffel war neidig vnd hessig/ das ist man noch. Der Teuffel bracht die menschen vmb das leben/ das thut man noch.

Er redet Gott nach/ darumb ist die welt auch noch vol nachred.

Der man solts weib gemeistert haben/ das sie nit wider Gott thete/ erthets aer nit/ das thut man auch noch nit.

Der man ließ sich das weib verfüren/ das geschicht vff den heutigen tag vilfeltig.

Das weib war fürwitzig/ schleckerhafft/ hoffertig/ das seind sie noch.

Sie beyde waren Gott vnghorsamm vnnd verachteten sein wort vnd hieltens für ein schimpff/ das thut man noch/ ia vil veruolgennds biß zum tod/ das thetten dannocht die ersten menschen nit.

Sie wolten klug vnd weiß werden/ vnd hetten einn stoltzen sin/ das hat der mensch noch.

Das weib entschuldiget sich mit der schlangen/ der man mit dem weib/ Also entschuldigenn sich die menschen noch heut deß tags/ in allen dingen/ die gleich offenlich wider Gott seind.

Vnnd summa/ wie ein mensch vom anderen den leib erbt/ mit vil gliidern/ henden/ füssen/ augen/ ohren/ mund/ kopff/ naßen/ schenckel vnd der geleichen/ vnd das vonn dem ersten menschen an/ biß vff den letsten/ Also erbt auch ein mensch von dem andern ein böse natur/ mit vil bösen stucken/ ddie im leib/ hertzen vnd allen glidern/ wurtzlen vnd auffwachsen.

Vnd Summa summarum/ der Teuffel/ Adam vnd Eua leben noch hert vnnd starck/ von der iugent an/ biß in das todtbet/ vnd gar in das grab.

Sündiget dann der mensch auch in der iugent?

Sihest du das nitt/ wie die iungen kind zürnen/ kratzenn/ beissen/ schleckenn/ liegenn vnnd stelnn/ vil schwetzenn/ vorteilig vnnd vngehorsam seind/ nitt gern betten/ vil eh schweren künden dann betten/ vnnd das sich die vnreinigkeit des fleyschs/ auch in der wiegen erzeyget/ ehe sie wissenn was recht/ odder vnnrecht sei/ noch so wirckts die böß natur in jnen vnd die Erbsünd/ vnnd sihestu die iugent nitt sünden/ so bisto doch gar blind.

Ich sihe sie ia wol sünden/ vnnd vil vnrechts thun/ ich meynt aber nit das also sünd were/ die weil sie nit wissen was gut oder böß?

Es hat ein jeder mensch zweierley sünd vnnd schuld/ ein frembde vnd eigne/ Die fremd sünd/ ist die Erbsünd/ in der selben wirt er empfangen vnd geboren/ daher wirt er gneigt zum böösenn/ hundertmalen mer dann zum guten/ daher kompt es/ das der mensch nit allein geneygt ist/ sonder auch eine lust hat/ zu allem das wider Gott. Warumb ist das kind lieber auff der gassen dann in der schul? Warumb ists lieber frey/ dann vnder der ruten/ Warumb verlangets so übel/ das es der ruten entwachse? Warumb geht die tochter lieber zum dantz/ dann in die kirche? Der iung gsell lieber zum wein/ dann da man fastet? Vnd summa warumb ists allen menschenn so ein groß creutz vnd leiden/ das böß lassen/ vnnd das gut thun? Darumb. Do seind wir in sünden empfangen vnnd geboren/ vnnd haben vns die zwei erstenn menschen den lust des hertzen zu Gott verschlecket/ vnd seind wir jres stammens vnnd namens/ darumb glus vns auch nichts guts/ vnd das ist ein frembde sünd vnd schuld/ dann da künnen wir nit für.

Darnach ist ein eygne sünd vnd schuld/ die fahet an/ so bald sich der iung oder als mensch anfacht auff das böß vnd gut verston/ vnnd wissen was recht oder vnrecht ist/ was Gott haben wil/ Wann er dann anfahet der frembden sünd vnnd innerlichen neigung der natur/ eusserlich volgen/ vnd thut das jn anficht/ das ist dann eygne sünd vnnd schuld/ der es gar nit dürffte/ dann es wer an der frembden sünd gnug/ vnd nun zuuil.

Gib mir ein exempel das ich den vnderscheyd wol verstand?

Es ficht einen menschen an die vnreinigkeit deß fleischs/ hoffart/ zorn/ das ist ein fremde sünd/ da kan er nichts für/ Darnach aber so sucht er vonn stund/ vrsach/ ort vnd end/ das er seiner anfechtung gnug thu/ das ist dann sein eygne sünd vnd schuld.

Vnnd das du sollichs noch baß verstandest. Durchschlecht/ rotsucht/ flüssig köpff/ vnnd der gleichen/ das der mensch mitt jm von vatter vnd muter an die welt bringt/ das seind wohl kranckheiten/ aber frembd/ dann es müssens kind haben/ die nit zuuil weder gessen noch truncken haben.

Ists dann sach/ das den menschen glust zu prassen/ schlemmen vnd schlecken/ wol zuessen vnd trincken/ so ist der lust noch ein frembde sünd vnd schuldt/ die wirckt in jm kein kranckheyt/ Dann es muß jjn lang lusten/ das er vol dauon werd. Fahet er aber an fressen/ sauffen/ prassen vnd schlemmen vnd sich füllen vnd von dem vnordenlichen/ überflüssigen/ schleckerhafftigen leben/ kranck werden/ hauptwee/ vil flüß/ kaltwee überkommen/ ietzz ist die kranckheit eine eigne sünd vnd schuld.

Da helff vns Gott/ dz die gantz welt so voller eigner vnd frembder sünd vnd schuld ist/ wider Gott.

Nach der rechnung/ so wer doch kein mensch vff erden frumb vnd on sünd/ weder iungs noch alts.

Ja die geschrifft sagts/ das nit einer sei/ vnnd wer da sagt dz er on sünd sei/ in dem sei die warheit nit/ Dann hette einer schon kein eigne eusserliche sünd/ so hette er doch frembde vnd innerliche/ vnnd wer sein sünd recht bekennen wil/ der muß sprechenn/ Ich soll eben gar nichts/ vonn natur vnnd von mir selbs/ Vnnd wer die sünd nicht also bekent/ vnd jn also auch reuwet/ der ist ein rechter gleißner/ wie deren vil warenn zur zeit Christi/ vnd noch/ vorauß der zu Christo sagt/ er hette die gebott Gottes alle gehalten von iugend vff.

Villeicht hatt ers aber gehalten so vil jm müglich war.

Das laß ich nach/ so vil im möglich/ wie aber/ wans weder im noch keinem menschen möglich ist zu halten/ vnnd es kein mensch nie gehaltenn hat?

Dann hat ein mensch gleich vil gebott gehalten/ so hat ers doch nit alle gehalten.

Hat ers gehaltenn mitt werckenn/ so hat ers doch nit gehalten mmit worten.

Hat ers gehalten mit worten vnd wercken/ so hat ers doch nit gehalten mit dem hertzen.

Hat ers ghalten eusserliich/ vnd nie abgötterey getriben/ nie geschworen/ vatter vnnd muter nie enteret/ nie tödt/ nie gestolen/ nie die ee gebrochen/ nie gewuchert/ vnd der gleichen/ noch so hat ers innerlich im hertzen nit gehalten/ vnnd ist so frumb nit das jn nie nichts wider Gott glust hab.

Vnd was ist doch das erst vnd letst gebot/ ia das einig/ in dem alle andere begriffen werden?

Du solt Gott lieb haben/ auß gantzem hertzen/ seel/ leib vnnd allen krefften/ vnnd den nechsten wie dich selbs.

Wer nun das gebot/ mit allenn andern die jm anhangen/ mit worten/ wercken/ willen/ gdancken/ on frembde vnnd on eygne schuld/ gehalten hat/ der ist frumb/ wer es nit der massen gehalten hat/ der ist nit frumb vor Gott/ vnd also seind alle menschen von dem aller erstenn an/ biß auff den aller letsten/ vßgenommen ein einigen menschen/ der ist Jesus Christus der sun Gottes.

Wann du mir das alles mit einem wort sagen kündtest?

Ich wolt dirs wol zum ersten mit eim wort gesagt habenn/ ob du es aber recht verstandenn hettest/ das weyß ich nit/ Aber Christus spricht/ Was vom fleisch ist/ das ist fleisch/ Da hastu des menschen herkommen/ natur/ eigenschafft/ verdamnuß/ vnd alles samen.

Seind dann alle menschen der natur halb den ersten menschenn gleich/ vnnd ist alles fleisch von fleisch/ sünd von sünd/ so trifft freilich die straff Gottes auch alle menschen an/ vnnd wie die sünd gemeyn ist/ also ist freilich die straff auch gmeyn?

Es ist ein leibliche vnd seeliche straff/ über die ersten menschen gangen/ vnd die beid/ gehn auch über alle menschen.

Darumb gibt das feldt nitt mehr frucht/ wie wir gern wölten.

Darumb legen wir vil arbeit an ein ding vnd geht vns nit mer von handen/ Wann wir wölten es were schön/ so ist vngewitter.

Wann wein vnd korn hüpsch ist auff dem feld/ so schlechts der hagel.

Wann wir gern reich werenn/ so müssen wir arm sein.

Darumb freurt/ hungert vnd dürst vns.

Darumb haben die weiber vil angst vnd not/ die weil sie tragen/ die weil sie geberen/ die weil sie die kindt auffziehen. Vnnd würt jr arbeit offt verloren darzu/ dann Gott hat an Adam vnd Eua sein müh vnd arbeit auch verloren.

Darumb ist vns gar kein creatur mer so gehorsam als sie vorhin gewesen were.

Darumb müssen wir ietz vil thier förchten/ über die wir solten herren gewesen sein.

Darumb fressen vns die wölff/ vnd plagen vns die leüß/ flöch/ fliegen vnd vil anders mehr.

Darumb müssen wir übel zeit haben/ ehe wir lernend erkennen/ was allerley naturen seien/ der vernünfftigen vnd vnuernünfftigen creaturen.

Darumb seind so vil gepresten vnd krankheyten/ leiden vnd Creutz auff erden.

Darumb ist ein iung kind in die wyegen so vnbeholffen/ als kum ein vnuernünfftigs thier.

Darumb müssen wir durch all vnser leben/ so offt vnd dick mortio/ ach vnd wee schreien.

Darumb muß das alter so schwach/ ellendt/ krumm vnd lamm sein/ keine zän/ graw har habenn/ halb blind sein/ nichts gehören/ zum stummen/ vnd also gestalt werden/ das er kum einem menschen mehr gleich sihet.

Darumb seind wir wedder iungs noch alts/ eins augenblicks vorm tod sicher/ wissenn so gar nit/ wann vnd wie es muß gestorben sein/ vnd das dennocht mit grosser angst vnd not.

Das vnnd der gleichenn/ seind alles leibliche straffen der sünde.

Das hertz vnd gewisse muß auch gestrafft sein.

Darumb seind wir so zab vnd forchtsam.

Darumb wenn sich nur ein meußlin regt/ so meynen wir es sei ein gespenst.

Darumb ist der tag so vnsicher/ vnd die nacht so vngeheur.

Darumb haben wir so vil fantaseien/ schwer zufäl so wir wachend/ vnnd souil schrecken vnnd schwere träum.

Darumb steckt das hertz vol sündtlicher anfechtung.

Darumb ist die gewissen so verzweifflet/ vnd muß die arm seel zu letst auch gar verdampt werden.

Das vnd dergleichen/ seind alles seelich straffen der sünden/ vnnd wo sünd ist/ da ist auch die straff der sünd.

Was ist aber Gott der nöt angangen/ das er die ersten menschenn also hat lassen in die sünd fallen/ die weil er es vorhin gewißt hat/ das sie würden sünden/ vnd er het wol künden daruor sein?

Redest du das von hertzenn/ so hastu ein recht unglaubigs hertz/ schimpfftest dann/ so were besser/ du schimpfftest mit wasser/ Manfindt aber dannocht die den handel von dem ersten menschen vnd Gott/ Von der Geschrifft vnd Glauben/ gar für ein narrenwerck habenn/ Ey sprechents/ Solt Gott mit dem ding also vmbgangen sein? Aber gleich also redet auch der Teuffel zum aller ersten/ vnd do Gott sagt zu den ersten menschen sie würden des tods sterben/ sprach der Teuffel auch nein darzu/ Also sagenn auch vil menschen/ nein/ wann Gott sagt/ ia/ darumb hast auch du ietz ein fürwitzig vnnd vntrew wort geredt.

Warumb wundert dich nit so bald/ das Gott so gut gewesen ist/ das er den ersten menschenn nit mer dann ein einigs vnd schlechts gebot auffgelegt hat/ soltenn sie nit einen apffel haben mügen lassen vmb Gottes willenn? wie wann er jnen gar einen fastag gepoten het? Weres du an Gottes statt gewesen/ vnd hettest einen menschen nun halb so herlich erschaffenn/ du würdest jm wol andere gebott auffgelegt habenn/ damit du der herr/ vnd er den knecht bliben were.

Warumb wundert dich auch nit seiner grossen gnaden/ des geists/ vnd des freien willens/ daher sie wol hettenn mögen nit vnrecht thunn/ wan sie hetten wöllen?

Vnnd wie/ wann jnen Gott das vermögen/ zum willen/ nit geben het/ oder den willen auch nit/ solte darumb die schuld der sünd/ Gott geben werden?

Solt die axt bochen wider den der sie füret? Solt der leym zum haffner sagen/ Was machest du? Solt das kind zum vatter sprechen/ was gepirstu? vnd zur muter/ was kindbetestu? oder solten wir auch Gott nachreden/ wie etwa das Jüdisch volck/ vnd sagen/ Ey vnsere älteren haben saur trauben oder winter trollen gessenn/ vnd es müssen vns die zän darnach ergelen?

Klägte aber iederman ab jm selbs/ vnnd nitt ab Gott/ das were vil seliger/ odder gieng ieder man der spitzfündigen fragen müssig/ vnd trachtete wie er am letsten tag/ Gott vff seine sschlechten fragen antwurten wölte/ dann es würt sich wol finden/ on alle liebe Gottes/ vnnd des nechsten/ leben/ vnnd dannocht darneben so klug vnd gelert sein wöllenn. Der Teuffel lert die erstenn menschenn auch so klug vnnd glert sein das geht vff den heutigenn tag noch vylen nach/ zu Gottes vnehr/ vnd jrem schaden.

Nein ich hab das nit gesagt/ als auß meinem hertzenn/ dann allein das die welt offt also redt vnd glaubt. Aber sag mir/ wie lang steht der handel des menschen also/ der sünd vnd der straff halb/ weret es immer ewigklichen?

Ja immer vnd ewigklich/ Es sei dann sach/ das der widerumb helffe/ wider den die sünd geschehen ist/ vnnd er vnns die sünd auß genad vnnd barmhertzigkeit verzeihe vnd vergebe.

Wie kans aber Gott thun/ die weil er gerecht ist vnnd das höchst gut/ der von natur alles vnrecht vnd böß straffen sol vnd muß.

Es möcht einen noch wol wunderen/ ia es möcht einen guthertzigen menschen/ der dannocht nach Got etwas fragt/ wol in grosse angst vnd not füren/ ia der allein seinen sünden/ der straff/ vnnd der gerechtigkeit Gottes nach dächte.

Aber wie Gott von natur gerecht ist/ also ist er auch von natur gütig/ trew/ gnedig/ barmhertzig. Vnd strafft Gott/ der gerecht/ so verzeicht Gott der barmhertzig.

Woher soll ich aber das wissen vnd verstehn mügen/ das Gott also barmhertzig sein wölle?

Die weil der Teuffel durch die schlangenn die erst vrsach gewesen war der sünd/ darumb strafft Gott jn zum aller ersten/ vnnd bezalt im sein geleichs mit gleichem.

Er hat gemacht/ das die erstenn mensschen nit auffrichtig vor Gott wandleten/ so soltt er auch ewigklich auff seinem hertzen kriechen/ vnd das selbig nagen vvnd fressen/ vnd nimmer mer kein ruwige gwissen noch zuuersicht zu Got haben mügen.

Er hat die ersten menschen verursacht/ das sie durch speiß vnnd schleck Gott hatten verachtet/ so solt er ewigklich erd fressen/ dz sölt sein schleck sein/ vnd sölt mit den worten vnd wercken Gottes nümmer mer weder gespeyßt noch getrenckt werden.

Vnd gleich auff den fluch/ verhieß er von stund ansein barmhertzigkeyt/ Nämlich/ die weil er/ der teuffel/ das weib durch falsche liebe verfüret hette/ so wölt er feindtschafft vnnd vneinigkeytt machen zwischen jm vnd eim weib/ vnd die weil er das weib zum werckzeug gbraucht hette aller sünden/ so wölte er hernach auch ein weib/ ebenn zum widerspyl brauchen.

Es sölte auch feindtschafft werden/ zwischen des teuffels somen vnnd des weibs somen/ dass ist zwischen allen die dem teuffel/ vnd hinwider/ die dem somen würden anhangen/ nachschlahen glauben vnd volgen/ sagt auch darbei/ der selbig som/ wurde dem teuffel den kopff zertretten/ dz ist/ des teuffels reich solte überwunden werden/ vnd dz nit allein stuckweiß/ sunder im grundt/ solte die hauptsünd hin sein/ mitt allem anhang/ das würd des weibs somen eygenschafft vnd vermügen sein.

Aber alles vermögen des Teuffels vnd seiner kind/ wwürd nichts anders sein/ dann feindschaffz/ vnd dz er den somen würd in die ferßen beissen/ das ist/ die weil der künfftig som des weibs/ der Christus ist/ würde mit seiner leer/ leben/ worten vnd wercken/ den vnreinen Teuffel außtreiben/ vnnd jn mit füssen trettenn/ darumb würd er jm auch nit holdt kündenn sein/ sonder wo er jm möcht hend vnnd füß abbeissen/ ia gar vmb das leben bringen/ so würd ers thun.

Also hat Gott im Paradeiß anfenckglich geleich als die sünd beschehen/ den teuffel verflucht einsteils/ vnnd den somen verheissenn/ anders teils/ Des gleichen7 diß sein erst verheissen/ den ersten menschen gethon/ hat er auch nachgender zeit/ vilen frrummen vättern/ vnd durch vil Propheten befestiget.

Vnnd daher magstu nun gwiß sein der barmhertzigkeit Gottes/ die weil er sich in der verheissung/ vnser so treulich hat angenommen/ darumb jn niemants het dörffen bittenn/ ia dauonn niemants hette künnen argwonen.

Hat aber Gott sein zusagen gehalten vnd den somen geschickt?

Ja treulicher hatt er es gehalten/ dann jm kein mensch het dürffen zumuten/ Dann er hat JEsum Christum den Götlichen somen/ on mans somen/ vnnd doch von eim weib lassen geborenn werdenn/ vnnd durch denselben die gantze welt heimgesucht/ ne das er sie/wie Adams vnnd des teuffels som/ verderbte/ sonder selig machte.

Triffts aber iederman an/ das Gott den somen verheyssen/ vnd geschickt hat?

Trifft nit die sünd/ die straff vnnd gerechtigkeit Gottes/ iederman an? So ists auch von nöten das die verzeihung der sünd vnd Gottes gnad/ iederman antreffe.

Vnnd alle menschen die jr ellendt herkommen vnd bresthafftige natur/ auch jreigen sündelichs wesen ie erkant haben/ vnnd nach der verheissung Gottes vff den somen gehoffet. Deßgeleichenn die geglaubt/ das des teuffels fluch/ vnser segenn/ Die verlogene freundtschafft des Teuffels/ eytel Gottes feindtschafft/ Die verschuldte feindtschafft Gottes/ widerumb auß gnaden vnd vnuerdient/ zu freundtschafft worden were/ Die habenn sich durch die hoffnung vnnd den glauben/ widerumb vom teuffel zu Gottj bekert/ vnnd seind jnen jre sünd verzigen/ vnnd ist jnen geschehenn wie sie geglaubt/ seind also auß Adams kindern/ Gottes kinder wordenn/ das seind Christenn gewesen/ vnnd seind es noch/ vnnd werdens sein ewigklich/ vonn dem ersten menschen an/ Ja der also von Gott halten vnnd glauben würt/ Vnnd hinwider/ alle die nit also vonn Gott halten vnnd glaubenn/ ob sie gleich wol sunst Hunderte Tausent glaubenn vonn Gott hetten/ vnnd durch vil ander weg wölten verzeihung der sünden erlangen/ vnnd dadurch frumb vnnd selig werden/ die gehn nit den weg/ den Gott verheissen vnd verordnet hat/ darumb es auch alles falscher glaube/ falsche hoffnung/ vnd nichts dann irthumb ist. Das gebe der gütig Got allen guthertzigen menschen zu erkennen/ dann es will sunst schir gleich geltenn/ was die weltt glaubt.

Werden aber alle sünd durch den weg verzygen?

Ja alle die der mensch bekent/ vnd jm von hertzen leid seind/ sie seien frembd oder eygen.

Wirt aber die straff auch verzygen?

Die straff der sünd/ die den leib vnd das zeitlich antrifft/ wirt nit verzygen/ dann du must lang glauben/ das du darumb kein creutz habest/ nitt kranck werdest vnd sterbest.

Also beschicht der gerechtigkeit Gottes deßhalb gnug/ so die leiblich straff fürgeht.

Aber das auch der barmhertzigkeit Gottes genug beschehe/ so wirt die seelich vnd ewig straff/ vnd die verdamnus der seel/ auß gnaden nachgelassen vnd verzygenn/ Darumb solten wir auch wol zu friden/ vnd nit so vngern arm/ ellend/ vnd kranck sein/ noch so vngern sterben/ die weil vns Gott die plag vnd straff der ewigen verdamniß nachglassen vnnd geschenckt hat/ Aber die welt möcht leiden/ das kein zeitlich creutz wer/ Gott geb wie es der seel hernach gieng/ darumb stelt sie auch tag vnnd nacht mer nach guten tagenn/ dann nach der seligkeit selbs/ Vrsach/ sie erkent weder jr sünd/ noch die verzeihung der sünd/ weder den gerechten Gott/ noch den barmhertzigen Gott.

Sol aber der mensch des versischeret sein/ vnnd sich der verzeihung der sünd an der seel gentzlich zu Got versehen?

Ja der mensch/ der Gott von hertzen darumb treuwet vnd glaubt/ vnnd der nit mit dem Teuffel auff dem bauch kreucht vnnd erdt frißt/ der Gottes verheyssung vnnd dem somenn nit feind ist/ vnnd jn mit dem Teuffel nit gern wölt in die füß beissen/ sonder der auffrichtig wandlet vor Got im glauben/ vnd des speiß/ narung/ auffenthalt/ leben vnnd sterben/ nichts anders ist/ dann Gottes wort vnd werck/ der selb mensch würt sich der verzeihung der sünd durch Jesum Christum den somen Gottes trösten mögen.

Was gibst mir aber für ein warzeichen das ich es glauben künd?

Eben der son/ Jesus Christus/ ist das waarzeichen/ den hat der almechtig Gott vnd vatter/ zu eim pfand vnd ebenbild seiner liebe vnnd genad/ der gantzenn welt dargestelt/ damit nit allein die guthertzigen/ gewiß vnd getröst würden.

Du machst in so gwiß/ wo mit wiltu aber so gwiß machen/ dann du sagst/ Christus Jesus sei der verheissen son/ der die sund verzeyhe/ vnnd in den wir glauben söllend?

Do das Jüdisch volck auff ein zeit widder Gott sündet/ vnnd Gott schlangen schickt vnder das volck/ die feur speieten vnnd das volck vmbrachten/ Wer machet sie dozumal widerumb gewiß der barmhertzikeit Gottes? Sagt nit Gott zu Mose/ Mach dir ein eerene schlangen/ vnnd richt sie auff zum zeichen/ wer bissen ist/ vnd siehet sie an/ der sol leben/ vnd es geschach also?

Hat aber nit der teuffel auch durch die schlangen feur gespeiet? hat er nit alle menschenn vergifft? So ist nun das Creutz jesu Christi/ an dem er on vrsach erhangenn/ auch das aller gwissest vnd recht lebendig zeichen/ der barmhertzigkeit Gottes/ vnd ist der sun Gottes/ also vffghenckt worden/ damit wer in jn glaube nit verderb/ sonder hab das ewig leben/ Da helff vns Gott zu.

Ja mann hat aber nit vil glaubens an das Creutz/ vil machen nur ein gespöt darauß/ vil ergerend sich darab. Vnnd falt dir nit etwan zu/ das es dannocht ein seltzams ist/ müssen verzeihung der sünd/ vnd Gottes gnad erlangen/ durch den der gesagt/ er sei der war sun Gottes/ vnd ist dannocht creutziget worden?

Für zufel kan niemand/ aber den züfellen glauben/ das ist ein grosse sünd/ vnd es falle zu/ spot oder ergernuß/ so hats laso sein müssen/ vß zweien vrsachen. Die erst/ damit vnser ewigs leiden/ verderben vnd grosse schuld/ durch das vnschuldig sterben Christi/ am Creutz gebüßt vnd abgewäschen würde/ vnnd der gerechtigkeit Gottes also gnug geschehe/ Vnnd wie ist es möglich gewesen/ das der gantzen welt sünd/ on Creutz vnd leidenn abtragen würd/ die weil es Gott geredt hat/ man müste des tods sterben/ so man sein gebot übertretten würd/ So es dann tausentfeltig übertretten ist/ vnd Gott muß gerecht vnd warhafft sein/ so muß es auch des ewigen tods gstorben sein/ Darumb so stirbt Jesus Christus zeitlich/ damit wir nit sterben seelich/ Vnd stirbt on schuld vnnd sünd/ das vns die sünd verzigenn/ Vnd stirbt am holtz des bittern creutz( damit die sünd an dem lustigen baum geschehen/ abtragen wurd/ vns stirbt schantlich/ der nie kein schande begangen/ damit wir schantlichen menschen/ wider zu der ehr Gottes kummen möchten.

Des ist das creütz vnd leiden/ das aller gwißest zeichen/ Vnd nimpst du das creutz vnnd den tod hin/ so lug wie du das vrteil Gottes tragenn vnd ewigklich erleiden wöllest/ vnd stirb du des ewigen todes in des tteuffels namenn/ für deine eigne vnd frembde sünd/ so darff Christus nit in Gottes namen für dich sterben. Wiltu aber lieber einen anderen sehen sterben on sünd vnd zeitlich damit du nit müssest sterbenn in der sünd/ vnnd ewigklich/ so danck Gott vmb das creutz/ ja vil mer vmb den leib/ der daran gestorben/ vnd das blut/ das daran vergossen ist/ vnd am aller meisten vmb den treuwen dienst Gottes/ den er dir/ mir/ vnd allen menschen hierin als ein vater bewisen hat. Ist aber die ewig verdamnuß/ der fluch vnnd das vrteil der gerechtigkeit Gottes/ ein schimpff/ so sei das Creutz/ Christus/ der Sun vnd Gott der Vatter/ auch ein schimpff.

Was ist aber die ander vrsach?

Weltliche weißheit/ kunst vnd klugheit/ ist auch ein vrsach/ dann die weil man Gott durch die selbe nit wil noch kan erkennen/ so hats Gott also gefallen/ zu trost allen einfeltigen menschen vnd zu spot vnnd schand der stoltzen welt/ die so gar nit glauben wil/ wie es Gott machet.

Handlet er weißlich vnnd künstlich/ vnnd gibt weißheit vnnd kunnst/ so wils die welt nitt verstehn/ warumb es Gott gibt/ mißbraucht es also zu vil dingenn/ darumb es Gott nit geben hät.

Handelt dann Gott auff torliche weiß/ so hat die welt erst nichts darauff.

Christus handlet weißlich vnnd gwaltigklich in seinen wortenn vnnd werckenn/ noch so nimpt es die welt nit an.

Christus handlet torlich vnd wil gern für die welt sterben/ so laßt sie jn nit natürlich/ sonder er muß schamlich sterben. Wie es nun Gott anricht so kan er weder der geistlichen noch der fleischlichen welt/ recht thun.

Aber ergere sich/ spotte/ vnnd verachte wer wol/ diß Creutz ist dz panier der warhafften Christen. Am holtz des lebens/ verschuldt Adam den tod/ Am holtz des tods/ verdient Christus das leben. Am holtz des lustigen baums/ sündiget Adam/ Am holtz des Creutz/ büßt vnnd verzeihet Christus alle sünd.

Ey es verspottet vnd verachtet dannocht niemants also das werck Gottes/ ob er jm gleich nit aller ding glaubte.

Ja wol/ der gröst ernst Christi/ ist bei der welt der gröst spott vnnd schimpff/ ia nichts dann gotßlestrung.

Wil Christus durchs leiden die sünd verzeyhen/ so verbindt man jm die augen/ vnd schlegt jnn an hals/ vnnd laßt jn radten wer er gethonn hab/ man setzt jm ein kron auff von donnen/ damit sein küngreich gnug veracht werd/ man legt jm ein narren kleyd an damit man sehe was man auff jm hab/ vnnd was schandtlicher spottwort muß er am Creutz hören?

Wil dann Christus die sünd verzeihen mit worten/ so sagt man es sei ein gotßlesterung/ Wil ers beweissen mit wercken/ die man augenscheinliche sihet/ so glaubt mans gleich so wenig.

Ja das haben etwan vnuerstendig vnnd ruchloß leut gethon?

O nein/ die aller gelertstenn der geschrifft/ die aller andechtigesten ordens leüt/ hieltenn so ergerlich von den worten vnnd wercken Christi/ wie herlich sie auch waren.

Darumb do Christus vff ein zeit zu eim gichtbrüchigen menschen sagt/ Deine sünd werdenn dir verzigen/ do murreten die geschrifft gelerten ab dem wort/ als hett er Gott damitt geschendt vnd gelestert.

Aber er gab jnen ein frag auff vnnd sprach/ Welches ist ringer zu sagen/ Stand vff vnd gang hin/ oder/ deine sünd werdenn dir verzigen/ als wölt er sagen/ Wann ich zu eim betsiechen spreche mit worten/ stand auff biß frisch vnd gesund/ nim dein bet vnd zeuch hin/ vnd es geschehe also mit der that sichtbarlich/ wölten jr nit glauben/ wann ich mit worten sagte deine sünd werden dir verzigen/ das es auch geschehe/ vnnd das ich an der seel vermage innerlich/ das ich an dem bresthafften leib vermüg eusserlich? Damit aber das sie vor augen sehen/ was jre lesterung/ vnd hinwider sein gwalt were/ sprach er trutzenlich/ Damit jr sehen/ das deß menschen sun gewalt habe/ die sünd zu verzeihen auff erden/ so stand vff/ sprach er zu dem betsiechen/ nimm dein bet vnd zeuch hin/ Vnd das geschach von stund an.

Also hat Christus beyde wort mit dem siechen geredt/ jm würdenn die sünd verzigen an der seel/ vnd das er gesund solte hin ziehen.

Die beyde wort Christti hort man mit den ohren/ so sahe man mit den augenn/ das der kranck das beth trug/ darinn er gelegen war/ vnnd den vorhin jr vier getragen hetten/ Vnd wie wol die geschriftgelerten sahen/ was Christus der kranckheit halb/ geredt hatt/ das es frei mit der that vnd warheit geschach/ noch wolten sie nit gelaubenn das es vß götlicher krafft/ auch alles anders frei geschehen möcht mit der that vnnd warheit/ das er redte mit worten/ vnnd müßten jnen die wort Christi/ ein vnwarhafftige/ vnd die gähe gesundtheyt des krancken/ ein falsche zeugnuß sein.

Aber hinwider glaubten auch vil/ vnd preißeten Gott/ vnnd sprachen/ sie hetten sollichs nie gesehen. Vnnd das ist auch war/ wie vil die welt auch Götter hatt/ vnnd wie manchen glauben/ noch ist deßgleichen nie erhört noch gsehen worden.

So thun die freilich größlich vnrecht/ die nit glauben?

Ja sie thun die gröst sünd auff erden/ die man thun kan/ dann der glaub verzeihet allein die sünd/ wo er nun nit ist/ da bleiben alle andere sünden/ die der mensch auff jm hat.

Wirt die sünd sunst durch kein anderen weg verzigen/ dann durch den glauben an Christum/ vnnd seine wort vnnd werck.

Es seind vil ander weg/ von menschen erdacht/ aber on verheissung Gottes/ vnnd warhafftige Euangelische wunder vnd zeugniß.

Die verheissung ist beschehen auff einen somen/ vnd nit auff vil.

Die menschen/ sie seiend lebendig oder tod/ haben alle sünd vnd schuld/ vnd beschleußt die geschrifft alle menschenn vnder die sünd/ auff das Gott sich aller erbarme.

Die weil dann Christus vmb der menschenn willenn/ vnnd nit vmb seins selbs willenn verdampt ist/ vnd alle menschen seines ampts müssen teilhafftig sein/ So mag auch kein mensch dz ampt Christi vertretten.

Das aber ein mensch das ander zu Christo weißt/ im namen Christi tröst/ vnd jm die verzeihung der sünd anzeyget/ das ist nit vnrecht/ aber dem/ das nit Gott ist/ zulegen/ das allein Gottes ist/ als glauben/ anbetten/ genad erwerben/ die seligkeit verdienen/ sünd verzeihen vnnd der geleichen/ das mag sich mit dem Christenlichenn glauben keins wegs vergleichen.

Gleich also ist es auch mit den worten vnd werken der menschen/ das sie den worten vnd wercken Christi/ keins wegs mögen vergleicht werden.

Ist aber die verzeihunng der sünd auß den wercken eines menschen/ so ist sie nit auß der genad Gottes.

Vnd so vns Gott vmb vnsers thuns willen/ vil bezalen sol/ so muß ers auß schuld thun/ vnnd wirt also genad/ nit mer gnad sein.

Aber Gott soll des billich überhept seinn/ das man ia nit vonn jm gedenck/ er hab vmb vnseres thuns willen/ diß oder ienes thun müssen/ sonder was er gethon/ thut/ oder thun wil/ das wil er vß freyer gnad vnnd schencke gethon haben/ so hat man jm auch recht darumb zu dancken.

Warumb steht dann so offt in der geschrifft/ wannn du das oder dises thust oder laßt/ so wirstu dis oder ienes erlangen/ selig sein/ gesegnet sein/ glück haben/ vnd widerumb rc.

Zum ersten/ wann schonn einer etwa vil thut das geschriben steht/ vnnd dardurch etwas verdiente odder bezalte/ noch het er es darumb nit alles abbezalt oder verdient.

Zum andern/ so seind dise geschrifften/ mir leiplich vnnd zeitlich verheissungen/ dannn seelich vnd ewig.

Zum Dritten/ so müssenn alle werck/ die Gott gebotten oder verbotten hat/ auß rechtem glauben gehalten oder nit gehalten werden/ vnd wenn das beschicht/ so seind die zeugen/ die bezeugen/ dz die sach des glaubens recht stehe/ oder nit. Vnnd daher redet man dann offt vnnd dick/ vonn den werckn/ wie vom glauben/ vnnd das des glaubens ist/ legt man jnen zu/ darumb das sie eusserlich anzeygen/ ob der glaub innerlich im hertzen sei oder nit.

Gib mir ein exempel/ so verstehe ich es dester baß.

Die schrifft sagt/ man sol die sünd ablegen vnd lösen mit almusen/ Wann nun ein Heid oder ein anderer vnglaubiger almusen gibt/ werden dem seine sünd verzigen/ vnd wirt er darumb selig? O nein. Warumb? Da ist er nit ein recht glaubger/ vnnd helt in der warheit nit recht von Got/ darumb gefalt Gott das werck nit anderst/ dann eben wie sein glaub/ Die weil es aber dannocht ein eusserlich werck ist/ so wirt die sünd gelößt/ vnd fürkommen/ die weil man dannocht dem gebot eusserlich gnug thut/ Noch hat er darumb nit seine sünd vor Gott büßt vnd bezalt/ in denen er empfangen vnnd geboren ist/ auch sunst darinn lebet.

So mags jm auch wol zeitlich von Gott bezalt werden/ vnd er schützt Gott dem riechen sein zeitlich gut/ darumb das er reichlich almusenn gibt/ vnd gibt Gott dem menschen gesundtheit/ darumb das er die krancken gern heimsucht/ vnnd fristet dem kind das leben/ das vatter vnd mutter in ehrenn hat.

Aber die freye vnnd ledige verzeihung aller sünden/ das die seel antrifft/ da ist kein Engel/ kein Heyd/ kein Mensch/ kein wort/ werck/ leben/ sterben/ kein himel/ kein erd/ vnd summa/ nichts überal/ das sollich außrichten möge/ außgenommen der einig glaub an die barmhertzigkeit Got des Vatters/ vns verheissen vnd erzeigt/ durch Jesum Christum seinen sun.

Darumb sprach Christus auch zu den Phariseern vnd gschrifft gelerten (deren leben dannoch nichts anders/ dann ein streng vnd ansichtig leben/ vnd jr thun nichts dann eytel Gottes dienst sein solt) Es sei dann sach/ das jr glaubenn/ das ist/ das jr lernen euwer grosse sünd vnnd schuld/ dargegen die barmhertzigkeit Gottes erkennenn vnd anruffen/ so werdenn jr sterben in euweren sünden/ Das gebe der barmhertzig Gott allenn menschen zu erkennen.

Muß man aber nit iemand haben gegen Christo/ der vns sein gunst erwerbe/ dann es thun fürsprechenn etwa gar wol.

Bei den menschen/ die weil vil auff sich selbs halten/ die wunderlich seind/ vnnd einer person geneigter/ dann der andern/ da muß man wol für sprechen haben/ wer num Christum für einen solichen hat/ des mag jm wol vmb fürsprechen lügen.

Er sagt aber selbs/ Kommen zu mir/ alle die jr beladen seind/ wie ich euch entladen. Das ist sein verheissung vnnd sein liebe/ vnnd das soll vnser vertrawen/ hertz/ sicherheit vnd glaub sein zu jm.

Vnnd also glaub ich an die verzeyhung der sünd/ von dem Vatter aller barmhertzigkeit/ im namenn Jesu Christi/ des suns aller liebe vnnd vnschuld.

Ich glaub auch/ das kein ander verzeihung der sünd sei/ weder im himel noch auff erden!

Deßgleichen/ so glaub ich/ wie mir niemandt nichts an dem stuck des glaubens gebenn kan/ also kan vnd mag mir auch niemand nichts daran nemen/ weder kleins noch groß/ Vnnd verzeihet mir Gott die sünd nit auß freyer gnad/ so verzeihet mir es wder himel noch erdtrich/ verzeihet mirs Got/ kan mir es weder himel noch erdtrich weren.

Ich laub auch/ wann ich aller welt gut hette vnnd tausent gesunder leib/ vnnd alle gesunde tag/ die je wurden/ wann ich den glauben an die treuw vnnd liebe Gottes nit hab/ so bin ich der ellendest mensch der je ward/ wann ich alle armut/ kranckheit vnd leiden het/ das je ward/ vnd all tag tausent mal vmb leib vnnd leben käme/ dz ich dannocht ein seliger mensch bin/ wann ich den glauben der verzeihung der sünd hab in meinem hertzen/ Das geb vns Got auch wol zu erkennen.

Glaubstu etwas mer von der verzeihung der sünd?

Ja ich glaube noch wol etwas mer vonn dem artickel/ Namlich/ das die verzeihung der sünden/ zwei ding wircken werd/ die mir der almechtig Gott geben wöll. Das erst/ das der glaubig mensch (dem die verzeihung der sünd recht würt zu hertzen gehn) auch iederman vnnd willigklich von grund seins hertzens verzeihen vnd vergeben würt alles das jm args widerfaren ist.

Das ander/ ob er gleich wol die sünd hinfür niit in all weg lassen kan/ vnd gantz on sünd sein/ sonderlichenn der erbsünd halb/ noch so würt er allem sündtlichem leben von hertzen feindt sein.

Die zwei stück/ namlich/ iederman auch verzeihen/ die sünd hatten/ vnnd leben in rechtem frid/ vnd nit auff die gütigkeit Gottes büberey treiben/ seind rechte danckbarkeit vor Gott/ vnnd der recht war Gottes dienst.

Vnnd vmb die zwei stuck wirt ein recht geschaffner Christ tag vnd nach bitten/ damit Got geprisen vnd gelobt/ er bei jm selbs vnnd jederman vonn jm seins glaubens gewiß werd/ vnnd spürenn mög/ das er die barmhertzigkeit Gotes nit rind/ sonder für das höchst werck achte/ das jm Gott beweisen künd vnd bewisen hab.

Du hast mir vil gesagt vonn verzeihung der sünd/ vnnd hatt sich der Artickel lang verzogen/ aber es ist schier das aller gröst dz du ietz gsagt hast.

Ich hab dir ia vil dauon gesagt/ aber du hast mich auch vil dauon gefragt/ Ich halt aber das letst/ auch für das gröst/ dann an den zweien stuck on lernt man wissen/ ob du nit alle inn den/ sonder alle andere Artickel des glaubens/ recht gelaubest oder nit.

Vnd an denen stucken/ verrat sich die welt mit jrem grossen vnglauben grob vnd offenlich gnug vnd die jetzig letst zeit/ vertat sich selbs auch/ das sie die zeit ist/ von der Christus selber klagt/ das die liebe erkalten/ vnd das man schir keinen glauben finden werd auff erden.

Da helff vns nun der barmhertzig Gott/ wider den wir tausentfeltig gesündiget habenn/ heimlich/ offenlich/ wissend vnd vnwissend/ auß frembder vnd eigner schuld/ vnnd sprech iederman.

Allmechtiger Gott/ wir haben gesündiget in himel vnd auff erdenn/ vnnd seind warlich alle sammen der verloren sun/ Biß aber du auch der gnedig vnd gütig Vatter/ Biß der gütig hirt der das verloren schaff sucht vnd findt/ Biß der herr der seinem knecht so ein grosse summa gelts frey schenckt vnnd nachlaßt/ Biß der zum betsiechen sagt/ deine sünde werden dir verzygen.

Ja es sei dir lob vnd danck/ das du solliches thun wilt/ bestettige nun das selb in vnser hertz/ das wirs ewigklich nimmer mer vergessen.

Güttiger Gott/ wiltu mir die sünd verzeihen/ wie mir Christus verheissen hat/ so behüt vnd beschirm mich/ das ich hinfür nit mer sünde/ vnnd mir villeicht nit ergers widerfare/ wie leider vilen beschicht/ die dein treuw vnd liebe treffenlich mißbrauchen.

Barmhertziger Gott/ gib mir grosse genad/ das dein grosse liebe gegen mir/ auch in mir ein gleiche liebe wircke/ gegen allen menschen/ freunden vnnd feinden.

Ach Gott/ das ich nit etwa thue/ wie der vnbarmhertzig knecht/ dem so vil guts beschehenn was/ vnd er aber mit seinem mitknecht so vntreulichen vmbgieng/ das mir nit auch etwan gange wie jm.

Almechtiger Gott/ das ich niemands engelten laß der mir leyds thut/ das ich nit böß mit bösem/ sonder mit gutem widergelte/ vnd gdencke das du dein sonnen täglich auch über mich armen sünder scheinen lassest.

Gütiger vnnd mein lieber Gott/ du hast mich gelert/ durch Christum/ ich soll meinem feind all teglich tag siben mal sibentzig mal verzeihen/ so bitt ich dich/ thu ein wunderzeichen an mir/ vnnd gib mir dasselbig/ dz ich sollichs willigklich thun müge allzeit.

Auch hat Christus gesagt/ das vns sein himlischer Vatter mit gebundenen henden vnd füssen/ werffenn werd in die eussere finsternuß/ so wir nit von gantzem hertzen vergebenn/ ein ietlicher seinem bruder sein missethat.

Da biß gebettenn almechtiger Gott/ gib mir das hertz/ das ich sollichs thun wöll vnnd thun künd.

Gib geist vnnd warheit/ das ich all mein sünd vnnd schuld/ vnnd all mein ellends leben/ on alle gleißnerey/ von grund meins hertzens erkenne/ das ich sie erkenne mit einem rechten reuwen vnd hertzleyd.

Allmechtiger Gott/ mach mich vnd alle menschen forchtsam vor deiner gerechtigkeit/ damit wir nit so sorgloß vnd verrucht seien/ in vnserm thun vnd lassen. Tröst vns aber auch/ das wir deiner barmhertzigkeit sicher seien.

Die gerechtigkeit Gottes leere vns Gott von hertzen fürchten/ vnd das böß lassen/ Die barmhertzigkeyt Gottes leere vnns Gott von hertzen liebenn/ vnnd das gut thunn/ sie stercke alle die gern wöltenn recht thun/ sie enthalte alle angefochtne menschen/ das sie in jren sünden nit verzweiflen. Sie verzeihe vns allen alle sünd/ vnd enthalt vns von allen sünden/ von ietz an vnnd ewiglich/ vnd sei Gott ewig lob vnd danck/ vmb die gnadreiche verzeihung der sünd/ vnnd vmb alles guts/ Amen.

Warumb sagstu/ Ich glaub ein vffersteung des fleyschs= Vnd sag mir es das ich es wol verstand.

Der mensch ist auß zweyen stucken gmachet/ vß dem fleysch oder leib/ vnnd auß dem geyst oder seel. Das fleysch hat haut vnnd har/ beyn/ hend vnnd füß/ darumb sihet mans vnnd hörts. Der geyst hat deren keins/ darumb sihet man jn nit vnd hört jn nit.

Exempel vom ersten menschen.

Adam was zum ersten nichts dann Erd/ vnd Gott derr HERR nam von der Erd vnd macht einen fleyschlichen leib daruß/ das war das erst teyl deß ersten menschen/ der noch nichts anders ist/ dann ein tod bild vnd geformierter leib/ der noch nichts vmb sich selbs weyß/ nichts versteht oder empfindet/ nichts hört/ nichts sihet/ nit lebt/ nit stirbt.

Darnach bließ Gott einn lebendigen Atem in sein angesicht/ da ward das fleysch vnd dz menschlich bild lebenndig/ das war der ander theyl des ersten menschen/ der fieng an sehen/ hören/ wissen/ vnd sich auff Gott verstehen.

Wo her macht Gott den leib vnd das fleysch? Auß der Erd. Wo nam er den geyst oder die seele? Vom himel/ das ist/ von jm selbs/ Also ward auß zweien stucken ein herlich lebendis manßbild.

Do ließ Gott den Adam hart entschlaffen/ vnd nam ein Ripp auß seinnem leib/ vnnd macht ein weibßbild darauß/ wie vor auß der erd ein mans bild.

Vnd von dem somen/ deren zweyen/ seind all andere menschen kommen nach jrer art vnd natur/ biß auff den heutigen tag.

Welches ist aber das fürnemest vnd edlest theyl des menschen/ Die seel oder der geyst?

Auß zweyen stucken verstehestu das.

Zum Erstenn/ Ehe Gott den menschenn schuff/ Sprach er/ das er den menschenn schaffen wölt nach seiner bildtnuß/ Nun ist aber Got keyn Erdt/ keynn Ripp/ keynn Menschlicher some/ darumb ist der mensch des teils halb der vß Erd Ripp vnd Somen ist/ nit nach der bildtnuß Gottes/ Aber Gott ist ein ewigs geistreichs lebenn/ vnnd ein ewiger lebendiger geist/ von der er genommen/ vnd dem menschen eingeblasen. Vnd des theils ist der mensch nach Gott gebildet.

Also ist auch das fürnemest vnnd edlest theil des menschen/ der nit allein vom himel vnd von Gott/ sonder auch nach Gott geschaffen ist.

Vnd lieber Gott/ wie wer es so edel/ nütz/ vnd notwendig/ das der mensch allzeit gedechte/ von wem/ vnnd nach wem er gebildet ist/ damit er auch allzeit mit leib vnnd seel/ fleisch vnnd geist/ Gott den schöpffer/ vor augen hette. Hetten Adam vnd Eua deß nie vergessen/ so hetten sie nie vnrecht gethon.

Zum Andern so sihest du wol/ die weil die seel vnd der geyst im menschen lebt/ so lebt der gantz leib/ vnd das fleisch/ So bald aber der geist auffart/ vnnd das fleisch verlaßt/ so ist der mensch nichts anders widerumb/ dann ein todter leib/ die weil er dann das lebenn nit hat für sich selbs/ sonder muß es entlehenen von der seel vnd geist so ist er auch das geringst theil am menschen/ vnd ist nichts dann als ein herberg deß lebendigenn geists vnd der seel/ die allweg lebt/ wann schon all leib nod seind.

warumb bleibt aber die seel nit alweg bei dem leib/ damit er allwege lebte?

Ach Gott/ da seind die ersten menschen daran schuldig/ sie hatten so einen herlichen leib von Gott mit souil ordenlichen lustigen vnnd notürfftigen glidmassen. Sie hetten so einen edlen/ himelischen/ vnd lebendigen geist/ nach Gott/ mit wissen vnd willen/ mit kunst vnd verstand/ mit krafft vnnd macht/ Vnd was het er jnen mer künden geben? Warumb hats aber Gott geben? Namlich/ das ER/ in jnen/ als seinen wunderbarlichen creaturen allzeit geprisen vnd globt wurde/ vnnd alle welt sehe was Er künde.

Aber es ist deren keines/ weder der leib/ noch die seel/ in seiner ordenung bliben.

Den geist fieng an gelüstenn wider Gott/ der leib fieng an thun wider Gott/ darumb ward vß dem leib ein sündtlicher vnnd presthaffter leib/ der auff den heuttigen tag nit mer so gehorsam/ gesund vnd frisch sein kan/ als het er nie vnrecht gethon/ Darumb ward der edel/ himelisch vnnd vnschuldig geist/ auch verloren/ vnd überkam der mensch einen irdischen schuldigen vnd sündtlichen geist.

Vnnd darumb mögen auch die zwei stuck/ ein ander nit mer der gestalt dulden/ wie on die sünd geschehen wer. Vnd die weil sie Gott mit seinem geist zusamenn bracht hat/ wunderbarlich/ vnnd sie haben beide einander gholffen vnrecht thun/ vnd waren so wol eins mit einander wider Got/ so müssen sie auch all jr leben lang nit mit einander künden naher kommen/ vnd müssend so vneins mit einander werdenn/ biß sie beide mit ach vnnd wehe von einander scheyden. Vnnd wann sie gleich gern wölten bleiben/ so mags doch nitt sein. Der geyst blibe gnug/ so wil jn dz fleysch nit mer herbergen/ es ist zu schwach/ krank oder alt wordenn/ Das fleysch möcht den geyst auch wol haben/ aber die sünd hat es verschult/ vnnd ist dz vrteyl des tods gefelt/ darumb muß es gescheyden seyn.

Wann es aber also gescheyden ist/ wo kompt ein iegklichs hin?

Du weist freilich wol wo der leib hin kompt/ Namlich/ in seiner rechten muter leib/ das ist/ in die Erd. Auß Erd wirt fleysch/ aus fleysch wirt wider Erd.

Wo kompt aber das ander theyl des menschen hin/ der geyst oder die seel?

Dahin er hie in zeit gestelt hat/ dahin kompt er. Ist der geyst des menschen hie gewesenn on Gott/ so faret er auch hin on Gott. Der geyst deß reichen mans/ fert in abgrund der hell/ der geyst des vnbarmhertzigen knechts/ fert in die eussern finsternuß. Der geyst deß gleißners der on hochzeitlich kleyd zu tisch saß/ wirt auch dahin gworffen. Der geyst des vndanckbaren zu Capernaum/ wirt biß inn die hell hinunder gestossenn/ Der geyst der vnglaubigen Phariseer vnd gschrifft gelerten/ stirbt in seinen sünden/ Der geyst der ergerlichen menschen/ geht in das ewig feur das nimmer mer erlöscht/ vnd da der nagend wurm ist/ der nümmer mer stirbt. Der geyst deß verzweifleten geitigen Judas/ fürdert sich selbs auch dahin.

Deßgleichen hinwider/ die seel oder der geyst der im leben deß menschen/ Got gesucht hat/ der wirt jn findenn/ der Gott trauwet hat/ der wirt nit zu schanden/ Die seel des armen willigen Lazarus/ kompt in die schoß Abrraams. Die seel deß schächers dem die sünd leyd/ vnnd Christum anrufft/ komppt in das Paradeiß. Die seel/ die mit Christto verharret biß in das end/ würt mit Christo zu tisch sitzen im reich Gotes/ vnd mit jm wol leben. Die seel deß´/ der Gott gefürcht vnnd geliebt hat/ wirt ewige freud haben/ vnd seligkeyt.

Noch hastu mir aber nichts gesagt wie das fleysch aufferstand.

Gott der Herr/ der alle ding hat angefangen/ der würt auch alle ding enden/ nach seinem willen. Zu dem selbenn end hat er ein zeit bestimpt/ vnd einen Jüngsten tag/ den er allein weyß.

So nun der selbig nach der ordnung Gottes/ gewißlich kommen wirt/ dann so wirt Gott der Herr/ allem menschlichem fleysch zusamen ruffen/ für sein letst vrtheyl/ vnnd das mit eynem grossen feldtgeschrey/ mit der stimm deß Ertzengels/ vnnd mit der pusunen Gottes/ So würt dann alles fleysch vfferstehn von der Erdenn/ vnd ein jede seel wirt jrenn leib widerumb findenn/ sich mit dem selbenn vereynigen vnnd vor Gott erscheinen.

Also würt der mensch/ der zum aller ersten vß Erd mensch ward/ vnnd auß dem menschen wider Erd/ zum aller letstenn widerumb auß geist vnnd fleisch zum menschenn werden/ da wirt es dann bleiben on alle endrung ewigklich.

Nun ists aber dannocht ein seltzams vnd wunderbarlichs ding/ das leib vnd seele des menscehn/ so weit von einander gescheiden werden/ vnd der leib faulet/ das fleisch wirt vonn würmen gefressen/ die bein werden zerströwt/ vnd sollen dannocht also wider zusammen kommen?

Es ist ia ein seltzams vnd wunderbars/ darumb ist auch vnser glaub ein seltzammer vnd wunderbarer glaub.

Wundert dich aber ob es möglich seie/ dz leib vnd seel wider zusamen kommen/ so gedenck/ dz der/ der sie zum aller ersten also hat kündenn zusamen bringen/ das ers auch zu letst würt künden/ vnd so offt er will.

Was ist die welt zum ersten gewesen?
Nichts.

Was ist auß dem Nichts worden?
So vil seltzams vnd wunderbarlichs dings.

Der nun auß Nichts/ so uil vnnd alle ding gemachet/ der kan auch vß allen dingen widerumb Nichts machen/ Vnnd so er wölt ebenn auß dem selben Nichts/ widerumb vnd eben die vorigen alle ding widerumb machenn. Der eins kan/ der kan das ander/ Der es zu einer zeit kan/ der kan es zu aller zeit/ Der es kan anfahenn/ der kan es auch enden/ Er kan abbrechen vnnd wider auffbauwen/ tödten vnd wider lebendig machen.

Vnd lieber was bistu zum ersten gewesen?
Adam was ein Erdknoll/ Eua was ein ripp. Du bist ein fleischlicher som gewesen/ der auß nichts dann deines vatters speiß/ gewachsenn ist. Auß dem somen ist ein fleisch worden/ auß dem fleisch ein leib/ vnnd Gott hat dem leib ein seel oder einen geist eingossen. Also ist auß seel vnnd leib/ ein lebendigs kind worden/ da hat es gelebt/ do es billich solt erstickt sein/ da hat es sich ernert/ do es billich solt ertruncken sein. Nach dem hats die natur außgeworffen/ vnnd an die welt bracht/ vnnd ist ein mensch darauß worden/ der bist du. Bald ehe du dich vmbsihest/ so muß sich leib vnd seel wider von einander scheyden.

Das ist dz herkommen/ vnd hinfaren aller menschen/ Nicht sein/ Etwas werden/ vnd bald wider Nichts werdenn/ Wer thut nun das alles? Thuts nit Gott? Wie ers nun ein mal kan/ also kan ers ewigklich/ kan ers heut/ so kan ers morn. Kan er im Paradeyß von der Erd menschen machen/ so kan er am iungsten tag von der Erd die menschen wider aufferwecken.

Warumb läßt Gott den leib nit gleich also ligen vnnd Erd bleiben/ müssen sie dann bei einander sein?

Gott hatt sie beyde erschaffen vnd zu einanderen verordnet/ vnnd hat an beiden stucken wöllen lob vnd ehr erleben. Das sie aber ein zeitlang von einander sein müssen/ ist der sünde schuldt/ noch gehören sie zusamen.

Darzu/ die weil der mensch mit leib vnd seel/ wider Gott gehandlet hat/ so müssen auch leib vnnd seel mit einander gestrafft sein. Will dann Gott durch sein gnad die sünd verzeihen/ so will ers auch beyden verzeihen.

Wolan/ ich glaub wol das Gott vil ding gethon vnnd geordnet habe/ das er auch alles künd vnd vermöge/ aber es ficht mich an/ ob es Gott also thun wölle/ dauon du mir ietz gesagt hast?

Wann Gott zwey wort redet/ vnnd das ein geschicht vor deinen augen/ wöltest du nit glauben/ dz ander müsse oder weerden auch gschehen?

Es sagt aber Gott/ das Hymel vnd erdtrich/ Sonn/ Mon/ vnd dergleich vil anders werden sölt/ vnd es ward alles samen.

Es sagte Gott zu den ersten menschen/ wann sie würden von dem verbottnenn holtz essen/ so müßten sie sterbenn/ das hat Gott mer dann vor sechßthalb tausent jarenn gesagt/ vnnd du sihest auff den heutigen tag/ das die menschen also sterben/ gleich wie es Gott gesagt hat. Die weil er dann vom iüngsten tag vnnd aufferstehung der todten/ auch vil gesagt hat/ so wirt es auch gwiß geschehen.

Glaubstu dann nit auch/ wann Christus tausent wort redt/ vnd sie geschehen alle biß an eins/ das das selbig ainig wort auch geschehen werd?

Er sagt der Statt Hierusalem/ wie es jr so übel gehn/ vnnd das keyn steyn vff dem andern bleiben würde/ vnd dasselbig ist geschehen.

Er sagt zu allen kranckenn/ sie soltenn gesund sein/ vnd es geschach.

Er sagt von jm selb/ er würd in die hend geben der Heyden/ da würd er verspeiet/ geyßlet/ vnd Creutziget/ vnd es ist geschehen.

Er sagt/ am drittenn tag würd er widerumb von todten aufferstehn/ Gab den Propheten Jonam zum eim warzeychen/ der drei tag im walfisch gelegen/ vnnd wider außgeworffen ward/ Gab auch bei dem Tempel ein zeichen/ den er zerbrechen/ vnnd in dreien tagen wölte wider auffbauwen.

Vund also ist er auch am dritten tag wider aufferstanden.

Hat sich nun das vnd anders funden/ wie er vorgesagt/ so wirt sich on zweifel das ander alles auch finden.

So hat er nun gesagt/ Es werde die stunnd kommen/ in der alle die in den grebern seind/ werden hören die stimm Gottes/ vnd also herfür gehn. Die stund würt nit außbleiben.

Er sagt/ das er selbs zur letsten stund kommenn werd in den wolcken/ zu richtenn die lebendigen vnd die todten. So gwiß er nun ein mal kommen ist/ im fleisch/ wie es Gott hatt vor gesagt/ als gewiß wirt er zum andern mal auch kommen/ wie er es hat vorgesagt.

Meynstu aber/ glaube es iederman also/ ob es gleich wol Gott vnd sein Sun Christus vorgesagt haben?

O we nein/ man glaubt doch nit das man vor augen sihet/ wie wolt man glaubenn/ das man nit sihet.

Zur zeit Christi was ein Regel der Saduceer/ die gelaubten nit das weder Engel noch Geist/ noch vfferstehung were/ Darumb fragten sie Christum. Wann siben mann ein frauwenn hetten nach einander/ vnnd sie würden all aufferstehn/ wie sie das weib mit einander theylen würden.

Deren fleyschlichen spitzfündigen fragen ist die welt noch voll.

Deßgleichen/ do Christus einn mal ein todes Töchterlin wider wolt lebendig machen/ vnnd sagt es schlieffe/ do verlachten jn jn vil. Also wirt das werck der aufferstehung vonn den todten/ noch heut diß tages/ von vilen treffenlichen verspottet.

Do der frumb Apostel sant Paulus zu Athen/ auff ein zeit leeret/ Gott gebötte allen menschen vnd an allen enden/ buß zethon/ dann er hette einen tag gesatzt/ auff welchem er richtenn wölte den gantzen vmbkreiß des erdbodens/ durch einen man (der ist Christus) in welchem er sollichs beschlossen/ vnd jn darumb auch von den todten aufferweckt hette. Do richten jr vil ein gespöt an/ von dem ernstlichen werck der aufferstehung der todten vnd des iüngsten tags. O des gespöts ist auch noch treffenlich vil allenthalben.

Vil sagen wie im buch der Weißheit/ Ey wann der mennsch stirbt/ so ist kein ergetzlicheit mer noch freud/ man kent auch keinen der vom todt widerkommen sei/ wir seind auß nichts gemachet/ vnd werden auch wider/ als werend wir nie gewesen/ vnd nach vnserm end ist kein widerkommen/ vnd es ist versiglet vnd nun gwiß/ das niemants wider kommen würt. Ist aber die red nit auch vast gemeynn/ bei vilenn zu vnser zeit vnd alle zeit?

Etlich sagenn/ wans also were/ wie würd es lotz zugehn/ die seelen wurden mit einanderen vneins werden/ vnd würd keyn beyn vnd keyn leib oder seel wissen welches zum andern ghörte. Gleich als ob Gott/ der alle ding von neuwem/ vnd auß Nichts etwas/ machen kan/ nicht auch künde etwas alts erneuweren/ vnd etwas zerströuwets widerumb samlen/ vnd alle ding auch mit eim gedancken/ ordnen/ Aber die erschrockenlich aufferstehung der todten/ vnnd das hergeschreydes deß iüngsten gerichts/ würt vilen menschen frei schimpff wol legen.

Villeicht ist inen nit ernst/ wann schon etlich also reden. Nun muß man dannocht etwas reden.

Man muß ja redenn/ man muß aber darumb nit vonn Articklen des glaubens vnnd Gottes wercken/ solliich fabel we4rck vnd vnnütz gschwetz treibenn. Glaubenn wir an Christum/ warumb glauben wir dann nit seinen worten do er spricht/ Ich sag euch das die menschen müssenn rechenschafft/ geben/ am iüngsten gericht/ vonn eynem ietlichen vnnützen wort/ das sie geredt habenn/ Auß deinen wortenn würst du gerechtuertiget/ vnd auß deinen worten würstu verdampt werden.

Darumb wie wol einer des anderen hertz nit weyß/ noch so hört er jn reden/ vnnd mag dann sprechenn/ Was das hertz vol ist/ geht der mund über.

Geschweigenn/ das so vil sein/ die jr hertz nit alleyn mit jren wortenn verradten/ sonder auch mit jrem leben.

Es seind die vil böse stuck thun dürffen/ auff den iungsten tag vnd aufferstehung.

Es seind/ die so ein üppig ergerlich leben füren/ als ob gar kein Gott odder iüngster tag sei.

Vnnd jrenthalb/ wer es jnen auch vil das weger es wer deren keins/ vnd das sie nun abgestorben weren wie das vieh/ die weil sie auch gleich ein leben gfürt haben/ wie das vieh.

Aber sie müssenn dannoch auch aufferstehn/ wann es jnen schon nit wol erschiessen würt.

Werden dann gute vnd böse menschen gleich aufferstehn?

Des leibs halb wirt einer vfferstehn wie der ander/ der verflucht wie der selig. Aber der seel halb/ die weil sie ist das fürnemst an dem menschen/ so wirt jr der leib müssen nachuolgen. Der leib wirt nit allein sein/ Die seel auch nit/ sonder auß denen zweyen wirt widerumb einn mensch werden.

Wie nun der selb mensch/ vor hin eh er starb/ glaubt vnnd gelebt hat/ wie er mit glauben oder on glauben/ auff Gott oder on Gott/ abgestorben ist/ also wirt er auch widerumb aufferstehn.

Daniel sagt/ Es werd die zeit der trübsal kommen/ deßgleichen nie gwesen sei/ seid die menschen worden seien/ dann werden vil die in der erden schlaffenn/ widerumb entwachenn/ Etliche zum ewigen leben/ Etlichen zur ewigen schmach vnnd vnlust.

Christus sagt/ Am iüngsten tag werden herfür gehn/ die guts gethon haben zur vfferstehung des lebens/ vnd die übels/ zur vfferstehung des gerichts. Also ist ein aufferstehung des fleysches zur seligkeyt/ vnd ein aufferstehung des fleyschs zur verdamnuß.

Vnnd wie solten wir all stund vnnd augenblick so ernstlich an den Artickel gedencken/ das wir nunmer on sorg stünden/ wie wir doch würden aufferstehn/ zum tod oder zum leben/ in Gottes zornn/ oder inn Gottes liebe/ zur freud oder schmach.

O wie wirt es so ein angsthaffter stand sein/ bei denenn die hie weder mit leib noch seel Gott gesucht oder gedient haben.

Mit jren augen haben sie nit auff die zeit gesehen/ Mit jren ohren haben sie nichts gehört.

Mit jrem mund haben sie einen schimpff daruß gemacht.

Mit jrem hertzen haben sie nit glaubt.

Mit jrem leben habenn sie das werck Gottes treffenlich geschenndt vnnd gelestert/ Darumb wirt die aufferstehunng jres theils nichts seinn dann angst/ not/ vnd verdruß/ Vnnd seind die selbigen/ vnglaubigen menschen von jrem tod vnd nit mer dann an der seel verdampt wordenn/ so werden sie hinfür mit leib vnnd seel verdampt.

Da wirt es sich dann ifnden was schimpffen ist/ verachten vnd nit glauben.

Was glaubstu nun in einer summa von dem Artickel?

Ich glaub das hymel vnnd erd zergehn werden/ vnd aber alles das der almechtig Gott von der Aufferstehung der todten gesagt hat/ on allen zweyfel geschehen vnd erfült werden muß.

Ich glaub/ wie Jesus Christus der Sun Gottes/ die todten widerumb zum leben vfferweckt hat/ das auch also alle menschen/ gute oder böse/ auff den letsten tag widerumb vom tod werden auferweckt.

Ichj glaub/ wie Jesus Christus zum Lazaro (der vier tag im grab gelegenn war) mit lauter stimm schrey/ Lazare/ kum herfür. Also gelaub ich das Gott zu der letstenn zeit/ auch mit der pusunen vnnd herrhorn laut schreien werd/ das wir auch alle herfür kommen/ vnd das es also gwiß geschehen werd/ mit allen menschen/ als gewiß Lazarus auß dem grab herfür kommen vnd aufferstanden ist.

Ich glaub/ wie zu der zeit/ do Christus gestorben ist/ die todten vß den grebern aufferstanden vnd erschinen seind/ das wir auch also zu der zeit/ so Christus die gantzen welt richtenn wirt/ aufferstehn vnnd vor seinenn augen erscheinen werden.

Ich glaub/ wie Gott sagt durch den Ezechiel/ er werde die gräber auffsteppen/ vnnd herauß ziehen/ seinen geyst in vns geben/ dauon wir lebendig werden/ vnnd vns in vnser recht hey´mat setzen/ das wir innen werden/ das ER der Herr sei/ der es geredt vnd mit der that erstattet hab.

Der Allmechtig Gott erstatte söllichs an vns mitt seinen gnaden/ Amen.

Ich gelaub/ wie Job sagt/ Ich weyß das mein erlöser lebt/ vnd er würt mich hernach auß der Erden aufferwecken/ vnnd werd darnach mit diser meiner haut vmbgehen werden/ vnnd werd inn meinem fleysch Gott sehen/ vnnd Ich werd jnn sehen vnd keyn anderer/ Da helff mir Gott zu.

Ich glaub wie sant Paulo sagt/ Ist die aufferstehung der todten nichts/ so ist Christus nit aufferstanden/ Ist Christus nit aufferstandenn/ so ist all vnser glaub vergeblich/ vnd seind wir noch in vnsern sünden/ vnnd alle abgestorne in Christo seind verloren/ ia wir seind die aller ellendesten vnder allen menschen.

Ich glaub aber das der tag der Aufferstehung von den todten/ ein beschluß vnd summa summarum werde/ alles des dz Gott ie geredt/ vnd vmb der welt willen gehandlet hat.

Da bit ich dich nun Allmechtiger Gott/ hilff mir armen menschen/ das ich hie in zeit wol vnd Christenlich lebe/ damit auch wol sterbe.

Güttiger Gott/ hilff das ich wol sterbe/ damit ich auch wol vom tod aufferstande.

Hilff das ich all meine tag hie in zeit in deiner gnaden schleiße/ vnd meinen letsten tag/ hie vff erden seligklich überwinden mug.

Das ich den aller letstenn vnnd iüngsten tag der gantzen welt/ mit freüd vnnd guter gewissen erleben/ im glauben Jesu Christi/ den tod vnnd alle sünd überwinden/ von der Erd seligklich aufferstehn/ vnnd dich meinen Gott vnnd schöpffer in meinem fleysch anschawen/ vnnd dir nach deinem willen dienenn mög immer vnnd ewigklich/ Amen.

In der hoffnunng laß mich Ewiger Gott leben/ sterben/ ruwen vnnd aufferstehn/ Amen.

Warumb sagst du/ du glaubest nach disem lebenn ein Ewigs leben. Vnnd warumb ist der Artickel der aller letst?

Da ist es der beschluß/ der andern Artickelen allersamen.

Darumb glaub ich in Got den Allmechtigen. In Jesum Christum/ das er gelebt hab/ gelitten hab/ gestorben sei/ begrabenn/ zur hell hinnab gefaren/ aufferstandenn/ gen himel hinauff gefaren/ dz er zu der gerechten Gottes sitz/ vnd wie er ein mal kommen ist zu lerenn die gantze welt/ das er zum andern mal kommen werd/ zu richten die gantze welt. Darumb glaub ich in den heyligen geyst. Das heyliges all gmeyns seligs volck Gotes seie/ Das verzeihung seie der sünd/ das ein aufferstehung der todtenn/ alles sampt vmb des ewigen leben willen.

Thu die vorigen Artickel all hinweg/ vnd gelaube sie nit/ so würt dir das ewig leben nit.

Thu den letsten Artickel hinweg/ so seind die anderen alsamen verlogen vnd vmb sunst.

Dann wo zu wer es mir nütz/ das ich glaubte/ lebte/ stürbe/ vom tod aufferstünde/ wie Gott wölte/ ich überkeme aber nit ein ewigs leben?

Darumb ist das ewig leben der beschluß alles deß/ das wir von Gott recht halten vnd glauben.

Was ist aber das ewig leben?

Das hab ich noch nit erfaren/ darumb kan ich dir es nit sagen/ Aber kan den menschen vff erden etwas fröwenn/ was würt in dann im reich Gottes künden fröwen.

Gott ist das ewig lebenn/ den sehenn wir nit/ wir glaubenn aber auff jnn/ Vnnd die wenigest fröud bei Gott ist ein grosser theyl des fröliiichen lebens das ewigklich keyn end haben würd.

O weren wir nun auff dem weg zum ewigen leben/ so würd sich das ewig lebenn wol selb finden.

Der glaub aber an die wort vnd werck Jesu Christi/ ist der recht vnd einig weg/ wer den hat/ der hat das ewig leben/ das ist/ er ist auff rechter straß darzu/ vnd mag nit irre gehn.

Vnnd eben das ists ewig leben/ das wir den einigen waren Gott erkennen/ vnd Jesum Christum/ den er in dise welt gesendt hat/ damit wer inn jn glaube/ nit verderb/ sonder habe das ewig leben.

Nun glaube die welt auff allen seitten was sie wöll/ sie zancke vnd hadere vmb des altenn oder newen glaubens willen/ auch so lang sie wölle/ so ist nit mer/ dann eben das der einig warhafftig glaub/ der Gott gefalt/ vnd der vns selig macht.

Darumb ist auch niemants schuldig ein einigs ding weiter zu glauben der seligkeyt halb/ dann wie in denen zwölff artickeln verfasset ist.

Was onn den glaubenn/ mag weder hie noch dort zu Gott kommen/ noch selig werden.

Was nebenn dem glaubenn/ das ist vnnötig/ vnd so mans nötig machet/ so ist es ein lesterung des glaubens/ vnd aller zusatz/ den man müsset/ ist ein falscher zusatz/ vnd wider Gott.

Was wider den gelaubenn/ das ist ewigklich verdampt vnd verflucht.

Was mit dem gelauben/ das ist ewigklich gesegnet.

Das ist der Glaub/ vmb des willen so treffenlich grosse thaten/ zeychen vnnd wunder geschehen seind.

Das ist der Glaub/ der so vnsegliche ding vermag/ als sünd verzeihen/ frumb machen/ vom tod erwecken/ vnd das ewig leben geben.

Sol ich mich aber sunst nichts lassenn irren überal/ vnnd keynem ding sunst weiter nachfragen der säligkeyt halb/ sonder allein des gelaubens warnemen?

Ja sicher vnnd frölich/ dann als wenig an Gottes warheit manglet/ so wenig manglet an dem glauben.

Aber da lug zu/ ob du den glaubenn in der warheit habest odder nit/ Dann es seind wol vil beruffter Christen/ aber wenig außerwölter.

Wie soll ich dann wissen/ ob ich den waren glauben hab/ vnnd der außerwelten Christen einer sei oder nit?

Kenstu nit den baum an den früchten? also lernn dich selbs vnnd die gantze welt auch kennen.

Weyst du nit was der glaube durch Jesum Christum/ zu seiner zeit/ an den menschen gwürckt hat? Die tauben/ stummen/ blinden/ lamen/ bet siechen/ wassersüchtigen vnd alle krancken seind gesund worden/ die aussetzigen seind gereyniget/ die teuffel seind außtriben/ die todten seind lebendig worden.

Was hat der glaub von Jesu Christo an allen creaturen gewirckt.

Der wind ist gelegenn/ Das meer hat sich gesetzt/ hat Christum on mittel tragen/ hat überflüssig fisch geben in seinem namen/ Wasser ist zu wein worden/ Fünff brot vnd zwei fischlin speißten fünff tausent menschen/ vnd bliben dannocht zwölff körb überig/ Der himmel hat sich mer dann ein mal auffgethan/ Mer dann ein mal hat man gehört ein stimm Gottes von himel.

Die Engel haben in lüfften gesungen/ sie seind gar herab kommen vnd haben Christo gedient/ vom anfang seiner empfengnuß/ biß er widder gen himel gefaren ist.

Was hat sich dann an dem leib Christi selbs verloffen/ vmb des glaubens willen?

Wie verklert er sich so wunderbarlich/ vnd ward so gar zu eim anderen menschenn auff dem berg/ das drei seiner iunger sahenn/ das sein antlitz ward wie die Sonnen/ seine kleyder weiß als der schne/ das Moses vnd Helias bei jm erschinen/ vnd mit jm redten.

Was wunder verlieffen sich in seinem sterben? Wie wunderbarlich erstund er vom tod/ Wie augenscheinlich fur er gen himel? Warumb seind die wunder alle geschehen?

Vmb des glaubens willen zu Gott dem Vatter/ durch Jesum Christum den sun/ in der krafft des Heyligen geysts/ Solte nun der selbig gelaub/ so vil wunderwerck augenscheinlichen gewürckt haben/ vnnd er solte die selbig würckung nit auch auff disen heutigen tag haben? So erkendt man nun den glauben an der krafft vnnd würkung/ vnd die glaubigen an jrem leben.

Das ist abermals der Glaub/ wie er on aller menschen hilff/ radt vnnd that selig macht nach diser zeit/ also macht er auch hie inn zeit auffrichtig/ frumm vnd redliche leut.

• Verruchte menschen macht er gotsförchtig.
• Mutwillige/ still vnd zam.
• Hoffertig leut macht er demütig.
• Vnreyne/ keusch vnd züchtig.
• Aufsetzige ergerliche/ frumm vnd erbar.
• Geitig vnd eygennützige/ gelassen.
• Die nach der welt leben/ das sie der welt absterben.
• Die sich selbs lieb habenn/ das sie jnenn selbs feind werden.
• Die reichen/ dz sie jr reichtumb frei willigklich brauchen/ wie es Gott habenn will/ vnnd das sie arm leut lieb haben.
• Die armen/ das sie der reichtumb nit nach fragen/ vnd jr armut als von Gott auffnemen.
• Die lesterer/ fresser/ sauffer/ spiler vnd raßler die zeucht er vonn dem selben schandtlichen wegen/ vnd macht sie zu feinen ordenlichen mässigen vnd geschickten leuten.
• Die nichts künden dan zancken/ haderenn/ nachreden/ hauwen vnnd stechen/ kriegen vnnd blutuergiessen/ machet der heilig Glaub fridlich vnd tugenlich/ vnd das sie jrem nechsten vngern wölten ein leyds thun/ mit worten oder wercken.
• Die Oberkeit macht der Glaub geflissenn vnnd arbeytsam/ das böß zu straffen/ vnnd das gut zu belonen.
• Das auffrürisch volck/ macht er gehorsam vnd vnderthenig.
• Der einn ampt hat/ das er es nit mißbraucht noch versaumpt.
• Eehleut macht er einmütig/ vnnd das zwey eins sein/ das sie auch jre kind mitt grossem fleiß vnd ernst ziehen werden.
• Die iugent würt der Glaub auch Christenlich ziehen/ von allem mutwillen vnd vnzucht/ vnnd das sie Gott vonn iugent auff/ würt vor augenn haben.

Nun lug in der gantzen weitenn welt/ wo der recht war Christenlich glaub sei.

Noch ist der glaub seinthalb recht vnd warhafft/ ob jm gleich wol keyn mensch auff erdenn recht glaubte.

Darumb ergere sich niemants/ daß die Cristenheyt vol falscher Christenn ist/ die gar nit einn weiß füren nach den worten vnd wercken Christi.

Hüte sich aber alle menschen/ vor ergernuß/ damit der nam Gottes vnnd seines Suns Jesu Christi nit geschendt vnd gelestert werd.

Betriege auch niemant sich selbs/ als ob er glaub vnd villeicht nichts daran sei.

Ein grosser nam vnnd vil geschrey/ bezeuget den glauben nie/ aber frümmkeyt/ gotßforcht/ gottes liebe/ liebe des nechsten/ feindschafft gegen dem eignen bösen fleisch vnd allen sünden.

Dise stuck geben eusserliche zeugnuß/ das der glaub innerlich im hertzen recht geschaffen sei.

Ergere sich niemandts/ das zanck vnd zweitracht in der Christenheyt sei/ dann die weil man es bei dem einigen glauben/ bei dem leben vnnd sterben/ bei den worten vnd wercken Jesu Christi/ nit will lassen bleiben/ so muß wol zanck sein.

Ergere sich niemandts an dem glauben des Creutzigeten/ Das Creutz ist wol verächtlich vor der welt/ aber die vrsach des Creutz/ ist das ewig leben.

Der Almechtig Gott/ behüt vnnd beschirmm vns/ das wir nit glauben/ nit Gott diennen/ nit leben noch sterben/ wie die welt lert vnd thut.

Er helff vns auß der welt/ in das Reich seines Suns Jesu Christi/ das wir durch den selben new geboren werden/ mit jm leben/ sterben/ aufferstanden/ gen himel faren/ vnnd überkommen das ewig leben.

Vnd Summa summarum/ Hab iederman reuw vnnd leyd über sein vnnd der gantzen welt grosse vnd schwere sünd.

Bitte Gott iederman/ das er vns allen die sünd verzeihenn/ vnnd genädig vnnd barmhertzig sein wölle.

Wisse iederman/ das er keyn theyl habenn würt an dem REych Gottes/ vnd ewigem leben dann auß der lauteren eynigen gnad vnnd barmhertzigkeyt beweisen will/ Aber auß keiner vrsach/ dann alleyn auß seiner vätterlichen liebe. In keynes namenn oder verdienst/ dann seines Suns Jesu Christi. Vnnd keynenn menschen/ dann die das glaubenn/ vnd sich des zu jm versehen.

Vmb die gutthat Gottes willen/ habe Gott iederman lieb von hertzen/ vnd diene jm sein leben lang nach seinem willen.

Habe iederman seinen nechsten lieb/ vnd thue niemandts dem anderen leyds/ sonder vil guts/ dann Gott hat es vns auch gethon.

So dann Gott kompt/ vnnd will vns auß diser zeit beruffen/ so laßt vnns frölic hauff Gott dahin faren/ vnnd der welt gern vrlaub gebenn/ dann wie vil Gott mühe vnnd arbeit an die welt gelegt hat/ vnd täglich legt/ noch ist es ein ergerliche vnd schandtliche welt/ auff allen seitten/ vnd da sie meynet am bestenn zu seinn/ da soll sie gar nichts/ O das sie vnns in vnseren hertzen recht erleyde/ vnd vns Gott mit seinem Reich warlich lieb werde/ Das wie ein gotßförchtig/ liebreich/ auffrecht vnd redlich leben füren/ vor Gott vnd allen menscehn/ verzeren also dise kurtzen vnnd letsten tag vnsers lebens/ in dem dienst des Allmechtigen Gottes vnd Vatters im hymel/ Damit wir nach diser zeit ewigklich behalten vnnd selig werden. Da helff vns Gott zu.

END