Vnd von dem gewalt der schlüssel sant Petri Beschriben durch D. MArtinum Luther.
Gedruckt zu Basel/ durch Adam Petri.
M.D.XX.
Das ewangelium Matthei. xvi. lutet also.
ES ist Jesus kummen in die gegen der stat Cesaria die Philippus erbwet hat/ vnd aldo fraget er sine iunger/ Was sagen die lüt von dem sun des menschen. do haben sy gesagt. Etlich sagen du syest Johannes der teuffer/ Etlich du syest Helias/ etlich Hieremias/ oder sunst einer vß den propheten. Do sprach Jesus zu in Was saget dann ir von mir? Do antwurt Simon Petrus vnd sprach. Du bist Christus ein sun des lebendigen gotts. Do antwurt im Jesus/ vnd sagt. Wol dir o Simon Bar iona/ dann fleisch vnd blut hat dir das nit offenbaret/ sunder myn vatter der im himel ist. Vnd ich sag dir auch/ du bist Petrus (das ist ein felß) vnd vff disen felß wil ich buwen myn kirche/ vnd der gewalt der hellen sollen nit sy übermügen/ vnd dir wil ich geben die schlüssel des himelrichs/ was du wirst binden vff erden/ das sol gebunden syn im hymel/ vnd was du wirst vfflösen vff erden/ das sol vffgelößt syn im hymel.
Das ewangelium begryfft alle materien der gantzen disputation/ das es von zweyerley materien fürnemlich redt. Zum ersten von der gnaden gottes/ vnd vnserm fryen willen. Zum andern/ von dem gewalt sant Peters/ vnd der schlüssel. Das erst gryfft an die grossen wysen vnd heiligen wil sy gar zu nicht machen/ so sy doch meynen durch ir kunst vnd werck alle ding vßzurichten. Aber hie leret der herr/ das alles ymb sunst sey/ was fleisch vnd blut ist oder vermag. Dann Christum mag niemant erkennen (schwyg dann folgen) vß fleisch vnd blut/ sunder der vatter im himel muß jn offenbaren/ wie hie sant Petro geschehen. Das zeygt auch an/ do er fragt/ was die lüt von jm sagten/ vnd kein gewiß bestendig antwurt geben wart/ sunder mancherley/ vnd wanckelbar meinung vnd whon des folcks erzelet/ vß zuwysen das on die gnad gottes man hin vnd her wanck vnd vnbestendig whon von got hat/ biß das der vatter offenbart/ do erkent der mensch was Christus sey.
Daruß folgt/ das der fry will des menschen (man lob vnd heb in/ wie man wil) gar nichts vermag vß im selbs/ vnd nit in siner wilküre frystat/ guts zu erkenen oder thun/ sonder allein in der gnaden gottes/ die in fry macht/ an welcher er on sünd vnd irtumb gefangen ligt/ vnd nit heruß von im selbs kummen mag. Als auch Christus sagt Johannes .viii. Wann üch die warheit fry macht/ so sind ir recht fry. Wer aber sünd thut/ der ist ein knecht der sünd. Also auch sant Paulus sagt Rom. iii. Es ist kein mensch vff erden/ der do frumb sey vnd gottes verstendig/ wolthun/ sunder sy dörffen alle gottes gnaden. Auch so wir von vns selbs guts anfahen möchten/ warumb heißt vns dann Christus bitten vmb gnad/ vnd leret vns im Vatter vnser sagen/ dyn will geschehe/ als in hymel vnd vff erden/ do mit bewert wirt/ das wir gottes willen nit mügen thun vß vnserm fryen willen. Wyter folgt/ das man den fryen willen nymmer recht nennt oder verstat/ er sey dann mit gottes gnaden gezieret/ on welche er mer ein eigner dann fryer will heyssen sol/ dann on gnad thut er nit gottes willen/ sunder sinen eigen willen/ der nymmer gut ist. Er ist wol fry gewesen in Adam. Aber nun durch sinen fall verterbt vnd in sünden gefangen/ doch den namen des fryen willen behalten/ darumb das er fry gewest vnd durch gnad wider fry werden sol.
Wann man nun begeret zu wissen/ wie man frumb werden vnd wolthun sol welchs dann die gemyn frag ist. Hab ich gesagt/ das das erst vnd fürnemest sey/ dz einer wiß wie er von im selbs nit mag frumb werden oder wolthon. Darumb er muß an im selbs verzwyfeln/ hend vnd füß gan lassen/U sich als einen vnnützen menschen vor Gottes augen klagen/ vnd aldo syn götliche gnad anruffen/ in welche er festiglich vertruwen sol. Vnd wer einen andern anfang lert oder sucht/ dann nach diser wyß/ der irret vnd verfüret sich vnd andere/ wie dann thun die do sagen Ey du hast ein fryen willen/ thu so vil in dir ist/ got wirt das sn thun/ vnd mainen man sol die lüt nit verzwyfeln heissen. Ja fryylich sol man sy nit verzwyfeln heissen. Aber das verzwyfeln muß man recht vß rechen. An gottes gnaden sol niemant verzwyfeln/ sunder wider alle welt vnd alle sünd/ festiglich vff gottes hilff sich verlassen/ aber an im selbs sol man gar verzagen/ vnd in keinen weg sich verlassen vff synen fryen willen/ das aller wenigst wercklin zu thun.
Darumb spricht wol sant Hieronymus über diß ewangelium/ das zu mercken sey wie Christus sine iunger fragt was die menschen von im sagen vnd darnach/ was sy von im sagten/ glych als sy nit menschen weren. Dann war ist es/ das der mensch mit gnaden beholffen/ mer ist dann ein mensch. Ja die gnad gots macht jn got formig/ vnd vergottet jn/ das jn auch die schrifft/ got vnd gottes sun heißt/ also muß der mensch über fleysch vnd blut vßgezogen werden/ vnd mer dann mensch werden sol er frumb werden/ das geschicht nun anfenglich wann der mensch das erkent als im selbs vnmüglich vnd demütiglich die gnad gottes darzu sucht/ an im selbs gantz verzwyfelt. Darnach folgen aller erst die guten werck/ wann die gnad also erlangt ist/ dann hastu ein fryen willen/ dann thu was in dir ist.
Es ist nit müglich dz got einem menschen syn gnad versag/ der massen vß gantzem hertzen erkennt syn vnuermügen/ vnd an im selbst luter verzagt. Das ist die best vnd nehst bereytung zu der gnaden/ wie die muter gottes in irem lobsang leret/ vnd sagt. ER hat die hungerigen vnd dürstigen erfüllt mit allen gütern.
Das solt man predigen vnd die lüt vor ledig machen von irem eigen falschen vertruwen/ vnd dann füllen mit guten wercken. So leren sy vns nit vil guter werck thun/ vnd gar wenig von dem anfang gute werck zu thun/ da doch mer angelegen ist/ dann an den guten wercken/ dann wo der anfang nit gut ist/ wirt selten ein gut end folgen/ wo aber die gnad gotts erlangt ist/ werden werck fast von jn selber folgen.
Diß verzwyfeln vnd gnad suchen/ sol nit ein stund oder ein zit weren vnd dann vffhören/ sunder all vnser werck/ wort/ gedancken diewyl wir hie leben/ nit anders gericht sind dann dohin/ das man allzyt in syn selbs verzwyfeln/ vnd in gottes gnaden/ begird/ vnd genung blib/ wie der prophet sagt Psal. xli. Myn sel hat sich begeret nach dir/ myn gott/ als der hirtz nach dem brunnwasser. Myn sel dürstet nach dem lebendigen starcken got. O wann wirt es das ich kumm vnd erschyn vor dem angesicht gottes/ solches verlangen nach got/ vnd frumb zu syn/ hebt die gnad an vnd weret biß in den tod/ darumb so muß auch daneben weren/ das verzagen an im selbs/ vnd nach blyben flasch eygen vertrawen.
Es ist dem gemeinen man nit not vil zu disputiren von sant Peters oder bäpstlicher gewalt/ da lygt mer an/ das man wisse wie man den selben seliglich gebruchen sol. Es ist war die schlüssel sind sant Peter geben/ aber nit im als siner person/ sonder in person der Christlichen kirchen/ vnd sindd eben mir vnd dir geben zu trost vnserm gewissen/ sant Peter oder ein priester ist ein diener an den schlüsseln. Die kirch ist ddie frauw vnd brut/ der er sol dienen mit der schlüssel gewalt/ als wir dann sehen in teglichem bruch/ das die sacrament gereicht werden allen die sy von den priestern begeren.
Nun das man vernemm/ wie man der schlüssel seliglich bruch/ hab ich daroben gesagt/ wann man frumb syn begert vnd durch vnsers vermügen verzyhung/ vns der gnaden empfenglich gemacht/ so lygt nun daran/ das man wisse ob man gottes gnaden erlangt hab/ dann man mß wissen wie man mit got daran sey/ sol anders das gewissen also syn vnd bestan/ wann so yemant daran zwyfelt vnd nit fest darfür helt/ er hab einen gnedigen got/ der hat jn auch nit/ wie er glaubt/ so hat er/ darumb so mag niemant wissen das er in gnaden sey/ vnd got im günstig sey/ dann durch den glauben/ glaubt er es so ist er selig/ glaubt er es nit so ist er verdampt/ dann ein solche zuuersicht vnd gut gewissen ist der recht grund guter glaub/ die gottes gnad in vns wircket. Sich hie zu/ dienen dir die schlüssel/ dazu sind die priester vffgesetzt/ wann du entpfindst dyn hertz/ das es wanckelt oder zwyfelt/ du syest nit in gnaden vor gottes augen/ da ist hohe zytt das du zum priester gast/ vnd begerest ein absolution über dyn sünd/ vnd suchst also den gewalt vnd trost der schlüssel/ wann nun der priester schlüßt ein vrteyl/ vnd absoluirt dich/ so ist es also vil gesagt/ dyn sünd synd vergeben/ du hast ein gnedigen gott/ das ist ein tröstliche red/ vnd sind wort gottes/ der sich dahin verbunden hat/ er wil es lassen loß syn im himel/ wann der priester loß gibt.
So sich dann zu das du ye nit zwyfelst/ es sey also vnd soltestu ee vil mal sterben/ ee du soltest zwyfeln an des priesters vrteil/ dann es ist Christus vnd gotts vrteil/ kanstu dz also glauben/ so muß din hertz vor freüden lachen/ vnd der gewalt des priesters liebhaben vnd got loben vnd dancken das er durch menschen also dyn gewissen tröstet.
Kanstu aber nit glauben/ vnd meinst du seyst nit wirdig solchs vergebens/ also hastu nit gnug gethon/ so bitt got vmb den selben glauben/ dann den mustu haben/ oder must ewiglich verterben/ vnd ist ein gewiß zeichen das du zu wenig vnderricht bist im glauben/ vnd zuvil in den wercken/ tusent mal mer lygt daran/ wie du festiglich glaubst dem vrteil des priesters/ dann wie du wirdig syest vnd gnug thust. Ja der selb glaub macht dich wirdig vnd hilfft dir ein recht gnugthuung machen. Also hilfft der gewalt der schlüssel/ nit die priester als priester/ sonder allein die sündliche vnd blöde gewissen/ die do gnad durch den glauben empfahen/ vnd ir hertz zu friden vnd guter zuuersicht gegen got gesetzt wirt/ daruß folgt dann das alles leben vnd lyden lycht wirt/ vnd der mensch mit freüden synem gnedigen got dienen kan/ der sunst vor vnruw syns hertzens nymer kein rechst werck thut/ das heißt dann die süsse bürde vnsers herren Jesu Christi. Amen.
Got sey lob vnd ere.