Sachs, Hans - Die zwen vnd sibentzig namen Christi.

Sachs, Hans - Die zwen vnd sibentzig namen Christi.

O Kayser aller Kayserthum
Durch deinen geist zu hilff mir kum
Das ich dir zu glori vnd rhum
Erzel deyn adel/ wird vnd stamen
Titel vnd empter alle samen
Durch dein zwen vnd sibentzig namen
Darmit die heylig gschrifft dich nent
In alt vnd newem Testament
Wiewol ir sunst on zal mer send
Weyl die gantz gschrifft sunst vberal
Deyns lobs ist vol mit vberschwal
Das es in dem jamerthal
Vnerforschlich vnd vnaußrechlich
Vnbeschreyblich vnd vnaußsprechlich
Menschlich vernunfft ist zu geprechlich
Dein vberschwencklich lob zu gründen
Yedoch sol man täglich verkünden
Dein lob/ das hertz mit an zuzünden
So vil ein yeder mag vnd kan
Des ich mich vnterwunden han
Auff deyn genad zu heben an.

1.

Psal. 2.

Ein Sun Gottes bist du erkorn
Von Got dem Vatter ewig worn
Ein warer Got von Got geporn.

2.

Joan. 1.

Gottes wort bist du ewigklich
Got bschuff all creatur durch dich
Vnd redt noch durch dich tägelich.

3.

Luce. 2

Ein Sun Dauid ist auch dein nam
Von Dauid dem Küngklichen stam
Deyn menschliche natur her kam.

4.

Matth. 5

Ein menschen Son bistu auch zwar
War fleysch vnd blut ein mensch fürwar
Von Maria die dich gepar.

5.

Gene. 17

Abrahams sam man dich außschreyt
In dir all völcker werden weyt
Gesegnet vnd gebenedeyt.

7.

Esaie. 9

Ein kind bist vns geporen klein
Vns vns geporen bist allein
Bist vnd bleibst der Christlichen gmeyn.

7.

Esaie. 9.

Ein Sun vom Vatter bist vns geben
Mit allen gütern gnad vnd leben
Bist vns geschenckt in vns zu schweben.

8.

Esaie. 7.

Emanuel bist auch genant
Weyl du vns Christen bist gesandt
Ist Got mit vns/ der in dir wont.

9.

Luce. 2.

Jesus ein heyland bistu ye
Dein volck du selig maches hie
Vor dir sich biegen alle knie.

10.

Matth. 25.

Christus Messias man dich heyst
Gesalbet vom heyligen Geist
Mit freuden öl, der gnaden feyst.

11.

Esaie. 11.

Ein zweyg Jesse man dich außgeyt
Auff dir wont Gottes geist allzeyt
Der sterck/ rats/ verstands vnd weyßheit.

12.

Nume. 17.

Die rut Aaronis du bist
Vber natur frucht bringen ist
Durch dich frucht bringt ein yeder Christ.

13.

Esaie. 11.

Nazarenus heist du darumb
Das grünend Euangelium
Prachstu menschlichem gschlecht zu frum.

14.

Deut. 18.

Ein Prophet der strafft vnser sünd
Den willen Gottes vns verkündt
Dein wort war als in Got gegründt.

15.

Ioan. 13.

Ein meyster bistu mit deyner leer
Auff das man sich zu Got beker
Dich sol man hörn/ sunst niemand mer.

16.

Mala. 4

Ein sun bist der gerechtigkeyt
Ein ebenbild vns alle zeyt
Der senfftmut/ lieb/ vnd freundtligkeyt.

17.

Nume. 24

Ein stern Jacob bist du klar
Nach dir sich richt die Christlich schar
In wort vnd wercken offenbar.

18.

Ioan. 1.

Ein liecht das all menschen erleucht
Bistu/ zu dir der glaubig fleucht
Die finsternus doch vor dir scheucht.

19.

Ioan. 14.

Das leben bist genennet eben
In dir steet vnser geistlich leben
Sunst wer wir ewing todt ergeben.

20.

Ioan. 14

Die warheyt bist du lauter klar
All deyne wort sind grecht vnd war
All menschen kind sind lügner gar.

21.

Esaie. 9

Ein rat bist vns rietst du auff erden
Wie wir all mügen selig werden
Erlößt auß der sünden geferden.

22.

Esaia. 9.

Ein fridfürst der dein frid brachst an
Das wir inwendig fride han
Den vns die welt nit nemen kan.

23.

Ioan. 14.

Der weg bistu zum vatterland
Zu dem vns füren kan niemand
Dann du alleyn hast jn gebant.

24.

Ioan. 10.

Die thür bist du zum heyl alleyn
Wer anderßwo wil steygen eyn
Der muß ein dieb vnd mörder sein.

25.

Gene. 28.

Ein layter Jacob man dich zeygt
Durch dich man zu dem vatter steygt
Der sich durch dich zu vns her neygt.

26.

2. Reg. 19

Das sayl Michol vergleicht man dir
Durch dich alleyn entrinnen wir
An dir zeucht vns Got Vatter schir.

27.

Matth. 23

Ein gluckhenn/ wir die jungen sein
Da samlest vns die Christlich gmein
Vnter den schutz vnd schirme dein.

28.

1. Petr. 2

Ein Bischoff vnser seel vnd gmüter
Bist/ vns gibstu die geistling güter
Ein trewer auffschawer vnd hüter.

29.

Ioan. 10

Ein guter Hyrt der vns mit bschaid
Gibest dein wort der seele waid
Hütst das vns widerfar keyn layd.

30.

Esaie. 9.

Wunderbar der sein Mayestat
Durch mirackel vnd wunderthat
Gar wunderlich bekrefftigt hat.

31.

Luce. 3

Ein Artzt du hayelst lam vnd blind
Teuffel durch dich außtriben sind
Erweckest auch vil menschen kind.

32.

Luce. 20

Ein Samaritan der vns fund
In dem gewissen tödtlich wund
Der durch sein leer vns haylt vnd pund.

33.

Matth. 15

Ein erquicker bist jederman
Wer hart beschwert dich ruffet an
Hast du gnedig erquicken than.

34.

Esaie. 9

Ein ewig vatter außerkorn
Der du uns geystlich hast geporn
Das wir sind deine kinder worn.

35.

Matth. 9

Ein preutgam bist/ durch dein wort wern
Wir schwanger vnd gut frucht gebern
Vnd sind dein gespons hie auff ern.

36.

Joan. 15

Ein weinstock bistu wol vnd eben
Wir aber sind in dir die Reben
Safft/ sterck/ vnd krafft mustu vns geben.

37.

1. Cor. 10

Ein fels in Horeb der vns trencket
Den waren glauben in vns sencket
Da vns der seelen durst hart krencket.

38.

Joan. 7

Ein lebendiger wasser Prunn
Bistu/ von dem vns auch zurunn
Der heilig Geist in freud vnd wunn.

39.

Joan. 8.

Das himelbrodt bist auch genent
Ein ware speiß in dem ellendt
Im glauben vnd im Sacrament.

40.

Hebre. 2.

Ein Hoherpriester der vor Got
Sich selber opffert in den todt
Der vns auch gab ein new gepot.

41.

Gene. 22

Isaac willig giengst in not
Trugst das Creutz warst gehorsam Got
Bis an das Creutz vnd in den todt.

42.

Nume. 25.

Die Erne schlang bist du genant
Da du am Creutz hiengst außgespant
Warst du der gantzen welt heylandt.

43.

Esaie. 33

Ein Lemlein Gottes trugst verwundt
Die sünd der gantzen welte/ vnd
Hast auch nie auffthon deynen mund.

44.

Esai. 53

Ein knecht der vnser sünd hast tragen
Für vns verwundet vnd geschlagen
Des wurd wir hayl in deinen plagen.

Matth. 28

Der Creutzigt heist/ der für vns starbst
Gantz gleich eim Schächer du verdarbst
Ewigs leben vns erwarbst.

46.

Colos. 2

Ein erlöser bist vns zu gut
Der du am Creutz vergost dein blut
Darinn vnser erlösung rhut.

47.

1. Joan. 2

Ein versöner bist du vns worn
Vor Gottes vaters grimmen zorn
Den er het menschling gschlecht geschworn.

48.

Joan. 12

Ein weytzen koren heist auch eben
In todt hast du dich willig geben
Entpfiengst ein new vnsterblich leben.

49.

Math. 12

Jona heist der im tode lag
Begraben biß an dritten tag
Erstundst du nach der Schriffte sag.

50.

1. Cor. 15

Der erstling so erstundst vom todt
Durch dich wir auch nach letzter not
Werden wider erstehen durch Got.

51.

Esaie. 9

Ein starcker Held der vberwund
Todt/ Sünd/ vnd Teufel er hart pund
Den auch die hell nicht bhalten kund.

52.

2. Reg. 1

Elia der gen himel fur
Erhebt vber all Creatur
Zu der rechten du sitzest pur.

53.

Joan. 10

HERR vnd Got bist du auch genent
Aller gwalt stehet in deiner hendt.
In himel erdt ewig on endt.

54.

Psal. 117

Ein stein bist/ der verworffen war
Vnd bist doch worden wunderbar
Ein grundfest der Christlichen schar.

55.

Ephe. 4

Ein haupt so bist du auch allein
Der gantzen Christlichen gemein
Wir alle deine glider sein.

56.

Roma. 3

Ein Gnadenthron bist du darmit
Zu Gott hab wir sichern zu tritt
Das er vns kan versagen nit.

57.

1. Joan. 2

Ein Fürsprecher bist du bey Got
Wo wir sünding an seim gepot
Das vns nicht würg der ewig todt.

58.

1. Timo. 2

Ein Mitler bist du auch allein
Zwischen Gott vnd Christlicher gmein
On dich wer vnser hoffnung klein.

59.

Hebre. 7

Ein vertretter/ der vns vertritt
Den vater teglich für vns bitt
Das er vns wöll verdammen nit.

60.

Joan. 17

Vnser heiligung du auch heist
Du heiligest vns allermeist
Durch vnd durch mit deim heiling Geist.

61.

1. Corin. 1

Vnser weißheit bist du fürwar
Dein wort zeigt Gottes willen klar
Der Welt weyßheit ist thorheit gar.

62.

Joan. 2

Ein Tempel Gottes bist allzeit
In dir wont völlig die Gotheit
Vnd gnad mit vberflüssigkeit.

63.

Math. 13

Ein schatz aller genad vnd gaben
Von dem wir all genommen haben
In deim wort muß wir dich außgraben.

64.

Esaie 2

Ein stein in Sion bist du Herr
Wer auff dich ist vertrawen sehr
Der wirdt zu schanden nimmer mer.

65.

Gene. 6

Arch Noe heist/ darinn wir schweben
In disem geprechlichen leben
Mit verfolgung ring weiß vmbgeben.

66.

Miche. 3

Hertzog des heils heist/ der vns fürt
Durch leyden creutz wie sich gepürt
Der all gfar hat vor außgespürt.

67.

Acto. 9

Ein stachel heyst daran sich stechen
Dein feinde die dir widersprechen
Den kanst jr stoltz vnd höchmut prechen.

68.

1. Sam. 17

Das schwerdt Goliat heist du wol
Das all sein feind vmbbringen sol
Der doch die gantze welt ist vol.

69.

Apoca. 5

Ein Löw Juda heist du der kriegt
All seinen feinden obgesiegt
Geistlich vnd leiblich obeligt.

70.

Acto. 10

Ein Richter dem das gricht ist eben
Von Got dem Vatter vbergeben
Vber die todten vnd die leben.

71.

Matt. 28

Vnser bruder mit dem wir gleich
Miterben sind des Vatters reich
Nach dem ellend dort ewigklein.

72.

Psal. 2

Ein Künig bist/ deyn Regiment
Gab dir der Vatter in deyn hendt
Das ymmer ewig hat keyn endt/
Durch dise dein heylige namen
Bit wir verleych vns allen samen
Mit dir ewig zu leben Amen.

Gedruckt zu Nürnberg
durch Georg
Wachter

Cookies helfen bei der Bereitstellung von Inhalten. Diese Website verwendet Cookies. Mit der Nutzung der Website erklären Sie sich damit einverstanden, dass Cookies auf Ihrem Computer gespeichert werden. Außerdem bestätigen Sie, dass Sie unsere Datenschutzerklärung gelesen und verstanden haben. Wenn Sie nicht einverstanden sind, verlassen Sie die Website.Weitere Information
autoren/s/sachs/72_namen.txt · Zuletzt geändert: von 127.0.0.1
Public Domain Falls nicht anders bezeichnet, ist der Inhalt dieses Wikis unter der folgenden Lizenz veröffentlicht: Public Domain