Lieben frewnd/ Christus vnser lieber herr/ auff das alle glaubigen zu bitten geraytzt wurden/ hat er gar ein tröstliche versicherung dem gepet angehenckt/ sprechend/ Suchet/ so werd jhr finden/ Klopffet an/ so wirt euch auffgethan/ Vnd wo zwen oder drey versamlet sind in meinem namen/ was sie bitten meinen hymlischen vater in meinem namen/ das sol jnen widerfaren von meinem vater im hymel. Dieweyl wir dann ein solche genedige vnd warhafftige zusagung Christi haben/ vnd seiner vnterweysung vnd befelh nach (wie das vater vnser anßweyst) schuldig sind für ein ander zu bitten. Darzu auch durch den heyligen S. Pauls zu solcher fürbit hoch vermanet werden/ vnd mancherley anligender not vnd vrsach vorhanden sind/ die vns billich zu bitten bewegen/ So verman ich euch jhr geliebten Christen vnsers herren/ haltent an am gepet on vnterloß/ Vnd sonderlich die weil wir yetzund versamlet sind in dem namen des herrn. So last vns zum ersten hertzlich bitten für die gemeyn Christlichen kirchen/ für die kirchen diener/ für die verkünder des worts Gottes/ das sie vnser Got wöl beschützen wider alle anlauff vnd versuchung des bösen feyndts/ damit sie auff dem starcken felsen/ vnsern herrn Christo Jesu bestendigklich beleyben.

Bittend mit mir also.

Almechtiger gütiger Gott/ vnd vatter vnsers herren Jesu Christi/ der du vns ernstlich befolhen hast/ das wir dich bitten sollen/ für arbaytter in die erndte/ das ist/ für rayne prediger deynes worts. Wir bitten dein grundlose barmhertzigkeit/ du wöllest vns rechtgeschaffen lerer vnd diener deines götlichen worts zu schicken/ vnd den selben dein haylsames wort in den mund geben/ vnd in das hertze/ das sie deynen beuelch getrewlich außrichten/ vnd nichts predigen das seinem heyligen wort entgegen sey/ auff das wir durch dein hymelisch ewigs wort/ ermanet/ gelert/ gespeyßt/ vnd getröst werden. Thun was dir gefellig/ vnd vns fruchtbarlich ist/ Gib herr deyner gemayn deynen geyst/ vnd götliche weyßheit/ das deyn wort vnter vns lauffe vnd wachse/ das sie die diener/ deyn wort mit aller fraydigkeyt/ wie sichs gepürt/ reden/ vnd deyn heylige Christliche gemayn/ gebessert werde/ vnd mit bestendigem glauben dir diene/ vnd in bekandtnus deynes namens bestande/ durch Jesum Christum vnsern herren/ Amen.

Laßt vns trewlich bitten aus dem befelch vnsers herren Jesu Christi vnd seiner Apostel/ für alle weltliche Obrickeit/ auff das wir ein ruwiges/ stils leben furen mügen/ in aller gotseligkeyt vnd erbarckeyt/ dann solchs ist gut/ darzu auch angenem vor Got vnserm herrn/ welcher wil/ das alle menschen genesen/ vnd zur erkantnus der warheit kumen.

Bittend mit mir also.

Barmhertziger hymlischer vater/ in welches hande aller menschen gewalt vnd öbrigkeit bestehet/ von dir gesetzt zur straff der vbeltheter/ vnd wolfart der bider leute/ In welches hand auch steen alle recht/ vnd gesatz aller reych/ Wir bitten dich/ sihe genedigklich auff vnseirn gnedigsten herrn den Kayser/ vnd alle Fürsten vnd Herren/ fürnemlich auff unsern gnedigen herren Marggrafen Georgen/ auff die gantzen herschafft zu Brandenburg/ auff alle ordenlich öbrigkeit/ damit sie dz weltlich schwert jhnen von dir befolhen/ im glauben vnd forcht Gottes/ nach deinem befelch/ füren mügen/ Vmbschatte sie mit der krafft des allerhöchsten/ erleuchte vnd erhalt sie bey deynem götlichen namen. Gib jhnen lieber herr weyßheit vnd verstand vnd ein fridlich regiment/ auff das sie alle jhre vnterthanen in der warheit vnd gerechtigkeit/ die dir herr gefellig ist/ regieren vnd beschiermen/ Er lenger jhnen/ o Got vnsers hayls/ jhre tag/ auff das dein götlicher nam durch sie geheyligt vnd gepreyßt werde/ von nun an biß in ewigkeit. Darzu helff jn Got vnser vater durch Jesum Christum vnsern herren/ Amen.

Last vns auch gar ernstlich bitten/ vmb einen gemeynen landtsfridt/ auff das der rechte go0ttes dienst vnter vns auffwachse/ vnd Christliche zucht zuneme/ dann wo krieg vnd vneynigkeit ist do geet der rechte gottes dienst zu grunde/ vnd fleußt ein vnglück aus dem andern.

Also bittend.

Almechtiger ewiger Got/ ein könig der ehren/ vnd ein herr hymels vnd der erden/ durch welches geyst alle ding regiert/ durch welches versehung alle ding geordnet werden/ der du bist eyn Gott des frids/ von dem allein alle eynickeit zu vns kumpt/ Wir bitten dich durch vnsern herrn Jhesum Christum/ du wöllest vns vnsere sünd vergeben/ vnd mit deynem götlichen frid vnd eynigkeit begnaden/ damit wir in forcht vnd zittern dir dienen zu lob vnd preyß deynes namens/ Amen.

Laßt vns auch bitten für vnsere sünde vnd vbertrettung/ damit wir Got belaydigt haben/ das er nicht wöl acht haben auff vnsere missethat/ vnd nit mit vns in das gericht tretten/ sonder gedenck seiner barmhertzigkeit/ vnd der verheyssung/ do er spricht/ Ich hab keynen lust ob des gottlosen todt/ sonder das ist mein lust/ das er sich von seinem wesen kere/ vnd lebe.

Also bittend mit mir.

Barmhertziger Gott vnd hymlischer vater/ des barmhertzigkeit keyn ende ist/ der du langmütig/ genedig/ vnd von grosser genad vnd trew bist/ vnd vergibst missethat/ vbertrettung/ vnd sünd. Wir haben layder gesündigt mit vnsern vettern/ wir haben miißhandelt/ vnd sind gottloß gewesen/ vnd dich offt erzürnet/ dir allain haben wir gesündigt/ vnd vbel vor dir gethan/ Aber herr gedenck nicht an vnsere vorige missethat/ laß bald dein barmhertzigkeit vber vns grösser sein/ dann wir sind fast ellend worden/ hilff vns Gott vnsers hayls/ vmb deines namens ehre willen/ Errette vns/ vnd vergib vns vnser sünd vmb deynes namens willen/ vnd von wegen deynes lieben sons Jesu Christi vnsers haylandts/ Amen.

Lassend vns auch bitten für die frücht der erden/ das sie Got wölle gesegnen vnd behütten/ vnd vns wol geraten lassen/ vnd götlich geniessen.

Bittend also.

O Herre almechtiger vater/ der du durch dein ewigs/ göttlichs wort alle ding erschaffen hast/ gesegnest vnd erhelst. Wir bitten dich/ das du dein wort vmsern herrn Jesum Christum vns wollest offenbaren/ vnd in vnser hertz pflantzen/ dardurch an vns gesegnet werd/ mit fruchtbarer wachsung/ vnd göttlichem gebrauch vnd gedeyen/ vnser ecker vnser schewer/ vnd alles was zur leyblichen notdürfft dienet/ durch Christum vnsern herrn/ Amen.

Lasset vns auch bitten für vnsere feyndt/ das Got sie füre in jhr eygne erkantnus/ vnd von jhrem vnrecht abfüre.

Also bittend mit mir.

Almechtiger e2wiger got/ der du vns befolhen hast durch deinen lieben son/ vnsern herrn Jesum Christum/ das wir vnsere feyndt lieb haben sollen/ denen/ so vns belaydigen/ guts thun/ vnd für vnsere verfolger bitten/ Wir schreyen ernstlich zu dir/ das du alle vnsere feind wöllest gnedigklich haymsuchen/ ware rew jhrer sünd verleyhen/ vnd ihnen mit vns vnd der gantzen Christenheit/ eyn freundtlichs/ gotforchtigs/ eynhelligs gemüt vnd hertz geben/ durch vnsern herrn Jesum Christum/ Amen.

Darneben/ weyl es yetzund die not hoch erfordert/ so lasset vns auch getrewlich bitten/ für alle bekümerte hertzen vnd verwirte gewissen/ vnd für die so mit falscher irriger lere behafft sein/ auch für die/ so dem wort Gottes entgegen sind/ vnd mit rath vnd that verfolgen/ das sich Got jr erbarm/ vnd bringe zu warer erkantnus der sünde vnd seiner göttlichen gnad/ Amen.

Laß vns also bitten.

Barmhertziger/ gütiger Gott vnd vater/ wir bitten dich ernstlich vnd mit gantzem hertzen/ du wöllest alle die jhenigen/ so von Christlichem glauben abgewichen/ oder usnst mit etlichen stucken irrendt/ vnd mit falscher schedlicher lere behafft oder vergifft sind/ veterlich haymsuchen/ vnd wider bringen zu erkantnus jhres irrthumbs/ das sie ein lust vnd gefallen gewynnen ab deyner bestendigen/ eynfeltigen/ ewigen warhayt/ vmb Jesus Christus leyden vnd sterben willen/ Amen.

Lassend vns auch bitten Got vnsern herren/ das er die welt vom irrthumb erlösen wöl/ vnd auch von kranckheyten/ theuerungen/ gefencknussen/ sterben/ vnd aller widerwertigkeit/ die durch den bösen geyst vnd schedlichen feynd/ zu verderbnus seel vnd leyb/ vns werden zugefügt.

Also bittend.

Almechtiger ewiger Got/ ein trost der trawrigen/ ein sterck der schwachen laß für deyn angesicht durch vnsern herren Jesum Christum kumen/ die bit aller deren/ so in bekümmernus vnd anfechtung zu dir seufftzen vnd schreyen/ das menigklich mercke vnd empfind/ deyn hilff vnd beystand in der zeyt der not/ Amen.

Lassend vns bitten Got vnsern herren für alle schwangere frawen/ das er jhnen wol geben sterck vnd hayl/ domit sie gnedigklich von kindsbanden erlöset werden.

Also bittend.

Almechtiger ewiger Got vater/ ein schöpfer aller ding/ der du genedigklich gesegnet hast man vnd weyb/ vnd gesagt/ Seyd fruchtbar vnd mehret euch/ auch hastu dem weyb in kummer zu geperen zu eynem heyligen creutze gemacht/ durch deynen son vnsern herren/ der vns von dem fluch vnnd sünden erlöset hat. Wir bitten dich gütiger vater/ herre vnd Got/ wöllest die frucht ihres leybs/ dein aygen werck erhalten vnd bewaren/ vnd vndter dem creutz in der bekümmerlichen gepurt nicht verderben lassen/ sonder gnedigklich vnd mit frid entpinden/ durch Christum Jesum vnsern herren/ Amen.

menschen es sey öbrigkeit/ prediger oder andere/ auch verfolger des Euangelij betreffend etc.

Also Bettend.

Almechtiger ewiger Gott/ der du wilt/ das alle menschen genesen vnd zu erkantnus deiner götlichen warheit kumen/ Wir bitten dein göttliche maiestet/ durch Jesum Christ dein eynigen son vnsern herrn vnd hayland/ du wöllest dein göttlige genad/ geyst/ vnd hilff mittaylen aller ordenlicher öbrigkeyt/ das sie fridlich vnd wol regieren allen Christenlichen dienern deines heyligen worts/ das sie recht vnd fruchtbarlich leren/ vnd wöllest durch deinen almechtigen gewalt vnd vnerforschliche weißheyt/ widerstand thun allen denen/ die dein heilig wort hassen/ vnd mit falscher leer vnd vnordenlichen gewalt verfolgen/ sie erleuchten/ vnd zu erkandtnus deiner herligkeit füren/ auff das wir alle in eym stillen/ geruwigen/ vnstreflichem leben/ die reychtumb deiner götlichen genad/ durch ein raynen gelauben erlernen/ vnd dir eynigem waren Got vnd herrn aller herrn/ mit volkumen hertzen/ in heyligkeit vnd gerechtigkeit/ die dir gefellig ist/ mögen dienen/ durch vnsern herrn Jesum Christ deinen son/ der mit dir in eynigkeit des heyligen geysts lebt vnd herscht/ ein eyniger warer Got ymmer vnd ewigklich Amen.

Almechtige Got/ der du bist ein beschützer aller die auff dich hoffen/ on welches genad niemandt nichts vermag/ noch etwas vor dir gilt/ laß deyn barmhertzigkeit vns reychlich widerfaren/ auff das wir durch dein heyliges eingeben/ gedencken was recht vnd gut ist/ vnd durch deyn krafft auch dasselbige volbringen/ vmb Jesus Christus vnsers herrn willen/ der mit dir herschet vnd lebt in ewigkeit/ Amen.

Catechismus, Das ist Vnterricht zum Christlichen Glauben wie man die jugent leren vnd ziehen sol, in frag weyß vnd antwort gestelt. Item, Etliche Christliche Collecten oder gebet für gemeynes anligen der Christenheyt. Nuremberg 1528.