Gib vns vnser teglich brodt.
DArnach fuhr Jhesus vber das Meer weg/ an der Stat Tiberias in Galilea/ vnnd es zg jhm viel volcks nach/ darumb/ das sie die zeychen sahen/ die er an den krancken thet. Jesus aber gieng hinauff auff einen Berg/ vnd satzte sich daselbst mit seinen Jüngern. Es war aber nahe die Ostern/ der Jüden Fest. Da hub Jhesus seine augen auff/ vnnd sihet/ das viel volcks zu jhm kombt/ vnnd spricht zu Philippo: Wo kauffen wir brodt/ das sie essen? Das saget er aber jhn zuuersuchen/ denn er wusste wol/ was er thun wolt.
Philippus antworrtet jhm: Zwey hundert pfenning wert brodts ist nicht gnug vnter sie/ das ein jeglicher vnter jnen ein wenig neme. Spricht zu ihm einer seiner Jünger/ Andreas der bruder Simonis Petri/ Es ist ein knab hie/ der hat fünff gersten brodt/ vnnd zween fisch/ aber was ist das vnter so vil? Jesuss aber sprach: SChaffet/ das sich das volck lagere. Es war aber vil graß an dem ort. Da lagerten sich bey fünff tausent Mann. Jesus aber nam die brodt/ dancket/ vnnd gab sie den Jüngern/ die Jünger aber denen/ die sich gelagert hetten. Desselbigengleichen auch von den fischen/ wie viel er wolt.
Da sie aber satt waren/ sprach er zu seinen Jüngern: Samlet die vbrigen brocken/ das nichts vmbkomme. Da samleten sie/ vnnd fülleten zwölff körb mit brocken/ von den fünff gersten brodt/ die vberblieben/ denen/ die gespeyset wurden. Da nun die menschen das zeychen sahen/ das Jesus thet/ sprachen sie: Das ist warlich der Prophet7 der in die welt kommen soll.
Da Jesus nun mercket/ das sie kommen würden/ vnnd jn haschen/ das sie jn zum könig macheten/ entweich er abermall auff den berg/ er selbs allein.
DEn Herren Christum jammert von hertzen/ das seine zuhörer nicht zu essen haben/ vnnd speyset 5000. menschen/ mit fünff broten vnd wenig fischen/ auß seiner allmechtigen handt.
Der Herr Christus ist nicht allein vom vatter gesandt/ dass er vnser seele mit seinem blute erlöse zum ewigen leben/ Johan. 17. Sondern er sorget auch hertzlich vnnd vetterlich für vnser leyb vnd leben/ vnd wil vns auß seiner allmechtigen vnd milden handt/ vnser lebenlang speisen vnd ernehren/ mit freude vnnd wolgefallen/ wie die kinder im Benedicite sagen.
Christus Gottes sones hand/ ist eine allmechtige hand/ die auß nichts etwas/ auß wenig vil schaffen kanä/ vnd kan auch die leute one brot ernehren/ wie Heliam vnd Mosen/ Vnnd ist ein reyche hand/ darein Gott alle himlische vnd jrdische gaben beschlossen hat/ wie Christus sagt aus dem 8. Psalm. Vnd ist ein rechte milde hand/ die an einem barmhertzigen vnnd trewen hertzen stehet/ vnd jerlich alles was da lebet/ mit freude vnd speyse settiget/ Acto. am 14. Vnd ist ein auffgethane/ redliche vnnd warhafftige hand/ die da helt vnnd leystet/ was Christus wort vnd munde zusaget.
Die Gottes gebot hören/ vnd schreibens in jr hertz/ wie in ein Büchlein/ Zu denen spricht Gott im 5. buch Mosi/ wie auch die Kirche heut zeuget/ wil ich ein land geben/ darinnen milch vnd honig fleust/ vnnd darinne brodt die fülle ist/ vnnd die steine eysen werden/ vnnd da man ertzt auß den bergen hawet/ wie die schrifft redet.
Darumb wer das teglich brodt begeret/ der muß Christo folgen/ Gottes reych suchen/ vnd Christi wort hören/ hertzlich beten/ trewlich arbeyten/ vnd da Christus mit seiner hand/ seinen segen tröpflen lest/ muß man Gott darfür dancken/ vernünfftig gebrauchen/ vnd das vbrigen auffheben vnd zu rath halten/ vnnd der dürfftigen auch nicht vergessen. Denn es heyst: höre mich/ so gebe ich dir/ saget Gott im 5. buch Mosi am 6. Cap.